Konvenzjoni Distrettwali “Messaġġiera tal-​Paċi Divina” Għall-​1996

¹ Il-​programm tal-​konvenzjoni distrettwali taʼ din is-​sena żgur se jgħinna nżommu l-​paċi divina tagħna, u se jispjega l-​irwol tagħna f’li ngħinu lil oħrajn biex isibu paċi bħal din. It-​tema hija “Messaġġiera Tal-​Paċi Divina.” Għamilt int il-​pjanijiet tiegħek biex ma titlef xejn mill-​programm?

² Programm Taʼ Tlett Ijiem: Aħna nafu li se tgawdu bis-​sħiħ il-​konvenzjoni taʼ din is-​sena u se tmorru lura d-​dar b’enerġija mġedda. (2 Kron. 7:10) Din is-​sena se jerġaʼ jkollna programm taʼ tlett ijiem. Għamilt int diġà l-​arranġamenti tiegħek biex tieħu l-​vaganzi mix-​xogħol sekulari sabiex tkun tistaʼ tattendi għall-​perijodu kollu?

³ Il-​konvenzjoni distrettwali għal Malta se terġaʼ ssir fiċ-​Ċentru għall-​Konferenzi tal-​Lukanda New Dolmen mit-​13 sal-​15 taʼ Settembru.

⁴ Il-​programm se jibda fit-​tlett ijiem kollha fid-​9:30 a.m. u se jispiċċa l-​Ħadd għall-​ħabta taʼ l-​4:00 p.m. Il-​bibien se jinfetħu fit-​8:00 a.m. L-​uniċi li għandhom permess li jidħlu qabel dak il-​ħin huma dawk b’inkarigi taʼ xogħol, u dawn m’humiex se jitħallew jerfgħu postijiet sakemm il-​bini jinfetaħ għal kulħadd. Se nuru qalb tajba lejn ħutna l-​anzjani u l-​morda billi nħallu l-​postijiet vojta f’inħawi li huma iktar konvenjenti u komdi? Ftakar li “l-​imħabba . . . ma tfittixx l-​interessi tagħha stess.”​—1 Kor. 13:​4, 5; Fil. 2:4.

⁵ Int Se Tiġi Misnun? Wara li kkwotat Proverbji 27:​17, “Bil-​ħadid, il-​ħadid innifsu jinsenn,” il-​ħarġa taʼ The Watchtower tal-​15 t’Awissu 1993, osservat: “Aħna qisna għodda li rridu niġu misnunin regolarment. Ladarba li nuru mħabba lejn Jehovah u li nagħmlu deċiżjonijiet ibbażati fuq il-​fidi tagħna jfisser li nkunu differenti mid-​dinja, aħna l-​ħin kollu rridu nieħdu triq differenti, biex ngħidu hekk, mill-​maġġoranza.” Kif nistgħu napplikawh dak il-​parir?

⁶ Aħna ninsabu u rridu nibqgħu differenti mid-​dinja. L-​isforz kontinwu biex dan inwettquh irid jibqaʼ għaddej jekk irridu nkunu żelużi għal xogħlijiet mill-​aħjar. (Titus 2:14) Huwa għalhekk li The Watchtower imsemmi hawn fuq kompla jgħid: “Meta nkunu m’oħrajn li jħobbu lil Jehovah, insinnu lil xulxin​—inħeġġu lil xulxin għall-​imħabba u għal xogħlijiet mill-​aħjar.” Il-​konvenzjoni distrettwali hija waħda mill-​provisti mingħand Jehovah biex tgħinna nibqgħu mqajmin spiritwalment. Ma nistgħu naffordjaw li nitilfu ebda parti mill-​programm.

⁷ Persuna Għaqlija Se Tagħti Widen: Li wieħed jagħti widen hija arti li trid tiġi żviluppata. Intqal li l-​individwu medju jiftakar biss in-​nofs taʼ dak li semaʼ​—avolja jaħseb li jkun ta widen bir-​reqqa. Peress li ngħixu fi żmien taʼ distrazzjonijiet, xi kultant nistgħu nesperjenzaw diffikultà biex nikkonċentraw għal perijodi twal. Nistgħu nipprovaw inżidu l-​ammont li fih nagħtu attenzjoni, speċjalment meta nkunu qegħdin bil-​qiegħda f’udjenza kbira, nisimgħu lil xi ħadd jitkellem? Li kieku kellek tiġi mistoqsi biex tgħid fil-​qosor x’kien fih il-​programm taʼ kull ġurnata wara li tkun mort id-​dar mill-​konvenzjoni, tkun tistaʼ tagħmel hekk? Kif nistgħu lkoll kemm aħna ntejbu l-​abbiltà tagħna f’li nagħtu widen u f’li nagħtu attenzjoni mill-​qrib għal kull parti ppreżentata fil-​programm tal-​konvenzjoni?

