Mistoqsijiet mill-​Qarrejja

Kien jaf Abel li kien meħtieġ sagrifiċċju taʼ l-​annimali biex jaqlaʼ l-​favur taʼ Jehovah?

Ir-​rakkont Bibliku taʼ Kajjin u Abel jagħmlu l-​offerti tagħhom huwa qasir ħafna. F’Ġenesi 4:​3-5, naqraw: “Ġara wara xi żmien li Kajjin għamel offerta mill-​frott taʼ l-​art lill-​Mulej; u Abel offra wkoll hu mill-​bikri tal-​merħla tiegħu u mill-​grass tagħhom. U l-​Mulej ħares lejn Abel u l-​offerta tiegħu. Imma lejn Kajjin u lejn l-​offerta tiegħu ma ħarisx.”

Fil-Bibbja mkien m’hemm imsemmi li qabel din il-​ġrajja Jehovah kien ta informazzjoni speċifika dwar is-​sagrifiċċji jew dwar x’tip taʼ sagrifiċċju kien aċċettat minnu. Għalhekk, Kajjin u Abel milli jidher għamlu l-​offerti tagħhom minn jeddhom. Huma ġew imċaħħdin milli jidħlu fil-​Ġenna, li kienet id-​dar oriġinali tal-​ġenituri tagħhom; bdew iħossu l-​effetti tad-​dnub; u kienu mbegħdin minn Alla. Fl-​istat midneb u miżerabbli tagħhom min jaf kemm ħassew il-​bżonn li jduru lejn Alla għall-​għajnuna. L-​offerta tagħhom lil Alla setgħet kienet ġest volontarju min-​naħa tagħhom biex jaqilgħu l-​favur t’Alla.

Kif ġraw l-​affarijiet, l-​offerta t’Abel kienet aċċettata minn Alla, imma taʼ Kajjin ma kinitx. Għala? Kien dan minħabba li Abel offra l-​affarijiet xierqa u Kajjin le? Ma nistgħux inkunu ċerti jekk it-​tip t’offerta kellux effett fuq il-​kwistjoni jew le, ladarba ħadd ma qalilhom x’kien aċċettabbli u x’ma kienx. Però, wisq probabbli li t-​tnejn li huma kienu aċċettabbli. Fil-​Liġi li maż-​żmien Jehovah ta lill-​ġens taʼ Iżrael, sagrifiċċji aċċettabbli ma kinux jinkludu biss annimali jew partijiet minn annimali imma wkoll qamħ inkaljat, qatet tax-​xgħir, dqiq fin, affarijiet imsajrin, u nbid. (Levitiku 6:​12-16 [6:​19-​23, NW]; 7:​11-​13; 23:​10-​13) Milli jidher, ma kienx biss dak li Kajjin u Abel kienu se joffru bħala sagrifiċċju li ġiegħel lil Alla jaċċetta lil wieħed u jirrifjuta lill-​ieħor.​—Qabbel Isaija 1:​11; Għamos 5:​22.

Sekli wara, l-​appostlu Pawlu qal: “Kien permezz tal-​fidi li Abel offra lil Alla sagrifiċċju aħjar minn taʼ Kajjin, sagrifiċċju li bis-​saħħa tiegħu kiseb xhieda li hu kien raġel ġust, u Alla tah xhieda tad-​doni tiegħu.” (Lhud 11:4) Għalhekk, kien permezz tal-​fidi li Abel ġie approvat minn Alla bħala bniedem ġust. Imma fidi fiex? Fidi fil-​wegħda taʼ Jehovah li kien se jipprovdi Nisel, li kellu ‘jisħaq ras is-​serp’ u jerġaʼ jġib il-​paċi u l-​perfezzjoni li l-​umanità kellha xi darba. Mill-​istqarrija li n-​Nisel kellu ‘jinsaħaqlu għarqubu,’ Abel setaʼ rraġuna li kien hemm bżonn sagrifiċċju li jinvolvi t-​tixrid tad-​demm. (Ġenesi 3:​15) Xorta waħda, jibqaʼ l-​fatt li kienet il-​fidi li wera Abel li għamlet is-​“sagrifiċċju [tiegħu] aħjar minn taʼ Kajjin.”

Bl-​istess mod, Kajjin ġie miċħud, mhux għax it-​tip taʼ sagrifiċċju li offra ma kienx xieraq, imma għaliex ma kellux fidi, kif fil-​fatt wera b’għemilu. Jehovah kien wissa biċ-​ċar lil Kajjin: “Jaqaw m’hux minnu dak li jekk tagħmel it-​tajjeb terfaʼ rasek?” (Ġenesi 4:7) Alla ma rrifjutax lil Kajjin minħabba li m’għoġbux dak li offrielu. Imma, kien minħabba li “għemilu kien ħażin”​—muri bl-​għira, bil-​mibegħda, u fl-​aħħar bil-​qtil​—li Kajjin ġie miċħud minn Alla.​—1 Ġwann 3:​12.