“Proklamaturi Żelużi tas-​Saltna” Ferħanin li Jiltaqgħu Flimkien

KRIŻIJIET morali, ekonomiċi, u politiċi qed jheżżu lid-​dinja. Iżda, fost dan it-​taqlib kollu, ix-​Xhieda taʼ Jehovah inġabru biex igawdu tlett ijiem taʼ paċi fil-​Konvenzjonijiet Distrettwali “Proklamaturi Żelużi tas-​Saltna.” Fl-​2002, dawn il-​konvenzjonijiet li jsiru madwar il-​globu kollu bdew f’Mejju.

Dawn il-​konvenzjonijiet tassew kienu okkażjonijiet taʼ ferħ. Ejja nirrivedu fil-​qosor il-​programm inkuraġġanti bbażat fuq il-​Bibbja.

Fl-​Ewwel Ġurnata Ġie Enfasizzat iż-​Żelu taʼ Ġesù

It-​tema taʼ l-​ewwel ġurnata tal-​konvenzjoni kienet “Imita ż-​Żelu taʼ Sidna, Ġesù.” (Ġwann 2:17) It-​taħdita “Ferħanin li Ninġemgħu Flimkien Bħala Proklamaturi tas-​Saltna” kienet stedina mill-​qalb għal dawk preżenti biex jieħdu sehem fil-​ferħ li bħas-​soltu qatt ma jonqos f’konvenzjonijiet bħal dawn tal-​poplu t’Alla. (Dewteronomju 16:15) Wara din it-​taħdita kien hemm intervisti maʼ xi proklamaturi żelużi taʼ l-​aħbar tajba.

Fit-taħdita “Sib l-​Għaxqa Tiegħek f’Jehovah Innifsu” ġie diskuss Salm 37:​1-11 vers vers. Ġejna mħeġġin biex ma ‘nagħdbux’ meta naraw is-​suċċess li jidher li qed ikollhom il-​ħżiena. Għalkemm xi wħud mill-​agħar jistgħu forsi jaqilgħu l-​gideb fuqna, meta jasal il-​waqt Jehovah se juri ċar min huma verament in-​nies leali tiegħu. Fit-​taħdita “Uri Gratitudni” ġie diskuss kif nistgħu nuru li aħna grati lejn Alla. Il-​Kristjani kollha huma fid-​dmir li joffru “sagrifiċċju taʼ tifħir” lil Jehovah. (Lhud 13:15) M’għandniex xi ngħidu, l-​ammont taʼ ħin li niddedikaw għas-​servizz taʼ Jehovah jiddependi mill-​apprezzament u ċ-​ċirkustanzi tagħna.

It-taħdita prinċipali kienet intitolata “Il-​Proklamaturi tas-​Saltna Għandhom Żelu Jaħraq bħan-​Nar.” Din ġibdet l-​attenzjoni lejn Ġesù Kristu bħala l-​aqwa eżempju taʼ żelu għalina. Mindu ġiet stabbilita s-​Saltna tas-​sema fl-​1914, il-​veri Kristjani kellhom bżonn taż-​żelu biex ixandru l-​aħbar tajba. Il-​kelliemi rrefera għall-​konvenzjoni taʼ Cedar Point, Ohio, fl-​Istati Uniti, li saret fl-​1922 u fakkarna f’dik l-​għajta storika: “Irreklamaw lis-​Sultan u lis-​Saltna tiegħu”! Hekk kif gerbu s-​snin, iż-​żelu tal-​qaddejja leali t’Alla qanqalhom biex jiddikjaraw il-​veritajiet meraviljużi dwar is-​Saltna lill-​ġnus kollha.

It-taħdita “Ma Nibżgħux għax Nafu li Jehovah Qiegħed Magħna,” li ngħatat fl-​ewwel ġurnata wara nofsinhar, uriet li n-​nies t’Alla huma l-​mira speċjali taʼ Satana. Iżda, minkejja l-​oppożizzjoni li jistaʼ jkollna, aħna niksbu kuraġġ jekk nimmeditaw dwar il-​ħafna eżempji taʼ nies taʼ fidi, kemm Bibliċi u kemm taʼ żmienna, biex inkunu nistgħu niffaċċjaw il-​provi u t-​tentazzjonijiet mingħajr biżaʼ.—Isaija 41:10.