⁸ Interess ħerqan huwa essenzjali, għax ir-​rigal divin tal-​memorja ma jistax jaħdem b’effiċjenza mingħajru. Per eżempju, iktar ma individwu juri interess f’suġġett, iktar huwa faċli li jiftakar il-​punti prinċipali taʼ taħdita jew taʼ parti fil-​programm. Madankollu, jiddependi ħafna fuq li nagħtu attenzjoni iktar mis-​soltu għall-​affarijiet li għandna l-​privileġġ li nisimgħu fil-​konvenzjonijiet distrettwali. L-​interess ħerqan tagħna u li noqogħdu attenti għal kull parti tal-​programm tal-​konvenzjoni se jeffettwa l-​kundizzjoni spiritwali preżenti tagħna kif ukoll il-​prospetti futuri tagħna. Fil-​konvenzjonijiet niġu mgħallmin il-​modi taʼ Jehovah u ningħataw istruzzjonijiet biex inwettqu xogħol li jsalva l-​ħajjiet. (1 Tim. 4:16) Immaġina lilek innifsek bħala vapur f’baħar imqalleb bil-​maltemp. Il-​wegħdi taʼ Jehovah huma l-​ankra soda tat-​tama. Jekk individwu ma joqgħodx attent waqt programmi Kristjani u jħalli lil moħħu jiġri bih, jistaʼ jitlef punti vitali taʼ pariri u istruzzjonijiet li bihom ikun jistaʼ jevita li jsofri nawfraġju spiritwali.​—Eb. 2:1; 6:19.

⁹ F’ħafna partijiet tad-​dinja, ħutna jagħmlu sforz fiżiku qawwi biex jattendu l-​laqgħat. Huwa meraviljuż li tarahom b’dik l-​attenzjoni kollha fil-​konvenzjonijiet. F’xi postijiet, iżda, individwi fixklu lil oħrajn billi qagħdu jduru ’l hemm u ’l hawn fil-​bini tal-​konvenzjoni matul is-​sessjonijiet. Oħrajn jiġu tard. F’xi konvenzjonijiet li għaddew, kien diffiċli li wieħed jismaʼ l-​ewwel ftit minuti tal-​programm minħabba ħafna wħud iduru ’l hemm u ’l hawn fis-​sala. Dawn taʼ spiss m’humiex aħwa rġiel fuq inkarigi taʼ xogħol jew ommijiet li qegħdin jieħdu ħsieb lit-​tfal żgħar tagħhom. Din is-​sena d-​Dipartiment taʼ l-​Attendants se jagħti iktar attenzjoni għall-​problema, u nisperaw li kulħadd ikun bil-​qiegħda meta ċ-​chairman jistedinna biex nagħmlu hekk. Tkun apprezzata ħafna l-​koperazzjoni tagħkom f’dan ir-​rigward.

¹⁰ X’suġġerimenti prattiċi se jgħinuna biex noqogħdu iktar attenti għall-​programm tal-​konvenzjoni u biex niftakru iktar minn dak li jiġi ppreżentat? Taʼ min jerġaʼ jirrepeti dak li ntqal fis-​snin li għaddew: (a) Iffoka fuq ir-​raġuni prinċipali għala sejjer il-​konvenzjoni. Sejjer, mhux biex tieħu sehem f’rikreazzjoni, imma biex tagħti widen u titgħallem. (Dewt. 31:12) Ipprova ħu mistrieħ biżżejjed kull lejl. Jekk tiġi għajjien ħafna għall-​konvenzjoni, ikun diffiċli li żżomm moħħok hemm. (b) Ħalli ħin biżżejjed biex tipparkja l-​karozza tiegħek u biex issib post bil-​qiegħda qabel ma jibda l-​programm. Taʼ spiss jirriżulta li, jekk tmur tiġri tfittex post fl-​aħħar minuta, titlef ftit mill-​parti tal-​ftuħ. (ċ) Ħu noti qosra tal-​punti prinċipali. Li tieħu ħafna noti żejda jistaʼ jfixklek milli tagħti widen sew. Meta tkun qiegħed tikteb, kun ċert li ma titlifx punti oħrajn għax tkun mitluf tieħu n-​noti tiegħek. (d) Meta tiġi introdotta parti fil-​konvenzjoni, ħares lejha bil-​quddiem. Staqsi lilek innifsek: ‘X’nistaʼ nitgħallem minn din il-​parti li se jżid l-​apprezzament u l-​imħabba tiegħi lejn Jehovah? Din l-​informazzjoni kif tistaʼ tgħinni biex nuri l-​personalità ġdida iktar bis-​sħiħ? Din kif se tgħinni biex nitjieb fil-​ministeru tiegħi?’

