“Il-​Ħajja taʼ Dejjem Tfisser Dan”

“Il-​ħajja taʼ dejjem tfisser dan: li jieħdu għarfien dwarek, l-​uniku Alla veru, u dwar Ġesù Kristu li int bgħatt.”​—ĠWANNI 17:3.

L-​GĦARFIEN jistaʼ jsalva l-​ħajja. Meta marad Nouhou, tifel taʼ għaxar xhur, ommu—impjegata fil-​qasam tal-​kura tas-​saħħa fin-​Niġer—kienet taf x’kellha tagħmel. Hi ppreparat għal binha xarba b’taħlita taʼ melħ, zokkor, u ilma nadif sabiex jiġu sostitwiti l-​fluwidi li tilef minn ġismu. Skont l-​UNICEF, minħabba li “aġixxiet fil-​pront u kellha aċċess għall-​kura medika fil-​komunità, binha setaʼ jirkupra malajr.”

Anki l-​għarfien mill-​Bibbja jistaʼ jsalva l-​ħajja. Mosè, l-​ewwel kittieb tal-​Bibbja, qal: “M’hijiex kelma bla siwi għalikom, imma tfisser ħajjitkom, u b’din il-​kelma ttawlu jiemkom.” (Dewteronomju 32:47) Tistaʼ l-​Bibbja verament ittawlilna jiemna? B’liema mod tfisser ħajjitna?

Il-​ħames artikli taʼ qabel f’din is-​serje wrew li l-​Bibbja hi ktieb li ma jitqabbel maʼ xejn f’dak li għandu x’jaqsam maʼ profeziji taʼ min joqgħod fuqhom, eżattezza storika u xjentifika, armonija fiha nfisha, u gwida prattika. Dan kollu juri li l-​Bibbja hi unika. B’hekk, meta din tistqarr li tistaʼ ttawwal il-​ħajja, jiġifieri ħajja taʼ dejjem, ma jkunx xieraq li tagħtiha attenzjoni bir-​reqqa?

Inħeġġuk issir taf kif l-​għarfien eżatt tal-​Bibbja jistaʼ jgħinek tikseb il-​paċi tal-​moħħ issa u hena fil-​futur. Ix-​Xhieda taʼ Ġeħova jieħdu pjaċir juruk kif tistaʼ tikseb dan l-​għarfien.

[Kaxxa/Stampa f’paġna 9]

Il-​Bibbja hija unika wkoll għax hi biss tagħti tweġibiet sodisfaċenti għall-​mistoqsijiet fundamentali li nistaqsu:

• Għala qegħdin hawnhekk?

• Għala hawn daqstant tbatija?

• Hemm xi tama għall-​maħbubin mejtin tiegħi?

Int tistaʼ ssib it-​tweġibiet li tagħti l-​Bibbja f’dan il-​ktieb, Il-​Bibbja X’Tgħallem Verament? ippubblikat mix-​Xhieda taʼ Ġeħova.