Imbagħad kien imiss serje taʼ tliet taħditiet bit-​tema “Il-​Profezija taʼ Mikea Ssaħħaħna biex Nimxu f’Isem Jehovah.” L-​ewwel kelliemi qabbel il-​kollass morali, l-​apostasija reliġjuża, u l-​materjaliżmu taʼ żmien Mikea maʼ żmienna. Hu stqarr: “It-​tama tagħna għall-​futur se tkun żgura jekk irrawmu qalb ubbidjenti u naraw li l-​imġiba tagħna tkun qaddisa u ħajjitna mimlija b’għemejjel taʼ devozzjoni lejn Alla​—u jekk qatt ma ninsew li l-​jum taʼ Jehovah se jiġi tabilħaqq.”​—2 Pietru 3:​11, 12.

It-tieni kelliemi f’din is-​serje taʼ taħditiet ġibed l-​attenzjoni lejn il-​kundanna taʼ Mikea fuq il-​mexxejja Lhud. Dawn ħaqru lin-​nies foqra li ma setgħux jiddefendu ruħhom. Imma Mikea bassar ukoll li l-​qima vera kellha tittrijonfa. (Mikea 4:​1-5) Bil-​qawwa li jagħtina l-​ispirtu qaddis taʼ Jehovah, aħna determinati li nxandru dan il-​messaġġ taʼ tama li tant iġib serħan. Imma xi ngħidu jekk inħossu li ma nistgħux nagħmlu kemm nixtiequ minħabba xi mard jew xi affarijiet oħra? It-​tielet kelliemi qal: “Il-​ħtiġijiet taʼ Jehovah huma raġunevoli u jistgħu jintlaħqu.” Hu mbagħad kompla jiddiskuti dwar l-​aspetti differenti taʼ Mikea 6:​8, li jgħid: “X’jistenna minnek il-​Mulej: li tagħmel dak li hu ġust, li tħobb u tkun ħanin, u li tkun umli fl-​imġiba tiegħek maʼ Alla tiegħek.”

Minħabba li t-​taħsir morali taʼ din id-​dinja jistaʼ jeffettwa lill-​Kristjani, ilkoll kemm aħna bbenefikajna mit-​taħdita intitolata “Ibqaʼ Safi Billi Tħares lil Qalbek.” Per eżempju, il-​fatt li nżommu ruħna safjin jgħinna biex ikollna żwieġ hieni. Bħala Kristjani, qatt m’għandna naħsbu, lanqas għal mument wieħed, dwar il-​ħsieb li nikkommettu immoralità sesswali.​—1 Korintin 6:18.

It-taħdita “Għasses Kontra l-​Qerq” urietna kemm hu għaqli li l-​qerq, in-​nofs veritajiet, u l-​gideb sfaċċat li jxerrdu l-​apostati, inqisuhom bħallikieku kienu velenu. (Kolossin 2:8) Bl-​istess mod, aħna qatt m’għandna nqarrqu bina nfusna u naħsbu li nistgħu nissodisfaw ix-​xewqat midinba tagħna mingħajr ma nġibu konsegwenzi koroh fuqna.

“Qim lill-​Uniku Alla Veru” kien it-​titlu taʼ l-​aħħar taħdita fl-​ewwel ġurnata. Hekk kif il-​kundizzjonijiet fid-​dinja jkomplu jsiru dejjem iktar kritiċi, kemm iqawwilna qalbna li nafu li Jehovah dalwaqt se jġib id-​dinja l-​ġdida tiegħu mimlija tjieba! Min se jgħix fiha? Dawk biss li jqimu lil Jehovah. Biex jgħin lilna, lil uliedna, u lil dawk li nistudjaw il-​Bibbja magħhom nilħqu din il-​mira, il-​kelliemi ħabbar il-​ħruġ taʼ ktieb ġdid għall-​istudju, Worship the Only True God (Qim lill-​Uniku Alla Veru). X’ferħ ħassejna!

