Proklamaturi tas-Saltna Jirrapportaw
Midalja taʼ Rikonoxximent għal Sala tas-Saltna
IL-MINISTERU taʼ l-Ambjent fil-Finlandja nnomina s-sena 2000 bħala “Is-Sena tal-Pajsaġġ.” Wieħed mill-organizzaturi qal li “l-iskop tal-pajsaġġ bħala t-tema tas-sena huwa biex ifakkarna lkoll dwar l-influwenzi li ambjenti ħodor għandhom fuq ħajjitna u l-benesseri tagħna.”
Fit-12 taʼ Jannar, 2001, ittra mill-Assoċjazzjoni Finlandiża għall-Industriji tal-Pajsaġġ waslet fl-uffiċċju tal-fergħa tax-Xhieda taʼ Jehovah t’hemmhekk. Fl-ittra ġie spjegat li s-Sala tas-Saltna tax-Xhieda taʼ Jehovah f’Tikkurila ġiet mogħtija waħda mill-midalji għall-pajsaġġ skond it-tema tas-sena minħabba d-disinn impressjonanti taʼ l-ambjent u l-ġnien miżmum tajjeb. L-ittra kompliet tgħid li “d-dehra taʼ l-ambjent in ġenerali, hi pjaċevoli, estetikament sabiħa, u taʼ kwalità għolja, kemm fis-sajf kif ukoll fix-xitwa.”
Il-midalja ġiet preżentata lix-Xhieda taʼ Jehovah fir-Rosendahl Hotel f’Tampere, fil-Finlandja, matul avveniment li għalih attendew 400 professjonist u negozjant. L-Assoċjazzjoni Finlandiża għall-Industriji tal-Pajsaġġ ħarġet ukoll stqarrija fuq il-mezzi tax-xandir u l-gazzetti, li tgħid: “F’partijiet differenti tal-pajjiż, is-Swali tas-Saltna tax-Xhieda taʼ Jehovah huma, tistaʼ tgħid kważi dejjem, disinjati b’mod verament sabiħ. Il-mod kif jieħdu ħsieb l-ambjent ma jħalli lil ħadd li jgħaddi minn ħdejhom jibqaʼ indifferenti. Is-Sala tas-Saltna f’Tikkurila hija eżempju wieħed taʼ ġnien mill-isbaħ in ġenerali. Il-bini u l-ġonna kbar jikkontribwixxu għall-kalma u l-bilanċ.”
Fil-Finlandja hemm 233 Sala tas-Saltna, ħafna minnhom imdawrin b’ġonna mill-isbaħ. Però, dak li jagħmel dawn il-postijiet verament sbieħ, huwa l-fatt li huma ċentri għall-qima vera u għall-edukazzjoni Biblika. Għal iktar minn sitt miljun Xhud taʼ Jehovah madwar id-dinja, Sala tas-Saltna—mgħammra tajba jew le—hi post għażiż ħafna għalihom. Għalhekk, huma ħerqanin biex jieħdu ħsiebha sew. Il-bibien tas-Swali tas-Saltna huma miftuħa għal kulħadd fil-komunità tiegħek!