Meta jkollok marda serja

“Meta sirt naf li kelli kanċer tal-pulmun u l-musrana, ħassejt li kont għadni kif irċivejt is-sentenza tal-mewt. Imma wara li wasalt id-dar mingħand it-tabib, għedt bejni u bejn ruħi, ‘Orrajt, ma kontx qed nistenna din l-aħbar, imma rrid insib mod kif inkampa.’”—Linda, li għandha 71 sena.

“Jien inbati minn marda taʼ wġigħ kbir li teffettwali n-nervituri tan-naħa tax-xellug taʼ wiċċi. Xi kultant, l-uġigħ tant ikun gravi li minħabba f’hekk waqajt f’dipressjoni. Spiss kont inħossni waħdi u anke ħsibt dwar li nagħmel suwiċidju.”—Elise, li għandha 49 sena.

Raġel marid f’siġġu tar-roti mdawwar b’uħud li jħobbuh

JEKK int jew xi ħadd li tħobb sar jaf li għandu marda li tistaʼ twassal għall-mewt, taf kemm jistaʼ jkun taʼ wġigħ. U minbarra l-marda nfisha, ikollok tkampa maʼ emozzjonijiet fraġli. Il-biżaʼ u l-ansjetà jistgħu jiżdiedu minħabba l-appuntamenti stressanti għand it-tabib, id-diffikultà biex tikseb kura jew biex tħallasha, jew l-effetti tal-mediċina. L-uġigħ mentali li hu assoċjat maʼ mard serju jistaʼ jkun wisq għalik.

Fejn nistgħu nduru għall-għajnuna? Ħafna sabu li jitfarrġu l-iktar meta jistrieħu fuq Alla permezz tat-talb u meta jaqraw siltiet inkuraġġanti mill-Bibbja. Għajnuna oħra tistaʼ tiġi mill-imħabba u l-appoġġ li jistgħu jipprovdu l-familja u l-ħbieb.

KIF XI WĦUD KAMPAW

Robert li għandu 58 sena ta dan il-parir: “Uri fidi f’Alla waqt li tiffaċċja l-marda u hu jgħinek tissaporti. Dur lejn Ġeħova fit-talb. Għidlu kif tħossok. Itlob biex itik l-ispirtu qaddis. Staqsih biex jgħinek tkun pożittiv u tinkuraġġixxi lill-familja tiegħek u biex iżżomm kalm waqt li tissaporti l-marda tiegħek.

“Ikun t’għajnuna kbira meta l-familja tappoġġak emozzjonalment, meta jkunu hemm għalik. Kuljum minn tal-inqas iċempel xi ħadd minnhom biex jistaqsini kif jien. Nirċievi l-inkuraġġiment mingħand ħbieb anke li joqogħdu ’l bogħod. Dan veru jġegħelni nħossni aħjar u jgħinni biex ma naqtax qalbi.”

Jekk int ħabib li qed iżżur lil xi ħadd marid, innota x’tgħid Linda: “Il-persuna marida aktarx li tkun tixtieq tkompli b’ħajja normali kemm jistaʼ jkun u forsi mhux dejjem tkun tixtieq titkellem dwar il-marda. Allura aħjar li titkellem dwar l-affarijiet li titkellem dwarhom is-soltu.”

Bis-saħħa mingħand Alla u l-faraġ mill-Iskrittura, kif ukoll bl-appoġġ tal-familja u l-ħbieb, aħna nistgħu nkunu fiduċjużi li l-ħajja hi taʼ min jgħixha, anke meta nkunu qed niffaċċjaw marda serja.

Versi tal-Bibbja li jistgħu jkunu t’għajnuna

Strieħ fuq Alla.

“Jien staqsejt lil Ġeħova, u hu wiġibni, u mill-biżaʼ kollu tiegħi ħelisni. Dan il-magħkus sejjaħ, u Ġeħova semaʼ.”—Salm 34:4, 6.

Linda li ġiet ikkwotata qabel tgħid: “Jien qatt ma nitlob, ‘Għinni biex jgħaddili.’ Imma nitlob, ‘Għinni biex inkun soda, u biex inkun nistaʼ nissaporti l-marda li għandi.’”

Ikseb is-saħħa mill-Kelma t’Alla.

“Ħadd minn min jgħammar hemmhekk ma jgħid: ‘Jien marid.’”—Isaija 33:24.

Immedita fuq il-wegħdi t’Alla għall-futur. Dan se jagħtik tama, u din se tagħtik is-saħħa biex tissaporti.

Fittex l-għajnuna tal-familja u l-ħbieb.

“Ħabib veru jħobb il-ħin kollu; huwa ħu mwieled għal meta jkun hemm in-niket.”—Proverbji 17:17.

“Tinqatax għalik waħdek,” tissuġġerixxi Elise, li ġiet ikkwotata qabel, “Ħalli lil ħbiebek jgħinuk. Jistaʼ jkun hemm mumenti fejn tħossok waħdek u taħseb li lanqas Alla mhu qed jisimgħek, imma tinqatax għalik waħdek.”