Jehovah Ibierek u Jħares lil Min Hu Ubbidjenti

“Min jismaʼ lili jgħix moħħu mistrieħ, bla ebda tfixkil, bla biżaʼ tal-​ħsara.”—Proverbji 1:33.

1, 2. L-ubbidjenza lejn Alla għala hija importanti? Agħti eżempju.

IL-​FLIELES b’rixhom isfar u artab jinsabu medhijin inaqqru l-​ikel minn ġol-​ħaxix qasir, mingħajr ma qed jindunaw li fil-​għoli hemm seqer idur fuqhom. F’daqqa waħda, il-​qroqqa tibda tqaqi b’leħen għoli u mriegħed bħala twissija u tiftaħ ġwenħajha. Il-​flieles tagħha jiġru lejha, u fi ftit sekondi jinħbew fil-​kenn taʼ ġwenħajha. L-​attakk tas-​seqer jiġi fix-​xejn.a X’nitgħallmu minn dan? Li l-​ubbidjenza ssalva l-​ħajjiet!

² Din it-​tagħlima hija importanti ferm għall-​Kristjani llum, għax Satana qed jagħmel minn kollox biex jaħtaf lin-​nies t’Alla. (Apokalissi 12:​9, 12, 17) Il-​mira tiegħu hi li jkisser l-​ispiritwalità tagħna sabiex b’hekk nitilfu l-​favur taʼ Jehovah u l-​prospett taʼ ħajja taʼ dejjem. (1 Pietru 5:8) Madankollu, jekk nibqgħu qrib t’Alla u naġixxu mill-​ewwel għad-​direzzjoni li nirċievu permezz tal-​Kelma u l-​organizzazzjoni tiegħu, nistgħu nibqgħu ċerti li hu se jipproteġina. “Bir-​rix tiegħu jgħattik, u taħt ġwenħajh tistkenn,” kiteb is-​salmista.—Salm 91:4.

Ġens Diżubbidjenti Jsir Priża

3. X’kien ir-​riżultat talli l-​Iżraelin m’obdewx għal darba wara l-​oħra?

³ Meta l-​ġens taʼ Iżrael kien jobdi lil Jehovah, dejjem kien jibbenefika mill-​protezzjoni tiegħu. Iżda b’sogħba, għal darba wara l-​oħra l-​poplu ta dahru lill-​Ħallieq u dar lejn allat taʼ l-​injam u tal-​ġebel—‘allat fiergħa, li la setgħu jgħinuhom u lanqas isalvawhom.’ (1 Samwel 12:21) Wara li dam jirribella b’dan il-​mod għal mijiet taʼ snin, il-​ġens kollu kemm hu tant kien mgħarraq fl-​apostasija li ma kien hemm l-​ebda tama għalih. Għaldaqstant, Ġesù lmenta: “Ġerusalemm, Ġerusalemm, int li toqtol il-​profeti u tħaġġar il-​messaġġiera mibgħutin lilek, kemm-il darba ridt niġbor lil uliedek bħalma l-​qroqqa tiġbor il-​flieles taħt ġwenħajha, u int ma ridtx! Ara, darkom għad iħalluhielkom ħerba!”​—Mattew 23:​37, 38.

