Xandar L-​Aħbar Tajba Kullimkien

¹ Il-​Kristjani bikrin xandru l-​aħbar tajba kullimkien. Kienu tant żelużi li fi żmien 30 sena mill-​qawmien taʼ Ġesù Kristu, il-​messaġġ tas-​Saltna kien ġie ‘ppridkat fil-​ħolqien kollu li huwa taħt is-​sema.’​—Kol. 1:23.

² Il-​qaddejja żelużi taʼ Jehovah illum għandhom l-​istess objettiv​—li jilħqu kemm jistaʼ jkun lil kulħadd bl-​aħbar tajba tas-​Saltna. X’jistaʼ jgħinna biex inwettqu din il-​mira? Iktar u iktar nies qegħdin jaħdmu l-​ġurnata kollha u taʼ spiss ma jkunux id-​dar meta mmorru għandhom. Meta ma jkunux jaħdmu, jistgħu jkunu qegħdin jivvjaġġaw, jixtru, jew jieħdu sehem f’xi għamla taʼ rikreazzjoni. Uħud li jistħoqqilhom fost dawn in-​nies, kif qegħdin jintlaħqu bil-​messaġġ tas-​Saltna?​—Matt. 10:11.

³ Xi wħud qegħdin jiġu kkuntattjati fuq il-​post tax-​xogħol tagħhom. Nies li jaħdmu f’oqsma industrijali jew f’xi uffiċċji u dawk li jgħixu f’appartamenti b’sigurtà kbira qegħdin jirċievu xiehda​—ħafna minnhom għall-​ewwel darba. Fi tmiem il-​ġimgħa, xi wħud li ġew ikkuntattjati waqt li kienu qegħdin jistrieħu ħdejn xatt il-​baħar, f’postijiet taʼ rikreazzjoni, f’kampeġġi, jew waqt li kienu qegħdin jistennew fejn jipparkjaw il-​karozzi jew f’ċentri kummerċjali nstabu li kienu disposti favorevolment lejn l-​aħbar tajba.

⁴ Għadd li dejjem jiżdied taʼ pubblikaturi qegħdin jagħmlu sforz speċjali biex jagħtu xiehda f’postijiet pubbliċi, kulfejn ikun hemm in-​nies. Għall-​ewwel, dawn ix-​Xhieda kienu bejn ħalltejn u ħassewhom xi ftit eċċitati peress li kienu mdorrijin ixandru f’ambjent iktar formali, bħal minn dar għal dar. Issa kif iħossuhom?

⁵ “Dan reġaʼ ta l-​ħajja mill-​ġdid lill-​ministeru tiegħi!” jesklama wieħed ħu taʼ l-​esperjenza. Ieħor iżid: “Dan iżommni moħħi hemm.” Wieħed pijunier b’iktar żmien josserva: “Tani l-​ħajja mill-​ġdid mentalment, fiżikament, u spiritwalment, . . . u għadni qiegħed inżid.” Wieħed pubblikatur jinnota li issa qiegħed jilħaq ħafna nies li qatt ma kienu tkellmu max-​Xhieda taʼ Jehovah qabel. Iż-​żgħażagħ ukoll qegħdin jidħlu fl-​ispirtu taʼ dan ix-​xogħol pjaċevoli. Wieħed żagħżugħ jesprimi ruħu b’dan il-​mod: “Huwa taʼ pjaċir għax jirnexxilek tkellem ħafna nies!” Ieħor jgħid: “Qiegħed inħalli letteratura iktar minn qatt qabel!” Dan kollu qiegħed iseħħ f’territorju li jinħadem darba wara l-​oħra.

