Noffru Sagrifiċċji Aċċettabbli lil Jehovah

XI DARBA fl-​istorja, setaʼ jiġi osservat fenomenu rimarkevoli fid-​daħla tal-​Lvant tal-​Ġnien taʼ Għeden.a Hemmhekk, kien hemm għassa xi kerubini setgħanin li d-​dehra minaċċuża tagħhom kienet tindika biċ-​ċar li ħadd ma kellu jissogra jgħaddi. Daqstant taʼ tkexkix kienet ix-​xafra li kien hemm taqbad taʼ sejf idur, li x’aktarx bil-​lejl kienet tixħet dija tal-​biżaʼ fuq is-​siġar taʼ madwarha. (Ġenesi 3:24) Kien kemm kien taʼ interess, kulmin kien jarah kien attent li jżomm ċertu distanza.

Kajjin u Abel wisq probabbli żaru dawk l-​inħawi ħafna drabi. Billi dawn twieldu meta Adam u Eva kienu barra l-​ġnien, huma setgħu biss jispekulaw dwar kif setgħet kienet il-​ħajja fil-​Ġenna, kif kienu jgħixu darba l-​ġenituri tagħhom, bix-​xtieli fertili u msoqqijin tajjeb u l-​abbundanza taʼ frott u ħaxix. Issa dak il-​ftit li setaʼ jidher mill-​Għeden mingħajr ebda dubju deher bħala ġnien mhux ikkultivat u maħnuq bil-​ħaxix.

Adam u Eva żgur li kienu spjegaw lil uliedhom għala l-​ġnien kien ittraskurat u għalfejn kienu tkeċċew minnu. (Ġenesi 2:17; 3:6, 23) Min jaf kemm ħassewhom frustrati Kajjin u Abel! Huma setgħu jarawh il-​ġnien, imma ma setgħux jidħlu fih. Kienu tant qrib tal-​Ġenna u fl-​istess ħin tant ’il bogħod. L-​imperfezzjoni kienet ħassrithom, u Kajjin u Abel setgħu jagħmlu ftit li xejn dwarha.

Ir-​relazzjoni tal-​ġenituri tagħhom żgur li ma setgħetx ittejjeb l-​affarijiet. Meta Alla kkundanna lil Eva, hu qalilha: “Lejn żewġek tiġbdek xewqtek, u jaħkem fuqek hu.” (Ġenesi 3:16) Bi twettiq taʼ din il-​profezija, Adam bilfors li beda jeżerċita d-​dominazzjoni tiegħu fuq martu, forsi billi ma baqax jittrattaha bħala sieħba u ajjutanta. U Eva mid-​dehra bdiet tiddependi żżejjed fuq dan ir-​raġel. Kummentarju wieħed saħansitra jasal biex jiddeskrivi ‘x-​xewqa’ tagħha bħala “xewqa kważi bħal marda.”

Il-​Bibbja ma tgħidx kemm din is-​sitwazzjoni taż-​żwieġ effettwat ir-​rispett tas-​subien lejn il-​ġenituri tagħhom. Iżda huwa evidenti li Adam u Eva taw eżempju li ħawwad lil uliedhom.

Jagħżlu Toroq Differenti

Eventwalment, Abel sar ragħaj u Kajjin sar bidwi. (Ġenesi 4:2) Hekk kif kien jindokra l-​merħliet tiegħu, Abel mingħajr ebda dubju kellu ħafna ħin biex jimmedita fuq il-​profezija stramba li tlissnet qabel ma l-​ġenituri tiegħu tkeċċew mill-​Għeden: “U jien inqajjem mibegħda bejnek u bejn il-​mara, bejn nislek u nisilha, u hu jisħaqlek rasek u int tisħaqlu għarqubu.” (Ġenesi 3:15) Abel żgur li qagħad iberren f’moħħu, ‘Kif se titwettaq din il-​wegħda t’Alla rigward żerriegħa li se tgħaffeġ lis-​serp, u l-​għarqub taʼ din iż-​żerriegħa kif se jiġi misħuq?’

Wara xi żmien, x’aktarx meta kienu saru adulti maturi, Kajjin u Abel għamlu offerta kull wieħed lil Jehovah. Ladarba Abel kien ragħaj, m’hijiex ħaġa kbira li hu ppreżenta “mill-​bikri tal-​merħla tiegħu u mill-​grass tagħhom.” B’kuntrast, Kajjin offra “frott taʼ l-​art.” Jehovah aċċetta s-​sagrifiċċju t’Abel, imma “lejn Kajjin u lejn l-​offerta tiegħu ma ħarisx.” (Ġenesi 4:3-5) Għala le?