4. Fis-​sena 70 E.K., kif deher ċar li Jehovah kien abbanduna lil Ġerusalemm?

⁴ Il-​fatt li Jehovah kien abbanduna lil Iżrael apostat deher ċar u b’mod agonizzanti fis-​sena 70 E.K. F’dik is-​sena l-​eżerċti Rumani, bl-​istendardi tagħhom imżejnin bix-​xbieha taʼ l-​ajkla merfugħin ’il fuq, niżlu b’ħeffa lejn Ġerusalemm biex jagħmlu massakru tal-​biżaʼ. Il-​belt f’dawk il-​ġranet kienet miżgħuda bin-​nies li kienu telgħu għaċ-​ċelebrazzjoni tal-​Qbiż. Il-​ħafna sagrifiċċji li għamlu ma ġabulhomx il-​favur t’Alla. Dan ifakkarna traġikament fil-​kliem li Samwel qal lis-​Sultan Sawl meta dan kien naqas li jobdi: “Jaqaw il-​Mulej jogħġbuh il-​vittmi tal-​ħruq u s-​sagrifiċċji aktar mis-​smigħ tal-​kelma tal-​Mulej? Ara, l-​ubbidjenza hi aqwa mis-​sagrifiċċji; is-​smigħ, aħjar mix-​xaħam tal-​muntun.”—1 Samwel 15:22.

5. Liema tip t’ubbidjenza jrid Jehovah, u kif nafu li ubbidjenza bħal din hija possibbli?

⁵ Minkejja l-​enfasi li jagħmel fuq l-​ubbidjenza, Jehovah jaf tajjeb x’inhuma l-​limitazzjonijiet tal-​bnedmin imperfetti. (Salm 130:​3, 4) Dak li jirrikjedi hu qalb sinċiera u ubbidjenza bbażata fuq il-​fidi, l-​imħabba, u l-​biżaʼ bnin li ma nogħġbuhx. (Dewteronomju 10:​12, 13; Proverbji 16:6; Isaija 43:10; Mikea 6:8; Rumani 6:​17) Ubbidjenza bħal din hija possibbli bħalma wrew ‘sħaba kbira taʼ xhieda’ qabel l-​era Kristjana, li żammew l-​integrità tagħhom minkejja li kellhom iħabbtu wiċċhom maʼ provi tal-​biżaʼ, saħansitra l-​mewt. (Lhud 11:​36, 37; 12:1) Kemm ferrħulu qalbu lil Jehovah dawn l-​uħud! (Proverbji 27:11) Madankollu, kien hemm oħrajn li għall-​ewwel bdew tajjeb u kienu leali imma mbagħad ma baqgħux jobdu. Wieħed minn dawn kien is-​Sultan Ġowas f’Ġuda tal-​qedem.

Sultan Irrovinat Minħabba Ħbiberija Ħażina

6, 7. X’tip taʼ sultan kien Ġowas sakemm Ġeħojada kien għadu ħaj?

⁶ Meta kien għadu tarbija, is-​Sultan Ġowas ħelisha ħafif milli jiġi maqtul. Meta Ġowas kellu sebaʼ snin, il-​Qassis il-​Kbir Ġeħojada għamel il-​qalb u ħarġu minfejn kien mistoħbi u għamlu sultan. Peress li Ġeħojada, li kien jibżaʼ minn Alla, għamilha taʼ missier u kunsillier għal Ġowas, il-​ħakkiem żagħżugħ ‘baqaʼ jagħmel is-​sewwa f’għajnejn il-​Mulej sakemm dam ħaj Ġeħojada, il-​qassis.’​—2 Kronaki 22:10–​23:​1, 11; 24:​1, 2.

⁷ Fost l-​għemejjel tajbin li għamel Ġowas kien hemm it-​tiġdid tat-​tempju—għemil li kien ħafna għal qalb Ġowas. Hu fakkar lill-​Qassis il-​Kbir Ġeħojada li kien hemm bżonn li jiġbru t-​taxxa tat-​tempju minn Ġuda u Ġerusalemm, bħalma kienet “ordnata minn Mosè,” sabiex ikunu jistgħu jħallsu x-​xogħol tat-​tiswija. Milli jidher, Ġeħojada kien irnexxielu jinkuraġġixxi lis-​sultan żagħżugħ biex jistudja u jobdi l-​Liġi t’Alla. Bħala riżultat, ix-​xogħol fuq it-​tempju u t-​tagħmir għat-​tempju tlesta f’qasir żmien.—2 Kronaki 24:​4, 6, 13, 14; Dewteronomju 17:18.

