Huwa x-​Xitan li Jġib il-​Mard Fuqna?

IL-​MARD QATT MA MISSU EŻISTA. Alla ħalaqna biex ngħixu għal dejjem b’saħħa perfetta. Kien minħabba Satana, ħliqa spirtu, li l-​mard, l-​uġigħ, u l-​mewt laqtu lill-​familja umana meta dan waqqaʼ fid-​dnub lill-​ewwel ġenituri tagħna, Adam u Eva.—ĠENESI 3:1-5, 17-19; RUMANI 5:12.

IFISSER dan li l-​mard kollu huwa riżultat dirett taʼ ndħil mid-​dinja taʼ l-​ispirti? Bħalma rajna fl-​artiklu taʼ qabel, ħafna nies illum hekk jaħsbuha. In-​nanna taċ-​ċkejkna Owmadji kienet waħda minn dawn. Imma d-​dijarea li kellha Owmadji​—marda li xi kultant tkun fatali fost it-​tfal żgħar fit-​tropiki—​tassew kienet kaġunata minn spirti li ma jidhrux?

L-​Irwol taʼ Satana

Il-​Bibbja twieġeb din il-​mistoqsija b’mod ċar ħafna. L-​ewwelnett, din turi li l-​ispirti taʼ l-​antenati tagħna ma jistgħux jeffettwaw lill-​ħajjin. Meta n-​nies imutu, dawn “ma [jkunu] jafu xejn.” M’għandhomx xi spirtu li jibqaʼ jgħix wara l-​mewt. Huma jinsabu reqdin fil-​qabar, fejn “ma jkunx hemm ħidma jew ħsieb, xjenza jew għerf.” (Koħèlet 9:5, 10) Bl-​ebda mod ma jistgħu l-​mejtin imarrdu lill-​ħajjin!

Madankollu, il-​Bibbja tirrevela li l-​ispirti mill-​agħar jeżistu tassew. L-​ewwel ribell fl-​univers kollu kien il-​ħliqa spirtu li issa nafuh bħala Satana. Oħrajn ngħaqdu miegħu u bdew jissejħu demonji. Jistgħu Satana u d-​demonji jikkaġunaw il-​mard? Din il-​ħaġa ġrat. Xi wħud mill-​mirakli taʼ fejqan li wettaq Ġesù kienu jinvolvu t-​tkeċċija tad-​demonji. ((Luqa 9:37-43; 13:10-16) Madankollu, ħafna mill-​fejqan li wettaq Ġesù kellu x’jaqsam maʼ mard li ma kienx kaġunat direttament mid-​demonji. (Mattew 12:15; 14:14; 19:2) L-​istess illum, ġeneralment il-​mard jiġi minn kawżi naturali, u mhux soprannaturali.

Xi ngħidu għas-​seħer? Proverbji 18:10 jassigurana: “Isem il-​Mulej hu torri qawwi; fih jistkenn il-​ġust b’moħħu mistrieħ.” Ġakbu 4:7 jgħid: “Ieqfu lix-​xitan, u hu jaħrab minnkom.” Iva, Alla jistaʼ jipproteġi lin-​nies leali tiegħu mis-​seħer u minn kwalunkwe qawwa mhix normali oħra. Dan huwa mod wieħed kif għandu x’jaqsam il-​kliem taʼ Ġesù: “[I]l-verità teħliskom.”—Ġwann 8:32.

‘Xi ngħidu dwar Ġob?’ xi wħud għandhom mnejn jistaqsu. ‘Mhux spirtu mill-​agħar kien dak li marrdu?’ Iva, il-​Bibbja tgħid li kien Satana li kkaġuna l-​mard taʼ Ġob. Imma l-​każ taʼ Ġob ma kienx wieħed tas-​soltu. Ġob kien ilu jgawdi protezzjoni divina kontra attakki demoniċi diretti. Imbagħad Satana sfida lil Jehovah biex jolqot lil Ġob, u peress li kienu involuti kwistjonijiet kbar, f’dan il-​każ partikulari Jehovah neħħa ftit mill-​protezzjoni li kien ta lill-​adoratur tiegħu.

Madankollu, Alla għamel limiti. Meta ppermetta lil Satana biex iweġġaʼ lil Ġob, Satana setaʼ jġib il-​mard fuq Ġob għal perijodu taʼ żmien, imma ma setax joqtlu. (Ġob 2:5, 6) Eventwalment, is-​sofferenza taʼ Ġob intemmet, u Jehovah ppremjah bl-​abbundanza għall-​integrità li kien wera. (Ġob 42:10-17) Il-​prinċipji li ġew provati permezz taʼ l-​integrità taʼ Ġob ilhom żmien twil dokumentati fil-​Bibbja u huma evidenti għal kulħadd. M’hemmx bżonn taʼ każ ieħor bħal dan biex jiġi stabbilit preċedent.

