Iddeterminati li Nsegwu l-​Mod taʼ Ħajja t’Alla

Il-​Konvenzjonijiet “Il-​Mod taʼ Ħajja t’Alla” kellhom wisq x’joffru lil dawk li jridu jaqdu ’l Alla! Delegata waħda ddeskriviet il-​konvenzjoni bħala “perijodu taʼ l-​għaġeb taʼ istruzzjoni, inkuraġġiment, u tidwil.”

DELEGAT ieħor qal li “kien hemm wisq xi tgawdi, x’tirrifletti fuqu, u x’tassorbi.” Ejjew issa nikkunsidraw il-​programm innifsu.

Ġesù Kristu​—It-​Triq, il-​Verità u l-​Ħajja

Din kienet it-​tema taʼ l-​ewwel jum tal-​konvenzjoni. (Ġwann 14:6) L-​ewwel taħdita spjegat l-​iskop li għalih inġbarna flimkien għall-​konvenzjoni: biex nitgħallmu iżjed dwar l-​aqwa mod taʼ ħajja possibbli, il-​mod taʼ ħajja t’Alla. Jehovah jgħallem lill-​poplu tiegħu kif jimxi fi triqatu. Dan jagħmlu permezz tal-​Bibbja, “l-​irsir leali u diskret,” u l-​ispirtu qaddis. (Mattew 24:45-47, New World Translation; Luqa 4:1; 2 Timotju 3:16) Xi privileġġ hu li s-​Sovran taʼ l-​Univers jistruwina!

Fi qbil mat-​tema tal-​jum, l-​indirizz tal-​qofol kien “Ir-​Rahan taʼ Kristu​—it-​Triq t’Alla għas-​Salvazzjoni.” Huwa vitali li nirrikonoxxu l-​irwol li għandu Ġesù Kristu fl-​iskop taʼ Jehovah, biex nikkonformaw mal-​mod taʼ ħajja t’Alla. Il-​kelliemi qal: “Mingħajr is-​sagrifiċċju li Ġesù Kristu ħallas bħala prezz tal-​fidwa, ebda bniedem, huma x’inhuma t-​twemmin jew ix-​xogħlijiet tiegħu, ma jistaʼ jirċievi l-​ħajja taʼ dejjem mingħand Alla.” Imbagħad ikkwota Ġwann 3:16, li jgħid: “Alla hekk ħabb lid-​dinja li ta lil Ibnu l-​waħdieni, biex kull min jemmen fih ma jintilifx, iżda jkollu l-​ħajja taʼ dejjem.” Jeħtieġ li naslu għal għarfien eżatt tal-​verità biex inkunu qed neżerċitaw fidi fis-​sagrifiċċju li Kristu ħallas bħala prezz tal-​fidwa. Jinvolvi wkoll li niddedikaw ħajjitna lil Jehovah, li nissimbolizzaw dan bil-​magħmudija taʼ l-​ilma, u li ngħixu fi qbil maʼ l-​eżempju li pprovdielna Ġesù Kristu.—1 Pietru 2:21.

Is-sessjoni taʼ wara nofsinhar bdiet bit-​taħdita intitolata “It-​Triq taʼ l-​Imħabba Qatt Ma Tfalli.” Din inkludiet diskussjoni vers b’vers tad-​deskrizzjoni li tqanqal taʼ Pawlu dwar l-​imħabba, iddokumentata fl-1 Korintin 13:4-8. L-​udjenza ġiet imfakkra li mħabba li tissagrifika lilha nfisha hija fattur li jidentifika l-​Kristjanità u li mħabba għal Alla u għall-​proxxmu huma fatturi essenzjali taʼ qima approvata minn Jehovah.