¹¹ Kondotta Li Ssebbaħ Il-​Ministeru Tagħna: Pawlu ħeġġeġ lil Titus biex juri lilu nnifsu bħala “eżempju taʼ xogħlijiet mill-​aħjar.” Billi juri nuqqas taʼ korruzzjoni fit-​tagħlim tiegħu, Titus kien b’hekk se jgħin lil oħrajn biex “iżejnu t-​tagħlim tas-​Salvatur tagħna, Alla, fl-​affarijiet kollha.” (Titus 2:​7, 10) Kull sena, nirċievu tfakkiriet b’imħabba rigward għala l-​kondotta kif irid Alla hija daqshekk importanti meta nkunu qegħdin nivvjaġġaw għal jew lura mill-​konvenzjoni, kif ukoll meta nkunu f’lukandi u f’restoranti u fil-​konvenzjoni nfisha. Is-​sena l-​oħra erġajna smajna ftit kummenti li jqawwu l-​qalb li nixtiequ naqsmu magħkom.

¹² Fil-​waqt li dawk li jmexxu l-​Lukanda New Dolmen huma favorevoli ħafna lejn l-​organizzazzjoni tagħna, madankollu, ma rridux li nieħdu vantaġġ minn dan. Irridu li l-​ħaddiema jibqgħu jħarsu lejna bħala grupp li huwa paċenzjuż, li jikkopera, u li noqogħdu għassa taʼ wliedna.

¹³ Mill-​banda l-​oħra, hemm wisgħa għal titjib f’ċerti nħawi. Nixtiequ naqsmu magħkom xi ftit osservazzjonijiet li ntbagħtu lis-​Soċjetà. Jidher li xi tfal għandhom bżonn iktar superviżjoni fil-​lukanda. Xi wħud dehru jiġru fil-​kurituri, u jagħmlu ħafna storbju li jtellef lill-​mistednin l-​oħra tal-​lukanda. Il-​kondotta tagħna fil-​lukanda, fir-​restoranti, u fit-​toroq għandha tkun onorabbli daqs kemm meta nkunu bil-​qiegħda maʼ ħutna matul is-​sessjonijiet, waqt li niġu mgħallmin minn Jehovah.​—Isa. 54:13; 1 Piet. 2:12.

¹⁴ Huma involuti spejjeż konsiderevoli biex tinkera l-​faċilità, u biex isiru affarijiet oħrajn. Id-​donazzjonijiet volontarji tagħna jkopru dawn l-​ispejjeż. Waħda oħt bi tfal adolexxenti marret il-​konvenzjoni bi ftit flus fuqha. Madankollu, hi u wliedha xorta għenu b’kontribuzzjoni żgħira. Dak li kull wieħed jiddeċiedi li jagħmel f’dan ir-​rigward hija xi ħaġa persunali, imma nafu li tapprezzaw tfakkiriet bħal dawn.​—Atti 20:35; 2 Kor. 9:7.

¹⁵ Nintgħarfu Mill-​Mod Kif Nilbsu: Il-​mod kif nilbsu juri ħafna dwarna u dwar is-​sentimenti tagħna lejn oħrajn. Il-​biċċa l-​kbira taż-​żgħażagħ u ħafna adulti fl-​iskola jew fuq il-​post tax-​xogħol tagħhom huma mdawrin bi stili taʼ lbies żmattat u li jdumu fil-​moda għal ftit żmien biss. Kull sena l-​istili taʼ l-​ilbies isiru iktar estremi, saħansitra xokkanti. Jekk ma noqogħdux attenti, nistgħu faċilment niġu influwenzati minn sħabna tad-​dinja biex nilbsu bħalhom. Ħafna stili m’humiex xierqa li wieħed jilbishom fil-​laqgħat għall-​qima. Nota li rċevejna wara waħda mill-​konvenzjonijiet tas-​sena l-​oħra fl-​Istati Uniti esprimiet l-​apprezzament lejn il-​programm imma kompliet tgħid: “Tħassibt għala kien hemm daqstant tfajliet lebsin ilbiesi qosra, flokkijiet skullati, u qsim twil tad-​dbielet.” Żgur li lkoll kemm aħna nixtiequ nilbsu b’mod li jixraq lil ministri Kristjani kemm fil-​konvenzjoni kif ukoll waqt li nagħmluha maʼ l-​aħwa wara l-​programm. Nagħmlu tajjeb li f’kull ħin nirriflettu fuq il-​parir taʼ l-​appostlu Pawlu għall-​Kristjani biex ikunu mżejnin “b’ilbies irranġat sewwa, bil-​modestja u moħħ f’loku.”​—1 Tim. 2:9.

