Fatturi Essenzjali li Jgħinuk Tikkomunika mas-​Sieħeb jew is-​Sieħba Tiegħek

‘MA JMISSNIX għedt hekk.’ ‘M’esprimejtx ruħi b’mod ċar.’ Qatt ħassejtek hekk wara li pprovajt tikkomunika mas-​sieħeb jew is-​sieħba tiegħek? Il-​komunikazzjoni hija sengħa li trid tiġi żviluppata. Bħal kull sengħa oħra, ħafna nies għandhom il-​kapaċità li jħaddmuha faċilment, filwaqt li oħrajn isibuha iżjed diffiċli. Jekk int wieħed minn dawk li jsibuha diffiċli, xorta waħda huwa possibbli li titgħallem twassal il-​ħsibijiet tiegħek b’manjiera ħelwa, li tikkomunika b’mod effettiv.

Kultant il-​kultura tinfluwenza lin-​nies b’ċertu mod meta jiġu biex jittrattaw mas-​sieħeb jew is-​sieħba tagħhom. Għandu mnejn intqal lill-​irġiel: ‘Biex tkun raġel ma tridx titkellem ħafna.’ Irġiel li jitkellmu ħafna jitqiesu bħala moħħ ir-​riħ u li m’humiex sinċieri. Huwa minnu li l-​Bibbja tgħid: “Kull bniedem irid ikun ħafif biex jismaʼ, tqil biex jitkellem.” (Ġakbu 1:​19) Madankollu, din it-​twissija tapplika kemm għall-​irġiel kif ukoll għan-​nisa u turi li l-​komunikazzjoni tinvolvi iktar milli sempliċement titkellem. Tnejn min-​nies jistgħu jkunu qed jitkellmu għal ħin twil, iżda x’jiġri jekk jonqsu li jisimgħu lil xulxin? X’aktarx, ma jkunx hemm komunikazzjoni vera. Il-​biċċa l-​kbira mill-​komunikazzjoni li tirnexxi, bħalma turi l-​iskrittura t’hawn fuq, hija s-​sengħa taʼ li tismaʼ.

Nikkomunikaw Mingħajr Kliem

F’xi pajjiżi, huwa mistenni li n-​nisa miżżewġin iżommu l-​opinjonijiet tagħhom għalihom infushom. L-​irġiel miżżewġin għandhom jibqgħu indifferenti b’mod riżolut lejn kwistjonijiet fil-​familja. F’ambjent bħal dan, ir-​raġel u l-​mara ma jafux xi jrid is-​sieħeb jew is-​sieħba f’xi ċirkustanza partikulari. Xi nisa miżżewġin isiru tas-​sengħa f’li jagħrfu l-​bżonnijiet taʼ żwieġhom u jaġixxu malajr sabiex jissodisfawhom. F’każi bħal dawn ikun hemm tip taʼ komunikazzjoni bla kliem bejn ir-​raġel u l-​mara. Però, normalment komunikazzjoni bħal din tkun ġejja minn naħa waħda biss. Filwaqt li l-​mara għandha mnejn titgħallem tagħraf dak li żewġha jkun qed jaħseb jew iħoss, ir-​raġel rari huwa mistenni li jiżviluppa l-​istess sengħa u jagħraf is-​sentimenti taʼ martu.

Huwa minnu li f’xi kulturi, l-​irġiel jagħrfu l-​bżonnijiet emozzjonali tan-​nisa tagħhom u jipprovaw jissodisfawhom. Madankollu, anki f’kulturi bħal dawn ħafna żwiġijiet kieku jibbenefikaw minn komunikazzjoni aħjar.