Imbagħad kien hemm is-​simposju maqsum fi tliet partijiet li kien intitolat “Ġenituri​—Naqqxu f’Qalb Uliedkom it-​Triq t’Alla.” Il-​ġenituri jistgħu jgħinu lil uliedhom jaqdu lil Alla billi jagħtu eżempju tajjeb fil-​qari u fl-​istudju tal-​Kelma tiegħu. Jistgħu jnaqqxu l-​verità f’uliedhom permezz taʼ studju regulari tal-​familja, billi jfassluh biex jilħaq il-​ħtiġijiet tal-​familja. Huwa importanti wkoll li jgħinu lit-​tfal jinvolvu ruħhom f’attivitajiet kongregazzjonali u fil-​ministeru taʼ l-​għalqa. Għalkemm it-​trobbija taʼ tfal li jibżgħu minn Alla f’din id-​dinja mill-​agħar hija sfida, jekk dan isir se jġib premjijiet kbar.

Wara s-​simposju kien hemm it-​taħdita “Ħalli lil Jehovah Jsawrek għal Użu Onorabbli.” Bħalma fuħħari jsawwar reċipjent tal-​fuħħar, hekk ukoll Alla jsawwar lil dawk li jixtiequ jaqduh. (Rumani 9:20, 21) Dan jagħmlu billi jipprovdi pariri fil-​Kelma tiegħu u permezz taʼ l-​organizzazzjoni tiegħu. Jehovah se jgħinna nużaw l-​abbiltajiet tagħna sa l-​iktar estent possibbli jekk nagħmlu lilna nfusna disponibbli, inwieġbu għal opportunitajiet, u nkunu lesti li nħalluh jidderieġi l-​passi tagħna.

Imbagħad segwa porzjon eċċitanti tal-​programm​—“Is-​Servizz fl-​Għalqa Missjunarja.” Hemm 2,390 individwu li huma kkunsidrati li għandhom l-​istatus taʼ missjunarju u li bħalissa qegħdin jaqdu madwar l-​art kollha f’148 pajjiż. Huma jagħtu eżempju mill-​aħjar taʼ lealtà u żelu u huma grati ferm għall-​privileġġ li għandhom li jaqdu fl-​għalqa barranija. Matul din il-​parti tal-​programm tal-​konvenzjonijiet internazzjonali, il-​missjunarji tkellmu dwar l-​isfidi u l-​ferħ tal-​ħajja missjunarja.

L-aħħar taħdita taʼ l-​ewwel jum kienet intitolata “Hemm Ħajja wara l-​Mewt?” Din il-​mistoqsija ħawdet lill-​umanità għal millennji sħaħ. Nies f’kull soċjetà rriflettew fuq is-​suġġett. U m’aħniex neqsin minn l-​hekk imsejħin tweġibiet. Dawn ivarjaw daqs kemm huma varji l-​użanzi u r-​reliġjonijiet taʼ dawk li jippreżentawhom. Madankollu, in-​nies għandhom bżonn jitgħallmu l-​verità.

Fi qbil maʼ dan, il-​kelliemi ħabbar il-​ħruġ tal-​browxer kollu kuluri, li fih 32 paġna, X’Jiġrilna meta Mmutu? Dan il-​browxer jispjega l-​oriġini tat-​tagħlim taʼ l-​immortalità tar-​ruħ u juri kif il-​konċett sar ċentrali għal kważi r-​reliġjonijiet kollha tad-​dinja llum. B’mod ċar u li jappella, dan jeżamina x’tgħid il-​Bibbja dwar ir-​ruħ, għala mmutu, u x’jiġrilna mal-​mewt. Il-​browxer jispjega wkoll liema tama hemm għall-​mejtin u għall-​ħajjin. X’barka se tkun din il-​pubblikazzjoni għal dawk minn kullimkien li qed ifittxu l-​verità!

