Afda f’Ġeħova Hekk Kif Joqrob it-Tmiem
“Afdaw f’Ġeħova għal dejjem.”—IS. 26:4.
1. Liema kuntrast jeżisti bejn il-qaddejja t’Alla u n-nies fid-dinja?
AĦNA ngħixu f’dinja fejn miljuni taʼ nies m’għadhomx jafu lil min jew x’jaqbdu jafdaw, forsi għaliex ġew imweġġgħin jew diżappuntati ħafna drabi. X’kuntrast mal-qaddejja taʼ Ġeħova! Minħabba li huma gwidati mill-għerf t’Alla, huma jafu li m’għandhomx ipoġġu l-fiduċja tagħhom f’din id-dinja jew “fin-nobbli” tagħha. (Salm 146:3) Minflok, huma jħallu ħajjithom u l-futur tagħhom f’idejn Ġeħova, għaliex jafu li jħobbhom u li dejjem iwettaq Kelmtu.—Rum. 3:4; 8:38, 39.
2. Ġożwè x’setaʼ jgħid dwar kemm Alla hu taʼ min jafdah?
2 Ġożwè tal-qedem setaʼ jgħid kemm Alla hu taʼ min jafdah. Lejn tmiem ħajtu, hu qal lil sħabu Iżraelin: “Intom tafu sew b’qalbkom kollha u b’ruħkom kollha li lanqas kelma waħda mill-kliem tajjeb kollu li Ġeħova Alla tagħkom qalilkom ma naqset. Kollu seħħ għalikom.”—Ġoż. 23:14.
3. X’jirrivela l-isem t’Alla dwaru?
3 Ġeħova jwettaq il-wegħdi tiegħu mhux sempliċement għax iħobb lill-qaddejja tiegħu, imma speċjalment minħabba ismu stess. (Eżo. 3:14; 1 Sam. 12:22) Rigward l-isem divin, l-introduzzjoni taʼ The Emphasized Bible minn J. B. Rotherham tgħid: “[L-isem] isir wegħda mill-iktar ħanina; il-kapaċità Divina li tadatta ruħha għal kull ċirkustanza, kull diffikultà, kull bżonn li jistaʼ jinqalaʼ . . . [Huwa] wegħda, . . . rivelazzjoni, tifkira, garanzija. Għal dan l-Isem, Alla dejjem se jkun leali; Hu qatt mhu se jkollu għalfejn jistħi minħabba fih.”
4. (a) Xi jħeġġiġna nagħmlu Isaija 26:4? (b) X’se nikkunsidraw f’dan l-artiklu?
4 Staqsi lilek innifsek: ‘Nafu biżżejjed lil Ġeħova biex ikolli fiduċja assoluta fih? Niffaċċja l-futur b’fiduċja għax naf li Alla għandu l-kontroll sħiħ?ʼ Isaija 26:4 jgħid: “Afdaw f’Ġeħova għal dejjem, għax f’Jah Ġeħova hemm il-Blata taʼ dejjem.” Ngħiduha kif inhi, issa Alla ma jindaħalx b’mod mirakoluż fil-ħajjiet tan-nies bħalma għamel kultant fiż-żminijiet Bibliċi. Minkejja dan, bħala “l-Blata taʼ dejjem,” hu jistaʼ jiġi fdat “għal dejjem.” Alla tagħna, li hu taʼ min jafdah, kif jgħin lill-aduraturi leali tiegħu llum? Ejja nikkunsidraw tliet modi: Hu jsaħħaħna meta nfittxu l-għajnuna tiegħu biex nirreżistu t-tentazzjoni, hu jappoġġana meta jkollna nikkumbattu mal-apatija jew oppożizzjoni diretta, u hu jgħinna nħossuna ottimisti meta nkunu mtaqqlin bl-ansjetajiet. Hekk kif neżaminaw dawn iċ-ċirkustanzi, kun ċert li tirrifletti dwar kif tistaʼ ssaħħaħ il-fiduċja tiegħek f’Ġeħova.