⁶ Indokraturi Li Jivvjaġġaw Qegħdin Ikunu Minn Taʼ Quddiem: Billi rrikonoxxiet li “x-​xena taʼ din id-​dinja qiegħda tinbidel,” dan l-​aħħar is-​Soċjetà ssuġġeriet li l-​indokraturi li jivvjaġġaw jirranġaw l-​iskeda tagħhom tas-​servizz taʼ l-​għalqa minn ġimgħa għall-​oħra sabiex kemm jistaʼ jkun nies ikunu jistgħu jintlaħqu bl-​aħbar tajba. (1 Kor. 7:​31) Għal snin sħaħ, indokraturi tas-​circuit warrbu l-​ħin taʼ fil-​għodu taʼ fost il-​ġimgħa biex jieħdu sehem fix-​xogħol minn dar għal dar, fil-​waqt li wara nofs in-​nhar kien iddedikat għaż-​żjajjar lura u biex isiru studji tal-​Bibbja fid-​dar. F’ċerti nħawi, din l-​iskeda forsi għadha prattika. F’oħrajn, ftit li xejn isir jekk jaħdmu minn dar għal dar fost il-​ġimgħa matul ċerti ħinijiet taʼ fil-​għodu. F’każijiet bħal dawn, l-​indokratur li jivvjaġġa jistaʼ jiddeċiedi li kmieni fil-​ġurnata jkun tajjeb li jsir xogħol minn ħanut għall-​ieħor jew għoti taʼ xiehda fit-​toroq. Jew jistaʼ jagħmel arranġament biex gruppi żgħar imorru jagħtu xiehda f’xi bini, f’ċentri kummerċjali, f’postijiet fejn jipparkjaw il-​karozzi, jew f’postijiet pubbliċi oħrajn. Billi l-​pubblikaturi jagħmlu użu iktar effettiv mill-​ħin disponibbli għas-​servizz taʼ l-​għalqa, se jiġu kkuntattjati ħafna iktar nies.

⁷ Rapporti jindikaw li dan it-​tibdil intlaqaʼ tajjeb ħafna kemm mill-​indokraturi li jivvjaġġaw u kemm mill-​pubblikaturi. Numru taʼ ġemgħat t’anzjani stiednu lill-​indokratur tas-​circuit biex iħarreġ xi ftit pubblikaturi f’aspetti tax-​xogħol li jirrikjedi attenzjoni fil-​lokal. Kien t’għajnuna kbira għal dawn il-​pubblikaturi li jakkumpanjaw lill-​indokratur li jivvjaġġa hekk kif jieħu sehem f’waħda minn dawn l-​attivitajiet. Huma, min-​naħa tagħhom, irnexxielhom iħarrġu oħrajn. (2 Tim. 2:2) Bħala riżultat, qegħdin jintlaħqu iktar nies bl-​aħbar tajba.

⁸ M’għandniex xi ngħidu, int m’hemmx għalfejn tistenna sakemm jiġi jżurkom l-​indokratur tas-​circuit biex tipprova xi ftit minn dawn il-​modi oħrajn taʼ xandir. Hawnhekk se ssib diversi ideat li jistgħu jkunu prattiċi fit-​territorju tiegħek:

⁹ Għoti Taʼ Xiehda Fit-​Toroq: ‘Fejn mar kulħadd?’ Xi kultant hekk ngħidu meta f’għodwa fost il-​ġimgħa nżuru post residenzjali fejn donnu għeb kulħadd. Xi wħud għandek mnejn issibhom jagħmlu xi qadjiet jew jagħmlu x-​xirja. Ipprovajt int tilħaqhom permezz taʼ l-​għoti taʼ xiehda fit-​toroq? Meta jsir kif għandu jsir, dan l-​aspett tal-​ministeru jistaʼ jkun produttiv bil-​bosta. Minflok ma toqgħod bil-​wieqfa f’post wieħed bir-​rivisti, ikun aħjar jekk tavviċina lin-​nies u tibda konversazzjoni kordjali. M’hemmx għalfejn li tagħti xiehda lil kulmin jgħaddi. Kellem lil dawk li ma tantx jidhru mgħaġġlin, bħal dawk l-​uħud li joqogħdu jħarsu fil-​vetrini tal-​ħwienet, dawk li jkunu qegħdin fil-​karozzi pparkjati, jew xi nies li jkunu qegħdin jistennew il-​karozza tal-​linja. Għall-​ewwel, tistaʼ sempliċement issellem lil dak li jkun b’mod dħuli u tistenna għal reazzjoni. Jekk dak li jkun jitħajjar jitkellem, staqsi għall-​opinjoni tiegħu dwar xi suġġett li taħseb li jinteressah.