Xi wħud jalludu għall-​fatt li s-​sagrifiċċju t’Abel kien mill-​“bikri tal-​merħla tiegħu,” (Korsiv tagħna.) fil-​waqt li taʼ Kajjin kien sempliċement “frott mill-​art.” Imma l-​problema ma kinitx fil-​kwalità tal-​prodott li offra Kajjin, għax ir-​rakkont jgħidilna li Jehovah ħares “lejn Abel u l-​offerta tiegħu,” u ma ħarisx “lejn Kajjin u lejn l-​offerta tiegħu.” (Korsiv tagħna.) Għalhekk, Jehovah ra primarjament il-​kundizzjoni tal-​qalb taʼ l-​adoratur. Meta għamel hekk, b’liema ħaġa induna? Lhud 11:4 jgħid li kien “permezz tal-​fidi” li Abel offra s-​sagrifiċċju tiegħu. Għalhekk, Kajjin mid-​dehra kien nieqes minn dik il-​fidi li għamlet lis-​sagrifiċċju t’Abel aċċettabbli.

F’dan ir-​rigward, huwa taʼ min jinnota li l-​offerta t’Abel involviet it-​tixrid tad-​demm. Hu għandu mnejn bix-​xieraq ikkonkluda li l-​wegħda t’Alla rigward żerriegħa li kien se jkollu għarqubu misħuq, kienet tinvolvi l-​issagrifikar taʼ ħajja. L-​offerta t’Abel setgħet b’hekk kienet talba għal tpattija, u esprimiet il-​fidi li Alla kien se jipprovdi sagrifiċċju propizjatorju għad-​dnubiet fiż-​żmien xieraq.

B’kuntrast, Kajjin x’aktarx li ma ħasibx ħlief superfiċjalment dwar l-​offerta li għamel. “L-​offerta tiegħu kienet biss rikonoxximent dwar Alla bħala benefattur,” issuġġerixxa kummentatur tal-​Bibbja tas-​seklu 19. “Din sempliċement irrivelat li hu ma rrikonoxxa l-​ebda vjolazzjoni attwali bejnu u bejn il-​Ħallieq tiegħu, lanqas ebda bżonn taʼ stqarrija tad-​dnub jew dipendenza fuq xi tpattija.”

Barra minn hekk, bħala l-​ewwel imwieled, Kajjin saħansitra għandu mnejn bi prużunzjoni ppretenda li hu kien dik iż-​żerriegħa mwiegħda li kellha teqred lis-​Serp, Satana. Eva wkoll setgħet kellha xewqat ambizzjużi bħal dawn dwar l-​ewwel imwieled tagħha. (Ġenesi 4:1) M’għandniex xi ngħidu, jekk dan kien dak li stennew Kajjin u Eva, arralhom bil-​kbir.

Il-​Bibbja ma tgħidx kif Jehovah indika l-​approvazzjoni tiegħu għas-​sagrifiċċju t’Abel. Xi wħud jissuġġerixxu li kien ikkonsmat permezz taʼ nar mis-​sema. Kien x’kien il-​każ, malli rrealizza li l-​offerta tiegħu ġiet irrifjutata, “Kajjin . . . saħan sewwa u wiċċu tqarras.” (Ġenesi 4:5) Kajjin kien se jispiċċa ħażin.

Il-​Parir taʼ Jehovah u t-​Tweġiba taʼ Kajjin

Jehovah rraġuna maʼ Kajjin. Hu staqsieh, “Għala sħant u għala għaddast rasek?” Dan ta opportunità kbira lil Kajjin biex jeżamina s-​sentimenti u l-​motivi tiegħu. “Jaqaw m’hux minnu dak li jekk tagħmel it-​tajjeb,” kompla Jehovah, “terfaʼ rasek? Imma jekk ma tagħmilx it-​tajjeb id-​dnub bħal xitan jissajja wara biebek. U hu xewqan għalik, imma inti tistaʼ trażżnu.”—Ġenesi 4:6, 7. (Ara l-​kaxxa f’paġna 23.)

Kajjin ma tax widen. Minflok, ħa lil Abel f’għalqa daqsxejn ’il bogħod u qatlu. Iktar tard, meta Jehovah staqsa dwar fejn setaʼ kien Abel, Kajjin kompla żied gidba mad-​dnub tiegħu. “Ma nafx,” wieġbu. “Jaqaw jien għassies taʼ ħija?”—Ġenesi 4:8, 9.