Afda f’Alla Meta Tkun Ittantat Biex Tagħmel il-Ħażen
5. Rigward il-fiduċja tagħna f’Alla, meta jistaʼ jkun l-iktar diffiċli li nagħmlu dan?
5 Hija ħaġa li nafdaw f’Ġeħova meta niġu għall-wegħda tiegħu taʼ Ġenna tal-art jew l-irxoxt—affarijiet li nixxennqu għalihom. Imma tistaʼ tkun ħaġa differenti għalkollox li nafdaw fih meta niġu għall-kwistjonijiet morali, li nkunu konvinti għalkollox f’qalbna li s-sottomissjoni tagħna għall-mogħdijiet u l-livelli tiegħu hija tajba u twassalna għall-akbar ferħ. Is-Sultan Salamun kiteb din it-twissija: “Afda f’Ġeħova b’qalbek kollha u tistrieħx fuq fehmtek stess. Agħti kasu fil-mogħdijiet tiegħek kollha, u hu jiddrittalek triqatek.” (Prov. 3:5, 6) Innota r-referenza għall-“mogħdijiet” u t-‘triqat’ tagħna. Iva, il-mod kollu taʼ ħajjitna—mhux biss it-tama Kristjana tagħna—għandu juri l-fiduċja tagħna f’Alla. Kif nistgħu nuru din il-fiduċja meta niffaċċjaw it-tentazzjonijiet?
6. Kif nistgħu nsaħħu d-determinazzjoni tagħna biex niċħdu ħsibijiet ħżiena?
6 Moħħna huwa l-post fejn jibda l-irraġunar tagħna biex induru ’l hemm mill-ħażen. (Aqra Rumani 8:5; Efesin 2:3.) Mela kif tistaʼ ssaħħaħ id-determinazzjoni tiegħek biex tiċħad ħsibijiet ħżiena? Ikkunsidra dawn il-ħames modi: 1. Fittex l-għajnuna t’Alla permezz tat-talb. (Mt. 6:9, 13) 2. Immedita fuq eżempji Bibliċi taʼ wħud li naqsu milli jagħtu widen lil Ġeħova u dawk li taw widen. Imbagħad innota kif l-affarijiet żvolġew għalihom.a (1 Kor. 10:8-11) 3. Irrifletti fuq il-ħsara mentali u emozzjonali li d-dnub jistaʼ jġib fuqek u fuq dawk li tħobb. 4. Aħseb dwar kif żgur iħossu Alla meta wieħed mill-qaddejja tiegħu jaqaʼ f’xi dnub serju. (Aqra Salm 78:40, 41.) 5. Immaġina l-ferħ kbir f’qalb Ġeħova meta jara aduratur leali jiċħad il-ħażen u jagħmel it-tajjeb, kemm fil-pubbliku u kemm fil-privat. (Salm 15:1, 2; Prov. 27:11) Anki int tistaʼ turi li tafda f’Ġeħova.
Afda f’Alla Meta Tiffaċċja l-Apatija u l-Oppożizzjoni
7. Liema provi ffaċċja Ġeremija, u kif kien iħossu kultant?
7 Ħafna minn ħutna jaqdu f’territorji fejn is-sabar hu taʼ sfida speċjali. Il-profeta Ġeremija qeda f’ambjent bħal dan—is-saltna taʼ Ġuda fl-aħħar ġranet imqallbin tagħha. Kuljum kien jiġi bombardjat bi provi tal-fidi għaliex b’ubbidjenza wassal il-messaġġi taʼ ġudizzju t’Alla. Darba waħda, anki s-segretarju leali tiegħu Baruk ilmenta bl-għeja. (Ġer. 45:2, 3) Ċeda Ġeremija għall-iskuraġġiment? M’għandniex xi ngħidu, kultant kien iħossu dipress. “Misħut jum twelidi!” esklama hu. “Għalfejn ħriġt mill-ġuf biex nara xogħol iebes u għali u biex jiemi jintemmu fl-għajb?”—Ġer. 20:14, 15, 18.
8, 9. Fi qbil maʼ Ġeremija 17:7, 8 u Salm 1:1-3, x’għandna nagħmlu sabiex inkomplu nagħtu frott tajjeb?
8 Madankollu, Ġeremija ma qatax qalbu. Hu kompla jafda f’Ġeħova. B’hekk, dan il-profeta leali ra b’għajnejh it-twettiq tal-kliem stess taʼ Ġeħova mniżżel f’Ġeremija 17:7, 8: “Imbierek ir-raġel b’saħħtu li jafda f’Ġeħova, u li Ġeħova sar il-fiduċja tiegħu. Hu jsir bħal siġra mħawla ħdejn l-ilmijiet, li tifrex għeruqha safejn ikun għaddej l-ilma; u meta tiġi s-sħana ma jarahiex, imma l-weraq tiegħu jibqaʼ jħaddar. U fis-sena tan-nixfa ma jsirx ansjuż, u lanqas jieqaf jagħmel il-frott.”