Fit-​Tieni Ġurnata Ġie Enfasizzat iż-​Żelu għal Dak li Hu Tajjeb

It-​tieni ġurnata tal-​konvenzjoni kellha t-​tema “Kun Żeluż għal Dak li Hu Tajjeb.” (1 Pietru 3:13) L-​ewwel kelliemi ddiskuta l-​Iskrittura tal-​jum. Hu enfasizza l-​fatt li meta neżaminaw bis-​serjetà l-​Iskrittura tal-​jum, dan iżidilna ż-​żelu.

Imbagħad kien hemm is-​serje taʼ taħditiet “Proklamaturi tas-​Saltna li Jigglorifikaw il-​Ministeru Tagħhom.” Fl-​ewwel parti ġie enfasizzat il-​bżonn li nimmaniġġaw sewwa l-​Kelma t’Alla. (2 Timotju 2:15) Meta nużaw il-​Bibbja b’mod effettiv inkunu qed inħalluha teżerċita l-​‘qawwa’ fil-​ħajjiet tan-​nies. (Lhud 4:12) Aħna għandna niġbdu l-​attenzjoni lejn il-​Bibbja u nirraġunaw fuqha b’mod li jikkonvinċi. Fit-​tieni parti taʼ din is-​serje taʼ taħditiet ġejna mħeġġin biex inżuru għal darba wara l-​oħra lin-​nies li juru interess. (1 Korintin 3:6) Neħtieġu l-​preparazzjoni u l-​qlubija biex inkomplu nieħdu ħsieb l-​interess kollu li nsibu fil-​pront. Fit-​tielet parti ngħatajna s-​suġġeriment biex inħarsu lejn kulmin navviċinaw bħala xi ħadd li għad isir dixxiplu. Din uriet ukoll li jekk noffru studju tal-​Bibbja fl-​ewwel żjara dan jistaʼ jwassal biex ikollna l-​ferħ li ngħinu lil xi individwi jsiru dixxipli.

“Għala ‘Titlob bla Heda’” kienet it-​tema tat-​taħdita li kien imiss. Il-​Bibbja tħeġġeġ lill-​Kristjani biex iduru lejn Alla għall-​gwida f’kull aspett tal-​ħajja. Jeħtieġ li nsibu l-​ħin biex nitolbu fil-​privat. Iktar minn hekk, irridu nipperseveraw fit-​talb, għax Jehovah jistaʼ jħallina nkomplu nitolbu għal xi żmien qabel nindunaw kif wieġeb talbna.—Ġakbu 4:8.

Fit-​taħdita “Konversazzjoni Spiritwali Tibnina” ġejna mħeġġin biex nużaw ir-​rigal tagħna tad-​diskors għall-​benefiċċju tagħna nfusna u taʼ oħrajn. (Filippin 4:8) Kemm ir-​raġel, kemm il-​mara, u kemm l-​ulied jeħtieġu xi ftit jew wisq konversazzjoni spiritwali bejniethom kuljum. Minħabba f’hekk, il-​familji għandhom jipprovaw jiltaqgħu minn taʼ l-​inqas għal ikla waħda kuljum, biex b’hekk ikollhom ħin għall-​konversazzjoni li tibnihom.

Il-programm taʼ fil-​għodu ntemm bit-​taħdita li tant tqanqal il-​qalb, “Kif id-​Dedikazzjoni u l-​Magħmudija Jwasslu għas-​Salvazzjoni.” Il-​kandidati tal-​magħmudija diġà kienu kisbu l-​għarfien, eżerċitaw fidi, nidmu, daru lura mill-​ħażen, u ddedikaw lilhom infushom lil Alla. Il-​kelliemi ġibdilhom l-​attenzjoni li wara l-​magħmudija, huma kellhom ikomplu jikbru spiritwalment u ma jitilfux iż-​żelu u l-​kondotta tajba li kellhom.—Filippin 2:​15, 16.

