Komunikazzjoni Bnina—Il-​Muftieħ Għal Żwieġ Tajjeb

Fis-​sena 1778, Robert Barron ivvinta serratura b’lieva t’azzjoni doppja li għadha l-​bażi għas-​serraturi li jintużaw illum. L-​għan tiegħu kien għall-​użu taʼ muftieħ wieħed li kapaċi jgħolli ż-​żewġ lievi tas-​serratura flimkien.

B’MOD simili, żwieġ taʼ suċċess jiddependi milli raġel u mara jaħdmu flimkien f’armonija. Biex jiżvelaw u jesperjenzaw il-​ferħ prezzjuż taʼ żwieġ tajjeb, komunikazzjoni bnina hija xi ħaġa essenzjali.

Dak li Tinvolvi l-​Komunikazzjoni Bnina

Komunikazzjoni bnina x’tinvolvi? Dizzjunarju wieħed jagħti t-​tifsira taʼ komunikazzjoni bħala “l-​għoti jew it-​tpartit taʼ ħsibijiet, opinjonijiet, jew informazzjoni bid-​diskors, bil-​kitba, jew bis-​sinjali.” Il-​komunikazzjoni għalhekk tinvolvi li taqsam sentimenti u ideat maʼ ħaddieħor. U komunikazzjoni bnina tinkludi affarijiet li huma edifikanti, rifreskanti, virtużi, li ħaqqhom it-​tifħir, u li jikkonslaw.—Efesin 4:29-32; Filippin 4:8.

Komunikazzjoni bnina tintgħamel possibbli permezz taʼ fidi f’xulxin, fiduċja, u fehma reċiproka. Dawn il-​kwalitajiet jirriżultaw meta ż-​żwieġ jitqies bħala relazzjoni tul il-​ħajja kollha u meta jkun hemm determinazzjoni ġenwina li dan jirnexxi. Billi kkummenta dwar relazzjoni bħal din, Joseph Addison, kittieb tas-​seklu 18, kiteb: “Żewġ persuni li għażlu lil xulxin minn fost il-​bnedmin l-​oħrajn kollha, bl-​iskop li jkunu taʼ faraġ u taʼ pjaċir għal xulxin, b’dik l-​azzjoni ntrabtu biex ikunu ferriħin, grazzjużi, diskreti, lesti li jaħfru, paċenzjużi, u ferħanin, inkwantu għall-​fraġilitajiet u l-​perfezzjonijiet taʼ xulxin, sa l-​aħħar taʼ ħajjithom.” Kemm hija hienja unjoni bħal din! U ż-​żwieġ tiegħek jistaʼ jkun imżejjen b’dawn il-​kwalitajiet bħal ġawhar, għax jistgħu jkunu tiegħek permezz taʼ komunikazzjoni bnina.

Ostakli għal Komunikazzjoni Bnina

Il-​biċċa l-​kbira tal-​koppji jidħlu għaż-​żwieġ b’ottimiżmu, saħansitra b’ewforja. Madankollu, għal bosta wħud l-​ewforja malajr tevapora, u l-​ottimiżmu jisparixxi. Iċ-​ċertezza għandha mnejn tinbidel f’taħlita morra taʼ frustrazzjoni, rabja, ostilità, u saħansitra antipatija kbira. Iż-​żwieġ imbagħad isir sitwazzjoni taʼ sempliċi ssaportar “sakemm il-​mewt tifridna.” Allura, biex titjieb jew tibqaʼ teżisti l-​komunikazzjoni bnina, li hija neċessarja għal żwieġ tajjeb, ċerti ostakli jridu jingħelbu.

Ostaklu veru għal komunikazzjoni bnina jistaʼ jkun il-​biżaʼ minn kif sieħeb fiż-​żwieġ se jirreaġixxi għal ċerta informazzjoni jew xewqa espressa. Per eżempju, jistaʼ jitqanqal il-​biżaʼ taʼ rifjut wara li wieħed isir jaf li qed tiżviluppa xi diżabilità persunali serja. Dak li jkun kif se jispjega lill-​persuna l-​oħra li l-​proċedura li riesqa se tbiddel drastikament l-​apparenza tiegħu jew l-​abbiltà li jaħdem? F’każijiet bħal dawn, jinħtieġu iktar minn qatt qabel komunikazzjoni onesta u ppjanar bil-​ħsieb għall-​futur. Kliem kontinwu li jassigura li hemm l-​imħabba, flimkien maʼ ġesti spissi taʼ tenerezza, se jikkomunikaw interess persunali li se jgħin biex jippromwovi żwieġ tassew sodisfaċenti. Dan il-​proverbju jgħodd b’mod speċjali fiż-​żwieġ: “Il-​ħabib iħobbok kull ħin, bħal ħuk imwieled għal żmien l-​hemm.”—Proverbji 17:17.

