Ma Konniex Beżgħanin—Ġeħova Kien Magħna

Kif rakkontata minn Egỵptia Petridou

Fl-​1972, ix-​Xhieda madwar Ċipru nġabru f’Nicosia biex jisimgħu taħdita speċjali minn Nathan H. Knorr, li għal ħafna snin sa dakinhar kien ħa t-​tmexxija fix-​xogħol tax-​Xhieda taʼ Ġeħova. Hu mill-​ewwel għarafni, u saħansitra qabel ma kelli ċans nintroduċi ruħi, staqsieni: “Għandek xi aħbarijiet mill-​Eġittu?” Jien kont iltqajt maʼ Ħuna Knorr 20 sena qabel fil-​belt taʼ Lixandra fejn kont ngħix ġo l-​Eġittu.

JIEN twilidt f’Lixandra fit-​23 taʼ Jannar, 1914, l-​akbar fost erbat itfal. Trabbejna tefgħa taʼ ġebla ’l bogħod mill-​baħar. Dak iż-​żmien Lixandra kienet belt sabiħa b’ħafna razez u kulturi differenti, magħrufa għall-​arkitettura u l-​istorja tagħha. Minħabba li l-​Ewropej tħalltu maʼ l-​Għarab, aħna t-​tfal tgħallimna nitkellmu bil-​Franċiż, bl-​Għarbi, bl-​Ingliż, u bit-​Taljan, kif ukoll bil-​lingwa tal-​familja tagħna, il-​Grieg.

Wara li ggradwajt mill-​iskola, sibt xogħol f’ħanut tal-​ħwejjeġ tal-​moda Franċiża, fejn kont nieħu pjaċir niddisinja u nħit ilbiesi eleganti għan-​nisa taʼ klassi għolja fis-​soċjetà. Jien kont ukoll bniedma reliġjuża ħafna u kont nieħu gost naqra l-​Bibbja, avolja ftit li xejn kont nifhem minn dak li kont naqra.

Madwar dan iż-​żmien—f’nofs is-​snin 30—iltqajt maʼ żagħżugħ mill-​aħjar li kien minn Ċipru. Theodotos Petrides, wrestler mill-​aqwa, imma li kien tgħallem ukoll is-​sengħa taʼ dolċier u kien jaħdem f’ħanut magħruf tal-​pasti. Theodotos ħa grazzja miegħi, tfajla magħmula żgħira b’xagħarha skur. Spiss kien jiġi jkantali kanzunetti Griegi romantiċi taħt it-​tieqa tiegħi. Iżżewwiġna fit-​30 taʼ Ġunju, 1940. Dak kien żmien sabiħ. Konna ngħixu f’appartament taħt l-​appartament t’ommi. L-​ewwel tifel tagħna, John, twieled fl-​1941.

Nitgħallmu Veritajiet Bibliċi

Għal xi żmien, Theodotos kien ħassu li ma kienx kuntent bir-​reliġjon li konna nħaddnu, u beda jistaqsi xi mistoqsijiet dwar il-​Bibbja. Mingħajr ma kont naf, ix-​Xhieda taʼ Ġeħova kienu bdew jistudjaw il-​Bibbja miegħu. Darba minnhom, waqt li kont id-​dar bit-​tarbija tagħna, waħda mara ħabbtitli l-​bieb u tatni kard tat-​testimonjanza b’messaġġ mill-​Bibbja. Biex inkun edukata, waqaft u bdejt naqraha. Imbagħad offrietli xi letteratura mill-​Bibbja. Lanqas temmen, kienu l-​istess kotba li Theodotos kien ġab miegħu d-​dar!

“Iva, għandi dawn il-​kotba,” jien għedtilha. “Jekk jogħġbok idħol ftit.” Lanqas laħqet daħlet li ma bdejtx nistaqsi lil din ix-​Xhud, Eleni Nicolaou, mistoqsija wara l-​oħra. Bil-​paċenzja kollha, hi użat il-​Bibbja biex twiġibni. Jien ħadt pjaċir. F’daqqa waħda, bdejt nifhem il-​messaġġ tal-​Bibbja. Matul pawsa li kellna fil-​konversazzjoni tagħna, Eleni għarfet ritratt tar-​raġel tiegħi. “Dak ir-​raġel nafu!” qalet. Is-​sigriet taʼ Theodotos inkixef. Jien inħsadt. Theo kien qed imur il-​laqgħat Kristjani mingħajri—saħansitra mingħajr ma qalli! Meta Theodotos ġie d-​dar dakinhar għedtlu: “Dak il-​post li mort nhar il-​Ħadd li għadda—din il-​ġimgħa jien ġejja miegħek!”