¹⁰ Wieħed indokratur li jivvjaġġa stieden lil sitt pubblikaturi biex jingħaqdu miegħu u maʼ martu fl-​għoti taʼ xiehda fit-​toroq. B’liema riżultati? “Kellna għodwa mill-​aqwa!” hu jirrapporta. “Ma kienx hemm nies li ma kinux id-​dar. Ġew imqassmin tmenin rivista u ħafna fuljetti. Kellna diversi konversazzjonijiet stimulanti. Wieħed mill-​pubblikaturi, li kien qiegħed jieħu sehem f’dan ix-​xogħol fit-​toroq għall-​ewwel darba, esklama: ‘Ilni fil-​verità għal dawn is-​snin kollha u qatt ma rrealizzajt x’kont qiegħed nitlef!’ Sa l-​aħħar tal-​ġimgħa, il-​provista tar-​rivisti tal-​kongregazzjoni li kienet ilha takkumula tbattlet.”

¹¹ Waqt li kien qiegħed jaqdi fil-​kongregazzjoni li jmiss, l-​istess indokratur li jivvjaġġa sar jaf li bosta pubblikaturi kienu ħadu sehem fl-​għoti taʼ xiehda fit-​toroq iktar kmieni fil-​għodu imma kellhom ftit suċċess. Waħda oħt kienet tkellmet maʼ żewġ persuni biss matul il-​ħin kollu li tat xiehda, għax il-​bqija li ltaqgħet magħhom kienu mgħaġġlin għax-​xogħol. L-​indokratur li jivvjaġġa ssuġġerixxa li lkoll kemm huma jerġgħu jmorru lura f’dik l-​istess triq ftit iktar tard fil-​għodu. Hekk għamlu, u baqgħu hemm sa nofs in-​nhar. L-​oħt li iktar kmieni fil-​ġurnata kellha biss żewġ konversazzjonijiet marret ħafna aħjar meta ġiet lura. Hi ħalliet 31 rivista u 15-il brochure, kisbet l-​ismijiet u l-​indirizzi taʼ sebaʼ individwi, u bdiet żewġ studji tal-​Bibbja fid-​dar! Oħrajn fil-​grupp kellhom riżultati daqstant inkuraġġanti.

¹² Meta ssib lil xi ħadd li juri interess, ipprova ikseb l-​isem, l-​indirizz, u n-​numru tat-​telefon tal-​persuna. Minflok ma tistaqsi għall-​informazzjoni direttament, tistaʼ tgħid: “Ħadt gost b’din il-​konversazzjoni. Hemm xi mod kif nistgħu nkompluha f’ħin ieħor?” Jew staqsi: “Hemm xi mod kif nistaʼ nsibek id-​dar?” Ħafna li jiġu kkuntattjati b’dan il-​mod jaċċettaw żjara lura. Kun ċert li jkollok provista mdaqqsa taʼ handbills biex tużahom f’li tistieden lil dawk li jkunu jixtiequ jattendu l-​laqgħat tagħna.

¹³ Jekk titkellem maʼ xi ħadd li juri interess u li joqgħod f’territorju assenjat lil kongregazzjoni oħra, għandek tgħaddi l-​informazzjoni lill-​aħwa t’hemm sabiex ikunu jistgħu jmorru lura fejn intwera l-​interess. Jistaʼ l-​għoti taʼ xiehda fit-​toroq ikun mod effettiv biex ixxerred l-​aħbar tajba fl-​inħawi fejn toqgħod int? Jekk iva, irrevedi l-​artiklu “Finding Interested Ones by Means of Effective Street Witnessing” (Insibu Wħud Li Juru Interess Permezz Taʼ Għoti Taʼ Xiehda Fit-​Toroq Effettiv) fl-​Our Kingdom Ministry taʼ Lulju 1994. Imbagħad agħmel arranġamenti biex tieħu sehem fl-​għoti taʼ xiehda fit-​toroq f’ħin addattat tal-​ġurnata li fih tkun tistaʼ tilħaq kemm jistaʼ jkun nies possibbli.

