Għarfien Eżatt dwar Alla Jagħtina l-Faraġ

GĦAL xi wħud, dak li tgħid il-​Bibbja dwar l-​imħabba u l-​ħniena t’Alla jqajmilhom ċerti dubji. Huma jistaqsu: Jekk Alla jixtieq jeqred il-​ħażen, jaf kif jeqirdu, u għandu l-​qawwa biex jagħmel dan, il-​ħażen għala jibqaʼ jinfirex? Huma jsibuha diffiċli jaċċettaw tliet punti li għalihom jidhru li ma jaqblux: (1) Alla jistaʼ kollox; (2) Alla hu twajjeb u jħobb; u (3) ġrajjiet diżastrużi jkomplu jseħħu. Huma jirraġunaw li peress li dan l-​aħħar punt ħadd ma jistaʼ jiċħdu, allura minn taʼ l-​inqas wieħed miż-​żewġ punti l-​oħra ma jistax ikun li hu veru. Huma jħossu li jew Alla m’hux kapaċi jwaqqaf il-​ħażen jew ma jimpurtahx minn dak li qed jiġri.

Ftit jiem wara l-​qerda tal-​World Trade Center fi New York, mexxej reliġjuż prominenti fl-​Istati Uniti qal: “Ġejt mistoqsi . . . mijiet taʼ drabi f’ħajti għala Alla jippermetti t-​traġedji u s-​sofferenzi. Irrid nistqarr li verament ma nafx it-​tweġiba sħiħa, lanqas għas-​sodisfazzjon persunali tiegħi.”

Dwar dan il-​kumment, professur tat-​teoloġija kiteb li hu kien impressjonat bit-​“teoloġija tajba” li ppriedka dan il-​mexxej reliġjuż. Hu qabel ukoll mal-​ħarsa taʼ wieħed studjuż li kiteb: “Is-​sofferenza hija impossibbli li tifhimha daqskemm huwa impossibbli li tifhem lil Alla.” Imma huwa tassew impossibbli li tifhem għala Alla ppermetta l-​ħażen?

L-​Oriġini tal-​Ħażen

Kuntrarju għal dak li forsi jgħidu l-​mexxejja reliġjużi, il-​Bibbja turi li m’huwiex impossibbli biex nifhmu għala Alla ppermetta l-​ħażen. Punt fundamentali biex nifhmu l-​kwistjoni tal-​ħażen huwa li nirrikonoxxu li Jehovah ma ħalaqx dinja ħażina. Hu ħalaq l-​ewwel koppja perfetta, mingħajr dnub. Jehovah ħares lejn il-​ħolqien tiegħu u sab li kien “tajjeb ħafna.” (Ġenesi 1:​26, 31) Kien l-​iskop tiegħu li Adam u Eva jifirxu l-​Ġnien taʼ l-​Għeden maʼ l-​art kollha u jimlewha b’nies henjin fil-​protezzjoni tas-​sovranità tiegħu kollha mħabba.—Isaija 45:18.

Il-ħażen beda permezz taʼ individwu spirtu li, għalkemm fil-​bidu kien leali lejn Alla, żviluppa xewqa li jiġi meqjum. (Ġakbu 1:​14, 15) Ir-​ribelljoni tiegħu ntweriet fuq l-​art meta hu influwenza lill-​ewwel koppja umana biex tingħaqad miegħu ħalli jiħduha kontra Alla. Minflok ma obdew l-​istruzzjoni ċara t’Alla biex la jieklu u lanqas imissu l-​frott tas-​siġra taʼ tagħrif it-​tajjeb u l-​ħażin, Adam u Eva ħadu minnu u kiluh. (Ġenesi 3:​1-6) Meta għamlu dan, mhux biss m’obdewx lil Alla imma wrew ukoll li xtaqu jkunu indipendenti minnu.

Tqajmet Kwistjoni Morali

Din ir-​ribelljoni fl-​Għeden qajmet kwistjoni morali, sfida taʼ importanza universali. Ir-​ribelli umani ddubitaw jekk Jehovah jeżerċitax il-​ħakma fuq il-​ħlejjaq tiegħu b’mod xieraq. Kellu dritt il-​Ħallieq li jirrikjedi ubbidjenza assoluta mill-​bnedmin? Kien se jaħbtilhom aħjar jekk in-​nies jaġixxu b’mod indipendenti?

Jehovah ittratta din l-​isfida fuq il-​ħakma tiegħu b’mod li wera l-​bilanċ perfett taʼ l-​imħabba, il-​ġustizzja, l-​għerf, u l-​qawwa li għandu. Hu setaʼ uża l-​qawwa tiegħu biex jeqred ir-​ribelljoni mill-​ewwel. Dan setaʼ deher li kien ġust, ladarba hu kellu d-​dritt li jagħmel dan. Imma b’dan il-​mod ma kinux jitwieġbu l-​mistoqsijiet morali li tqajmu. Mill-​banda l-​oħra, Alla setaʼ sempliċement għalaq għajnejh għad-​dnub. Illum, għal xi wħud, din tistaʼ tidher għażla taʼ mħabba. Madankollu, din ukoll ma kinitx se tagħti tweġiba għal dak li sostna Satana li l-​bnedmin se jkunu aħjar jekk imexxu lilhom infushom. Barra minn hekk, ma kinitx din l-​azzjoni se tinkuraġġixxi jerġaʼ lil oħrajn biex jitbiegħdu mit-​triq taʼ Jehovah? Dan kien se jġib sofferenzi bla tmiem.

