Żewġ “Mirakli” f’Konvenzjoni fil-​Ġeorġja

AVVENIMENT li ma jintesiex, u li fih seħħew żewġ “mirakli” sar fl-​2006 fil-​pajjiż tal-​Ġeorġja. Għal tlett ijiem, mis-​7 sad-​9 taʼ Lulju, il-​Konvenzjoni Distrettwali tax-​Xhieda taʼ Ġeħova “Il-​Ħelsien fil-​Qrib!” saret f’sitt postijiet madwar il-​pajjiż. Kienet festa spiritwali li gawdew minnha iktar minn 17,000 ruħ.

F’Jannar taʼ l-​2006, saru sforzi biex jinstab post xieraq sabiex jinġabru eluf taʼ Xhieda fil-​belt fejn kienet se ssir il-​konvenzjoni, fi Tbilisi, il-​belt kapitali tal-​Ġeorġja. Postijiet oħrajn tal-​konvenzjoni kellhom ikunu magħqudin mal-​programm permezz tat-​telekomunikazzjoni.

Il-libertà tal-​qima fil-​Ġeorġja ġiet mogħtija progressivament f’dawn l-​aħħar snin. Minkejja l-​oppożizzjoni tant mifruxa fil-​passat, ix-​Xhieda komplew għaddejjin bit-​tħejjijiet, fiduċjużi li kien se jinstab post għall-​konvenzjoni fil-​belt kapitali. In-​nies fil-​Ġeorġja huma dħulin u ospitabbli b’mod naturali. Madankollu, fost xi uffiċjali hemm preġudizzju reliġjuż qawwi ħafna. Kienu huma se jegħlbu s-​sentiment tagħhom taʼ preġudizzju u jħallu lix-​Xhieda jikru faċilità?

L-aħwa li jaqdu fil-​Kumitat tal-​Konvenzjoni żaru diversi stejdjums u swali taʼ l-​isports kbar. Il-​maniġers wegħduhom li setgħu jużaw il-​faċilitajiet tagħhom imma ma ridux jaċċettaw data speċifika għall-​kiri. Għalhekk, il-​kumitat kien sorpriż, meta l-​amministrazzjoni Filarmonika taʼ Tbilisi qablet li tikri l-​faċilità lix-​Xhieda taʼ Ġeħova. Is-​sala tal-​kunċert tinsab fil-​qalba tal-​belt, fejn jinżammu ħafna mill-​avvenimenti mill-​iktar prestiġjużi.

Inkuraġġit mir-​riżultati tajbin taʼ l-​isforzi tiegħu, il-​kumitat beda jorganizza l-​konvenzjoni taʼ Tbilisi, kif ukoll konvenzjonijiet oħrajn fl-​irħula u fil-​bliet madwar il-​pajjiż li jinkludu Tsnori, Kutaisi, Zugdidi, Kaspi, u Gori. Sar ħafna xogħol biex dawn il-​postijiet taʼ konvenzjonijiet ikollhom konnessjoni mal-​programm b’sistema telefonika sabiex il-​programm isir simultanjament. Kollox kien jinsab lest. Imbagħad, f’daqqa waħda, ġimgħa biss qabel ma bdiet il-​konvenzjoni, id-​diretturi tas-​sala tal-​kunċert Filarmoniku fi Tbilisi, ħassru l-​kuntratt. Ma ngħatat l-​ebda spjegazzjoni.

L-​Ewwel “Miraklu”

X’setgħu jagħmlu l-​aħwa f’dan iż-​żmien qasir li kien għad fadal? L-​unika alternattiva kienet ir-​raħal taʼ Marneuli, post tal-​biedja li jinsab 40 kilometru ’l barra minn Tbilisi. Ħafna konvenzjonijiet inżammu f’dan il-​post fil-​proprjetà taʼ familja li huma Xhieda taʼ Ġeħova. Dan il-​post qabel kien ġnien kbir. Għal dawn l-​aħħar għaxar snin, kien l-​unika post li l-​kongregazzjonijiet taʼ Tbilisi setgħu jużaw għall-​konvenzjonijiet. Madankollu, Marneuli huwa wkoll il-​post fejn ix-​Xhieda taʼ Ġeħova esperjenzaw attakki minn marmalji feroċi.

Wieħed minn dawn l-​aċċidenti seħħ fis-​16 taʼ Settembru tas-​sena 2000. Il-​pulizija tal-​belt taʼ Marneuli għamlet barrikati biex twaqqaf lix-​Xhieda milli jaslu fuq il-​post tal-​konvenzjoni. Imbagħad ġew xarabanks mimlijin delinkwenti mmexxijin minn Vasili Mkalavishvili li kien ġie mneħħi mill-​pożizzjoni tiegħu bħala qassis Ortodoss. Huma waqqfu xarabanks u karozzi li kienu sejrin għall-​konvenzjoni f’Marneuli, kaxkru ’l barra bosta delegati mill-​vetturi, u sawtuhom bla ħniena, waqt li lil passiġġieri oħrajn ħadulhom dak li kellhom, inkluż il-​Bibbji u l-​letteratura Biblika tagħhom.

