Inrażżnu l-​Pjaga taʼ l-​Inugwaljanza

Il-​Ħallieq dalwaqt se jġib l-​ugwaljanza li l-​bnedmin tant jixtiequ. Sadanittant, aħna nistgħu nieħdu passi biex għall-​inqas inrażżnu l-​pjaga taʼ l-​inugwaljanza li teffettwa lilna u lill-​familji tagħna. Bħalma osserva Nelson Mandela, ex-president taʼ l-​Afrika t’Isfel, “huwa l-​mod kif nużaw dak li għandna, u mhux dak li ningħataw, li jiddistingwi persuna minn oħra.”

L-​ISTORJA tivverifika kliemu. Ħafna huma dawk l-​irġiel u nisa li ngħataw ftit fi twelidhom imma li, billi wżaw dak li kellhom, kisbu suċċessi li ġagħluhom jispikkaw fuq sħabhom li forsi kienu ngħataw iktar minnhom. Mill-​banda l-​oħra, individwi oħrajn li kienu mberkin b’ħafna vantaġġi mit-​twelid ħlew dak li kellhom u m’għamlux użu mill-​potenzjal kollu tagħhom.

Uża Dak li Għandek bl-​Aħjar Mod li Tistaʼ!

Ix-​Xhieda taʼ Jehovah huma interessati ferm f’li jgħinu lin-​nies jiksbu għarfien taʼ l-​iskopijiet t’Alla permezz taʼ studju tal-​Bibbja. Madankollu, huma jirrealizzaw li biex jibbenefikaw bis-​sħiħ mill-​informazzjoni Biblika, in-​nies iridu jkunu letterati. Għal din ir-​raġuni, ix-​Xhieda taʼ Jehovah għallmu lil għaxriet t’eluf taʼ nies jaqraw u jiktbu, inkluż 23,000 ruħ (sa nofs is-​snin disgħin) f’pajjiż wieħed biss taʼ l-​Afrika tal-​Punent. B’referenza għas-​servizz soċjali impressjonanti li jipprovdu x-​Xhieda taʼ Jehovah, is-​San Francisco Examiner osservat: “Tistaʼ tqishom bħala ċittadini mudell. Huma diliġenti fil-​ħlas tat-​taxxi, jieħdu ħsieb il-​morda, u jitħabtu biex ma jħallux nies illetterati.”

Iktar minn hekk, permezz taʼ kors progressiv fuq kif wieħed ikun kelliemi tajjeb, ix-​Xhieda taʼ Jehovah ħarrġu mijiet t’eluf taʼ nies biex isiru kelliema kwalifikati, li huma kapaċi jesprimu lilhom infushom b’mod fluwenti fil-​pubbliku. Fost dawn l-​eluf hemm uħud li darba kellhom problemi serji tad-​diskors. Ikkunsidra lir-​raġel mill-​Afrika t’Isfel li jikteb: “Tant kont intemtem li kont sirt introvert, u normalment kont inserraħ fuq oħrajn biex jitkellmu għalija. . . . Meta nktibt fl-​Iskola tal-​Ministeru Teokratiku u kelli nagħmel qari mill-​Bibbja quddiem udjenza żgħira . . . , tant temtimt bl-​ikrah li ma kontx kapaċi nispiċċa l-​inkarigu fil-​ħin allokat. Wara l-​laqgħa [dak li jagħti l-​pariri] tani parir bil-​ħlewwa. Hu ssuġġerixxa li nipprattika naqra ngħajjat waħdi. Jien hekk għamilt, billi kont inqattaʼ ftit ħin, jum wara jum, naqra ngħajjat mill-​Bibbja tiegħi u mir-​rivista Torri taʼ l-​Għassa.” Dan ir-​raġel tant għamel progress li issa jagħti taħditiet pubbliċi lil udjenzi li jkunu jgħoddu bil-​mijiet, saħansitra bl-​eluf.

Ingawdu l-​Ugwaljanza fost l-​Aħwa

Fejn jidħlu l-​edukazzjoni, il-​kura tas-​saħħa, u l-​qagħda ekonomika u soċjali, iċ-​ċirkustanzi fost ix-​Xhieda taʼ Jehovah jvarjaw bil-​kbir. Dawn id-​differenzi sempliċement jirriflettu l-​kundizzjonijiet imperfetti tad-​dinja li jgħixu fiha. Imma f’kuntrast maʼ gruppi reliġjużi oħrajn, il-​preġudizzji razzjali, soċjali, u ekonomiċi tistaʼ tgħid li tneħħew minn fost il-​membri tagħhom.