9 Bħal siġra tal-frott li tħaddar “imħawla ħdejn l-ilmijiet” jew fi ġnien b’siġar tal-frott imsoqqi, Ġeremija qatt ‘ma waqaf jagħmel il-frott.’ Hu ma ħalliex lilu nnifsu jiġi influwenzat minn dawk madwaru li kienu mill-agħar u jwaqqgħu għaċ-ċajt. Minflok, hu żamm sod mas-Sors tal-“ilma” li jsostni l-ħajja u daħħal f’qalbu dak kollu li qallu Ġeħova. (Aqra Salm 1:1-3; Ġer. 20:9) X’eżempju mill-aqwa hu għalina Ġeremija, speċjalment għal dawk minna li jaqdu lil Alla f’territorji diffiċli! Jekk din hi s-sitwazzjoni tiegħek, kompli strieħ għalkollox fuq Ġeħova, li se jagħtik is-sabar hekk kif int ‘tistqarr ismu pubblikament.’—Ebr. 13:15.
10. Liema barkiet għandna, u x’għandna nistaqsu lilna nfusna?
10 Biex jgħinna nkampaw mal-ħajja f’dawn l-aħħar jiem, Ġeħova tana bosta affarijiet spiritwali. Fost dawn l-affarijiet hu pprovdielna l-Kelma t’Alla sħiħa, li qed tiġi tradotta b’mod eżatt b’iktar u iktar lingwi. Hu għamlilna disponibbli abbundanza t’ikel spiritwali f’waqtu permezz tal-klassi tal-ilsir leali u għaqli. U tana s-sħubija li tappoġġana taʼ folla kbira taʼ sħabna fit-twemmin li nassoċjaw magħhom fil-laqgħat u l-assembleat. Tieħu int vantaġġ sħiħ minn dawn il-provvedimenti? Dawk kollha li jagħmlu dan “se jgħajtu bil-ferħ minħabba l-kundizzjoni tajba taʼ qalbhom.” Iżda dawk li jonqsu milli jagħtu widen għal dak li jgħid Alla ‘se jgħajtu bl-uġigħ taʼ qalb u jnewħu minħabba spirtu mkisser.’—Is. 65:13, 14.
Afda f’Alla Meta Tittratta mal-Ansjetajiet
11, 12. Meta nqisu l-problemi fid-dinja, fejn jinsab l-għerf veru?
11 Kif kien imbassar, għargħar li dejjem tielaʼ taʼ gwajijiet qed jeffettwa lill-umanità. (Mt. 24:6-8; Riv. 12:12) Meta jseħħ għargħar letterali, ir-reazzjoni komuni hi li wieħed jiġri lejn post iktar fl-għoli jew li jitlaʼ fuq il-bejt taʼ xi bini—ikun fejn ikun, imbasta f’post ogħla. Bl-istess mod, hekk kif il-problemi tad-dinja jiżdiedu, miljuni taʼ nies ifittxu kenn f’istituzzjonijiet finanzjarji, politiċi, jew reliġjużi li jidhru taʼ min jafdahom, kif ukoll fix-xjenza u t-teknoloġija. Imma l-ebda waħda minn dawn ma toffri sigurtà vera. (Ġer. 17:5, 6) Min-naħa l-oħra, il-qaddejja taʼ Ġeħova għandhom kenn ċert—“il-Blata taʼ dejjem.” (Is. 26:4) Is-salmista stqarr: “[Ġeħova] hu l-blata u s-salvazzjoni tiegħi, il-post fl-għoli tiegħi taʼ sigurtà.” (Aqra Salm 62:6-9.) Kif nagħmlu din il-Blata l-kenn tagħna?