Qisu Sewwa kif Iġġibu Ruħkom

Kemm kienet addattata din it-​tema għat-​tieni jum tal-​konvenzjoni! (Efesin 5:15) Il-​programm taʼ fil-​għodu ffoka fuq ix-​xogħol taʼ l-​ippridkar u taʼ li nagħmlu dixxipli. Wara diskussjoni taʼ l-​iskrittura tal-​ġurnata, il-​programm kompla bit-​taħdita “Ngħinu lin-​Nies Jaqbdu t-​Triq għall-​Ħajja.” Huwa importanti li jkollna attitudni pożittiva biex inwettqu dan ix-​xogħol urġenti, billi nirrikonoxxu li għandna kemm il-​privileġġ u kemm id-​dmir li naqsmu l-​verità m’oħrajn. Fl-​ewwel seklu E.K, il-​maġġuranza tan-​nies irrifjutaw il-​Kelma t’Alla. Madankollu, minkejja l-​oppożizzjoni, kien hemm xi wħud ‘li kienu disposti sewwa għall-​ħajja taʼ dejjem u saru jemmnu.’ (Atti 13:48, 50, NW; Atti 14:1-5) Is-​sitwazzjoni hija simili llum. Għalkemm ħafna jirrifjutaw il-​verità tal-​Bibbja, aħna nkomplu nfittxu lil dawk li se jwieġbu favorevolment.—Mattew 10:11-13.

It-taħdita taʼ wara ddiskutiet l-​isfida biex nilħqu lil ħaddieħor bil-​messaġġ tal-​ħajja. Minħabba li qed tiżdied id-​diffikultà biex insibu lin-​nies id-​dar, jinħtieġ li nagħmlu dan bir-​reqqa u b’kull mezz possibbli jekk irridu nilħqu kemm jistaʼ jkun nies bil-​messaġġ tas-​Saltna. F’ħafna pajjiżi, il-​pubblikaturi taʼ l-​aħbar tajba jiksbu riżultati mill-​aħjar permezz taʼ l-​għoti taʼ xiehda bit-​telefon u billi jippridkaw f’territorju tan-​negozju, u b’hekk jilħqu lil dawk li kieku jkun diffiċli li tikkuntattjahom.

It-taħdita intitolata “Ngħallmu lid-​Dixxipli dak Kollu li Ordna Kristu” ffokat fuq l-​importanza li nsiru tas-​sengħa fil-​ministeru tagħna. L-​abbiltà tagħna biex ngħallmu titjieb hekk kif nitgħallmu minn oħrajn u napplikaw it-​taħriġ eċċellenti li nirċievu fil-​laqgħat tal-​kongregazzjoni. Hekk kif insiru tas-​sengħa fit-​tagħlim tagħna, se nsibu iktar ferħ u sodisfazzjon fix-​xogħol li għandna biex ngħinu lin-​nies jitgħallmu l-​verità tal-​Bibbja.

Is-​sessjoni taʼ fil-​għodu spiċċat b’taħdita dwar is-​sinjifikat tad-​dedikazzjoni u l-​magħmudija. Wieħed mill-​punti li għamel il-​kelliemi kien li jekk nafdaw f’Alla kompletament u nfittxu bil-​ħerqa li nagħmlu r-​rieda tiegħu, hu se jberikna u jsostnina. Ir-​raġel l-​għaref kiteb: “Fih [f’Alla] aħseb f’kull ma tagħmel, u hu jwittilek triqatek.” (Proverbji 3:6) Il-​magħmudija kollha ferħ, hi nfisha kienet waħda mill-​affarijiet prinċipali tal-​konvenzjoni li wriet li ħafna kienu bdew jikkonformaw ruħhom mal-​mod taʼ ħajja t’Alla.

