Se taħtaf l-opportunità?
It-Tifkira li ġejja tagħtina opportunità biex nuru l-gratitudni
1. Liema opportunità speċjali tagħtina t-Tifkira?
1 It-Tifkira fl-14 t’April tagħtina opportunità unika biex inkabbru u nuru l-gratitudni tagħna għat-tjubija taʼ Ġeħova. Ir-rakkont f’Luqa 17:11-18 jurina kif Ġeħova u Ġesù jħarsu lejn il-gratitudni. B’sogħba, wieħed biss mill-għaxar imġiddmin ħataf l-opportunità biex jesprimi l-gratitudni tiegħu. Fil-futur, l-għotja tal-fidwa se tfejjaq għalkollox il-mard kollu, u tagħmel il-ħajja taʼ dejjem realtà! Bla dubju, f’dak iż-żmien se nirringrazzjaw lil Ġeħova għal dawn il-barkiet. Imma kif nistgħu nuru l-gratitudni fil-ġimgħat li ġejjin?
2. Kif nistgħu nkabbru l-gratitudni tagħna għall-fidwa?
2 Kabbar il-gratitudni: Il-ħsibijiet iqanqlu sentimenti taʼ gratitudni. L-iskeda għall-qari tal-Bibbja speċjali li jkollna għat-Tifkira se tgħinna nibnu l-apprezzament tagħna għall-fidwa. Nistgħu nsibu kopja tagħha f’diversi postijiet, bħal pereżempju fil-kalendarju tagħna u fil-ktejjeb Neżaminaw l-Iskrittura Kuljum. Għala ma tagħmilx dan bħala familja? Jekk nagħmlu dan, l-apprezzament tagħna għall-fidwa se jikber. U dan imbagħad se jeffettwa b’mod pożittiv il-kondotta tagħna.—2 Kor. 5:14, 15; 1 Ġw. 4:11.
3. B’liema modi nistgħu nuru li aħna grati matul iż-żmien tat-Tifkira?
3 Uri l-gratitudni: Il-gratitudni tidher bl-azzjonijiet. (Kol. 3:15) Ir-raġel imġiddem kien grat, u allura għamel sforz biex isib lil Ġesù u jirringrazzjah. Bla dubju, hu tkellem ukoll b’entużjażmu dwar il-fejqan mirakoluż tiegħu maʼ ħaddieħor. (Lq. 6:45) Se tqanqalna l-gratitudni għall-fidwa biex b’żelu nieħdu sehem fil-kampanja tat-Tifkira? Mod ieħor kif nuru li aħna grati hu billi naqdu bħala pijunieri awżiljarji jew billi nżidu s-sehem tagħna fil-ministeru matul iż-żmien tat-Tifkira. Fil-lejla tat-Tifkira, qalb mimlija apprezzament se tqanqalna nagħtu merħba lill-viżitaturi u nwiġbulhom il-mistoqsijiet.
4. X’għandna nagħmlu biex ma jkollniex dispjaċiri wara li tgħaddi din it-Tifkira?
4 Tgħid din it-Tifkira se tkun l-aħħar waħda li niċċelebraw? (1 Kor. 11:26) Ma nafux. Imma dak li nafu hu li ladarba tgħaddi, se tkun għaddiet opportunità unika biex nuru l-gratitudni. Se taħtafha int din l-opportunità? Jalla l-kliem t’apprezzament taʼ fommna u l-meditazzjoni taʼ qalbna jkunu pjaċevoli għal Ġeħova, Dak li bil-ġenerożità taʼ qalbu pprovda l-fidwa.—Salm 19:14.