Wara nofsinhar, ġew enfasizzati żewġ punti fit-​taħdita “Kun Modest, u Żomm Għajnek Sempliċi.” Li nkunu modesti jfisser li jkollna ħarsa realistika tal-​limitazzjonijiet u tal-​qagħda tagħna quddiem Alla. Il-​modestja tgħinna nżommu għajn “safja” jew kif tpoġġiha n-​New World Translation, “sempliċi”​—iffokata fuq is-​Saltna t’Alla, u mhux fuq affarijiet materjali. Jekk nagħmlu hekk, m’għandniex għalfejn inkunu ansjużi, għax Jehovah jipprovdilna dak li jkollna bżonn.​—Mattew 6:​22-24, 33, 34.

Il-​kelliemi taʼ wara li ta t-​taħdita “Afda f’Jehovah Għalkollox fi Żmien l-​Inkwiet” uriena għala għandna nagħmlu dan. Kif nistgħu nkampaw m’affarijiet bħalma huma dgħjufijiet persunali u problemi taʼ saħħa jew finanzjarji? Ejja nitolbu lil Jehovah għall-​għerf prattiku u nitolbu l-​għajnuna taʼ ħaddieħor. Minflok ma nċedu u nibdew nippanikkjaw u niddispraw, aħna għandna nsaħħu l-​fiduċja tagħna f’Alla billi naqraw il-​Kelma tiegħu.​—Rumani 8:​35-39.

L-aħħar serje taʼ taħditiet f’din il-​konvenzjoni kellha t-​tema “Il-​Kwalità tal-​Fidi Tagħna Mġarrba b’Diversi Provi.” L-​ewwel parti fakkritna li l-​Kristjani veri kollha jiffaċċjaw il-​persekuzzjoni. Din isservi bħala xiehda, issaħħilna l-​fidi, u tagħtina opportunità biex nuru l-​lealtà tagħna lejn Alla. Għalkemm aħna ma nissograwx ħajjitna bla bżonn, qatt ma se nużaw mezzi li m’humiex skritturali biex nevitaw il-​persekuzzjoni.​—1 Pietru 3:16.

It-​tieni kelliemi f’din is-​serje taʼ taħditiet semma xi mistoqsijiet li għandhom x’jaqsmu man-​newtralità. Il-​Kristjani tal-​bidu ma kinux paċifisti, imma kienu jirrikonoxxu li l-​lealtà primarja tagħhom kienet lejn Alla. Bl-​istess mod illum, ix-​Xhieda taʼ Jehovah iżommu sod maʼ dan il-​prinċipju: “M’intomx tad-​dinja.” (Ġwann 15:19) Ladarba minn ħin għall-​ieħor nistennew li tinqalaʼ xi ħaġa li tittestja n-​newtralità tagħna, għandna nsibu l-​ħin biex bħala familja nirrivedu dak li tgħid il-​Bibbja dwar dan is-​suġġett. Bħalma wriet it-​tielet taħdita f’din is-​serje taʼ taħditiet, mhux bilfors li l-​mira taʼ Satana hija li joqtolna, imma li jagħmlilna pressjoni biex ma nibqgħux leali. Jekk nissaportu fedelment it-​twaqqigħ għaċ-​ċajt, il-​pressjonijiet immorali, l-​uġigħ emozzjonali, u l-​mard, inkunu qed inġibu tifħir lil Jehovah.

L-​istedina mill-​qalb “Ersaq Qrib Lejn Jehovah” kienet it-​titlu taʼ l-​aħħar taħdita taʼ din il-​ġurnata. Meta nifhmu l-​attributi kardinali li għandu Jehovah, inkunu nistgħu nersqu qrib tiegħu. Hu juża l-​qawwa bla limitu li għandu biex jipproteġi lin-​nies tiegħu, speċjalment spiritwalment. Il-​ġustizzja tiegħu m’hijiex ħarxa imma tqanqlu biex jagħmel ħajja bla tmiem disponibbli għal kulmin jagħmel is-​sewwa. L-​għerf t’Alla jidher fil-​mod kif hu uża lill-​bnedmin imperfetti biex jiktbu l-​Bibbja. L-​iktar kwalità li tiġbdek lejh hi l-​imħabba tiegħu, li qanqlitu jagħmel arranġament għas-​salvazzjoni tal-​bnedmin permezz taʼ Ġesù Kristu. (Ġwann 3:16) Il-​kelliemi spiċċa billi ppreżenta l-​ktieb il-​ġdid li tant iqanqal il-​qalb, Draw Close to Jehovah (Ersaq Qrib Lejn Jehovah).