Wara waqfa għall-​ikel, is-​sessjoni taʼ wara nofsinhar bdiet bit-​taħdita “Naqdu bil-​Ħajja bla Tmiem Quddiem Għajnejna.” L-​iskop t’Alla li jkollu bnedmin ubbidjenti jaqduh għal dejjem fuq l-​art se jitwettaq. Kemm huwa xieraq, allura, li niffokaw il-​ħsibijiet, il-​pjanijiet, u t-​tamiet tagħna fuq li naqdu lil Jehovah bl-​eternità quddiem għajnejna! Waqt li rridu nżommu “l-​Jum taʼ Alla” sewwa f’moħħna, huwa vitali li niftakru li l-​għan tagħna huwa li naqdu għall-​eternità. (2 Pietru 3:12) Il-​fatt li ma nafux iż-​żmien eżatt meta Ġesù se jesegwixxi l-​vendetta t’Alla jżommna viġilanti u jagħtina opportunità kuljum biex nagħtu prova li naqdu lil Jehovah b’motivi mhux egoistiċi.

Iż-żewġ taħditiet taʼ wara eżaminaw ir-​4 kapitlu taʼ l-​ittra taʼ Pawlu lill-​Efesin. Fost l-​affarijiet li kkunsidrajna kien hemm il-​barka li għandna taʼ ‘doni fi bnedmin,’ irġiel ikkwalifikati spiritwalment maħturin bl-​ispirtu qaddis. Dawn l-​anzjani jipprovdu pariri u direzzjoni għall-​benefiċċju spiritwali tagħna. L-​ittra ispirata taʼ Pawlu tħeġġeġ ukoll lill-​Kristjani biex jilbsu “l-​bniedem il-​ġdid.” (Efesin 4:8, 24) Personalità li ġejja minn Alla tinkludi kwalitajiet bħalma huma l-​ħniena, it-​tjieba, l-​umiltà, il-​ħlewwa, is-​sabar, u l-​imħabba.—Kolossin 3:12-14.

Biex inqisu sewwa kif inġibu ruħna rridu nżommu lilna nfusna bla tebgħa mid-​dinja​—is-​suġġett tat-​taħdita li kien imiss. Jinħtieġ il-​bilanċ biex nagħżlu divertiment, attivitajiet soċjali, u miri materjalistiċi. Billi napplikaw il-​parir f’Ġakbu 1:27 biex nibqgħu bla tebgħa mid-​dinja, aħna ngawdu waqfa nadifa quddiem Alla u kuxjenza nadifa. Nistgħu ngħixu wkoll ħajjiet bi skop u se nitbierku bil-​paċi, bi prosperità spiritwali, u b’imseħbin meraviljużi.

Imbagħad kellna simposju fi tliet partijiet intitolat “Żgħażagħ​—Segwu t-​Triq t’Alla.” Billi jafu li Alla jħobbhom u japprezza l-​isforzi tagħhom biex jappoġġaw il-​qima pura, iż-​żgħażagħ għandhom iħarrġu l-​fakultajiet perċettivi tagħhom biex jaqduh fedelment. Mod wieħed kif niżviluppaw il-​fakultajiet perċettivi huwa billi naqraw il-​Kelma t’Alla kuljum u nimmeditaw fuqha. Jekk nagħmlu hekk, nistgħu nsiru nafu t-​triqat taʼ Jehovah. (Salm 119:9-11) Il-​fakultajiet perċettivi niżviluppawhom ukoll billi naċċettaw pariri maturi mingħand il-​ġenituri, l-​anzjani, u l-​pubblikazzjonijiet tas-​Soċjetà. Permezz taʼ l-​użu tal-​fakultajiet perċettivi tagħhom bil-​mod it-​tajjeb, iż-​żgħażagħ jirreżistu l-​preokkupazzjoni b’affarijiet materjali, diskors maħmuġ, u eċċessi fir-​rikreazzjoni li jikkaratterizzaw lil din id-​dinja mbiegħda minn Alla. Billi jsegwu l-​mod taʼ ħajja t’Alla, kemm iż-​żgħażagħ u kemm ix-​xjuħ jistgħu jgawdu suċċess veru.

