Noffru Sagrifiċċji li Jogħġbu lil Alla

“IL-​ĦAJJA ġiet mill-​mewt​—hekk kienu jemmnu l-​Azteki, li kienu jissagrifikaw lill-​bnedmin fuq skala li qatt ma kien hawn bħala fil-​Mesoamerika,” jgħid il-​ktieb The Mighty Aztecs. Il-​ktieb ikompli: ‘Hekk kif kiber l-​imperu, huma kienu jissagrifikaw lill-​bnedmin biex jipprovaw jibnu fiduċja fl-​imperu.’ Skond enċiklopedija oħra, in-​numru taʼ sagrifiċċji umani li kienu jagħmlu l-​Azteki laħaq l-​20,000 fis-​sena.

Kemm jekk minħabba biżaʼ u inċertezza u kemm jekk imqanqlin minn sentimenti taʼ ħtija u rimors, matul l-​istorja n-​nies offrew sagrifiċċji taʼ xi tip jew ieħor lill-​allat tagħhom. Mill-​banda l-​oħra, il-​Bibbja turi li ċerti sagrifiċċji ġew stabbiliti b’mod divin​—minn Ġeħova, l-​Alla li jistaʼ kollox. Għalhekk, ikun xieraq li nistaqsu: Liema tip taʼ sagrifiċċji jogħġbuh lil Alla? U għandhom l-​offerti u s-​sagrifiċċji jkunu parti mill-​qima llum?

Offerti u Sagrifiċċji fil-​Qima Vera

Meta ġie fformat il-​ġens taʼ Iżrael, Ġeħova ta istruzzjonijiet dettaljati dwar kif ried l-​Iżraelin iqimuh, u dan kien jinkludi offerti u sagrifiċċji. (Numri, kapitli 28 u 29) Xi offerti kienu mill-​prodotti tar-​rabaʼ; offerti oħrajn kienu jinvolvu sagrifiċċji t’annimali bħal barrin, nagħaġ, mogħoż, ħamiem, u gamiem. (Levitiku 1:​3, 5, 10, 14; 23:​10-​18; Numri 15:​1-7; 28:7) Kien hemm offerti tal-​ħruq li kellhom jinħarqu kompletament fin-​nar. (Eżodu 29:​38-​42) Kien hemm ukoll sagrifiċċji tas-​sliem, jew tal-​komunjoni, fejn dawk li kienu joffruhom kienu jipparteċipaw billi jieklu minn dak li kien qed jiġi sagrifikat lil Alla.​—Levitiku 19:​5-8.

L-offerti u s-​sagrifiċċji kollha li kienu jiġu preżentati lil Alla taħt il-​Liġi Mosajka kienu mod kif iqimu lil Alla u kif jirrikonoxxuh bħala s-​Sovran taʼ l-​univers. Permezz taʼ sagrifiċċji bħal dawn, l-​Iżraelin kienu jesprimu l-​gratitudni tagħhom lejn Ġeħova għall-​barka u l-​protezzjoni tiegħu kif ukoll biex jiksbu l-​maħfra għal dnubiethom. Sakemm kienu jibqgħu josservaw lealment dak li Ġeħova kien jeħtieġ minnhom għall-​qima, huma kienu jiġu mberkin bil-​kbir.​—Proverbji 3:​9, 10.

Għal Ġeħova, l-​iktar ħaġa importanti kienet l-​attitudni taʼ dawk li kienu joffru s-​sagrifiċċji. Permezz tal-​profeta tiegħu Ħosegħa, Ġeħova qal: “Għaliex jiena tjieba rrid, mhux sagrifiċċju; li tagħrfu ’l Alla rrid, u mhux vittmi maħruqa.” (Ħosegħa 6:6) B’hekk, meta n-​nies tbiegħdu mill-​qima vera u ħadu sehem f’kondotta laxka u xerrdu demm innoċenti, ma kienu jiswew għalxejn is-​sagrifiċċji li kienu qed jippreżentaw fuq l-​artal taʼ Ġeħova. Għalhekk, permezz taʼ Isaija, Ġeħova qal lill-​ġens taʼ Iżrael: “X’tiswieli l-​kotra tas-​sagrifiċċji tagħkom? . . . Xbajt mis-​sagrifiċċji tal-​ħruq tal-​bdabad, u mix-​xaħam tal-​bhejjem smien. Id-​demm tal-​gniedes u l-​ħrief, u taʼ l-​imtaten ma jogħġobnix.”​—Isaija 1:​11.