8. (a) X’kienet il-​kawża ewlenija li wasslet għar-​rovina spiritwali taʼ Ġowas? (b) Id-​diżubbidjenza tas-​sultan x’wasslitu biex jagħmel fl-​aħħar mill-​aħħar?

⁸ B’sogħba, Ġowas ma baqax jobdi lil Jehovah sa l-​aħħar. Għala? Il-​Kelma t’Alla tgħidilna: “Meta miet Ġeħojada l-​prinċpijiet taʼ Ġuda marru jsellmu lis-​sultan b’wiċċhom fl-​art, u mbagħad is-​sultan tahom widen. Huma ħallew it-​tempju tal-​Mulej, Alla taʼ missirijiethom, u marru jaqdu x-​xbihat taʼ l-​Asera u l-​idoli. U l-​korla tal-​Mulej xegħlet kontra Ġuda u Ġerusalemm minħabba din il-​ħtija tagħhom.” L-​influwenza ħażina tal-​prinċpijiet taʼ Ġuda wasslet ukoll lis-​sultan biex isodd widnejh għall-​profeti t’Alla, li wieħed minnhom kien Żakkarija bin Ġeħojada. Dan bi qlubija ċanfar lil Ġowas u lin-​nies għad-​diżubbidjenza tagħhom. Minflok ma nidem, Ġowas ordna li Żakkarija jiġi mħaġġar. X’qalb taż-​żonqor kien rabba Ġowas u kemm kien sar diżubbidjenti—dan kollu għax ċeda għall-​influwenza taʼ ħbieb ħżiena!—2 Kronaki 24:​17-​22; 1 Korintin 15:33.

9. Il-​fatt li d-​diżubbidjenza hija bluha kif jiġi enfasizzat minn dak li ġara fl-​aħħar lil Ġowas u lill-​prinċpijiet?

⁹ Xi ġralhom Ġowas u l-​prinċpijiet mill-​agħar li kien jagħmilha magħhom, issa li kienu abbandunaw lil Jehovah? Forza militari Sirjana—“bi ftit nies”—invadiet lil Ġuda ‘u qerdet mill-​poplu l-​prinċpijiet kollha tiegħu.’ L-​invażuri ġagħlu wkoll lis-​sultan jagħtihom ġidu stess kif ukoll id-​deheb u l-​fidda tat-​tempju. Għalkemm Ġowas baqaʼ ħaj, hu spiċċa raġel dgħajjef u marid. Ftit żmien wara, xi wħud mill-​qaddejja tiegħu għamlu konfoffa kontrih u qatluh. (2 Kronaki 24:​23-​25; 2 Slaten 12:​18, 19 [12:​17, 18, NW]) Kemm kien minnu l-​kliem li Jehovah qal lil Iżrael: “Jekk int ma tismax leħen il-​Mulej, Alla tiegħek, u ma tħarisx u ma tagħmilx l-​ordnijiet u l-​liġijiet tiegħu . . . , saħtiet . . . jiġu fuqek u jilħquk.”—Dewteronomju 28:15.

Segretarju Salvat Talli Obda

10, 11. (a) Għala huwa t’għajnuna li nirriflettu fuq il-​parir li Jehovah ta lil Baruk? (b) Jehovah liema parir tah lil Baruk?

¹⁰ Tħossok kultant skuraġġit għax fil-​ministeru Kristjan ma tantx tiltaqaʼ maʼ nies li juru interess fl-​aħbar tajba? Ġieli jiġuk mumenti meta tibda tgħir xi ftit għal uħud tat-​tajjeb u għall-​mod kapriċċuż kif jgħixu ħajjithom? Jekk inhu hekk, aħseb ftit dwar Baruk, is-​segretarju taʼ Ġeremija, u l-​parir li ngħata b’imħabba minn Jehovah.