Ir-risentiment huwa ostaklu ieħor għal komunikazzjoni bnina. Bix-​xieraq intqal li żwieġ hieni huwa l-​unjoni taʼ tnejn min-​nies li jafu jaħfru. Biex taqbel maʼ dik id-​deskrizzjoni, koppja miżżewġa għandha tagħmel kull sforz biex issegwi l-​parir prattiku taʼ l-​appostlu Pawlu: “Tħallux ix-​xemx tgħib fuq il-​korla tagħkom.” (Efesin 4:26) Li wieħed japplika dan il-​parir minflok ma joqgħod iżomm ir-​rabja jew ir-​risentiment f’qalbu żgur li jirrikjedi komunikazzjoni umli. L-​imseħbin fi żwieġ tajjeb ma jċedux b’mod persistenti għal rabja, tilwim, u żamma fil-​qalb. (Proverbji 30:33) Huma jipprovaw jimitaw lil Alla, li ma jżommx fil-​komma. (Ġeremija 3:12) Tabilħaqq, huma jaħfru lil xulxin minn qalbhom.—Mattew 18:35.

Ċertament li ostaklu għal kwalunkwe tip taʼ komunikazzjoni huwa s-​skiet. Dan jistaʼ jinvolvi espressjonijiet biċ-​ċiera, nifsijiet qawwijin, ġesti mekkaniċi, u li wieħed jaqaʼ fil-​muta. Sieħeb fiż-​żwieġ li jaġixxi b’dan il-​mod qed jikkomunika ċerta għamla taʼ dispjaċir. Imma t-​tlissin taʼ sentimenti persunali b’manjiera sinċiera u pjaċevoli huwa ferm iktar taʼ ġid biex itejjeb iż-​żwieġ milli huma s-​skiet u l-​geddum.

Il-fatt li wieħed jonqos li jismaʼ tajjeb jew għalkollox meta l-​persuna l-​oħra tkun qed titkellem huwa ostaklu ieħor li jrid jingħeleb sabiex ikun hemm komunikazzjoni tajba fir-​relazzjoni intima taż-​żwieġ. Forsi nkunu għajjenin wisq jew sempliċement inkunu mħabbtin wisq biex niksbu l-​enerġija mentali u emozzjonali meħtiġin biex nisimgħu lil xulxin bl-​attenzjoni. Jistgħu jinqalgħu argumenti fuq xi arranġamenti mifhumin ħażin li xi ħadd mit-​tnejn ikun ħaseb li spjegahom b’mod ċar u tond imma li l-​ieħor jinsisti li qed jismagħhom għall-​ewwel darba. Ovvjament, komunikazzjoni fjakka hija kaġun għal dawn id-​diffikultajiet.

Kif Nippromwovu Komunikazzjoni Bnina

Kemm hu importanti li ssib il-​ħin għal komunikazzjoni bnina u bl-​imħabba! Xi wħud tant iqattgħu ħin quddiem it-​TV joqogħdu jaraw il-​ħajja taʼ ħaddieħor li jibqgħalhom ftit ħin għalihom infushom. Għaldaqstant, taʼ spiss pass neċessarju għal komunikazzjoni bnina jkun li titfi t-​televixin.

Madankollu, l-​istess bħalma hemm ħin xieraq biex titkellem, hemm ħin biex toqgħod kwiet. Il-​bniedem l-​għaref qal: “Kollox għandu żmienu, . . . żmien li tiskot, u żmien li titkellem.” Tabilħaqq, hemm ukoll kliem xieraq x’tgħid. “Kelma f’waqtha, kemm hi sabiħa!” jgħid proverbju. (Koħèlet 3:1, 7; Proverbji 15:23) Mela iddetermina meta jkun l-​aħjar waqt biex toħroġ il-​punt tiegħek jew biex tesprimi x’għandek f’qalbek. Staqsi lilek innifsek: ‘Il-​persuna l-​oħra għajjiena, jew inkella tħossha rilassata u friska? Is-​suġġett li nixtieq niddiskuti għandu mnejn jiżbroffana? Il-​persuna l-​oħra għal liema ħaġa oġġezzjonat fil-​kliem li wżajt l-​aħħar li tkellimna dwar din il-​kwistjoni?’