¹⁴ Xiehda Fuq Tal-​Linja: Għodwa waħda numru taʼ pijunieri qatgħuha li jagħtu xiehda lin-​nies li kienu qegħdin jistennew lill-​karozza tal-​linja qrib skola lokali. Fil-​waqt li kellhom xi konversazzjonijiet pjaċevoli, sabu problema. Sakemm kien jirnexxilhom jitkellmu biċċa sew, il-​karozza tal-​linja kienet tilħaq tiġi, u b’hekk ittemm ħesrem il-​konversazzjoni. Il-​pijunieri solvew il-​problema billi rikbu l-​karozza tal-​linja u komplew jagħtu xiehda lill-​passiġġieri waqt li vvjaġġaw minn naħa għal oħra tal-​belt. Fit-​tmiem tal-​vjaġġ, il-​pijunieri kienu jerġgħu jirkbu l-​karozza tal-​linja lura minn fejn ġew, u jagħtu xiehda huma u sejrin. Wara diversi vjaġġi ’l hemm u ’l hawn, għoddew ir-​riżultati taʼ l-​isforzi tagħhom: Ġew imqassmin iktar minn 200 rivista u nbdew sitt studji tal-​Bibbja. Xi passiġġieri taw minn jeddhom l-​indirizz u n-​numru tat-​telefon tagħhom sabiex ikunu jistgħu jżuruhom fid-​dar. Il-​ġimgħa taʼ wara, il-​pijunieri marru lura fejn tiġi l-​karozza tal-​linja u għamlu l-​istess ħaġa bħall-​aħħar darba. Huma qassmu 164 rivista u bdew studju tal-​Bibbja ieħor. F’waħda mill-​waqfiet wieħed passiġġier rikeb tal-​linja u poġġa bil-​qiegħda fl-​uniku post disponibbli​—ħdejn wieħed pijunier. Hu ħares lejn il-​ħu u bi tbissima qallu: “Naf biex ġej, int għandek Torri Taʼ L-​Għassa għalija.”

¹⁵ Ħafna pubblikaturi jagħtu xiehda effettiva waqt li jkunu qegħdin jivvjaġġaw bil-​karozza tal-​linja, jew bl-​ajruplan. Kif tistaʼ int tibda konversazzjoni maʼ passiġġier li jkun bil-​qiegħda ħdejk? Wieħed pubblikatur taʼ 12-il sena sempliċement beda jaqra kopja taʼ l-​Awake! fuq tal-​linja, bit-​tama li jqajjem l-​interess taʼ tfajla żagħżugħa li kienet bil-​qiegħda ħdejh. Irnexxielu. It-​tfajla staqsietu x’kien qiegħed jaqra, u ż-​żagħżugħ weġibha li kien qiegħed jaqra dwar is-​soluzzjoni għall-​problemi li jkollhom jiffaċċjaw iż-​żgħażagħ. Kompla jgħid li kien ibbenefika ħafna mill-​artiklu u li dan setaʼ jgħin lilha wkoll. Hi aċċettat ir-​rivisti bil-​qalb kollha. Żewġ żgħażagħ oħrajn semgħu l-​konversazzjoni tagħhom u staqsew huma wkoll għal kopji tar-​rivisti. Għal dan, is-​sewwieq tal-​karozza tal-​linja waqqaf mal-​ġenb tat-​triq u staqsa għala kien hemm daqshekk interess f’dawn ir-​rivisti. Meta sar jaf, hu wkoll aċċetta xi kopji. M’għandniex xi ngħidu, xejn minn dan ma kien ikun possibbli li kieku l-​pubblikatur żagħżugħ ma kellux provista mdaqqsa tar-​rivisti biex jaqsam maʼ kulmin wera interess!

¹⁶ Xiehda F’Xatt Il-​Baħar u Fejn Jipparkjaw Il-​Karozzi: L-​għoti taʼ xiehda f’xatt il-​baħar u fejn jipparkjaw il-​karozzi huwa mod eċċellenti biex wieħed isib in-​nies. Ipprovajt int tagħti xiehda fil-​post merfugħ għall-​karozzi taʼ xi ċentru tal-​ħwienet? Dejjem ħu ftit ħin biex tara x’hemm madwarek. Għarrex għal xi ħadd li ma jidhirx mgħaġġel jew li qiegħed jistenna f’xi karozza pparkjata u pprova ibda konversazzjoni kordjali. Jekk il-​konversazzjoni tkompli, daħħal il-​messaġġ tas-​Saltna. Ipprova aħdem waħdek imma b’xi pubblikatur ieħor fil-​qrib. Evita li ġġorr xi basket kbir u goff jew li b’xi modi oħrajn tiġbed l-​attenzjoni lejn x’qiegħed tagħmel. Kun għaqli. Forsi jkun aħjar jekk tqattaʼ ftit ħin f’post wieħed fejn jipparkjaw il-​karozzi u mbagħad tmur f’ieħor. Jekk xi ħadd ma jridx jitkellem miegħek, sellimlu bl-​edukazzjoni u fittex lil xi ħadd ieħor lil min tavviċina. Billi uża dawn il-​metodi, wieħed ħu qassam 90 rivista f’xahar wieħed waqt li kien jagħti xiehda fejn jipparkjaw il-​karozzi.