¹⁶ Min għandu jiddetermina x’inhu lbies modest, “irranġat sewwa”? Li l-​ilbies ikun modest ifisser li jkun “la insolenti u lanqas li tagħmel l-​arja bih.” Id-​dizzjunarju jfisser ukoll il-​kelma modest bħala “mingħajr pretensjoni.” La s-​Soċjetà u lanqas l-​anzjani m’għandhom jistabbilixxu regoli dwar l-​ilbies u l-​maxta. Minkejja dan, m’għandux ikun ċar għal wieħed Kristjan liema stili taʼ lbies huma sempliċement mhux modesti jew diċenti? (Qabbel Filippin 1:10.) Il-​maxta u l-​ilbies tagħna m’għandhomx jattiraw attenzjoni żejda. Irridu nidhru aċċettabbli fid-​dehra, mhux bħal tad-​dinja jew offensivi. Bħala ministri taʼ l-​aħbar tajba, li nkunu lebsin ilbies u li jkollna maxta xierqa matul iż-​żmien li nkunu fil-​post fejn issir il-​konvenzjoni distrettwali jġib unur lil Jehovah u jirrifletti sewwa fuq l-​organizzazzjoni. Għalhekk, il-​ġenituri se jagħtu l-​eżempju u mbagħad ikunu ċerti li wliedhom jilbsu kif jixraq għall-​okkażjoni. L-​anzjani jridu jagħtu eżempju tajjeb u jkunu lesti li joffru pariri bl-​imħabba jekk ikun hemm bżonn.

¹⁷ Cameras, Camcorders, u Audiocassette Recorders: Huwa permissibbli li jintużaw cameras jew tagħmir ieħor li jirrekordja, basta li nuru konsiderazzjoni lejn oħrajn li qegħdin jattendu. Jekk noqogħdu nduru nieħdu r-​ritratti matul is-​sessjonijiet, mhux biss se ntellfu lil oħrajn li qegħdin jipprovaw jagħtu widen imma se nitilfu ftit mill-​programm aħna stess. Taʼ spiss nibbenefikaw iktar mill-​konvenzjoni jekk nagħtu attenzjoni mill-​qrib lejn il-​kelliema u nieħdu noti moderati. Forsi aħna nkunu qegħdin nirrekordjaw għal xi ħu jew oħt li ma jistgħux joħorġu mid-​dar; madankollu, għall-​użu persunali tagħna, meta mmorru lura d-​dar għandna mnejn insibu li wara li rrekordjajna ħafna sigħat mill-​programm, ma nsibux ħin għalina biex nirrevedu kważi dak kollu li rrekordjajna. L-​ebda tip taʼ tagħmir taʼ l-​irrekordjar m’għandu jiġi mqabbad mas-​sistemi tad-​dawl u tas-​smigħ, u lanqas m’għandu t-​tagħmir jiżgombra kurituri, passaġġi, jew il-​veduta t’oħrajn.

¹⁸ Siġġijiet: Qegħdin inkomplu naraw titjib fil-​kwistjoni taʼ li nerfgħu siġġijiet. Is-​sena l-​oħra, il-​biċċa l-​kbira minnkom segwew id-​direzzjonijiet: TISTAʼ ŻŻOMM SIĠĠIJIET BISS GĦAL MEMBRI IMMEDJATI TAL-​FAMILJA TIEGĦEK U GĦAL MIN IKUN QIEGĦED JIVVJAĠĠA MIEGĦEK FIL-​KAROZZA TIEGĦEK. X’aktarx li sibt li kien taʼ inqas uġigħ taʼ ras għaliex ħafna kienu qegħdin isegwu dawn id-​direzzjonijiet ċari. Saħansitra iktar importanti, li għamiltu kif kien mitlub għoġob lil Jehovah u lill-​“irsir leali,” li jagħti l-​ikel spiritwali.​—Matt. 24:45.

