Il-​Problemi tad-​Distinzjoni bejn il-​Klassijiet

“L-​UGWALJANZA TISTAʼ FORSI TKUN DRITT, IMMA L-​EBDA QAWWA FUQ L-​ART QATT MA TISTAʼ TAGĦMILHA REALTÀ.”

Hekk qal Honoré de Balzac, rumanzier Franċiż tas-​seklu 19. Taqbel miegħu int? Ħafna jħossu li hija ħaġa naturali li d-​distinzjonijiet bejn il-​klassijiet huma ħżiena. Madankollu, saħansitra f’dan is-​seklu 21, is-​soċjetà umana għadha maqsuma f’diversi klassijiet soċjali.

CALVIN COOLIDGE, li kien president taʼ l-​Istati Uniti mill-​1923 sa l-​1929, kien konċernat dwar il-​problema tad-​distinzjonijiet bejn il-​klassijiet soċjali u tkellem dwar “it-​tneħħija fundamentali taʼ kull klassi għolja.” Minkejja dan, xi 40 sena wara l-​presidenza taʼ Coolidge, il-​Kummissjoni taʼ Kerner, li nħatret biex tagħmel studju dwar ir-​relazzjonijiet bejn ir-​razez, esprimiet il-​biżaʼ li l-​Istati Uniti kienu żgur se jinqasmu f’żewġ soċjetajiet: “waħda tas-​suwed, waħda tal-​bojod—separati u mhux ugwali.” Xi wħud isostnu li din it-​tbassira diġà seħħet u li “l-​firda ekonomika u razzjali qed tikber” f’dan il-​pajjiż.

Għala huwa daqshekk diffiċli li l-​idea li n-​nies kollha jkunu ugwali ssir realtà? Fattur ewlieni hu n-​natura umana. William Randolph Hearst, ex-membru tal-​kungress taʼ l-​Istati Uniti, darba qal: “Il-​bnedmin kollha nħolqu ugwali f’aspett wieħed, għallinqas, u dan l-​aspett hu x-​xewqa tagħhom li ma jkunux ugwali.” X’ried ifisser? Forsi l-​awtur Franċiż tas-​seklu 19 Henry Becque esprima ruħu iktar ċar meta qal: “Dak li jagħmel l-​ugwaljanza biċċa xogħol daqshekk diffiċli hu li aħna rriduha biss maʼ dawk li qegħdin fuqna.” Fi kliem ieħor, in-​nies iridu jkunu ugwali maʼ dawk li għandhom pożizzjoni ogħla fis-​soċjetà minn tagħhom; imma m’hemmx ħafna li huma lesti li jillimitaw il-​privileġġi u l-​vantaġġi tagħhom biex jagħtu l-​ugwaljanza lil dawk li jqisuhom bħala inferjuri għalihom.

Fil-passat, in-​nies kienu jitwieldu bħala nies komuni, bħala parti minn xi aristokrazija, jew saħansitra bħala membri rjali. Dan għadu minnu f’ċertu pajjiżi. Madankollu, fil-​biċċa l-​kbira tal-​pajjiżi llum huma l-​flus—jew in-​nuqqas taʼ flus—li jiddeterminaw jekk bniedem hux taʼ klassi baxxa, tan-​nofs, jew għolja. Madankollu, hemm fatturi oħrajn li jiddeterminaw il-​klassi soċjali taʼ dak li jkun, bħalma huma r-​razza, l-​edukazzjoni, u jekk wieħed ikunx jaf jaqra u jikteb. U f’xi pajjiżi teżisti wkoll id-​diskriminazzjoni bejn is-​sessi, fejn in-​nisa huma meqjusin bħala klassi inferjuri.

Xaqq taʼ Tama?

Il-​leġislazzjoni dwar id-​drittijiet tal-​bniedem għenet biex tkisser xi ftit mill-​firdiet bejn il-​klassijiet. Għaddew liġijiet kontra l-​firda razzjali fl-​Istati Uniti. L-​apartheid saret kontra l-​liġi fl-​Afrika t’Isfel. L-​iskjavitù, għalkemm għadha teżisti, hija illegali fil-​biċċa l-​kbira tad-​dinja. Deċiżjonijiet legali ġagħlu li jiġi rikonoxxut id-​dritt taʼ ċerti nies tal-​post, bħall-​Aboriġini, biex jiksbu l-​art, u liġijiet kontra d-​diskriminazzjoni pprovdew għajnuna għal xi wħud li kienu parti minn xi klassi żvantaġġata.

Jindika dan li mhux se jkun hemm iktar distinzjonijiet bejn il-​klassijiet soċjali? Xejn affattu. Għalkemm xi distinzjonijiet bejn il-​klassijiet soċjali issa forsi qed jiddgħajfu, bdew jidhru xi firdiet ġodda. Il-​ktieb Class Warfare in the Information Age jgħid: “Il-​klassijiet ġenerali taʼ kapitalisti u ħaddiema ma jidhrux xierqa llum, imma sempliċement għax dawn iż-​żewġ klassijiet kbar inqassmu fi gruppi iżgħar taʼ nies irrabjati.”

Se jibqgħu d-​distinzjonijiet bejn il-​klassijiet soċjali jifirdu lin-​nies għal dejjem? Bħalma se juri l-​artiklu li jmiss, hemm tama għal din is-​sitwazzjoni.