¹⁷ Xi nies imorru ħdejn il-​baħar biex jistrieħu; oħrajn imorru hemm biex jilagħbu xi logħba jew iqattgħu ftit ħin maʼ wliedhom. Mingħajr ma tindaħal bla bżonn fl-​attivitajiet tagħhom, oqgħod attent għal xi opportunità biex tagħti xiehda.

¹⁸ Għoti Taʼ Xiehda Informali F’Ċentri Kummerċjali: Fil-​waqt li m’huwiex dejjem possibbli li wieħed jippriedka formalment minn ħanut għall-​ieħor f’ċentri kummerċjali minħabba xi restrizzjonijiet lokali fuq attivitajiet bħal dawn, xi pubblikaturi joħolqu opportunitajiet biex jagħtu xiehda informali hemmhekk. Huma jpoġġu bil-​qiegħda fuq xi bank u jibdew konversazzjoni kordjali m’oħrajn li jieqfu jistrieħu. Meta jintwera l-​interess, b’mod għaqli joffru xi fuljett jew rivista u jipprovaw jagħmlu arranġamenti għal żjara lura. Wara li jqattgħu ftit minuti jagħtu xiehda f’parti waħda taċ-​ċentru, jerħulha għal oħra u jibdew konversazzjoni maʼ xi ħadd ieħor. M’għandniex xi ngħidu, dak li jkun irid joqgħod attent li ma jattirax attenzjoni bla bżonn waqt li jkun qiegħed jagħti xiehda informali b’dan il-​mod.

¹⁹ Meta tavviċina persuna, ibda l-​konversazzjoni fuq nota dħulija. Jekk is-​semmiegħ tiegħek iwieġeb, staqsi mistoqsija, u mbagħad agħti widen sew hekk kif jesprimi ruħu. Ħu interess persunali f’dak li qiegħed jgħid. Urih li int tapprezza l-​opinjoni tiegħu. Fejn hu possibbli, aqbel miegħu.

²⁰ Waħda oħt kellha diskussjoni pjaċevoli maʼ waħda mara xiħa billi semmiet kemm qiegħda togħla l-​ħajja. Il-​mara dritt qablet, u dan irriżulta f’konversazzjoni interessanti. Dik l-​oħt irnexxielha tikseb l-​isem u l-​indirizz tal-​mara, u saret żjara lura dik il-​ġimgħa stess.

²¹ Naħdmu Minn Ħanut Għall-​Ieħor: Xi kongregazzjonijiet għandhom distretti tan-​negozju bħala parti mit-​territorju assenjat lilhom. Il-​ħu li jieħu ħsieb it-​territorju jistaʼ jħejji mapep speċjali taʼ dawn in-​naħat fejn hemm ħafna negozji. Il-​mapep taʼ djar residenzjali li jinkludu xi negozji għandhom jindikaw biċ-​ċar li dawn m’għandhomx jinħadmu bħala parti mit-​territorju. F’territorji oħrajn, il-​postijiet tan-​negozju jistgħu jinħadmu flimkien mad-​djar. L-​anzjani jistgħu jistiednu xi pubblikaturi kkwalifikati biex jaħdmu t-​territorji tan-​negozju fuq bażi regulari sabiex ix-​xogħol minn ħanut għall-​ieħor ma jiġix traskurat.

²² Jekk int tiġi mistieden biex tieħu sehem f’dan ix-​xogħol u qatt m’għamiltu qabel, mod tajjeb kif ‘trabbi l-​qlubija’ huwa li għall-​ewwel taħdem ftit ħwienet żgħar; imbagħad, meta tħossok iktar fiduċjuż, aħdem dawk akbar. (1 Tess. 2:2) Meta tkun qiegħed taħdem minn ħanut għall-​ieħor, ilbes daqs li kieku kont se tattendi xi laqgħa fis-​Sala tas-​Saltna. Jekk hu possibbli, idħol fil-​ħanut meta ma jkunx hemm xi klijenti li qegħdin jistennew biex jinqdew. Staqsi biex titkellem maʼ l-​imgħallem jew maʼ min hu inkarigat. Kun kordjali, u fuq kollox, kun fil-​qosor. M’hemmx għalfejn toqgħod tiskuża ruħek. Ħafna negozji huma mdorrijin bil-​klijenti u draw jistennew xi interruzzjonijiet.