Kemm qabel il-​qtil t’Abel u kemm wara, Kajjin irrifjuta li ‘jagħmel it-​tajjeb.’ Hu għażel li jħalli d-​dnub jaħkmu, u minħabba dan, Kajjin tkeċċa mill-​inħawi fejn kienet tgħix il-​familja umana. Ġie stabbilit “sinjal,” forsi sempliċement digriet solenni, sabiex ħadd ma kellu jivvendika l-​mewt t’Abel billi joqtol lil Kajjin.—Ġenesi 4:15.

Iktar tard Kajjin bena belt, u semmiegħa għal ibnu. Mhux taʼ b’xejn li d-​dixxendenti tiegħu saru magħrufin għall-​vjolenza tagħhom. Eventwalment, il-​linja taʼ Kajjin spiċċat meta l-​Għarqa taʼ żmien Noè kinset lin-​nies il-​ħżiena kollha.—Ġenesi 4:17-24; 7:21-24.

Ir-​rakkont Bibliku dwar Kajjin u Abel ma ġiex ippreservat sempliċement biex wieħed jieħu pjaċir jaqrah. Pjuttost, “nkiteb għat-​tagħlim tagħna” u ‘jiswa biex wieħed jgħallem, iċanfar.’ (Rumani 15:4; 2 Timotju 3:16) X’nistgħu nitgħallmu minn dan ir-​rakkont?

Lezzjoni Għalina

Il-​Kristjani llum, bħal Kajjin u Abel, huma mistednin li joffru sagrifiċċju lil Alla​—mhux xi offerta maħruqa litterali, imma “sagrifiċċju taʼ tifħir, jiġifieri l-​kelma taʼ xufftejna li tistqarr ismu.” (Lhud 13:15) Fil-​preżent dan qed isir fuq skala mad-​dinja kollha, hekk kif ix-​Xhieda taʼ Jehovah jippridkaw l-​aħbar tajba tas-​Saltna t’Alla f’iktar minn 230 pajjiż. (Mattew 24:14) Qiegħed int tieħu sehem f’dan ix-​xogħol? Mela, tistaʼ tibqaʼ ċert li “Alla m’hux se jkun hekk inġust li jinsa dak li intom għamiltu u l-​imħabba li wrejtu lejn ismu.”—Lhud 6:10.

Bħall-​offerti taʼ Kajjin u Abel, is-​sagrifiċċju tiegħek m’huwiex iġġudikat minn kif jidher minn barra​—per eżempju, sempliċement min-​numru taʼ sigħat li tqattaʼ fil-​ministeru. Jehovah jħares iktar fil-​fond. Ġeremija 17:10 jgħid li hu ‘jifli l-​qalb’ u saħansitra ‘jgħarbel il-​ġewwieni’​—l-​iktar ħsibijiet, sentimenti, u motivazzjonijiet profondi tal-​personalità taʼ dak li jkun. Għalhekk, il-​kwistjoni vera hi l-​motiv, u mhux l-​ammont. Tassew, sew jekk is-​sagrifiċċju jkun kbir u sew jekk ikun żgħir, dan ikun taʼ valur għal Alla jekk jiġi offrut minn qalb li hija mqanqla mill-​imħabba.—Qabbel Mark 12:41-44 maʼ 14:3-9.

Fl-​istess ħin, irridu nkunu konxji li Jehovah ma jaċċettax sagrifiċċji zopop, bħalma m’aċċettax l-​offerta b’nofs qalb taʼ Kajjin. (Malakija 1:8, 13) Jehovah jesiġi li tagħtih l-​aħjar tiegħek, li taqdih b’qalbek, b’ruħek, b’moħħok, u bis-​saħħa tiegħek kollha. (Mark 12:30) Qed tagħmlu dan? Mela, għandek għalfejn tqis is-​sagrifiċċju tiegħek b’sodisfazzjon. Pawlu kiteb: “Kull wieħed jgħarbel għemilu, mbagħad ikun jistaʼ jiftaħar bih innifsu, u mhux b’ħaddieħor.”—Galatin 6:4.

Kajjin u Abel kellhom l-​istess trobbija. Imma ż-​żmien u ċ-​ċirkustanzi taw l-​opportunità lil kull wieħed minnhom sabiex jiżviluppa karatteristiċi uniċi. Kajjin kompla dejjem isir iktar itturmentat minħabba l-​għira, il-​piki, u r-​rabja.