Tajjeb li tiftakar li n-​nies jirreaġixxu l-​aħjar meta jkunu jistgħu jaraw kif il-​kooperazzjoni u l-​qbil maʼ rikjesta se jkunu taʼ benefiċċju għalihom. Jekk żviluppat xi tensjoni bejn l-​imseħbin, xi ħadd minnhom jistaʼ jkun inklinat li jgħid, “Hemm xi ħaġa li ilha ddejjaqni, u se niċċarawha issa stess!” M’għandniex xi ngħidu, il-​kliem eżatt jiddependi miċ-​ċirkustanzi, imma jistaʼ jkun aħjar li tgħid xi ħaġa hekk, “Qalbi, kont qed naħseb dwar il-​kwistjoni li tkellimna dwarha qabel u kif nistgħu insolvu l-​affarijiet.” Liema metodu se jiġi apprezzat l-​iktar?

Iva, kif jintqal il-​kliem huwa importanti ferm. L-​appostlu Pawlu kiteb: “Ħa tkun dejjem il-​kelma tagħkom kollha ħlewwa, mħawwra bil-​melħ.” (Kolossin 4:6) Stinka biex turi ħlewwa fit-​ton taʼ leħnek u fil-​kliem li tagħżel. Żomm f’moħħok li “l-​kliem ħelu bħal xehda għasel, hu ħlewwa tar-​ruħ u saħħa tal-​ġisem.”—Proverbji 16:24.

Għal xi koppji, il-​fatt li jaħdmu flimkien f’xi proġetti fid-​dar jistaʼ jipprovdi atmosfera mill-​aħjar għall-​komunikazzjoni. Kooperazzjoni bħal din tistaʼ tħeġġiġhom biex jaqsmu l-​affarijiet flimkien filwaqt li tħalli ħin biżżejjed għal konversazzjoni bnina. Għal xi miżżewġin oħrajn, ħin fil-​kwiet waħedhom flimkien mingħajr ma jipprovaw jagħmlu xi xogħol ikun aħjar u iktar iwassal għal komunikazzjoni bnina.

Taʼ spiss, nistgħu nitgħallmu ħafna jekk ninnotaw kif jikkomunikaw flimkien xi miżżewġin kompatibbli. X’ġagħalhom ikunu hekk? X’aktarx li l-​armonija tagħhom u l-​faċilità li jikkomunikaw biha rriżultaw minn sforz persunali, paċenzja, u konsiderazzjoni bl-​imħabba. Huma nfushom milli jidher kellhom jitgħallmu ħafna affarijiet, għax żwiġijiet tajbin ma jiġux awtomatikament. Mela, kemm hu importanti li tikkunsidra l-​ħarsa tal-​persuna l-​oħra, li tapprezza l-​bżonnijiet tagħha, u tikkalma b’kelma bil-​għaqal sitwazzjonijiet li jistgħu joħolqu tensjoni. (Proverbji 16:23) Mela, jekk int miżżewweġ, aħdem biex tkun bniedem li tieħu gost tgħix miegħu u li faċli li tiskuża ruħek miegħu. Dan żgur li se jkun t’għajnuna kbira f’li jagħmel iż-​żwieġ tiegħek wieħed tajjeb.

Alla Jehovah jrid li n-​nies igawdu żwiġijiet hienja u dejjiema. (Ġenesi 2:18, 21) Imma l-​muftieħ jinsab f’idejn dawk li huma magħqudin fiż-​żwieġ. Żewġ persuni mimlijin imħabba li tassew jaħdmu flimkien huma meħtiġin biex jiftħu l-​bieb għal żwieġ taʼ suċċess billi jużaw bis-​sengħa l-​arti taʼ komunikazzjoni bnina.

[Stampa f’paġna 22]

Jekk jintefa t-​TV ikun hemm iktar ħin għal komunikazzjoni

[Stampi f’paġna 23]

Komunikazzjoni bnina tgħin biex il-​qlub jintrabtu f’imħabba dejjiema