Il-​Komunikazzjoni Hi Vitali

Komunikazzjoni sinċiera tistaʼ tevita nuqqas taʼ ftehim u miżinterpretazzjonijiet. Kmieni fl-​istorja taʼ l-​Iżraelin, it-​tribujiet taʼ Ruben, Gad, u n-​nofs tribù taʼ Manassi li kienu jgħammru lejn il-​lvant tax-​Xmara Ġordan bnew “artal kbir li jidher” ħdejn il-​Ġordan. Tribujiet oħra fehmu ħażin l-​azzjonijiet tagħhom. Peress li ħasbu li ħuthom tan-​naħa l-​oħra tal-​Ġordan kienu kkommettew l-​apostasija, it-​tribujiet fuq in-​naħa tal-​punent ippreparaw ruħhom biex jiggwerraw mar-​“ribelli.” Iżda qabel ma ħarġu għall-​gwerra huma bagħtu delegazzjoni biex tikkomunika mat-​tribujiet tal-​lvant. X’azzjoni għaqlija kienet din! Huma sabu li l-​artal ma kienx biex isiru offerti tal-​ħruq u sagrifiċċji kontra l-​liġi. Minflok, it-​tribujiet tal-​lvant beżgħu li fil-​futur it-​tribujiet l-​oħrajn jgħidulhom: “Intom ma għandkomx sehem fil-​Mulej.” L-​artal kellu jservi taʼ xiehda li huma wkoll kienu aduraturi taʼ Ġeħova. (Ġożwè 22:​10-​29) Huma semmew l-​artal Xhud, x’aktarx minħabba li serva bħala xiehda li għalihom Ġeħova kien l-​Alla l-​veru.​—Ġożwè 22:34.

L-ispjegazzjoni tagħhom kienet biżżejjed biex tikkonvinċi lit-​tribujiet l-​oħrajn. Dawn kienu biddlu l-​ħsieb li jieħdu azzjoni kontra ż-​żewġ tribujiet u nofs. Iva, komunikazzjoni sinċiera u bil-​miftuħ biegħdet konflitt bl-​armi. Iktar tard, meta Iżrael irribella kontra Alla Ġeħova, ir-​raġel figurattiv tagħhom, qalilhom li kellu ‘jkellem lil qlubhom bil-​ħniena.’ (Hosegħa 2:16 [2:​14, NW]) X’mudell mill-​isbaħ għal dawk miżżewġin! Iva, stinka biex tilħaq qalb is-​sieħeb jew is-​sieħba tiegħek sabiex hu jew hi tkun tistaʼ tifhem is-​sentimenti tiegħek. Dan huwa importanti, speċjalment meta jkun hemm emozzjonijiet qawwijin. “Il-​kliem ma jiswiex wisq, xi wħud jistgħu jgħidu,” tosserva Pattie Mihalik, ġurnalista fl-​Istati Uniti, “imma l-​kliem jistaʼ jkun imprezzabbli. U filwaqt li xi wħud jistgħu jsibuha diffiċli jesprimu s-​sentimenti, ir-​riżultat jistaʼ jrendi ħafna iktar mill-​flus fil-​bank.”

Kompli Żviluppa s-​Sengħa tal-​Komunikazzjoni

‘Iż-​żwieġ tagħna kien falliment mill-​bidu,’ xi wħud jistgħu jsostnu. ‘Dan iż-​żwieġ ma jistax jiġi salvat,’ oħrajn jistgħu jikkonkludu. Huma jistgħu jħossu li huwa impossibbli li jtejbu s-​sengħa tal-​komunikazzjoni wara żżwieġ. Madankollu, aħseb f’dawk li jgħixu f’soċjetajiet fejn iż-​żwiġijiet huma rranġati mill-​qraba. Bosta nies f’kulturi bħal dawn fl-​aħħar jistabbilixxu komunikazzjoni b’suċċess fil-​ħajja miżżewġa tagħhom.

Koppja waħda f’pajjiż Orjentali ngħaqdu fi żwieġ irranġat. Medjatur kien ġie mitlub jivvjaġġa distanza twila biex isib għarusa għar-​raġel. Xorta waħda, il-​koppja miżżewġa, li għexu kważi 4,000 sena ilu, urew sengħa li tispikka fl-​arti tal-​komunikazzjoni. Ir-​raġel, Iżakk, iltaqaʼ mal-​medjatur u maʼ dik li kellha tkun martu, ġo għalqa. Ir-​raġel li qeda bħala medjatur “qal lil Iżakk kull ma kien għamel.” Ir-​rakkont fil-​Bibbja dwar dan iż-​żwieġ ikompli: “U Iżakk daħħalha [lil Rebekka] fl-​għarix taʼ Sara ommu [dan il-​ġest kien turija taʼ żwieġ uffiċjali], u ħa ’l Rebekka u saret martu u ħabbha; u hekk tfarraġ Iżakk wara l-​mewt taʼ ommu.”​—Ġenesi 24:​62-​67.

Innota li Iżakk l-​ewwel semaʼ r-​rapport u wara dan hu ħa lil Rebekka bħala martu. Il-​medjatur kien qaddej taʼ min jafdah u kien devot lejn Alla Ġeħova, li lilu Iżakk kien iqim. Iżakk kellu raġuni tajba biex jafda lil dan ir-​raġel. Minn dakinhar ’l hemm Iżakk sar ‘iħobbha’ lil Rebekka, il-​mara li kien iżżewweġ.