¹⁹ Hemm għadd li dejjem jikber t’aħwa li għandhom bżonnijiet speċjali taʼ saħħa. Xi wħud jiġu għall-​konvenzjoni fis-​siġġijiet tar-​roti u jridu jieħdu ħsiebhom il-​membri tal-​familja. Oħrajn qegħdin jieħdu mediċini diversi għal mard kroniku bħal per eżempju problemi jew attakki tal-​qalb. Verament iqawwilna qalbna li naraw lil dawn l-​aħwa għeżież irġiel u nisa fil-​konvenzjoni, determinati li ma jitilfu xejn mill-​ikel spiritwali. Madankollu, xi drabi, kien hemm il-​problema li xi persuni jħossuhom ma jifilħux matul il-​konvenzjoni, mingħajr ma jkun hemm membri tal-​familja jew tal-​kongregazzjoni biex jagħtu l-​għajnuna. F’ċerti każi l-​amministrazzjoni tal-​konvenzjoni kellha ċċempel għal servizz mediku urġenti biex jieħu lil xi ħu jew oħt l-​isptar. Ir-​responsabbiltà għall-​kura taʼ dawk morda kronikament għandha primarjament taqaʼ fuq membri tal-​familja u qraba. Id-​Dipartiment taʼ l-​Ewwel Għajnuna fil-​konvenzjoni m’huwiex f’pożizzjoni li jipprovdi kura għal dawk morda kronikament. Jekk xi membru tal-​familja tiegħek għandu bżonn kura speċjali, jekk jogħġbok kun ċert li ma jitħalliex waħdu f’każ li tqum emerġenza. Flimkien maʼ dan, ma se jkun hemm l-​ebda arranġament fil-​konvenzjonijiet għal kmamar speċjali biex jakkomodaw lil dawk li għandhom allerġiji li jimpeduhom li jpoġġu bil-​qiegħda mal-​kumplament taʼ l-​udjenza. L-​anzjani jridu joqogħdu għassa għal xi wħud fil-​kongregazzjoni tagħhom li għandhom bżonnijiet speċjali taʼ saħħa u jkunu ċerti li jsiru arranġamenti għall-​kura tagħhom minn qabel.

²⁰ Bżonnijiet Taʼ L-​Ikel Fil-​Konvenzjoni: L-​ebda ikel ma se jiġi pprovdut mill-​volontieri fil-​konvenzjoni imma se jsiru arranġamenti, bħal fis-​snin taʼ qabel, biex xi ikel jiġi pprovdut mill-​ħaddiema tal-​lukanda fil-​qasam taʼ l-​ikel. Iktar ma toqrob il-​konvenzjoni, il-​kumitat tal-​konvenzjoni distrettwali se javżakom dwar x’ikel se jintgħamel disponibbli u l-​prezz tiegħu. Tistgħu tieħdu ftit minuti biex tirrevedu paragrafu 26 taʼ l-​insert taʼ l-​Our Kingdom Ministry taʼ Mejju 1995, rigward suġġerimenti taʼ x’ikel prattiku u sustanzjuż nistgħu nieħdu magħna għall-​konvenzjoni. Jekk jogħġobkom ftakru li m’għandhomx jiddaħħlu fil-​faċilità tal-​konvenzjoni xi reċipjenti tal-​ħġieġ jew xorb alkoħoliku. Jekk hemm bżonn taʼ reċipjenti li jkessħu, dawn għandhom joqogħdu sew taħt is-​siġġu tiegħek. Żommu f’moħħkom li hemm ħin biżżejjed matul il-​waqfa taʼ nofs in-​nhar biex tieklu u tixorbu dak li ġġibu. Bħalma nagħmlu matul il-​laqgħat fis-​Swali tas-​Saltna, dejjem inżommu lura milli nieklu matul is-​sessjonijiet tal-​konvenzjoni. B’hekk nuru rispett lejn l-​arranġament għall-​qima u lejn l-​ikel spiritwali li qiegħed jiġi pprovdut.

