Tkellem Bi Qlubija

¹ Matul dawn l-​aħħar snin pubblikaturi f’xi nħawi qegħdin isibuha diffiċli iktar minn qatt qabel li jitkellmu man-​nies fid-​djar tagħhom. Ħafna jirrapportaw li fit-​territorju tagħhom iktar minn 50 fil-​mija tan-​nies li ma jkunux id-​dar meta jsiru żjajjar minn dar għal dar. Bħala riżultat, ħafna mill-​ħin imqattaʼ ma jagħtix frott.

² Snin ilu ħafna nies kont tistaʼ ssibhom id-​dar nhar taʼ Ħadd, li ġeneralment kienu jħarsu lejh bħala jum taʼ mistrieħ. Id-​drawwiet inbidlu. Huwa komuni llum li n-​nies jaħdmu f’xogħlijiet sekulari, jieħdu ħsieb il-​bżonnijiet tal-​familja bħal xiri, jew jieħdu sehem f’rikreazzjoni, li wkoll jeħodhom ’il bogħod mid-​dar. Mela saħansitra fil-​Ħdud, li nsibu nies minn dar għal dar sar problema.

³ Meta n-​nies ma jkunux id-​dar, bilfors ifisser li qegħdin x’imkien ieħor. Peress li l-​mira tagħna hija li nitkellmu man-​nies, għala ma nitkellmux maʼ dawk li niltaqgħu magħhom​—fit-​triq, fis-​suq, jew fuq il-​post tax-​xogħol? Kienet id-​drawwa taʼ Pawlu li jmur fuq “dawk li kienu jinzertaw hemmhekk” biex jagħtihom xiehda. (Atti 17:17) Din uriet li kienet forma produttiva t’għoti taʼ xiehda dak iż-​żmien, u hija forma produttiva t’għoti taʼ xiehda fi żmienna.

⁴ Meta mmorru minn dar għal dar, taʼ spiss naraw nies għaddejjin mhux mgħaġġlin jew forsi qegħdin jistennew lil xi ħadd. Meta tkun ġurnata sabiħa, forsi jkunu bil-​qiegħda fuq bank fi ġnien jew isewwu jew jaħslu l-​karozza tagħhom. Tbissima taʼ ħbiberija u merħba minn tagħna jistgħu jkunu dak kollu li neħtieġu biex nibdew konversazzjoni. Jekk jgħixu fil-​qrib, nistgħu saħansitra ngħidulhom li x’aktarx li ħabbatnielhom u ma sibnihomx id-​dar u issa ferħanin li għandna din l-​opportunità li nkellmuhom. Billi ħadu l-​inizjattiva f’li juru ftit iktar qlubija, ħafna gawdew esperjenzi premjanti.

⁵ Il-​Qlubija Ġġib Riżultati: Wieħed ħu qal li hu jmur fuq in-​nies li qegħdin weqfin, jistennew xi karozza tal-​linja, għaddejjin passiġġata, jew bil-​qiegħda fil-​karozza tagħhom. Bi tbissima ħelwa u vuċi ferriħija, hu jagħmilha taʼ ġar minn tagħna li sempliċement irid jgħid kelma. B’dan il-​mod mhux talli ħalla ħafna letteratura imma beda wkoll diversi studji tal-​Bibbja.

⁶ Ħu ieħor u l-​mara tiegħu kienu qegħdin iżuru minn dar għal dar meta ltaqgħu maʼ waħda mara li kienet għaddejja ġġorr ġewlaq kbir tax-​xirja. Huma bdew konversazzjoni, billi faħħruha għall-​għaqal tagħha f’li tieħu ħsieb il-​bżonnijiet tal-​familja tagħha. “Imma min,” huma staqsew, “jistaʼ jipprovdi l-​bżonnijiet taʼ l-​umanità?” Dak qanqal l-​interess tal-​mara. Konversazzjoni qasira wasslet għal stedina fid-​dar tagħha, fejn ġie mibdi studju tal-​Bibbja.

⁷ Mela d-​darba li jmiss li tkun qiegħed tagħti xiehda minn dar għal dar, kemm jekk il-​Ħadd u kemm fost il-​ġimgħa, u ssib li n-​nies ma jkunux id-​dar, għala ma turix ftit iktar qlubija u titkellem man-​nies li tiltaqaʼ magħhom​—fit-​triq jew x’imkien ieħor? (1 Tess. 2:2) Jistaʼ jkollok ministeru iktar produttiv, u se tesperjenza iktar ferħ fis-​servizz tiegħek.