Irnexxielhom Iżakk u Rebekka jiżviluppaw komunikazzjoni tajba? Wara li Għesaw, it-​tifel tagħhom, iżżewweġ lil tnejn mill-​bniet taʼ Ħet, inqalgħet problema serja fil-​familja. Rebekka baqgħet tgħid lil Iżakk: “Iddejjaqt minn ħajti minħabba l-​bniet taʼ Ħet. Jekk Ġakobb [it-tifel iż-​żgħir tagħhom] jiżżewweġ xi waħda mill-​bniet taʼ Ħet . . . , xi tkun tiswieli ħajti?” (Ġenesi 26:34; 27:46) Bla dubju hi esprimiet it-​tħassib tagħha b’mod ċar.

Iżakk qal lil Ġakobb, it-​tewmi t’Għesaw, biex ma jiħux b’martu lil waħda mill-​bniet taʼ Kangħan. (Ġenesi 28:​1, 2) Rebekka kienet għamlitu l-​punt tagħha. Din il-​koppja kien irnexxielha titkellem dwar suġġett sensittiv ħafna għall-​familja, u b’hekk ipprovdiet eżempju tajjeb għalina llum. Iżda xi ngħidu jekk il-​koppja ma tistax tasal għal qbil? X’jistaʼ jsir?

Meta Jkun Hemm Nuqqas taʼ Qbil

Jekk hemm xi nuqqas taʼ qbil serju bejnek u bejn is-​sieħeb jew is-​sieħba tiegħek, taġixxix miegħu jew magħha billi ma tkellimhiex. Dan jistaʼ jwassal messaġġ ċar ħafna: Int m’intix ferħan, u trid li lanqas is-​sieħeb jew is-​sieħba tiegħek ma tkun ferħana. Xorta waħda, il-​parti l-​oħra għandha mnejn ma tifhimx sewwa x-​xewqat u s-​sentimenti tiegħek.

Forsi int u s-​sieħeb jew is-​sieħba tiegħek għandkom bżonn tikkomunikaw b’mod sinċier. Jekk is-​suġġett huwa sensittiv, probabbli ma jkunx faċli tibqaʼ kalm. Darba minnhom, Abraham u Sara, il-​ġenituri taʼ Iżakk, iffaċċjaw sitwazzjoni diffiċli. Minħabba li Sara kienet ħawlija, hi segwiet id-​drawwa taʼ dak iż-​żmien u tatu lil Ħagar, il-​qaddejja tagħha, bħala konkubina biex ikollhom it-​tfal. Ħagar wildet iben lil Abraham, Ismagħel. Madankollu, iktar tard Sara nfisha ħarġet tqila u wildet iben lil Abraham, Iżakk. Meta wasal iż-​żmien biex Iżakk jinfatam, Sara nnotat lil Ismagħel iwaqqaʼ lil binha għaċ-​ċajt. Għalhekk, Sara, billi ħasset li binha setaʼ jkun fil-​periklu, ħeġġet lil Abraham ikeċċi lill-​qaddejja u lil Ismagħel. Iva, Sara tkellmet dwar kif ħassitha b’mod dirett. Iżda dak li talbet m’għoġbu xejn lil Abraham.

Id-differenza kif ġiet irranġata? Ir-​rakkont fil-​Bibbja jgħid hekk: “Alla qal lil Abraham: ‘La tinkwetax għaż-​żagħżugħ u għall-​qaddejja; kull ma qaltlek Sara, ismaʼ minn kliemha, għax b’Iżakk jissemma nislek.’” Abraham semaʼ u aġixxa fi qbil mad-​direzzjoni t’Alla Ġeħova.​—Ġenesi 16:​1-4; 21:​1-​14.

‘Tabilħaqq,’ int forsi tgħid, ‘kieku Alla kellu jkellimna mis-​sema, faċilment naslu għal qbil!’ Dan iwassalna għal fattur ieħor biex insolvu tilwim fiż-​żwieġ. Koppji miżżewġin jistgħu jisimgħu lil Alla. Kif? Billi jaqraw il-​Kelma t’Alla flimkien u jaċċettaw dak li tgħid bħala direzzjoni t’Alla.​—1 Tessalonikin 2:​13.