²³ Wara li tiltaqaʼ maʼ tal-​ħanut, int tistaʼ tgħid dan: “In-​negozjanti għandhom skedi tant mimlijin li rari nsibuhom id-​dar, u għalhekk qegħdin inżuruk fuq il-​post tan-​negozju tiegħek biex inħallulek artiklu x’taqra li verament iqanqal il-​ħsieb.” Imbagħad agħmel xi kumment jew tnejn dwar xi rivista li tkun qiegħed toffri.

²⁴ Jew tistaʼ tgħid hekk meta tavviċina lil xi mgħallem: “Innotajna li n-​negozjanti jagħmluha mira li jżommu ruħhom informati sew. L-​aħħar ħarġa taʼ It-​Torri Taʼ L-​Għassa (jew l-​Awake!) fiha artiklu li jeffettwa personalment lilna lkoll.” Spjega x’inhu, u ikkonkludi billi tgħid: “Aħna ċerti li se tieħu gost taqrah.”

²⁵ Jekk hemm l-​impjegati, u jidher li jkun addattat, tistaʼ żżid: “Jimporta għalik jekk nagħmel l-​istess preżentazzjoni qasira lill-​impjegati tiegħek?” Jekk tingħata l-​permess, ftakar li int wegħedt li se tkun fil-​qosor, u l-​imgħallem se jistenna li żżomm kelmtek. Jekk xi ħadd mill-​impjegati jixtieq jidħol f’diskussjoni twila, ikun aħjar jekk iżżuru ġo daru.

²⁶ Dan l-​aħħar, ftit pubblikaturi f’belt żgħira ngħaqdu maʼ l-​indokratur tas-​circuit fix-​xogħol minn ħanut għall-​ieħor. Xi ftit mill-​pubblikaturi qagħdu jaħsbuha għall-​ewwel, minħabba li qatt ma kienu għamlu dan ix-​xogħol qabel; imma malajr ħassewhom aħjar u bdew jieħdu gost. F’inqas minn siegħa, huma tkellmu maʼ 37 persuna u qassmu 24 rivista u 4 brochures. Wieħed ħu osserva li normalment ma jirnexxilhomx jikkuntattjaw daqshekk nies f’xahar wieħed taʼ xogħol minn dar għal dar daqs kemm irnexxielhom f’li jaħdmu minn ħanut għall-​ieħor f’dak il-​ħin qasir.

²⁷ Noħolqu Opportunitajiet Biex Inxandru: Ġesù ma llimitax l-​għoti taʼ xiehda tiegħu għal ambjenti formali. Hu xerred l-​aħbar tajba f’kull okkażjoni xierqa. (Matt. 9:9; Luqa 19:​1-​10; Ġwann 4:​6-​15) Innota kif xi pubblikaturi qegħdin joħolqu opportunitajiet biex ixandru.

²⁸ Xi wħud jagħmluha d-​drawwa li jagħtu xiehda lill-​ġenituri li jkunu qegħdin jistennew lil uliedhom ħdejn il-​bieb taʼ l-​iskola. Peress li ħafna ġenituri jaslu hemmhekk sa 20 minuta qabel, hemm ħin biex tinvolvihom f’konversazzjoni stimulanti fuq suġġett Skritturali.

²⁹ Ħafna pijunieri huma konxji taʼ li jilħqu nies li jistaʼ jkollhom interess speċjali f’xi suġġett partikulari li jissemma fir-​rivisti tagħna. Per eżempju, waħda oħt kellha riżultati tajbin meta żaret sitt skejjel fit-​territorju tal-​kongregazzjoni tagħha bl-​artiklu “Schools in Crisis” (Skejjel Fi Kriżi), li deher fl-​Awake! tat-​22 taʼ Diċembru, 1995. Hi żaret ukoll ċentri t’għajnuna dwar il-​familja b’rivisti fuq il-​ħajja tal-​familja u l-​abbuż fuq it-​tfal u ġiet mistiedna biex terġaʼ tmur meta joħorġu artikli oħrajn li jittrattaw fuq suġġetti bħal dawn. Ir-​rispons li kellha għall-​Awake! tat-​8 taʼ Marzu, 1996 fuq il-​qagħad, fl-​uffiċċju fejn tingħata l-​għajnuna li min hu qiegħed, ġie deskritt bħala “taʼ l-​għaġeb.”