¹¹ Baruk kien qed jikteb messaġġ profetiku meta hu nnifsu ġibed l-​attenzjoni taʼ Jehovah. Għala? Għax Baruk beda jiddispjaċih dwar xortih fil-​ħajja u beda jixtieq xi ħaġa aħjar mill-​privileġġ speċjali li kellu li jaqdi lil Alla. Jehovah innota din il-​bidla fl-​attitudni taʼ Baruk u tah parir sod imma bi ħlewwa, billi qallu: “Jaqaw int qiegħed tfittex ħwejjeġ kbar? Tfittixhomx, għax, arani, se nġib il-​ħsara fuq kull bniedem, . . . imma lilek inħallilek ħajtek bħallikieku priża tal-​gwerra, kull fejn tmur.”​—Ġeremija 36:​4; 45:5.

12. Għala għandna nevitaw li nfittxu “ħwejjeġ kbar” għalina nfusna fis-​sistema preżenti t’affarijiet?

¹² Mill-​kliem li Alla qal lil Baruk, tistaʼ tinnota l-​interess profond li Jehovah wera lejn dan ir-​raġel mill-​aħjar, li kien qdieh lealment u bi qlubija flimkien maʼ Ġeremija? Bl-​istess mod illum, Jehovah jimpurtah ferm minn individwi li f’din is-​sistema t’affarijiet qed jitħajru jfittxu opportunitajiet li f’għajnejhom jidhru aħjar. B’ferħ, ħafna wħud bħal dawn għamlu bħal Baruk u mxew fuq il-​pariri taʼ mħabba li ngħataw minn aħwa spiritwali maturi. (Luqa 15:​4-7) Iva, jalla lkoll kemm aħna nifhmu li m’hemm l-​ebda futur għal dawk li jfittxu “ħwejjeġ kbar” għalihom infushom f’din is-​sistema. Dawn l-​uħud mhux talli mhux se jirnexxilhom isibu l-​ferħ veru imma, jerġaʼ agħar minn hekk, dalwaqt se jgħaddu maʼ din id-​dinja u x-​xewqat egoistiċi kollha tagħha.​—Mattew 6:​19, 20; 1 Ġwann 2:​15-​17.

13. Ir-​rakkont dwar Baruk x’jgħallimna rigward l-​umiltà?

¹³ Ir-​rakkont dwar Baruk jgħallimna wkoll lezzjoni mill-​aqwa dwar l-​umiltà. Innota li Jehovah ma tax parir lil Baruk direttament iżda tkellem permezz taʼ Ġeremija. Min-​naħa tiegħu, Baruk kien familjari sew mad-​dgħjufijiet taʼ Ġeremija u mal-​mod kif dan kien jaħsibha u jaġixxi. (Ġeremija 45:​1, 2) Madankollu, Baruk ma ħalliex il-​kburija tegħlbu; b’umiltà hu għaraf minfejn kien ġej verament il-​parir—mingħand Jehovah. (2 Kronaki 26:​3, 4, 16; Proverbji 18:12; 19:20) Għalhekk, jekk nagħmlu xi ħaġa ħażina bla ma nindunaw u ningħataw il-​parir li jkollna bżonn mill-​Kelma t’Alla, ejja nuru l-​istess maturità, dehen spiritwali, u umiltà taʼ Baruk.—Galatin 6:1.

14. Għala nagħmlu tajjeb jekk nobdu lil dawk li qed imexxuna?

¹⁴ Attitudni umli bħal din min-​naħa tagħna tgħin ukoll lil dawk li jagħtuna parir. Lhud 13:17 jgħid: “Oqogħdu għal dawk li jmexxukom, u obduhom, għax huma jgħassu fuqkom għall-​ġid tagħkom, bħala nies li għad iridu jagħtu kont tagħkom. Hekk huma jaqdu dan id-​dmir bil-​ferħ, u mhux bi swied il-​qalb; għax dan ma jkun jiswielkom taʼ ebda ġid.” Min jaf kemm-il darba l-​anzjani jiftħu qalbhom maʼ Jehovah, u jitolbuh biex jagħtihom il-​kuraġġ, l-​għerf, u t-​tattika li għandhom bżonn biex iwettqu dan l-​aspett diffiċli tax-​xogħol tagħhom bħala rgħajja! Ejja ‘ngħożżuhom nies bħal dawn.’—1 Korintin 16:18.