Waħda mara miżżewġa li kienet Kristjana matura qalet: “Ħafna drabi, meta mara żagħżugħa tiġi għandi għal xi parir fuq iż-​żwieġ, jien nistaqsiha jekk hi u żewġha humiex qed jaqraw il-​Bibbja flimkien. Ħafna minn dawk li jkollhom problemi fiż-​żwieġ tagħhom m’għandhomx din id-​drawwa.” (Titu 2:​3-5) Ilkoll nistgħu nibbenefikaw mill-​osservazzjoni tagħha. Aqra l-​Kelma t’Alla mas-​sieħeb jew is-​sieħba tiegħek regolarment. B’dan il-​mod, int “tismaʼ” kliem Alla dwar kif għandek iġġib ruħek jum wara jum. (Isaija 30:21) Madankollu oqgħod attent: Tużax il-​Bibbja bħala bastun biex tweġġaʼ lis-​sieħeb jew is-​sieħba tiegħek, billi kontinwament tipponta lejn skritturi li int tħoss li s-​sieħeb jew is-​sieħba tiegħek qed tonqos milli tapplika. Minflok, ipprova ara kif it-​tnejn li intom tistgħu tpoġġu fil-​prattika dak li taqraw.

Jekk qed tipprova tittratta maʼ problema diffiċli, għala ma tiċċekkjax il-​Watch Tower Publications Indexa fuq dak li jikkonċerna lilek b’mod partikulari? Jistaʼ jagħti l-​każ li int qed tieħu ħsieb il-​ġenituri tiegħek li huma mdaħħlin fiż-​żmien, u dan qed joħloqlok tensjoni fiż-​żwieġ. Minflok ma targumenta dwar x’għandu jew m’għandux jagħmel is-​sieħeb jew is-​sieħba tiegħek, għaliex ma tpoġġux bil-​qiegħda u tiċċekkjaw l-​Index flimkien? L-​ewwel, fittxu taħt it-​titlu “Parents.” Forsi tkunu tridu tfittxu r-​referenzi taħt is-​sottitli, bħal per eżempju “caring for aged parents” (nieħdu ħsieb il-​ġenituri mdaħħlin fiż-​żmien). Flimkien aqraw l-​artikli relatati mill-​pubblikazzjonijiet tax-​Xhieda taʼ Ġeħova. Tistaʼ tkun sorpriż dwar kemm int u s-​sieħeb jew is-​sieħba tiegħek tistgħu tibbenefikaw mill-​informazzjoni bbażata fuq il-​Bibbja, li għenet lil ħafna Kristjani sinċieri.

Se tiġu megħjunin tiksbu ħarsa reali tal-​problema tagħkom jekk tiċċekkjaw dawn ir-​referenzi u taqraw il-​materjal flimkien. Se ssibu skritturi kwotati u ċitati li juru l-​ħarsa t’Alla. Fittxuhom fil-​Bibbja u aqrawhom flimkien. Iva, intom se tisimgħu dak li jgħid Alla fuq il-​problema li qed tiffaċċjaw!

Żomm Komunikazzjoni Tajba

Qatt ipprovajt tiftaħ bieb li ma ntużax għal xi żmien? B’ħafna żaqżiq, iċ-​ċappetti msaddin bil-​mod il-​mod iċedu. Iżda xi ngħidu kieku l-​bieb intuża regolarment u ċ-​ċappetti tiegħu ngħataw iż-​żejt? Kien ikun faċli biex tiftħu. L-​istess jiġri fil-​“bieb” tal-​komunikazzjoni. Bħalma huwa iktar faċli li tiftaħ bieb li jintuża regolarment u li jingħata ż-​żejt, jekk tiħduha drawwa li tikkomunikaw spiss u bi mħabba Kristjana se jkun iktar faċli li tikkomunikaw il-​ħsibijiet tagħkom anki meta jkun hemm nuqqas taʼ qbil serju.

Minn xi mkien trid tibda. Għalkemm il-​komunikazzjoni tistaʼ tirrikjedi ħafna sforz fil-​bidu, aħdem fuqha. Imbagħad tistaʼ verament tgawdi relazzjoni iżjed faċli mas-​sieħeb jew is-​sieħba tiegħek, u dan iwassal biex tibdew tifhmu iktar lil xulxin.

[Nota taʼ taħt]

[Stampa f’paġna 7]

Meta tiffaċċja nuqqas taʼ qbil, se tfittex int id-​direzzjoni t’Alla?