³⁰ Wieħed indokratur tad-​distrett jirrapporta li hu u martu jagħtu xiehda informali regolarment waqt li jagħmlu x-​xirja tagħhom taʼ l-​ikel. Huma jmorru jixtru f’ħin tal-​ġurnata meta l-​ħanut ma tantx ikun mimli bin-​nies, u l-​klijenti jkunu għaddejjin bil-​kalma bejn filliera u oħra taʼ l-​ixkafef. Huma jirrapportaw ħafna konversazzjonijiet sbieħ.

³¹ Xi pubblikaturi magħżulin se jiġu maħturin biex jagħtu xiehda fl-​ajruport. F’xi pajjiżi fejn sar dan, l-​aħwa kellhom il-​pjaċir li jagħtu xiehda lil vjaġġaturi internazzjonali li jgħixu f’pajjiżi fejn hemm ftit nies taʼ Jehovah. Fejn instab l-​interess, huma offrew xi fuljett jew ir-​rivisti.

³² Fejn hemm territorju li huwa diffiċli biex jinħadem minħabba restrizzjonijiet taʼ sigurtà, xi wħud ħaduha drawwa li bit-​tattika jagħtu xiehda lill-​għassiesa li jkunu xogħol hemmhekk. Xi kultant in-​nies li jgħixu f’dawn l-​inħawi jistgħu jiġu kkuntattjati bit-​telefon. Għandek issib informazzjoni prattika fuq is-​suġġett taʼ l-​għoti taʼ xiehda bit-​telefon fl-​insert “Telephone Witnessing​—A Way to Reach Many” (Għoti Taʼ Xiehda Bit-​Telefon​—Mod Kif Tilħaq Lil Ħafna) fl-​Our Kingdom Ministry t’Awissu 1993.

³³ Stinka Biex Tippriedka Kullimkien: Li ngħixu fi qbil mad-​dedikazzjoni tagħna jinkludi li jkollna sens t’urġenza dwar l-​inkarigu tagħna li nxandru l-​messaġġ tas-​Saltna. Sabiex nilħqu n-​nies f’ħin li hu komdu għalihom, irridu nwarrbu fil-​ġenb il-​preferenzi persunali tagħna biex inkunu ‘nistgħu nsalvaw b’kull mezz lil xi wħud.’ Il-​qaddejja ddedikati kollha taʼ Jehovah iridu jkunu jistgħu jgħidu, bħalma qal l-​appostlu Pawlu: “Jien nagħmel l-​affarijiet kollha minħabba l-​aħbar tajba, biex jistaʼ jkolli sehem minnha m’oħrajn.”​—1 Kor. 9:​22, 23.

³⁴ Pawlu kompla jikteb: “Bl-​akbar ferħ, għalhekk, sejjer jien minflok niftaħar rigward id-​dgħjufijiet tiegħi, biex il-​qawwa tal-​Kristu tistaʼ bħal tinda tibqaʼ fuqi. . . . Għax meta jien dgħajjef, allura jien potenti.” (2 Kor. 12:​9, 10) Fi kliem ieħor, ħadd minna ma jistaʼ jwettaq dan ix-​xogħol bis-​saħħa tiegħu stess. Irridu nitolbu lil Jehovah għall-​ispirtu qaddis u setgħan tiegħu. Jekk nitolbu lil Alla għas-​saħħa, nistgħu nkunu fiduċjużi li se jwieġeb it-​talb tagħna. Imbagħad imħabbitna għan-​nies se tqanqalna biex infittxu opportunitajiet ħalli nxandrulhom l-​aħbar tajba, kulfejn jistgħu jinstabu. Matul il-​ġimgħa li ġejja, għala ma tipprovax waħda mis-​suġġerimenti murijin f’din l-​insert?