15. (a) Ġeremija kif wera li kellu fiduċja f’Baruk? (b) Kif ġie premjat Baruk talli obda umilment?

¹⁵ Jidher ċar li Baruk bidilha fehemtu għax Ġeremija mbagħad tah inkarigu tassew diffiċli—li jmur fit-​tempju u jaqra jgħajjat l-​istess messaġġ taʼ ġudizzju li hu stess kien kiteb minn fomm Ġeremija. Obda Baruk? Iva, hu “għamel kollox skond ma ordnalu Ġeremija, il-​profeta.” Fil-​fatt, hu saħansitra qara l-​istess messaġġ lill-​prinċpijiet taʼ Ġerusalemm, u dan bla dubju kien jeħtieġ kuraġġ mhux ħażin. (Ġeremija 36:​1-6, 8, 14, 15) Meta l-​belt waqgħet f’idejn il-​Babiloniżi xi 18-il sena wara, immaġina kemm kien grat Baruk li hu kien ġie salvat għax ta kas it-​twissija taʼ Jehovah u ma baqax ifittex “ħwejjeġ kbar” għalih innifsu!​—Ġeremija 39:​1, 2, 11, 12; 43:​6.

L-​Ubbidjenza Matul Assedju Salvat il-​Ħajjiet

16. Jehovah kif wera mogħdrija mal-​Lhud f’Ġerusalemm matul l-​assedju Babiloniż fis-​sena 607 Q.E.K.?

¹⁶ Meta wasal it-​tmiem fuq Ġerusalemm fis-​sena 607 Q.E.K., il-​mogħdrija t’Alla lejn dawk ubbidjenti lejh reġgħet spikkat. Fl-​eqqel taʼ l-​assedju, Jehovah qal lil-​Lhud: “Se nqiegħed quddiemkom it-​triq tal-​ħajja u t-​triq tal-​mewt. In-​nies li jifdal f’din il-​belt se jmutu bix-​xabla, bil-​ġuħ u bil-​pesta; u min joħroġ u jagħti ruħu lill-​Kaldin li qegħdin jassedjawkom jgħix, u jkollu ħajtu bħala priża.” (Ġeremija 21:​8, 9) Għalkemm l-​abitanti taʼ Ġerusalemm kien jistħoqqilhom li jinqerdu, saħansitra f’dawk l-​aħħar mumenti kruċjali, Jehovah wera mogħdrija maʼ dawk li kienu ubbidjenti lejh.b

17. (a) L-ubbidjenza taʼ Ġeremija b’liema żewġ modi għaddiet minn prova meta Jehovah qallu biex jgħid lil-​Lhud assedjati biex ‘jaqilbu għal mal-​Kaldin’? (b) Kif nistgħu nibbenefikaw mill-​eżempju taʼ Ġeremija li obda b’kuraġġ?