X’Inhi t-​Tattika taʼ Satana?

Kważi f’kull każ, l-​unika konnessjoni bejn Satana u l-​mard li jolqot lin-​nies hija l-​fatt li Satana ttanta lill-​ewwel koppja umana, u t-​tnejn li huma waqgħu fid-​dnub. Hu u d-​demonji tiegħu m’humiex il-​kawża diretta taʼ kull marda li teżisti. Madankollu, Satana m’huwiex se joqgħod jiddejjaq biex jinfluwenzana ħalli nagħmlu deċiżjonijiet bla għaqal u nikkompromettu l-​fidi tagħna, u minħabba f’hekk nagħmlu ħsara lil saħħitna. Hu m’għamilx xi magħmul fuq Adam u Eva, qatilhom, jew laqathom b’xi marda. Hu pperswada lil Eva biex ma tobdix lil Alla, u Adam m’obdiex bħalha. Il-​mard u l-​mewt kienu parti mill-​konsegwenzi.—Rumani 5:19.

Darba, profeta żleali jismu Balgħam tqabbad mis-​sultan taʼ Mowab biex jisħet lill-​ġens taʼ Iżrael, li kien waqqaf it-​tined qrib iżżejjed tal-​fruntieri taʼ Mowab. Balgħam ipprova jisħet lil Iżrael, imma ma rnexxilux għax il-​ġens kien taħt il-​protezzjoni taʼ Jehovah. Imbagħad il-​Mowabiti qatgħuha li jħajru lill-​Iżraeliti biex jikkommettu idolatrija u immoralità sesswali. Din it-​tattika rnexxiet, u Iżrael tilef il-​protezzjoni taʼ Jehovah.—Numri 22:5, 6, 12, 35; 24:10; 25:1-9; Apokalissi 2:14.

Nistgħu nitgħallmu tagħlima importanti minn din il-​ġrajja tal-​qedem. L-​għajnuna divina tagħti protezzjoni lill-​adoraturi leali taʼ Jehovah mill-​attakki diretti taʼ l-​ispirti mill-​agħar. Madankollu, Satana għandu mnejn jipprova jġiegħel lil individwi biex jikkompromettu l-​fidi tagħhom. Forsi jistaʼ jipprova jħajjarhom biex jaqgħu fl-​immoralità. Jew, bħal iljun jgħajjat, jistaʼ jipprova jbeżżagħhom biex jaġixxu b’tali mod li ma jibqgħux igawdu l-​protezzjoni t’Alla. (1 Pietru 5:8) Huwa għalhekk li l-​appostlu Pawlu jsejjaħ lil Satana “dak li kellu l-​mewt f’idejh [“dak li għandu l-​mezzi biex jikkaġuna l-​mewt,” NW].”—Lhud 2:14.

In-nanna taʼ Owmadji pprovat tipperswadi li Hawa biex tuża l-​amuleti u l-​fetiċċi bħala protezzjoni kontra l-​mard. X’kien jiġri li kieku Hawa ċediet? Hi kienet tkun uriet nuqqas taʼ fiduċja sħiħa f’Alla Jehovah, u ma kinitx tkun tistaʼ tibqaʼ fiduċjuża fil-​protezzjoni tiegħu.—Eżodu 20:5; Mattew 4:10; 1 Korintin 10:21.

Satana ipprova l-​persważjoni fil-​każ taʼ Ġob ukoll. Li jiħodlu l-​familja, ġidu, u saħħtu ma kienx biżżejjed. Ġob ngħatalu wkoll parir ħażin ħafna mingħand martu meta din qaltlu: “Isħet ’l Alla u mut!” (Ġob 2:9) Imbagħad tlett “iħbieb” żaru lil Ġob bil-​ħsieb li jikkonvinċuh li kien it-​tort tiegħu li issa kien jinsab marid. (Ġob 19:1-3) B’dan il-​mod Satana ħa vantaġġ mill-​qagħda dgħajfa taʼ Ġob biex jipprova jiskuraġġih u jdgħajjef il-​fiduċja tiegħu fit-​tjieba taʼ Jehovah. Madankollu, Ġob baqaʼ jistrieħ fuq Jehovah bħala l-​unika tama tiegħu.—Qabbel Salm 55:23 [Salm55:22, NW].

