Nagħmlu Użu Effettiv Minn Il-​Ktieb Tiegħi taʼ Stejjer mill-​Bibbja

¹ Kif nistgħu nagħmlu użu tajjeb minn din il-​pubblikazzjoni? Hemm ħafna karatteristiċi sbieħ li jolqtu l-​għajn u l-​qalb: l-​ordni kronoloġiku tiegħu, it-​tipa kbira, il-​ħafna stampi, l-​istil li bih tistaʼ tgħallem lilek innifsek, u l-​istejjer qosra tiegħu. Dawn nistgħu nużawhom biex ngħinu lil kulħadd.

² Il-​valur taʼ tagħlim li hemm fl-​istampi tal-​ktieb huwa tabilħaqq kbir, u juri kemm huwa veru meta jgħidu, “Stampa tiswa daqs elf kelma.” “It-​tifel tagħna ma jiqafx iħares lejn l-​istampi waqt li naqrawlu,” jikteb ġenitur. “Aħna mistagħġbin kif l-​istampi jgħinuh jiftakar l-​istejjer b’mod daqshekk ċar.”

³ Kif jistaʼ jiġi ppreżentat b’mod effettiv il-​ktieb Stejjer mill-​Bibbja? Jiddependi ħafna minnek u minn kif tħossok int dwar il-​ktieb. Għala tħoss li huwa taʼ valur? Għid lil oħrajn bil-​ħeġġa u b’mod konvinċenti kif tħossok int dwaru.

⁴ Meta tkun qiegħed titkellem maʼ l-​inkwilini, wara li tkun introduċejt ruħek, tistaʼ tgħid: “Qegħdin naqsmu man-​nies xi ħaġa li huma verament japprezzaw. Huwa dan il-​ktieb sabiħ, Il-​Ktieb Tiegħi taʼ Stejjer mill-​Bibbja. Forsi int ġie li ħsibt dwar it-​tweġibiet għal mistoqsijiet bħal dawn.” Imbagħad mur fl-​Ewwel Taqsima u aqra l-​ewwel paragrafu taħt it-​titlu “Mill-​Ħolqien sad-​Dulluvju.” Wara dan, iġbed l-​attenzjoni lejn l-​istampi fl-​1 u fit-​2 storja fil-​paġni li jmiss u agħmel kummenti xierqa. Jekk l-​inkwilin juri interess ġenwin tistaʼ toffri li tħalli l-​ktieb waqt li tieħu l-​ħin biex tispjega kif inhu ffinanzjat ix-​xogħol tagħna madwar id-​dinja, jekk l-​inkwilin jistaqsi.

⁵ Preżentazzjoni oħra li ġiet użata b’suċċess hija, “Il-​ġurnata t-​tajba. Bħala l-​ġar tiegħek huwa taʼ ferħ għalija li nġiblek aħbar tajba. Ħafna minna ġarrabna t-​telfa taʼ xi ħabib intimu jew xi qarib fil-​mewt. Forsi int ġie li ħsibt x’setaʼ sar minnhom uħud bħal dawn u wkoll jekk hemmx xi tama għalihom.” (Ħalli ħin għal risposta.) Mur fi storja 92, billi tindika l-​istampa li turi x’kien qiegħed jagħmel Ġesù. Imbagħad aqra l-​aħħar paragrafu fl-​istorja. Ikkonkludi billi tgħid: “Dan il-​ktieb huwa maħsub kemm għaż-​żgħar u kemm għall-​kbar. Jgħinna lkoll napprezzaw iktar l-​imħabba li għandu Alla għalina u kemm jimpurtah minna. Tixtieq taqrah?” Imbagħad offri kopja u ftiehem biex terġaʼ tmur ħalli tibni fuq l-​interess li jkun ġie muri.