Fl-għerf tiegħu, Jehovah ippermetta lill-​bnedmin biex għal perijodu taʼ żmien imorru għal riħhom. Dan kien ifisser li jippermetti l-​ħażen għal xi żmien. B’hekk il-​bnedmin kellhom l-​opportunità juru jekk kinux kapaċi jaħkmu lilhom infushom b’suċċess filwaqt li jkunu indipendenti minn Alla, billi jgħixu skond il-​livelli tagħhom stess taʼ x’inhu tajjeb u x’inhu ħażin. X’kien ir-​riżultat? Bla waqfien, l-​istorja umana kienet karatterizzata minn gwerer, inġustizzji, oppressjoni, u sofferenzi. Il-​falliment aħħari tar-​ribelljoni kontra Jehovah se jsolvi darba għal dejjem il-​kwistjonijiet li tqajmu fl-​Għeden.

Sadattant, Alla wera mħabbtu billi pprovda lil Ibnu, Ġesù Kristu, li ta l-​ħajja umana tiegħu bħala sagrifiċċju taʼ fidwa. Dan jgħin lill-​bnedmin ubbidjenti biex jinħelsu mill-​kundanna tad-​dnub u l-​mewt li ġiet mid-​diżubbidjenza taʼ Adam. Il-​fidwa fetħet it-​triq għall-​ħajja taʼ dejjem għal dawk kollha li jeżerċitaw fidi f’Ġesù.—Ġwann 3:16.

Għandna l-​assiguranza taʼ faraġ mingħand Jehovah li s-​sofferenzi tal-​bnedmin huma temporanji. “Ftit ieħor, u l-​ħażin ma jkunx aktar,” kiteb is-​salmista. “Għad tħares fejn kien u ma ssibux. Imma l-​ġwejdin għad jirtu l-​art, u bi sliem kotran jitgħaxxqu.”—Salm 37:​10, 11.

Futur Mimli Sigurtà u Hena

It-​twettiq tal-​profeziji tal-​Bibbja juri li wasal iż-​żmien biex Alla jtemm il-​mard, in-​niket, u l-​mewt. Innota x’dehra taʼ l-​għaġeb bil-​quddiem ngħatat lill-​appostlu Ġwanni f’viżjoni taʼ l-​affarijiet li għad iridu jiġru. Hu kiteb: “Rajt sema ġdid u art ġdida, għax is-​sema taʼ qabel u l-​art taʼ qabel għabu, u ma kienx hemm iżjed baħar. . . . Alla nnifsu jkun magħhom [mal-bnedmin], Alla tagħhom. Hu jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel.” Fi stqarrija li tenfasizza ċ-​ċertezza taʼ dawn il-​wegħdi, lil Ġwanni ntqallu: “Ikteb, għax dawn il-​kelmiet huma minnhom u taʼ min joqgħod fuqhom.”—Apokalissi 21:​1-5.

Xi ngħidu dwar il-​biljuni taʼ nies innoċenti li mietu mir-​ribelljoni taʼ l-​Għeden ’l hawn? Jehovah wiegħed li se jġib lura għall-​ħajja lil dawk li bħalissa reqdin fil-​mewt. L-​appostlu Pawlu qal: “Nittama f’Alla . . . li kemm it-​tajbin u kemm il-​ħżiena għad iqumu minn bejn l-​imwiet.” (Atti 24:15) Dawn se jkollhom il-​prospett li jgħixu f’dinja fejn se “tgħammar il-​ġustizzja.”—2 Pietru 3:13.

Sewwa sew bħalma missier taʼ mħabba jħalli lil ibnu jgħaddi minn operazzjoni taʼ tbatija ladarba jaf li din se ġġiblu benefiċċji dejjiema, hekk ukoll Jehovah ippermetta li l-​bnedmin jesperjenzaw l-​eżistenza temporanja tal-​ħażen fuq l-​art. Madankollu, hemm eternità taʼ barkiet tistenna lil dawk kollha li jfittxu li jagħmlu r-​rieda t’Alla. Pawlu spjega: “Il-​ħolqien jinsab taħt il-​frugħa—mhux minn rajh, imma minħabba Alla li xeħtu taħtha—bit-​tama li l-​ħlejjaq huma wkoll għad ikunu meħlusa mill-​jasar tat-​taħsir u jiksbu l-​ħelsien tal-​glorja taʼ wlied Alla.”—Rumani 8:​20, 21.

Din hi verament aħbar—mhux bħalma naraw fuq it-​televixin jew naqraw fil-​gazzetti, imma aħbar tajba. Hija l-​aqwa aħbar mingħand “Alla taʼ kull faraġ,” li tassew jimpurtah minna.—2 Korintin 1:3.

[Stampi f’paġna 6]

Iż-​żmien wera li l-​bnedmin ma jistgħux jaħkmu lilhom infushom b’suċċess filwaqt li jkunu indipendenti minn Alla

[Sorsi]

Familja mis-​Somalja: UN PHOTO 159849/M. GRANT; bomba atomika: USAF photo; kamp tal-​konċentrament: U.S. National Archives photo