12 Aħna nżommu sod maʼ Ġeħova meta nobdu Kelmtu, li ħafna drabi hi kuntrarju għall-għerf tal-bniedem. (Salm 73:23, 24) Pereżempju, nies li jkunu influwenzati mill-għerf tal-bniedem għandhom mnejn jgħidu: ‘Ħajja waħda għandek; gawdiha kemm tiflaħ.’ ‘Ara li jkollok karriera tajba.’ ‘Agħmel ħafna flus.’ ‘Ixtri dan, ixtri dak.’ ‘Siefer; gawdi d-dinja.’ Min-naħa l-oħra, l-għerf t’Alla jaqbel mal-parir: “[Ħalli] dawk li jużaw id-dinja [ikunu] bħal dawk li ma jużawhiex bis-sħiħ; għax ix-xena taʼ din id-dinja qed tinbidel.” (1 Kor. 7:31) Bl-istess mod, Ġesù jinkuraġġina biex dejjem inpoġġu l-interessi tas-Saltna l-ewwel, u b’hekk naħżnu “teżori fis-sema,” fejn ikunu assolutament fis-sigurtà.—Mt. 6:19, 20.
13. Bl-iskrittura tal-1 Ġwanni 2:15-17 f’moħħna, x’għandna nistaqsu lilna nfusna?
13 Turi l-attitudni tiegħek lejn “id-dinja” u “dak li hemm fid-dinja” li int tafda kompletament f’Alla? (1 Ġw. 2:15-17) Huma r-rikkezzi spiritwali u l-privileġġi tas-servizz tas-Saltna iktar mixtiqin u importanti għalik mill-affarijiet li għandha x’toffrilek id-dinja? (Flp. 3:8) Tissielet biex iżżomm ‘għajn sempliċi’? (Mt. 6:22) Bla dubju, Alla ma jridekx tkun nieqes mill-għaqal jew irresponsabbli, speċjalment jekk għandek familja x’tieħu ħsieb. (1 Tim. 5:8) Però jistenna li l-qaddejja tiegħu jafdaw bis-sħiħ fih—mhux fid-dinja moribonda taʼ Satana.—Ebr. 13:5.
14-16. Xi wħud kif ibbenefikaw billi żammew ‘għajn sempliċi’ u billi żammew l-interessi tas-Saltna fl-ewwel post?
14 Aħseb ftit fuq l-eżempju taʼ Richard u Ruth, il-ġenituri taʼ tlett itfal żgħar. “F’qalbi ħassejt li stajt nagħmel iktar għal Ġeħova,” jgħid Richard. “Kont ngħix ħajja komda iżda ħassejt li sempliċement kont qed nagħti lil Alla miż-żejjed tiegħi. Wara li tlabna dwar din il-ħaġa u rajna x’tinvolvi, jien u Ruth qbilna li nistaqsu lis-supervisor tiegħi biex naħdem inqas sigħat mifruxin fuq erbat ijiem fil-ġimgħa—minkejja li l-pajjiż kien f’nofs kriżi ekonomika. It-talba tiegħi ġiet aċċettata, u bdejt naħdem bl-iskeda l-ġdida fi żmien xahar.” Kif iħossu Richard issa?
15 Hu jgħid: “Qed naqlaʼ 20 fil-mija inqas minn qabel, imma issa għandi 50 ġurnata fis-sena iktar biex inkun mal-familja tiegħi u nħarreġ it-tfal. Stajt nirdoppja l-ħin tiegħi fis-servizz tal-għalqa, nittriplika n-numru tal-istudji tal-Bibbja, u ngħatajt iżjed inkarigi fil-kongregazzjoni. U peress li qed ikolli iktar ħin biex nieħu ħsieb it-tfal, minn żmien għall-ieħor Ruth setgħet taqdi bħala pijuniera awżiljarja. Jien determinat li nżomm maʼ din l-iskeda għal kemm żmien nistaʼ.”
16 Roy u Petina, li għad għandhom tifla d-dar, setgħu jnaqqsu mix-xogħol sekulari tagħhom biex jieħdu sehem fil-ministeru full-time. Roy jgħid: “Naħdem tlett ijiem fil-ġimgħa u Petina taħdem jumejn. Ukoll, morna noqogħdu f’appartament minflok dar għax huwa eħfef biex tieħu ħsiebu. Qabel kellna t-tfal konna qdejna bħala pijunieri, u qatt ma tlifna x-xewqa tagħna li nkunu pijunieri. B’hekk, meta wliedna kibru rġajna qdejna fil-ministeru full-time. L-ebda ammont taʼ flus ma jitqabbel mal-barkiet li kellna.”