Fl-ewwel laqgħa li mort, grupp taʼ madwar għaxra min-​nies kienu qed jiddiskutu l-​ktieb Bibliku taʼ Mikea. Jien daħħalt f’qalbi dak kollu li smajt! Minn dakinhar ’l hemm, kull nhar taʼ Ġimgħa fil-​għaxija George u Katerini Petraki kienu jżuruna sabiex jistudjaw il-​Bibbja magħna. Missieri u ħafna minn ħuti opponew l-​istudju tagħna max-​Xhieda, imma oħti kienet tolleranti, avolja qatt ma saret Xhud. Madankollu, ommi ħaddnet il-​verità tal-​Bibbja. Fl-​1942, ommi, Theodotos, u jien tgħammidna fil-​baħar f’Lixandra b’simbolu tad-​dedikazzjoni tagħna lil Ġeħova.

Ħajjitna Titħarbat

Fl-​1939, bdiet it-​tieni gwerra dinjija, u din ma damitx ma ħraxet. Sal-​bidu tas-​snin 40, il-​Ġeneral Ġermaniż Erwin Rommel u t-​truppi tiegħu bit-​tankijiet tal-​gwerra kienu f’El Alamein, post fil-​viċin, u Lixandra kienet mimlija b’nies militari tal-​Britannja. Aħna bdejna naħżnu l-​ikel. Imbagħad, Theodotos intalab jieħu ħsieb ħanut ġdid tal-​ħelu li l-​imgħallem tiegħu kellu f’Port Taufiq viċin is-​Swejz, u għalhekk morna noqogħdu hemmhekk. Żewġ Xhieda li kienu jitkellmu bil-​Grieg ġew ifittxuna. Għalkemm ma kinux jafu l-​indirizz tagħna, huma ppridkaw minn dar għal dar sakemm sabuna.

Sakemm konna f’Port Taufiq, studjajna l-​Bibbja maʼ Stavros u Giula Kypraios u t-​tfal tagħhom, Totos u Georgia, u huma saru ħbieb kbar tagħna. Stavros tant kien jieħu pjaċir jistudja l-​Bibbja li hu kien idawwar l-​arloġġi kollha tad-​dar tiegħu siegħa lura ħalli nitilfu l-​aħħar ferrovija lura d-​dar, u b’hekk indumu hemm iktar. Id-​diskussjonijiet tagħna kienu jibqgħu sejrin sa tard bil-​lejl.

Domna sena u nofs ngħixu f’Port Taufiq, imbagħad morna lura Lixandra meta ommi mardet. Hi mietet leali lejn Ġeħova fl-​1947. Għal darb’oħra, ħassejna kif Ġeħova saħħaħna permezz tas-​sħubija inkuraġġanti taʼ ħbieb Kristjani maturi. Aħna stajna wkoll nuru ospitalità lill-​missjunarji li kienu fi triqithom lejn l-​inkarigi tagħhom f’pajjiżi barranin meta l-​vapuri li kienu qed ibaħħru fuqhom kienu jidħlu għal ftit fil-​port taʼ Lixandra.

Ferħ u Inkwiet

Fl-​1952, twieled it-​tieni tifel tagħna, James. Bħala ġenituri, aħna rrikonoxxejna l-​importanza li rrabbu t-​tfal tagħna f’ambjent li fih setgħu jibbenefikaw spiritwalment, u għalhekk fid-​dar tagħna kellna arranġamenti għal studju regulari tal-​Bibbja u spiss konna nistiednu l-​aħwa fis-​servizz full-time. Għalhekk, it-​tifel il-​kbir tagħna, John, żviluppa mħabba għall-​verità tal-​Bibbja, u waqt li kien għadu żagħżugħ beda x-​xogħol taʼ pijunier. Fl-​istess ħin, hu kien jattendi l-​iskola taʼ fil-​għaxija ħalli jtemm l-​edukazzjoni sekulari.

Ftit wara, sirna nafu li Theodotos kellu kundizzjoni serja tal-​qalb u ngħata l-​parir biex jieqaf jagħmel it-​tip taʼ xogħol li kien qed jagħmel. It-​tifel tagħna James kellu biss erbaʼ snin. X’konna se nagħmlu? Ma kienx Ġeħova wiegħed: “La tibżax, għax miegħek jien”? (Is. 41:10) Immaġina x’sorpriża ħadna u kemm kien taʼ ferħ għalina meta fl-​1956 ġejna mistidnin biex naqdu bħala pijunieri f’Ismailia, viċin il-​Kanal tas-​Swejz! Is-​snin taʼ wara kienu żminijiet diffiċli fl-​Eġittu, u ħutna l-​Kristjani kellhom bżonn l-​inkuraġġiment.

Fl-1960, kellna nitilqu mill-​Eġittu b’bagalja waħda kull wieħed. Morna noqogħdu Ċipru, il-​gżira minfejn kien ġej ir-​raġel tiegħi. Sa dan iż-​żmien, Theodotos kien marid sew u ma setax jaħdem. Madankollu, ħu Kristjan qalbu tajba u l-​mara tiegħu offrewlna noqogħdu f’dar li kellhom. B’dispjaċir, sentejn wara żewġi miet, u jien spiċċajt waħdi maʼ James, li kien għadu żgħir. John, li wkoll kien ġie joqgħod Ċipru, kien iżżewweġ u kellu l-​familja tiegħu x’jieħu ħsieb.