Huma wettqu dan billi għamlu l-​aħjar li setgħu f’li jipprattikaw dak li tgħallmu mill-​Bibbja. Huma jħaddnu b’qalbhom kollha prinċipji Bibliċi bħal: “Il-​Mulej ma jarax bħalma jara l-​bniedem, dak biss li jidher fl-​għajn, imma l-​qalb.” (1 Samwel 16:7) “Alla ma jħares lejn wiċċ ħadd, imma jilqaʼ lil kull min għandu l-​biżaʼ tiegħu u jagħmel is-​sewwa, ikun minn liema poplu jkun.” (Atti 10:34, 35) “Troddu lil ħadd deni b’deni. Ħa jkun ħsiebkom filli tagħmlu t-​tajjeb quddiem il-​bnedmin kollha. Jekk jistaʼ jkun, sakemm ikun ġej minnkom, għixu fil-​paċi maʼ kulħadd.”—Rumani 12:17, 18; ara wkoll l-1 Timotju 6:17-19; Ġakbu 2:5, 9.

Billi jżommu mill-​qrib maʼ dawn il-​prinċipji Bibliċi li jippromwovu l-​unità, ix-​Xhieda taʼ Jehovah jirrifjutaw li jittolleraw fost il-​membri tagħhom kwalunkwe eżerċitar taʼ inugwaljanza bbażata fuq differenzi razzjali, soċjali, jew ekonomiċi. Per eżempju, dawn il-​fatturi m’għandhom ebda effett meta jiġi deċiż min se jingħata privileġġi taʼ servizz fil-​kongregazzjoni Kristjana. Karigi taʼ responsabbiltà, bħalma huma t-​tagħlim u l-​indokrar, jingħataw biss fuq il-​bażi taʼ kwalifiki spiritwali.—1 Timotju 3:1-13; Titu 1:5-9.

Fil-każ taʼ individwi li batew taħt l-​inugwaljanzi taʼ dinja preġudikata, kemm hu rifreskanti li jkollhom oħrajn li jittrattawhom bħala aħwa rġiel u nisa li huma ndaqs f’għajnejn il-​Ħallieq tagħhom! Martina tistaʼ tixhed dan. Wara li missierha abbanduna l-​familja tagħha, hi trabbiet f’familja fqira, b’ġenitur wieħed. Taʼ spiss kienet tiġi trattata bħala waħda mwarrba mis-​soċjetà, ftit li xejn kellha fiduċja fiha nfisha, u kienet issibha iebsa li tingwalaha m’oħrajn. Hi żviluppat attitudni taʼ x’jimpurtani. Madankollu, l-​affarijiet inbidlu wara li bdiet tistudja l-​Bibbja u saret waħda mix-​Xhieda taʼ Jehovah. Hi tgħid: “Xorta għadni rrid niġġieled ħsibijiet negattivi, imma issa nistaʼ nkampa aħjar mal-​problema. Ir-​rispett lejja nnifsi tjieb, u sirt nitkellem b’iktar kunfidenza. Il-​verità tatni sens taʼ responsabbiltà. Issa naf li Jehovah jħobbni u li l-​ħajja hi vallapena li tgħixha.”

Bħala grupp internazzjonali taʼ Kristjani, ix-​Xhieda taʼ Jehovah f’iktar minn 230 pajjiż igawdu grad taʼ ugwaljanza li hu verament uniku fid-​dinja tal-​lum. Tistaʼ xi organizzazzjoni reliġjuża oħra tgħidu dan u tappoġġah bil-​fatti?

M’għandniex xi ngħidu, ix-​Xhieda taʼ Jehovah huma realistiċi. Mill-​ewwel jammettu li minħabba li huma riżultat t’ambjent imperfett, m’għandhomx il-​ħila jneħħu l-​inugwaljanza fost il-​bnedmin iktar milli jistgħu dawk kollha li pprovaw jagħmlu dan matul is-​sekli​—u fallielhom. Minkejja dan, huma jithennew minħabba l-​fatt li fost il-​membri tagħhom, twettaq ħafna biex titrażżan din il-​pjaga qerrieda. U b’fidi qawwija fil-​wegħda t’Alla, huma jħarsu ’l quddiem lejn dinja ġdida taʼ tjieba li fiha l-​inugwaljanza se tkun għal dejjem xi ħaġa tal-​passat.

Iva, l-​bnedmin ubbidjenti kollha dalwaqt se tingħatalhom lura l-​ugwaljanza “fid-​dinjità u fid-​drittijiet” li l-​Ħallieq tagħhom kellu l-​iskop li jgawdu fil-​bidu. Xi ħsieb sabiħ! U din id-​darba se jkun realtà!

[Stampa f’paġna 7]

Ix-​Xhieda taʼ Jehovah jitħabtu biex ma jħallux nies illetterati billi jgħallmu għaxriet t’eluf taʼ nies jaqraw u jiktbu

[Stampa f’paġna 8]

Il-​verità tal-​Bibbja tgħin biex jitneħħew għalkollox preġudizzji razzjali, soċjali, u ekonomiċi