Meta nimirdu, aħna wkoll nistgħu nispiċċaw dipressi. F’sitwazzjoni bħal din, Satana huwa ħafif biex jipprova jġagħalna naġixxu b’tali mod li nikkompromettu l-​fidi tagħna. Għaldaqstant, meta jiġi l-​mard fuqna, huwa importanti li nżommu f’moħħna li l-​kawża bażika tas-​sofferenzi tagħna hija x’aktarx l-​imperfezzjoni li writna u mhux xi influwenza barra min-​normal. Ftakar, ir-​raġel leali Iżakk tilef id-​dawl t’għajnejh għadd taʼ snin qabel mewtu. (Ġenesi 27:1) Il-​kawża ma kinitx spirti mill-​agħar imma x-​xjuħija. Rakel mietet hi u twelled, mhux tort taʼ Satana, imma tort tal-​ġisem dgħajjef. (Ġenesi 35:17-19) Eventwalment, l-​uħud leali tal-​qedem kollha mietu​—mhux minħabba xi seħer jew magħmul imma minħabba l-​imperfezzjoni li kienu wirtu.

Nistgħu naqgħu f’nassa jekk noqogħdu nimmaġinaw li l-​ispirti li ma jidhrux għandhom influwenza diretta fuq kull marda li tiġi fuqna. Dan jistaʼ jqajjem ġo fina biżaʼ tal-​waħx mill-​ispirti. Imbagħad, meta nimirdu, nistgħu niġu mħajrin biex nipprovaw nikkwitaw lid-​demonji minflok ma nżommu ’l bogħod minnhom. Jekk Satana jirnexxilu jdawwarna lejn prattiċi spiritistiċi, inkunu qed niċħdu lill-​veru Alla, Jehovah. (2 Korintin 6:15) Aħna għandna niġu gwidati minn biżaʼ mimli rispett lejn Alla, u mhux minn biżaʼ superstizzjuż mill-​Avversarju tiegħu.—Apokalissi 14:7.

Iċ-ċkejkna Owmadji diġà għandha l-​aqwa protezzjoni possibbli kontra l-​ispirti mill-​agħar. Skond l-​appostlu Pawlu, Alla jqisha ‘qaddisaʼ għax għandha lil ommha fil-​verità, u ommha tistaʼ titlob lil Alla biex ikun maʼ bintha permezz taʼ l-​ispirtu qaddis. (1 Korintin 7:14) Imbierka b’għarfien eżatt bħal dan, Hawa rnexxielha tikseb kura effettiva għal Owmadji minflok ma strieħet fuq l-​amuleti.

Diversi Kawżi tal-​Mard

Il-​biċċa l-​kbira tan-​nies ma jemmnux fl-​ispirti. Meta jimirdu, dawn imorru għand it-​tabib​—jekk ikunu jaffordjawh. M’għandniex xi ngħidu, persuna marida tistaʼ tmur għand tabib u xorta ma tfiqx. It-​tobba ma jagħmlux mirakli. Imma ħafna individwi superstizzjużi li jistgħu jitfejqu jmorru għand tabib wara li jkun tard wisq. Huma l-​ewwel jipprovaw il-​metodi superstizzjużi taʼ fejqan, u meta dawn ma jirnexxux imorru għand it-​tabib bħala l-​aħħar sforz. Ħafna nies imutu bla bżonn.

Oħrajn isibu l-​mewt maʼ wiċċhom qabel il-​waqt minħabba l-​injoranza. Dawn ma jindunawx bis-​sintomi u ma jafux x’miżuri prattiċi għandhom jittieħdu biex ma jimirdux. L-​għarfien jgħin biex ineħħi s-​sofferenza bla bżonn. Taʼ min jinnota li l-​ommijiet li jkunu jafu jaqraw imutulhom inqas tfal minħabba l-​mard minn dawk l-​ommijiet li ma jkunux jafu jaqraw. Iva, l-​injoranza tistaʼ tkun fatali.

It-traskuraġni hija kawża oħra tal-​mard. Per eżempju, ħafna nies jimirdu għax iħallu l-​insetti joqogħdu fuq l-​ikel li jkunu se jieklu iktar tard jew għax dawk li jkunu ħejjew l-​ikel ma jaħslux idejhom qabel. Li torqod mingħajr il-​purtiera tan-​nemus huwa wkoll perikoluż f’reġjuni infettati bil-​malarja.a F’affarijiet taʼ saħħa, sewwa jgħid il-​qawl Ingliż li “uqija prevenzjoni tiswa iktar minn libbra kura.”

Stil taʼ ħajja mingħajr għaqal wassal lil miljuni taʼ nies biex jimirdu u jmutu qabel iż-​żmien. Ix-​xorb żejjed, l-​immoralità sesswali, l-​użu tad-​drogi, u l-​użu tat-​tabakk ħassru s-​saħħa taʼ ħafna nies. Jekk individwu jagħtiha għal dawn il-​vizzji u mbagħad jimrad, ikun dan ġralu hekk għax xi ħadd ikun għamillu xi magħmul jew għax xi spirtu jkun dar għalih? Le. Hu jaħti għall-​mard tiegħu. Jekk wieħed iwaħħal fl-​ispirti, ikun qed jirrifjuta li jaċċetta r-​responsabbiltà taʼ stil taʼ ħajja bla għaqal.