Ħalli “l-Paċi t’Alla” Tgħasses lil Qalbek
17. Meta tqis l-inċertezzi tal-ħajja, l-Iskrittura kif kienet taʼ faraġ għalik?
17 Ħadd minna ma jaf x’se jġib miegħu għada għax iż-“żmien u l-ġrajjiet mhux mistennijin” jiġu fuqna lkoll. (Ekk. 9:11) Madankollu, l-inċertezza dwar għada m’għandhiex għalfejn tisirqilna l-paċi tal-moħħ illum, bħalma spiss jiġri lil dawk li m’għandhomx is-sigurtà taʼ relazzjoni mill-qrib m’Alla. (Mt. 6:34) L-appostlu Pawlu kiteb: “Tkunu ansjużi fuq xejn, imma f’kollox b’talb u b’suppliki flimkien maʼ radd il-ħajr ħallu lil Alla jkun jaf x’teħtieġu; u l-paċi t’Alla li tisboq kull ħsieb tgħasses lil qalbkom u l-qawwa mentali tagħkom.”—Flp. 4:6, 7.
18, 19. B’liema modi jfarraġna Alla? Agħti eżempju.
18 Ħafna aħwa esperjenzaw kalma u paċi ġewwinija mingħand Ġeħova f’sitwazzjonijiet diffiċli. Waħda oħt tgħid: “Tabib ipprova kemm-il darba jisforzani biex naċċetta trasfużjoni tad-demm. L-ewwel ftit kliem li laqagħni bih kien: ‘Din xi ħmerija hi li ma tiħdux demm?’ F’dak il-waqt u f’waqtiet oħrajn, f’qalbi tlabt lil Ġeħova u ħassejt il-paċi tiegħu. Ħassejtni soda daqs il-blat. Minkejja li ma kontx inħossni tajba minħabba l-livell baxx tad-demm, stajt nagħti raġunijiet Skritturali ċari għall-waqfa tiegħi.”
19 Xi drabi Alla jipprovdi l-appoġġ meħtieġ permezz tal-faraġ taʼ xi sieħeb fit-twemmin jew permezz t’ikel spiritwali fil-ħin. X’aktarx li smajt lil xi ħu jew oħt tgħid: “Dan l-artiklu kien eżatt dak li kelli bżonn. Għalija kien miktub!” Iva, ikunu xi jkunu ċ-ċirkustanzi jew il-bżonnijiet tagħna, Ġeħova se jurina li jħobbna jekk aħna nafdaw fih. Wara kollox, aħna “n-nagħaġ” tiegħu u hu għamilna poplu li nissejħu b’ismu.—Salm 100:3; Ġw. 10:16; Atti 15:14, 17.
20. Il-qaddejja taʼ Ġeħova għala se jgħammru fis-sigurtà meta d-dinja taʼ Satana tiġi fi tmiemha?
20 Matul “jum il-qilla taʼ Ġeħova” li riesaq bil-ħeffa, kulma tpoġġi t-tama tagħha fih id-dinja taʼ Satana se jisfaxxa fix-xejn. Id-deheb, il-fidda, u l-affarijiet l-oħra taʼ valur mhuma se joffru l-ebda sigurtà. (Sof. 1:18; Prov. 11:4) L-uniku kenn se jkun il-“Blata taʼ dejjem” tagħna. (Is. 26:4) Għalhekk, ejja nuru l-fiduċja sħiħa tagħna f’Ġeħova issa billi nimxu b’ubbidjenza fil-mogħdijiet tiegħu, billi nxandru l-messaġġ tas-Saltna tiegħu minkejja li jkollna niffaċċjaw l-apatija jew l-oppożizzjoni, u billi nitfgħu l-ansjetajiet kollha tagħna fuqu. Hekk kif nagħmlu dawn l-affarijiet, aħna verament se ‘ngħammru fis-sigurtà u ma ninkwetawx mill-biżaʼ taʼ xi gwaj.’—Prov. 1:33.
[Nota taʼ taħt]
Tistaʼ Tispjega?
Kif nistgħu nafdaw f’Alla
• meta niġu ttantati nagħmlu l-ħażen?
• meta niffaċċjaw l-apatija jew l-oppożizzjoni?
• meta nittrattaw mal-ansjetajiet?
[Stampa f’paġna 13]
Li nżommu mal-livelli t’Alla jwassal għall-ferħ
[Stampa f’paġna 15]
‘Ġeħova hu l-Blata taʼ dejjem’