“Ħaġa li Jiena Ma Qabbadthomx”

B’kuntrast ċar maʼ l-​Iżraelin, l-​abitanti taʼ Kangħan kienu joffru lil uliedhom bħala sagrifiċċji lill-​allat tagħhom, inkluż l-​alla t’Għammon imsejjaħ Molek, magħruf ukoll bħala Milkom jew Molok. (1 Slaten 11:​5, 7, 33; Atti 7:​43) Il-​ktieb Halley’s Bible Handbook jgħid: “Il-​Kangħanin kienu jqimu, billi jieħdu sehem fl-​immoralità sesswali bħala parti mir-​rit reliġjuż fil-​preżenza taʼ l-​allat tagħhom, u mbagħad, kienu joqtlu lill-​ewwel wild tagħhom bħala sagrifiċċju lill-​istess allat.”

Kienu prattiċi bħal dawn jogħġbuh lil Alla Ġeħova? Dażgur li le. Hekk kif l-​Iżraelin kienu waslu biex jidħlu fl-​art taʼ Kangħan, Ġeħova tahom il-​kmand dokumentat f’Levitiku 20:​2, 3: “Għid lil ulied Iżrael: ‘Jekk xi ħadd minn ulied Iżrael, jew mill-​barranin li jgħammru f’Iżrael, jagħti ’l xi ħadd minn nislu lil Molek, jagħtuh il-​mewt billi jħaġġru l-​poplu. U jien indur għalih, u neqirdu minn fost il-​poplu tiegħu, għax ikun ta lil nislu lil Molek, u niġġes is-​santwarju tiegħi u pprofana l-​isem qaddis tiegħi.’”

Għalkemm jidher impossibbli, xi Iżraelin li żvijaw mill-​qima vera adottaw din il-​prattika demonika taʼ li jissagrifikaw lil uliedhom lill-​allat foloz. Rigward dan, Salm 106:​35-​38 jgħid: “Imma tħalltu mal-​ġnus, u tgħallmu d-​drawwiet tagħhom. Taw qima lill-​idoli tagħhom, li saru bħal nassa għalihom. Qatlu b’sagrifiċċji lix-​xjaten lil uliedhom subjien u bniet. Xerrdu demm bla ħtija, demm uliedhom subjien u bniet, li ssagrifikaw lill-​idoli taʼ Kangħan; u l-​art tniġġset bid-​dmija.”

Ġeħova, biex jesprimi kemm kien jistmerr din il-​prattika, qal hekk permezz tal-​profeta tiegħu Ġeremija rigward ulied Ġuda: “Qiegħdu l-​allat moqżieża fid-​dar li fuqha jissejjaħ ismi biex ikasbruha. U bnew is-​santwarju taʼ Tofet li hemm fil-​wied taʼ Ben Ħinnom, u hemm ħarqu ’l uliedhom subjien u bniet, ħaġa li jiena ma qabbadthomx, u lanqas qatt ma ġiet f’rasi.”​—Ġeremija 7:​30, 31.