M’għandniex xi ngħidu, ċerti affarijiet ma nistgħux nikkontrollawhom. Per eżempju, nistgħu niġu esposti għal mikrobi li jġorru l-​mard jew għat-​tniġġis. Dan hu dak li ġralha Owmadji. Ommha ma kinitx taf x’qed jikkaġuna d-​dijarea. It-​tfal tagħha ma jimirdux daqs tfal oħra għax hi żżomm id-​dar u l-​bitħa tagħha nodfa u dejjem taħsel idejha qabel ma tħejji l-​ikel. Imma xi darba jew oħra t-​tfal kollha jimirdu. Hemm madwar 25 infezzjoni organika differenti li jistgħu jikkawżaw id-​dijarea. Probabbilment, ħadd qatt ma se jkun jaf liema waħda minnhom ikkaġunat il-​problema t’Owmadji.

Is-​Soluzzjoni Dejjiema

Alla ma jaħtix għall-​mard. “Alla ma jistax jiġġarrab għall-​ħażin, u anqas m’hu se jġarrab lil ħadd.” (Ġakbu 1:13) Jekk xi ħadd mill-​adoraturi tiegħu jimrad, Jehovah jsostnih spiritwalment. “Il-​Mulej jieqaf miegħu meta jkun fuq is-​sodda tal-​mard tiegħu; int tbiddel is-​sodda tiegħu kollha tal-​mard.” (Salm 41:3, Karm Żammit) Iva, Jehovah jagħder. Hu jgħinna jrid, mhux iweġġagħna.

Tabilħaqq, Jehovah għandu soluzzjoni dejjiema għall-​mard​—il-​mewt u l-​irxoxt taʼ Ġesù. Permezz tas-​sagrifiċċju li Ġesù ħallas bħala prezz tal-​fidwa, nies b’qalb retta jiġu mifdijin mill-​qagħda midinba tagħhom u eventwalment se jgawdu saħħa perfetta u ħajja eterna f’art magħmula ġenna. (Mattew 5:5; Ġwann 3:16) Il-​mirakli taʼ Ġesù kienu previżjoni tal-​fejqan veru li se ġġib is-​Saltna t’Alla. Barra minn hekk Alla se jneħħi min-​nofs lil Satana u d-​demonji tiegħu. (Rumani 16:20) Tabilħaqq, Jehovah għandu affarijiet taʼ l-​għaġeb merfugħin għal dawk li jeżerċitaw fidi fih. Kulma rridu hu li nkunu paċenzjużi u nissaportu.

Sadanittant, Alla jipprovdi għerf prattiku u direzzjoni spiritwali permezz tal-​Bibbja u tal-​fratellanza dinjija t’adoraturi leali. Hu jurina kif nistgħu nevitaw il-​vizzji li jġibu l-​problemi taʼ saħħa. U jipprovdilna wkoll ħbieb veri li se jgħinuna meta jqumu l-​problemi.

Erġaʼ ġib quddiem għajnejk lil Ġob. Kienet tkun l-​agħar ħaġa li qatt setaʼ għamel li kieku Ġob mar għand tabib saħħâr! Dan kien iċaħħdu mill-​protezzjoni t’Alla, u kollha kien jitlifhom dawk il-​barkiet li kienu qed jistennewh wara li jgħaddi mill-​burraxka. Alla ma nsiehx lil Ġob, u lanqas lilna m’hu se jinsa. “Smajtu bis-​sabar taʼ Ġob, u tafu kif bl-​għajnuna tal-​Mulej hu għalaq jiem ħajtu,” jgħid id-​dixxiplu Ġakbu. (Ġakbu 5:11) Jekk qatt ma naqtgħu qalbna, aħna wkoll nistgħu nirċievu barkiet taʼ l-​għaġeb meta Alla jara li huwa l-​waqt.

Kif baqgħet iċ-​ċkejkna Owmadji? Ommha ftakret f’artiklu dwar l-​oral rehydration therapy li kienet rat fl-​Awake!, ir-​rivista li toħroġ flimkien maʼ It-​Torri taʼ l-​Għassa.b Hi mxiet fuq l-​istruzzjonijiet li kien hemm u ħejjiet it-​taħlita għal Owmadji biex tixrobha. Issa t-​tifla tinsab qawwija u sħiħa.

[Noti taʼ taħt]

[Stampi f’paġna 7]

Jehovah ħejja soluzzjoni dejjiema għall-​problema tal-​mard