It-​Tielet Ġurnata Ffokat fuq iż-​Żelu għal Għemejjel Tajbin

It-​tema tat-​tielet ġurnata tal-​konvenzjoni kienet “Poplu Żeluż għal Għemejjel Tajbin.” (Titu 2:14) Il-​programm tal-​ġurnata beda billi familja ddiskutiet l-​iskrittura tal-​jum. Imbagħad kien hemm it-​taħdita “Qiegħda l-​Fiduċja Tiegħek f’Jehovah?” Il-​ġnus poġġew il-​fiduċja tagħhom f’sors żbaljat billi straħu fuq l-​għerf u l-​qawwa tagħhom stess. Iżda b’kuntrast, il-​qaddejja taʼ Jehovah jistrieħu fuqu bil-​kuraġġ u bil-​ferħ minkejja l-​gwaj kollu li jistaʼ jiġi fuqhom.—Salm 46:​2-4, 8-12 (46:​1-3, 7-11, NW).

Fil-​parti intitolata “Żgħażagħ​—Ibnu għall-​Futur maʼ l-​Organizzazzjoni taʼ Jehovah” ġiet diskussa l-​mistoqsija: Kif jistaʼ żagħżugħ tassew jikseb l-​aħjar mill-​ħajja? Dan mhux se jinkiseb billi wieħed ikun moħħu fil-​flus, fil-​ġid materjali, u fil-​fama. Il-​Ħallieq tagħna jħeġġeġ bl-​imħabba kollha liż-​żgħażagħ biex jiftakru fih dment li għadhom żgħar. Il-​kelliemi intervista lil xi wħud li stinkaw kemm felħu fis-​servizz Kristjan f’żgħożithom, u stajna nifhmu l-​ferħ li qed iħossu. U kemm ħadna gost meta rċivejna l-​fuljett il-​ġdid, Żgħażagħ—Kif Se Tużaw Ħajjitkom?, li sar bl-​għan li jgħin lix-​Xhieda żgħażagħ ipoġġu l-​pedament għall-​futur li ma jintemm qatt maʼ l-​organizzazzjoni taʼ Jehovah!

Imbagħad wasal il-​ħin għad-​drama “Sodi fi Żmien taʼ Inkwiet,” li kulħadd segwa b’attenzjoni kbira. Din tat deskrizzjoni fil-​qosor tal-​karriera twila taʼ Ġeremija mindu kien għadu żagħżugħ sal-​qerda taʼ Ġerusalemm, li dwarha hu kien ipprofetizza b’żelu kbir. Ġeremija ħass li ma kienx kwalifikat biżżejjed għal dan l-​inkarigu, imma hu wettqu minkejja l-​oppożizzjoni li kellu, u Jehovah ħelsu.​—Ġeremija 1:​8, 18, 19. 

Wara d-​drama kien hemm it-​taħdita “Kun bħal Ġeremija​—Ipproklama l-​Kelma t’Alla bla Biżaʼ.” Illum taʼ spiss insibu lil min jaqlaʼ l-​gideb u jagħmel propaganda malizzjuża kontra l-​proklamaturi tas-​Saltna. (Salm 109:​1-3) Iżda aħna, bħal Ġeremija, nistgħu negħlbu l-​iskuraġġiment billi nsibu l-​għaxqa tagħna fil-​Kelma taʼ Jehovah. U ninsabu fiduċjużi li dawk li jiġġieldu kontrina m’humiex se joħorġu rebbiħin.

Tabilħaqq kienet f’waqtha t-​taħdita pubblika, intitolata “Ix-​Xena taʼ Din id-​Dinja Qiegħda Tinbidel.” Fi żmienna kien hawn ħafna bidliet drammatiċi. Il-​Bibbja bassret li dawn il-​kundizzjonijiet, inkluż għajta taʼ “paċi u sigurtà,” kienu se jwasslu għall-​jum il-​ħaqq t’Alla li tant iqanqal il-​biżaʼ. (1 Tessalonikin 5:​3, NW) Dan il-​jum se jġib bidliet taʼ l-​għaġeb​—it-​tmiem tal-​gwerer, tal-​kriminalità, tal-​vjolenza, u saħansitra tal-​mard kollu. Mela, minflok ma nafdaw f’din is-​sistema t’affarijiet, dan hu ż-​żmien biex nibqgħu nimxu bid-​devozzjoni lejn Alla u nżommu l-​kondotta tagħna nadifa.