Ukoll, il-​post tal-​konvenzjoni f’Marneuli ġie attakkat minn marmalja taʼ 60 persuna. Xi 40 Xhud ġew imweġġgħin. Wieħed ħu qalaʼ daqqa taʼ sikkina f’sidru. Xi wħud minn dawk li għamlu l-​attakk kellhom snieter isserrati, li bdew jisparaw bihom bl-​addoċċ fl-​ajru. Wieħed minnhom ipponta senter lejn sidt il-​post u ġagħalha tagħtih il-​flus u l-​ġojjellerija. Dawk tal-​marmalja serqulha kulma kien hemm fid-​dar, li kienet tinsab f’tarf wieħed tal-​post tal-​konvenzjoni, u serqulha kulma kellha taʼ valur. Wara li kissru t-​twieqi kollha fid-​dar, huma ħarqu l-​letteratura Biblika u l-​bankijiet li kienu saru apposta għall-​konvenzjoni. Huma qerdu tunnellata u nofs letteratura. Minflok ma waqqfet dan l-​att kriminali, il-​pulizija li kienet fuq ix-​xena ħadet sehem fil-​vjolenza kontra x-​Xhieda.a

Il-​Kumitat tal-​Konvenzjoni kellu jissielet mhux biss mat-​theddid tal-​vjolenza imma wkoll maʼ l-​isfida taʼ li jqiegħed 5,000 persuna f’post li normalment jiflaħ madwar 2,500 ruħ. Kif setgħet din il-​problema tiġi solvuta fi żmien daqshekk qasir? Kien jidher qisu miraklu meta s-​sidien taʼ proprjetà maġenb il-​post fejn kienet se ssir il-​konvenzjoni avviċinaw lill-​aħwa u offrew li jikrulhom l-​art tal-​ġonna tagħhom.

Ma kinitx biċċa xogħol żgħira biex din l-​art tinbidel f’post għall-​konvenzjoni. It-​temp għamel is-​sitwazzjoni diffiċli ħafna​—ix-​xita baqgħet nieżla l-​ġimgħa kollha qabel il-​konvenzjoni. Ir-​rabaʼ tal-​ġirien kien miżrugħ bil-​patata, u kellhom bżonn jaħsduh. L-​ewwel, il-​volontieri nġabru fix-​xita biex jaqilgħu l-​patata. Imbagħad tneħħew il-​ħitan u tpoġġa qafas sabiex jagħmlu tined li jipproteġu lill-​udjenza mix-​xemx u x-​xita. Kellhom jinħadmu ħafna iktar bankijiet taʼ l-​injam, u installaw iktar apparat mas-​sistema tas-​sawnd. Lejl u nhar il-​volontieri għamlu x-​xogħol taʼ l-​injam li kien hemm bżonn, xi wħud saħansitra baqgħu għaddejjin mingħajr irqad.

Kulħadd beda jaħseb: “X’se jiġri jekk ix-​xita tkompli nieżla matul il-​konvenzjoni? Se jispiċċaw id-​delegati mgħarrqin fit-​tajn?” Sabiex titgħatta l-​art imxarrba, inxtara t-​tiben. Fl-​aħħar, ħarġet ix-​xemx! Matul it-​tlett ijiem kollha tal-​konvenzjoni, is-​sħana sabiħa tax-​xemx ksiet l-​art.

Meta waslu d-​delegati, huma ġew milqugħin minn xenarju mill-​isbaħ. Is-​serenità tal-​kampanja kienet qisha dehra bil-​quddiem tad-​dinja l-​ġdida. Komdi bil-​qiegħda, id-​delegati kienu mdawrin b’siġar tat-​tin u b’siġar taʼ frott ieħor u b’għelieqi tal-​qamħirrum u tad-​tadam. In-​naħa taʼ wara tal-​palk kienet imżejna bid-​dwieli taʼ l-​għeneb. Kultant matul il-​programm, l-​udjenza setgħet tismaʼ xi sriedaq jiddnu u xi tiġieġ iqaqu hekk kif il-​bajd tagħhom kien qed jinġabar. Kien hemm xi ħsejjes oħrajn li s-​soltu tismaʼ fil-​kampanja, imma għal dawk li kienu qed jattendu, dawn kienu biss bħal għanja pjaċevoli. Minflok ma ġew aljenati, dawk fl-​udjenza bilkemm innotaw x’kien qed jiġri madwarhom, minħabba li kienu attenti jisimgħu l-​programm eċċellenti bbażat fuq il-​Bibbja. Madankollu, dawn ma kinux l-​uniċi mumenti taʼ din il-​konvenzjoni li ma kinux se jintesew.

It-​Tieni “Miraklu”

Il-​ġimgħa fil-​għodu, fil-​konklużjoni tas-​sessjoni, id-​delegati ngħataw sorpriża meta Geoffrey Jackson, membru tal-​Ġemgħa li Tiggverna tax-​Xhieda taʼ Ġeħova, ħabbar il-​ħarġa tan-​New World Translation of the Holy Scriptures kompluta bil-​Ġeorġjan.b L-​għajnejn taʼ ħafna wħud kienu mimlijin dmugħ, għaliex kienu sempliċement mgħaġġbin. Familja waħda b’eċċitament qalet: “Aħna ma nistgħux nieqfu nesprimu l-​gratitudni tagħna għal dan il-​miraklu​—miraklu taʼ Ġeħova. Biċċa xogħol daqshekk kbira, fi żmien daqshekk qasir!”