Minħabba li ħa sehem fi prattiċi daqshekk diżgustanti, il-​ġens taʼ Iżrael fl-​aħħar tilef il-​favur t’Alla. Il-​belt kapitali tiegħu, Ġerusalemm, maż-​żmien ġiet meqruda, u n-​nies ittieħdu bħala lsiera lejn Babilonja. (Ġeremija 7:​32-​34) B’mod ċar, il-​prattika taʼ sagrifiċċji umani bħala offerti m’hijiex ġejja mill-​Alla l-​veru u m’hijiex parti mill-​qima pura. Kull forma taʼ sagrifiċċju uman hija demonika, u l-​aduraturi veri t’Alla jiċħdu kwalunkwe ħaġa li għandha x’taqsam maʼ din il-​prattika.

Is-​Sagrifiċċju Bħala Fidwa taʼ Ġesù Kristu

Madankollu, xi wħud għandhom mnejn jistaqsu, ‘Għala, mela, il-​Liġi taʼ Ġeħova għall-​Iżraelin kienet tirrikjedi s-​sagrifiċċji taʼ l-​annimali?’ L-​appostlu Pawlu kkunsidra propju din il-​mistoqsija u pprovda din it-​tweġiba: “Għala, allura, il-​Liġi? Ġiet miżjuda biex tagħmel in-​nuqqasijiet jidhru, sakemm jasal in-​nisel li lilu saret il-​wegħda . . . Għaldaqstant, il-​Liġi kienet tmexxina qisna tfal lejn Kristu.” (Galatin 3:​19-​24) Is-​sagrifiċċji taʼ l-​annimali taħt il-​Liġi Mosajka kienu qed jirrapreżentaw simbolikament sagrifiċċju akbar li Alla Ġeħova kellu jipprovdi għall-​bnedmin​—dak taʼ Ibnu, Ġesù Kristu. Ġesù rrefera għal dan l-​att kollu mħabba meta qal: “Alla tant ħabb lid-​dinja li ta l-​Iben uniġenitu tiegħu, biex kulmin jeżerċita l-​fidi fih ma jinqeridx imma jkollu l-​ħajja taʼ dejjem.”​—Ġwann 3:​16.

Sforz l-​imħabba għal Alla u għall-​bnedmin, Ġesù ta l-​ħajja umana perfetta tiegħu minn jeddu bħala fidwa għan-​nisel taʼ Adam. (Rumani 5:​12, 15) Ġesù qal: “Bin il-​bniedem ma ġiex biex ikun moqdi, imma biex jaqdi u jagħti ruħu b’fidwa għal ħafna.” (Mattew 20:28) L-​ebda bniedem ieħor fuq l-​art ma setaʼ jifdi lill-​bnedmin mill-​jasar tad-​dnub u l-​mewt li nbigħu fih minn Adam. (Salm 49:​8, 9 [49:​7, 8, NW]) B’hekk, Pawlu spjega li Ġesù “daħal darba għal dejjem fil-​post qaddis, le, mhux bid-​demm tal-​mogħoż u taʼ l-​għoġiela, imma b’demmu stess, u kisbilna ħelsien taʼ dejjem.” (Ebrej 9:​12) Billi aċċetta d-​demm bħala sagrifiċċju taʼ Ġesù, Alla “ħassar il-​kitba kontra tagħna.” Jiġifieri, Ġeħova warrab il-​patt tal-​Liġi, bl-​offerti u s-​sagrifiċċji li kien jirrikjedi, u b’hekk introduċa ‘l-​għotja taʼ ħajja taʼ dejjem.’​—Kolossin 2:​14; Rumani 6:​23.

Sagrifiċċji u Offerti Spiritwali

Ladarba s-​sagrifiċċji u l-​offerti taʼ l-​annimali m’għadhomx parti mill-​qima vera, hemm bżonn nagħmlu xi sagrifiċċji llum? Iva, tabilħaqq. Ġesù Kristu għex ħajja kollha sagrifiċċji biex jaqdi lil Alla u fl-​aħħar offra lilu nnifsu għall-​bnedmin. Għaldaqstant, hu ddikjara: “Jekk xi ħadd irid jiġi warajja, ħa jiċħad lilu nnifsu u jerfaʼ z-​zokk tat-​tortura tiegħu u jibqaʼ miexi warajja.” (Mattew 16:24) Dan ifisser li kulmin irid isir segwaċi taʼ Ġesù jrid jagħmel ċerti sagrifiċċji speċifiċi. X’inhuma dawn?