¹⁷ Bla dubju, l-​ubbidjenza taʼ Ġeremija wkoll għaddiet minn prova meta kellu jgħid lil-​Lhud sabiex iċedu. Qabel xejn hu kellu ħeġġa kbira għall-​isem taʼ Jehovah. Ma riedx li dan jiġi mmaqdar mill-​għedewwa li kienu se jagħtu l-​kredtu għar-​rebħa tagħhom lil idoli bla ħajja. (Ġeremija 50:​2, 11, NW; Lamentazzjonijiet 2:​16) Iżjed minn hekk, Ġeremija kien jaf li billi jgħid lin-​nies biex iċedu, kien qed ipoġġi ħajtu stess f’periklu kbir għaliex ħafna kienu se jqisuh bħala xewwiexi. Minkejja dan, hu ma beżax, imma obda u ħabbar dak li qal Jehovah. (Ġeremija 38:​4, 17, 18) Bħal Ġeremija, aħna wkoll inħabbru messaġġ li m’huwiex milqugħ min-​nies. Huwa l-​istess messaġġ li għalih Ġesù ġie mżeblaħ. (Isaija 53:3; Mattew 24:9) Għalhekk ejja ‘ma nibżgħux mill-​bniedem,’ imma bħal Ġeremija, ejja nobdu lil Jehovah b’kuraġġ u nafdaw kompletament fih.​—Proverbji 29:25.

Ubbidjenza Meta Jattakka Gog

18. Il-​qaddejja taʼ Jehovah liema provi taʼ ubbidjenza jridu jiffaċċjaw fil-​futur?

¹⁸ Dalwaqt, is-​sistema mill-​agħar taʼ Satana kollha kemm hi se tinqered f’“diqa kbira” li qatt ma kien hawn bħalha qabel. (Mattew 24:21) Bla dubju, qabel u matul dak iż-​żmien, il-​fidi u l-​ubbidjenza tan-​nies t’Alla se jgħaddu minn provi kbar. Per eżempju, il-​Bibbja tgħidilna li Satana, fl-​irwol tiegħu bħala ‘Gog taʼ l-​art taʼ Magog,’ se jagħmel attakk sfrenat kontra l-​qaddejja taʼ Jehovah, billi jħejji għall-​azzjoni qtajjiet kbar li huma deskritti bħala “ġemgħa kbira u eżerċtu qawwi . . . , bħalma sħaba tgħatti l-​art.” (Eżekjel 38:​2, 14-16) In-​nies t’Alla, żgħar fin-​numru u mhux armati, se jfittxu l-​kenn taħt ‘ġwenħajn’ Jehovah, li hu se jiftaħhom biex jipproteġi lill-​uħud ubbidjenti.

19, 20. (a) L-ubbidjenza min-​naħa taʼ l-​Iżraelin għala kienet taʼ importanza vitali għalihom meta kienu ħdejn il-​Baħar l-​Aħmar? (b) Kif nistgħu nibbenefikaw illum jekk nirriflettu bit-​talb fuq dak li ġara ħdejn il-​Baħar l-​Aħmar?

¹⁹ Din is-​sitwazzjoni tfakkarna fl-​Eżodu taʼ Iżrael mill-​Eġittu. Wara li laqat lill-​Eġittu b’għaxar kastigi qerrieda, Jehovah għadda lill-​poplu tiegħu, mhux mill-​iqsar triq lejn l-​Art Imwiegħda, imma mexxiehom ’l isfel lejn il-​Baħar l-​Aħmar, fejn faċilment setgħu jiġu b’daharhom mal-​ħajt u attakkati. Minn ħarsa militari, din kienet strateġija diżastruża. Kieku kont hemm, kont int tobdi dak li qal Jehovah permezz taʼ Mosè u tinżel lejn il-​Baħar l-​Aħmar b’fiduċja sħiħa, meta taf li l-​Art Imwiegħda tinsab f’direzzjoni oħra?​—Eżodu 14:​1-4.

²⁰ Jekk inkomplu naqraw f’Eżodu kapitlu 14, naraw kif Jehovah ħeles lin-​nies tiegħu b’turija taʼ l-​għaġeb tal-​qawwa tiegħu. Kemm jistgħu jsaħħulna l-​fidi tagħna rakkonti bħal dawn meta nieħdu l-​ħin biex nistudjawhom u nimmeditaw fuqhom! (2 Pietru 2:9) Fidi b’saħħitha mbagħad issaħħaħna biex nobdu lil Jehovah, saħansitra meta dak li jitlob minna jidher li jmur kontra r-​raġunar uman. (Proverbji 3:​5, 6) Għalhekk, staqsi lilek innifsek, ‘Qed nistinka biex nibni l-​fidi tiegħi permezz taʼ l-​istudju tal-​Bibbja, it-​talb, u l-​meditazzjoni, kif ukoll bi sħubija regulari man-​nies t’Alla?’​—Lhud 10:​24, 25; 12:​1-3.