B’kuntrast, lil Abel Alla jiftakar fih bħala raġel twajjeb. (Mattew 23:35) Id-​determinazzjoni tiegħu biex jogħġob lil Alla akkost taʼ kollox lil Abel għamlitu ferm differenti minn dawk l-​ingrati fil-​familja tiegħu​—Adam, Eva, u Kajjin. Il-​Bibbja tgħidilna li għalkemm Abel miet, hu “għadu jsammaʼ leħnu.” Is-​servizz leali tiegħu lejn Alla huwa parti mir-​rekord storiku permanenti misjub fil-​Bibbja. Jalla nsegwu l-​eżempju t’Abel billi kontinwament noffru sagrifiċċji aċċettabbli lil Alla.—Lhud 11:4.

[Nota taʼ taħt]

[Kaxxa/Stampa f’paġna 23]

Mudell għall-​Kristjani li Jagħtu l-​Pariri

“GĦALA sħant u għala għaddast rasek?” B’din il-​mistoqsija, Jehovah rraġuna b’qalb tajba maʼ Kajjin. Hu ma sforzax lil Kajjin biex jinbidel, għax Kajjin kien aġent morali ħieles. (Qabbel Dewteronomju 30:19.) Minkejja dan, Jehovah ma qagħadx jaħsibha biex jindika l-​konsegwenzi tal-​korsa stinata taʼ Kajjin. Hu wissa lil Kajjin:“Imma jekk ma tagħmilx it-​tajjeb id-​dnub bħal xitan jissajja wara biebek. U hu xewqan għalik.”—Ġenesi 4:6, 7.

Taʼ min jinnota li saħansitra b’din it-​twiddiba qawwija, Jehovah ma ttrattax lil Kajjin bħala ‘kawża mitlufa.’ Pjuttost, hu qal lil Kajjin dwar il-​barkiet li kien se jkollu jekk ibiddel l-​attitudnijiet tiegħu, u esprima fiduċja li Kajjin setaʼ kieku ried jegħlibha din il-​problema. “Jaqaw m’hux minnu dak li jekk tagħmel it-​tajjeb,” qallu Jehovah, “terfaʼ rasek?” Hu staqsa wkoll lil Kajjin rigward id-​dagħdigħa qattiela li kellu: ‘lnti tistaʼ trażżnu?’

Illum, l-​anzjani fil-​kongregazzjoni Kristjana għandhom jimitaw l-​eżempju taʼ Jehovah. Kif inhu mniżżel fit-​2 Timotju 4:2, huma għandhom kultant ‘iċanfru’ u ‘jwiddbu,’ mingħajr tlaqliq waqt li jindikaw il-​konsegwenzi tal-​korsa stinata taʼ dak li jkun żbalja. Fl-​istess ħin, l-​anzjani għandhom ‘iwissu.’ Il-​kelma Griega pa·raʼkle·tos tfisser “biex tinkuraġġixxi.” “It-​twissija m’hijiex ħarxa, ma toħloqx polemika, jew ma tikkritikax,” jinnota t-​Theological Dictionary of the New Testament. “Il-​fatt li din tistaʼ tfisser ukoll faraġ jindika l-​istess ħsieb.”

B’mod sinjifikanti, il-​kelma Griega relatata, pa·raʼkle·tos, tistaʼ tirreferi għal wieħed li jgħin jew avukat fi kwistjoni legali. Għalhekk, saħansitra meta l-​anzjani jagħtu twiddiba f’waqtha, għandhom jiftakru li huma jridu jgħinu—mhux jiħduha kontra—dak l-​individwu li għandu bżonn il-​parir. Bħal Jehovah, l-​anzjani għandhom ikunu pożittivi, billi jkollhom fiduċja li dak li qed jingħatalu l-​parir jistaʼ jegħleb il-​problema tiegħu.—Galatin 6:1.

M’għandniex xi ngħidu, fl-​aħħar mill-​aħħar, huwa l-​individwu li jrid japplika t-​twissija. (Galatin 6:5; Filippin 2:12) L-​anzjani li jagħtu l-​parir se jsibu li xi wħud ma jagħtux kas it-​twissijiet tagħhom, sewwa sew bħalma Kajjin għażel li jinjora t-​twiddiba mingħand il-​Ħallieq innifsu. Madankollu, meta l-​anzjani jimitaw lil Jehovah, il-​Mudell perfett għall-​Kristjani li jagħtu l-​pariri, jistgħu jibqgħu ċerti li jkunu għamlu dak kollu li kellhom jagħmlu sabiex jgħinu lill-​individwi.