L-aħħar taħdita tal-​jum kienet “Il-​Ħallieq​—Il-​Personalità Tiegħu u Triqatu.” Wara li ġibdilna l-​attenzjoni lejn il-​fatt li hemm miljuni taʼ nies li ma jafux lill-​Ħallieq, il-​kelliemi qal: “Sinjifikat veru fil-​ħajja hu marbut maʼ li wieħed ikun jaf lill-​Ħallieq, Alla persunali tagħna; li wieħed jirrikonoxxi l-​personalità tiegħu; u li wieħed jikkoopera maʼ triqatu. . . . Hemm fatti dwar id-​dinja tagħna u dwarna li tistaʼ tużahom biex tgħin lin-​nies jaċċettaw lill-​Ħallieq u jsibu sinjifikat f’konnessjoni miegħu.” Il-​kelliemi mbagħad iddiskuta l-​evidenza li tipponta lejn l-​eżistenza taʼ Ħallieq għaref kollu mħabba. Il-​quċċata tat-​taħdita kien il-​ħruġ taʼ ktieb ġdid​—Is There a Creator Who Cares About You? (Hemm Ħallieq li Jimpurtah Minnek?)

“Din Hi t-​Triq; Għaddi Minnha”

Din kienet it-​tema tat-​tielet jum tal-​konvenzjoni. (Isaija 30:21) Il-​programm beda b’simposju eċċitanti taʼ tliet taħditiet, li ffokaw fuq il-​viżjoni taʼ Eżekjel dwar it-​tempju. Din il-​viżjoni għandha sinjifikat kbir għall-​poplu t’Alla llum, peress li għandha x’taqsam mal-​qima pura fi żmienna. Ħjiel biex nifhmu l-​viżjoni huwa dan: It-​tempju spiritwali kbir taʼ Jehovah jirrappreżenta l-​arranġament tiegħu għall-​qima pura. Waqt li l-​fatturi tal-​viżjoni ġew diskussi, is-​semmiegħa rriflettew dwar l-​attività tagħhom biex jappoġġaw ix-​xogħol li jsir mill-​indokraturi kollhom imħabba tal-​fdal midluk u mill-​membri prospettivi tal-​klassi tal-​prinċep.

Iktar tard fil-​għodu, kien hemm drama Biblika ħajja b’kast taʼ parteċipanti lebsin il-​kostum. Id-​drama kienet intitolata “Familji​—Agħmlu l-​Qari tal-​Bibbja Kuljum il-​Mod taʼ Ħajja Tagħkom!” Din tat stampa tal-​fidi u l-​kuraġġ tat-​tliet Ebrej li rrifjutaw li jinżlu jmilu quddiem l-​istatwa tad-​deheb imwaqqfa mis-​Sultan Nabukodonosor taʼ Babilonja. L-​għan tad-​drama kien li juri li mhux biss il-​Bibbja hija ktieb antik taʼ l-​istorja imma l-​pariri tagħha huma tassew taʼ benefiċċju kemm għaż-​żgħar u kemm għall-​kbar illum.

Is-sessjoni taʼ wara nofsinhar kienet il-​waqt għat-​taħdita pubblika “L-​Unika Triq li Tagħti għall-​Ħajja taʼ Dejjem.” Wara li ttraċċa l-​istorja tal-​waqgħa tal-​bniedem fid-​dnub u l-​mewt, il-​kelliemi kkonkluda b’dan il-​kliem li jqanqal il-​ħsieb: “Il-​vers Bibliku tat-​tema għal dan il-​jum tal-​konvenzjoni kien Isaija kapitlu 30, vers 21, li jgħid: “Minn warajk jisimgħu widnejk kliem li jwissik u jgħidlek: ‘Din hi t-​triq; għaddi minnha, sew jekk tikser lejn il-​lemin, sew lejn ix-​xellug.’ Kif nisimgħuh dan il-​leħen? Billi nagħtu widen għall-​Kelma t’Alla, il-​Bibbja Mqaddsa, u billi nsegwu d-​direzzjoni li l-​Istruttur Grandjuż tagħna, Alla Jehovah, jipprovdi permezz tagħha u permezz taʼ l-​organizzazzjoni Kristjana tiegħu taʼ żmienna. Tabilħaqq, li nagħmlu dan huwa l-​unika triq li tagħti għall-​ħajja taʼ dejjem.”