L-ewwelnett, segwaċi ġenwin taʼ Kristu ma jibqax jgħix għalih innifsu imma jgħix biex jagħmel ir-​rieda t’Alla. Hu jpoġġi r-​rieda u x-​xewqat persunali tiegħu wara dawk t’Alla. Innota kif ipoġġiha l-​appostlu Pawlu: “Ħuti, nitlobkom bil-​ħrara minħabba l-​mogħdrijiet t’Alla biex tippreżentaw ġisimkom bħala sagrifiċċju ħaj, qaddis, aċċettabbli għal Alla, jiġifieri, servizz sagru bil-​qawwa tar-​raġuni tagħkom. U tibqgħux magħġunin skond din is-​sistema, imma inbidlu billi ġġeddu moħħkom, biex tagħtu prova lilkom infuskom dwar x’inhi r-​rieda tajba u aċċettabbli u perfetta t’Alla.”​—Rumani 12:​1, 2.

Barra minn hekk, il-​Bibbja tindika li l-​espressjonijiet tagħna taʼ tifħir jistgħu jitqiesu bħala sagrifiċċji offruti lil Ġeħova. Il-​profeta Ħosegħa uża l-​frażi “l-​barrin żgħar tat-​tifħir,” biex juri li Alla jikkunsidra t-​tifħir taʼ xofftejna bħala wieħed mill-​aqwa sagrifiċċji. (Ħosegħa 14:​2, NW) L-​appostlu Pawlu ħeġġeġ lill-​Kristjani Ebrej: ‘Offru dejjem sagrifiċċju taʼ tifħir lil Alla, jiġifieri, il-​frott tax-​xofftejn li jistqarru ismu pubblikament.’ (Ebrej 13:15) Illum, ix-​Xhieda taʼ Ġeħova jħabirku ħafna f’li jippridkaw l-​aħbar tajba u jagħmlu dixxipli min-​nies tal-​ġnus kollha. (Mattew 24:14; 28:​19, 20) Huma qed joffru sagrifiċċji taʼ tifħir lil Alla lejl u nhar madwar id-​dinja.​—Rivelazzjoni 7:​15.

Flimkien max-​xogħol taʼ l-​ippridkar, fost is-​sagrifiċċji li jogħġbu lil Alla hemm inkluż li wieħed jagħmel il-​ġid m’oħrajn. “Tinsewx tagħmlu l-​ġid u taqsmu m’oħrajn,” ħeġġeġ Pawlu, “għax sagrifiċċji bħal dawn jogħġbu ħafna lil Alla.” (Ebrej 13:16) Fil-​fatt, dawk li joffru sagrifiċċji taʼ tifħir lil Alla jrid ikollhom kondotta xierqa jekk iridu li s-​sagrifiċċji tagħhom jogħġbuh. Pawlu wissa: “Ġibu ruħkom kif jixraq lill-​aħbar tajba dwar il-​Kristu.”​—Filippin 1:​27; Isaija 52:11.

Bħal fil-​passat, is-​sagrifiċċji kollha li jsiru biex jappoġġaw il-​qima vera se jirriżultaw f’ferħ kbir u f’barkiet minn Ġeħova. Għalhekk, jalla nagħmlu dak kollu li nistgħu biex noffru sagrifiċċji li verament jogħġbu lil Alla!

[Stampa f’paġna 18]

‘Issagrifikaw lil uliedhom subjien u bniet lill-​idoli taʼ Kangħan’

[Stampi f’paġna 20]

Billi jippridkaw l-​aħbar tajba u jkunu t’għajnuna b’modi oħrajn, il-​Kristjani veri joffru sagrifiċċjili jogħġbu lil Alla