L-​Ubbidjenza Tnissel it-​Tama

21. Liema barkiet, issa u fil-​futur, se jkollhom dawk li jobdu lil Jehovah?

²¹ Dawk li jagħmlu l-​ubbidjenza lejn Jehovah parti mill-​mod kif jgħixu ħajjithom jesperjenzaw issa stess it-​twettiq taʼ Proverbji 1:​33, li jgħid: “Min jismaʼ lili [u jobdi] jgħix moħħu mistrieħ, bla ebda tfixkil, bla biżaʼ tal-​ħsara.” Kemm se japplika b’mod meraviljuż dan il-​kliem taʼ faraġ matul il-​jum taʼ vendetta taʼ Jehovah li riesaq! Fil-​fatt, Ġesù qal lid-​dixxipli tiegħu: “Meta jibda jseħħ dan kollu, qawwu qalbkom u erfgħu raskom, għax il-​fidwa tagħkom hi fil-​qrib.” (Luqa 21:28) Jidher ċar, li dawk biss li jobdu lil Alla se jkollhom il-​fiduċja li jisimgħu minn dan il-​kliem.​—Mattew 7:​21.

22. (a) In-nies taʼ Jehovah x’raġuni għandhom biex ikunu fiduċjużi? (b) X’se jiġi diskuss fl-​artiklu li jmiss?

²² Raġuni oħra biex inkunu fiduċjużi hija li “ebda ħaġa ma jagħmel . . . il-​Mulej, jekk ma jurix il-​ħwejjeġ moħbija tiegħu lill-​qaddejja tiegħu l-​profeti.” (Għamos 3:7) Illum, Jehovah ma jnebbaħ lil ebda profeta bħalma kien jagħmel fil-​passat; minflok, hu inkariga lill-​klassi taʼ l-​ilsir leali biex tipprovdi ikel spiritwali fil-​ħin lin-​nies taʼ daru. (Mattew 24:​45-​47, NW) Għalhekk, kemm hu importanti li jkollna attitudni ubbidjenti lejn dak l-​“ilsir”! Bħalma se jurina l-​artiklu li jmiss, ubbidjenza bħal din tirrifletti wkoll l-​attitudni li għandna lejn Ġesù, is-​sid taʼ l-​“ilsir.” Hu l-​Wieħed li “minnu l-​ġnus [se] jisimgħu.”—Ġenesi 49:10.

[Noti taʼ taħt]

Tiftakar Int?

• X’kien ir-​riżultat talli l-​Iżraelin kienu diżubbidjenti għal darba wara l-​oħra?

• Is-Sultan Ġowas kif kien effettwat mill-​ħbiberiji tiegħu, kemm kmieni f’ħajtu kif ukoll iktar tard?

• X’lezzjonijiet nistgħu nitgħallmu minn Baruk?

• In-nies li jobdu lil Jehovah għala m’għandhomx għalfejn jibżgħu hekk kif din is-​sistema preżenti toqrob lejn tmiemha?

[Stampa f’paġna 13]

Taħt il-​gwida taʼ Ġeħojada, iż-​żagħżugħ Ġowas kien ubbidjenti lejn Jehovah

[Stampa f’paġna 15]

Ħbieb ħżiena influwenzaw lil Ġowas biex jordna l-​qtil tal-​profeta t’Alla

[Stampa f’paġna 16]

Kont tobdih int lil Jehovah u tara b’għajnejk il-​qawwa taʼ l-​għaġeb li għandu biex isalva?