Wara sommarju taʼ l-​artiklu taʼ l-​istudju tat-​Torri taʼ l-​Għassa għal dik il-​ġimgħa kien hemm l-​aħħar taħdita, intitolata “Ibqaʼ Miexi fit-​Triq taʼ Jehovah.” F’parti minnha, kien hemm reviżjoni tal-​punti ewlenin tal-​programm. Il-​kelliemi mbagħad ippreżenta riżoluzzjoni li esprimiet id-​determinazzjoni tagħna li nkomplu nimxu fit-​triq t’Alla.

Ir-riżoluzzjoni ntemmet b’dan il-​kliem li jqanqal: “Aħna . . . konvinti illi li ngħixu mal-​prinċipji, il-​pariri, u t-​twissijiet Skritturali se jirriżulta li jkun l-​aqwa mod taʼ ħajja llum u jqiegħed pedament mill-​aħjar għall-​futur, sabiex inkunu nistgħu naqbdu qabda soda fuq il-​ħajja vera. Fuq kollox, nagħmlu din ir-​riżoluzzjoni għaliex inħobbu lil Alla Jehovah b’qalbna, b’ruħna, b’moħħna, u b’saħħitna kollha!” Kulmin kien preżenti afferma l-​qbil tiegħu b’għajta qawwija fl-​affermattiv!

[Kaxxa/Stampa f’paġna 8]

Hemm Ħallieq li Jimpurtah Minnek?

Il-​ktieb il-​ġdid li għandu dan it-​titlu (Is There a Creator Who Cares About You?) jippreżenta evidenza konvinċenti dwar l-​eżistenza tal-​Ħallieq, Jehovah, u jiddiskuti l-​kwalitajiet tiegħu. Huwa mfassal partikolarment għal dawk li għandhom livell għoli t’edukazzjoni fi kwistjonijiet sekulari imma li ma jemmnux f’Alla. Dan il-​ktieb taʼ 192 paġna se jqawwi wkoll il-​fidi taʼ individwi li diġà jemmnu f’Alla, billi jibnilhom l-​apprezzament għall-​personalità tiegħu u triqatu.

Is There a Creator Who Cares About You? ma jassumix li l-​qarrej jemmen f’Alla. Minflok, jiddiskuti kif skoperti u konċetti xjentifiċi reċenti ferm jixhdu li jeżisti Ħallieq. Fost il-​kapitli hemm dawk intitolati “What Can Add Meaning to Your Life?” (X’Jistaʼ Jagħmel lil Ħajtek Iktar Sinjifikanti?), “How Did Our Universe Get Here?​—The Controversy” (L-Univers Tagħna kif Ġie?​—Il-​Kontroversja), u “How Unique You Are!” (Kemm Int Uniku!). Kapitli oħrajn jikkunsidraw għala nistgħu nkunu żguri li l-​Bibbja hija ispirata divinament. Il-​ktieb il-​ġdid jagħti wkoll ħarsa ġenerali dwar il-​Bibbja, li tirrivela l-​personalità u t-​triqat tal-​Ħallieq. Dan il-​ktieb mhux biss jiddiskuti għala Alla ilu jippermetti daqstant sofferenza, imma wkoll jispjega kif se jtemmha għal dejjem.

[Stampi f’paġna 7]

Tgħammdu ħafna

[Stampi f’paġna 7]

Il-​ħruġ tal-​browxer il-​ġdid tħabbar minn A. D. Schroeder, membru tal-​Ġemgħa li Tiggverna tax-​Xhieda taʼ Jehovah

[Stampi f’paġni 8, 9]

Drama li tqanqal inkuraġġiet il-​qari tal-​Bibbja kuljum