Ħadu Ħsiebna fi Żmien Diffiċli

Imbagħad, Stavros u Dora Kairis qalulna li stajna noqogħdu magħhom. Inżilt għarkopptejja u rringrazzjajt lil Ġeħova talli għal darb’oħra ħa ħsieb il-​bżonnijiet tagħna. (Salm 145:16) Meta Stavros u Dora ddeċidew li jbigħu d-​dar tagħhom u jibnu dar ġdida b’Sala tas-​Saltna fl-​ewwel sular, b’qalb tajba huma bnew żewġ kmamar oħra għalija u għal James.

Eventwalment, James iżżewweġ, u hu u martu qdew bħala pijunieri sakemm kellhom l-​ewwel tarbija. Iktar tard kellhom tlett itfal oħra. Fl-​1974, sentejn wara ż-​żjara memorabbli taʼ Ħuna Knorr, f’Ċipru nqalaʼ xi inkwiet politiku.a Ħafna nies, inkluż xi Xhieda, ħarbu minn djarhom u reġgħu bdew ħajja mill-​ġdid xi mkien ieħor. Ibni John kien wieħed minnhom. Hu mar jgħix il-​Kanada maʼ martu u t-​tliet uliedu. Madankollu, fl-​istess perijodu, konna ferħanin meta rajna ż-​żjieda fin-​numru taʼ pubblikaturi tas-​Saltna f’Ċipru.

Meta bdejt nieħu l-​pensjoni, setaʼ jkolli sehem akbar fil-​ministeru. Imma xi ftit tas-​snin ilu, tatni puplesija ħafifa u kelli mmur noqgħod maʼ ibni James u l-​familja tiegħu. Iktar tard, meta saħħti marret lura, kelli nidħol l-​isptar għal diversi ġimgħat, u mbagħad mort noqgħod f’dar tax-​xjuħ. Minkejja l-​uġigħ li ma jaqtaʼ qatt, jien nagħti xiehda lil dawk li jaħdmu hemm, lill-​pazjenti, u lil dawk li jiġu jżuru lill-​pazjenti. Inqattaʼ ħafna ħin nistudja waħdi u bl-​għajnuna mimlija qalb tajba taʼ ħuti spiritwali, jirnexxili nattendi l-​Istudju tal-​Ktieb tal-​Kongregazzjoni li qiegħed fil-​viċin.

Faraġ fi Xjuħiti

Jien nitfarraġ meta nismaʼ dwar uħud li jien u Theodotos kellna l-​privileġġ li ngħinuhom. Ħafna minn uliedhom u t-​tfal tat-​tfal tagħhom qed jaqdu fil-​ministeru full-time—xi wħud fl-​Awstralja, il-​Greċja, l-​Ingilterra, l-​Isvizzera, u l-​Kanada. Illum, ibni John u l-​mara tiegħu jgħixu l-​Kanada mat-​tifel tagħhom. It-​tifla l-​kbira tagħhom u r-​raġel tagħha huma pijunieri. It-​tifla ż-​żgħira tagħhom u r-​raġel tagħha, Linda u Joshua Snape, ġew mistidnin biex jattendu l-​124 klassi taʼ l-​Iskola taʼ Gilgħad (Watchtower Bible School of Gilead).

Ibni James u l-​mara tiegħu issa qed jgħixu l-​Ġermanja. Tnejn minn uliedhom qed jaqdu f’Betel—wieħed f’Ateni, il-​Greċja, u l-​ieħor f’Selters, il-​Ġermanja. It-​tifel iż-​żgħir tagħhom, it-​tifla tagħhom, u żewġha jaqdu bħala pijunieri fil-​Ġermanja.

Kemm għandna stejjer x’nirrakkontawlhom lil ommi u lill-​għażiż Theodotos meta jerġgħu jiġu rxoxtati! Huma se jkunu ferħanin ħafna la jkunu jafu x’wirt spiritwali mill-​aqwa ħallew lill-​familja tagħhom.b

[Noti taʼ taħt]

[Kumment f’paġna 24]

Għal darba oħra, ħassejna kif Ġeħova saħħaħna permezz tas-​sħubija inkuraġġanti taʼ ħbieb Kristjani maturi

[Mappa f’paġna 23]

(Għall-formazzjoni sħiħa tat-​test, ara l-​pubblikazzjoni)

ĊIPRU

NICOSIA

IL-​BAĦAR MEDITERRAN

EĠITTU

KAJR

Lixandra

El Alamein

Ismailia

Swejz

Il-​Port Taufiq

Il-​Kanal tas-​Swejz

[Sors]

Based on NASA/Visible Earth imagery

[Stampa f’paġna 23]

Maʼ Theodotos fl-​1938

[Stampa f’paġna 25]

Ibni James maʼ martu

[Stampa f’paġna 25]

Ibni John maʼ martu