Oħt mir-​raħal taʼ Tsalendjikha li semgħet il-​programm permezz tat-​telefon wieġbet: “Ma nistax nesprimi l-​ferħ li ħassejt meta ngħatajna l-​Bibbja kompluta. Nixtieq nirringrazzjakom għal din il-​konvenzjoni taʼ tlett ijiem li tispikka. Kienet tassew avveniment storiku.” Familja f’kongregazzjoni fil-​Ġeorġja tal-​punent, maġenb il-​Baħar l-​Iswed, qalet: “S’issa, aħna kellna Bibbja waħda biss għall-​familja kollha, imma issa l-​erbgħa li aħna għandna kopja persunali kull wieħed tan-​New World Translation. Issa kull wieħed minna jistaʼ jistudja l-​Bibbja personalment.”

Madankollu, wara l-​kwinti, mhux kollox mar ward u żahar. Per eżempju, għalkemm In-​New World Translation kompluta, kienet stampata u trasportata lejn il-​Ġeorġja fil-​ħin għall-​konvenzjoni, l-​uffiċjali tad-​Dipartiment tad-​Dwana rrifjutaw li jħallu l-​konsenja tidħol fil-​Ġeorġja. L-​aħwa appellaw lill-​Uffiċċju taʼ l-​Ombudsman. L-​ombudsman irnexxielu jeħles il-​konsenja tal-​Bibbji eżatt fil-​ħin għall-​konvenzjoni distrettwali. Hu saħansitra bagħat l-​assistent tiegħu fejn kienet qed issir il-​konvenzjoni f’Marneuli biex jakkwista kopji tal-​Bibbja l-​ġdida għall-​uffiċċju tagħhom.

Merħba mill-​Qalb, bi Stil Ġeorġjan

Il-​konvenzjoni distrettwali f’Marneuli kienet okkażjoni sinifikanti ferm għax-​Xhieda taʼ Ġeħova fil-​Ġeorġja għal raġuni oħra. Membru tal-​Ġemgħa li Tiggverna tax-​Xhieda taʼ Ġeħova kellu sehem fil-​programm. Kulħadd fl-​attendenza tant kien eċċitat li xtaq personalment jestendilu merħba tradizzjonali mill-​qalb. Ħuna Jackson kellu joqgħod bil-​wieqfa u jsellem lill-​aħwa għal sigħat sħaħ qabel, matul, u wara l-​konvenzjoni, imma kien ferħan jagħmel dan.

Lura fl-​1903 fit-​tmiem taʼ konvenzjoni oħra, wieħed ħu kien qal: “Ma kontx inbiddel il-​benefiċċji kollha li rċivejt minn din il-​konvenzjoni m’elf dollaru, u jien sempliċi raġel fqir.” Iktar minn seklu wara, dan kien eżatt kif ħassewhom ix-​Xhieda li attendew il-​konvenzjoni importanti li seħħet fis-​sajf tas-​sena 2006 fil-​pajjiż tal-​Ġeorġja.

[Noti taʼ taħt]

[Kaxxa f’paġna 19]

“L-​Iżgħar Fostkom” Kiber

Il-​kliem taʼ Isaija 60:22 seħħ tabilħaqq fil-​Ġeorġja: “L-​iżgħar fostkom isir tribù u l-​iċken isir ġens qawwi. Jien il-​Mulej, li nfittex nagħmel dan kollu f’waqtu.” F’inqas minn 20 sena, in-​numru taʼ pubblikaturi tas-​Saltna fil-​Ġeorġja kiber minn ftit inqas minn 100 ruħ għall-​madwar 16,000 ruħ. Dawn il-​ministri żelużi tal-​Kelma t’Alla qed jikkonduċu madwar 8,000 studju tal-​Bibbja kull ġimgħa​—potenzjal meraviljuż għal iktar żjieda fil-​Ġeorġja.

[Tabella/Mappep f’paġna 16]

(Għall formazzjoni sħiħa tat-test, ara pubblikazzjoni)

FEDERAZZJONI RUSSA

ĠEORĠJA

Zugdidi

Kutaisi

Marneuli Gori

Kaspi

Tsnori

TBILISI

TURKIJA

ARMENJA

AZERBAJĠAN

[Sors]

Globu: Based on NASA/Visible Earth imagery

[Stampa f’paġna 16]

Statwa fi Tbilisi

[Stampi f’paġna 17]

Il-​programm tal-​konvenzjoni f’Marneuli kien konness permezz tat-​telekomunikazzjoni maʼ ħames postijiet oħrajn

[Stampi f’paġna 18]

Id-​delegati kienu ferħanin ferm bis-​sorpriża tal-​ħarġa tan-​“New World Translation” kompluta bil-​Ġeorġjan