It-Torri taʼ l-​Għassa fil-​qosor ġie segwit mill-​aħħar taħdita tal-​konvenzjoni, intitolata “Furu bl-​Għemejjel Tajbin Bħala Proklamaturi Żelużi tas-​Saltna.” Il-​kelliemi wera kif il-​programm kien qanqalna spiritwalment u inkuraġġiena biex nistrieħu fuq Jehovah. Dan spiċċa billi ħeġġiġna biex inkunu nodfa, nuru mħabba, u nkunu proklamaturi żelużi tas-​Saltna t’Alla.​—1 Pietru 2:12.

Bi spirtu bħal dak tal-​qaddejja taʼ Jehovah taʼ żmien Neħemija, aħna ċertament li morna lura lejn darna ferħanin minħabba l-​barkiet spiritwali li rċivejna fil-​Konvenzjonijiet Distrettwali “Proklamaturi Żelużi tas-​Saltna.” (Neħemija 8:12) Ma ġagħlitekx din il-​konvenzjoni eċċitanti tħossok mimli ferħ u determinazzjoni biex tibqaʼ miexi ’l quddiem bħala proklamatur żeluż tas-​Saltna?

[Kaxxa/Stampa f’paġna 23]

Għajnuna Ġdida għall-​Istudju!

Fi tmiem l-​ewwel ġurnata tal-​konvenzjoni, dawk preżenti ħadu gost ħafna bil-​ħruġ tal-​ktieb il-​ġdid Worship the Only True God (Qim lill-​Uniku Alla Veru). Dan sar bl-​għan li jiġi studjat maʼ dawk li jkunu studjaw il-​ktieb Għarfien Li Jwassal Għall-​Ħajja Taʼ Dejjem, u dan bla dubju se jsaħħaħ il-​fidi taʼ dawk li huma “disposti sewwa għall-​ħajja taʼ dejjem.”​—Atti 13:​48, NW.

[Sors]

Stampa fuq il-​qoxra tal-​ktieb: ritratt mill-​U.S. Navy

[Kaxxa/Stampi f’paġna 24]

Għajnuna biex Nersqu Eqreb Lejn Alla

L-​aħħar kelliemi fit-​tieni ġurnata tal-​konvenzjoni ħabbar il-​ħruġ tal-​ktieb il-​ġdid Draw Close to Jehovah (Ersaq Qrib Lejn Jehovah). Dan fih erbaʼ sezzjonijiet prinċipali, waħda għal kull attribut kardinali taʼ Jehovah—il-​qawwa, il-​ġustizzja, l-​għerf, u l-​imħabba. Kull sezzjoni tal-​ktieb għandha kapitlu li turi kif Ġesù Kristu wera l-​kwalitajiet t’Alla fil-​ħajja tiegħu. L-​iskop ewlieni taʼ dan il-​ktieb il-​ġdid hu li jgħin lilna u lil dawk li jistudjaw il-​Bibbja magħna biex nibnu relazzjoni mill-​qrib u iktar b’saħħitha m’Alla Jehovah.

[Kaxxa/Stampi f’paġna 26]

Gwida Spiritwali għaż-​Żgħażagħ

It-​tielet ġurnata tal-​konvenzjoni spikkat minħabba l-​ħruġ taʼ fuljett speċjali intitolat Żgħażagħ​—Kif Se Tużaw Ħajjitkom? Dan il-​fuljett ġdid sar bl-​għan li jgħin lix-​Xhieda żgħażagħ jieħdu deċiżjonijiet tajbin rigward il-​futur tagħhom, għaliex jagħti pariri Skritturali kif jistgħu jibnu karriera dejjiema fis-​servizz taʼ Jehovah.