²¹ Dalwaqt se jibdew l-​ewwel Konvenzjonijiet Distrettwali “Messaġġiera Tal-​Paċi Divina.” Lestejt int il-​preparazzjonijiet tiegħek biex tattendi, u lest issa biex tgawdi tlett ijiem taʼ sħubija hienja u affarijiet spiritwali tajbin? Hija t-​talba sinċiera tagħna li Jehovah ibierek l-​isforzi tiegħek biex tattendi l-​konvenzjoni taʼ dan is-​sajf.

Tfakkiriet Tal-​Konvenzjoni Distrettwali

Magħmudija: Kandidati għall-​magħmudija għandhom ikunu bil-​qiegħda f’posthom fis-​sessjoni magħżula qabel ma jibda l-​programm is-​Sibt fil-​għodu. Ġie osservat li xi wħud jilbsu tipi taʼ ħwejjeġ li m’humiex dinjitużi u li jnaqqsu l-​valur taʼ l-​okkażjoni. Kull wieħed li bi ħsiebu jitgħammed irid iġib miegħu malja modesta u xugaman. Anzjani tal-​kongregazzjoni li jirrevedu l-​mistoqsijiet mal-​kandidati għall-​magħmudija minn fuq il-​ktieb Our Ministry iridu jkunu ċerti li kull wieħed jifhem dawn il-​punti. Wara li ssir it-​taħdita tal-​magħmudija u t-​talba mill-​kelliemi, iċ-​chairman tas-​sessjoni jagħti istruzzjonijiet qosra lill-​kandidati u mbagħad iħabbar l-​għanja. Wara l-​aħħar strofa, l-​attendants jidderieġu lill-​kandidati lejn il-​post fejn se ssir il-​magħmudija. Peress li l-​magħmudija f’simbolu tad-​dedikazzjoni taʼ dak li jkun hija xi ħaġa intima u persunali bejnu u bejn Jehovah, m’hemmx lok għall-​hekk imsejħin magħmudijiet bil-​pari fejn żewġ kandidati tal-​magħmudija jew iktar jitgħannqu jew iżommu id f’id waqt li jkunu qegħdin jiġu mgħammdin.

Badge Cards: Jekk jogħġobkom ilbsu l-​badge card taʼ l-​1996 għall-​konvenzjoni u waqt li tkunu qegħdin tivvjaġġaw għal u lura mill-​post tal-​konvenzjoni. Dan taʼ spiss jagħmilha possibbli għalina li nagħtu xiehda mill-​aħjar waqt li nivvjaġġaw. Għandkom tiksbu l-​badge cards u l-​holders mill-​kongregazzjoni tagħkom, peress li m’humiex se jkunu disponibbli fil-​konvenzjoni. Toqogħdux tistennew sa ftit jiem qabel il-​konvenzjoni biex tistaqsu għal cards għalikom u għall-​familja tagħkom. Ftakru biex iġġorru fuqkom il-​biljett kurrenti tagħkom taʼ Direttiva Medika Bil-​Quddiem/Li Teħles Lit-​Tobba.

Pushchairs: Hemm verament ftit wisq spazju għal pushchairs fiċ-​Ċentru għall-​Konferenzi tan-​New Dolmen. Fi kwalunkwe każ, regolamenti tan-​nar jipprojbixxu li dawn jitpoġġew fil-​kurituri jew fil-​passaġġi jew bejn ringieli taʼ siġġijiet. Peress li folol kbar jistgħu joħolqu kundizzjonijiet taʼ imblokkar, il-​pushchairs huma potenzjalment perikolużi mhux biss għat-​tarbija imma wkoll għal xi ħadd li jistaʼ jitfixkel fihom. Mela jekk jogħġobkom idaħħluhomx fis-​sala. Madankollu, wieħed jistaʼ juża siġġijiet tat-​trabi jew tal-​karozzi, peress li dawn jistgħu jintrabtu mas-​siġġijiet taʼ maġenb il-​ġenituri. Hija apprezzata l-​koperazzjoni tagħkom f’dawn l-​affarijiet.

Servizz Taʼ Volontieri: Tistaʼ int twarrab ftit ħin fil-​konvenzjoni biex tgħin f’wieħed mid-​dipartimenti? Li naqdu lil ħutna, saħansitra jekk għal ftit sigħat biss, jistaʼ jkun taʼ ħafna għajnuna u jġib ammont tajjeb taʼ sodisfazzjon. Jekk tistaʼ tgħin, jekk jogħġbok irrapporta lid-​Dipartiment tas-​Servizz tal-​Volontieri fil-​konvenzjoni. Tfal taħt is-​16-il sena jistgħu wkoll jagħtu kontribut mill-​aħjar billi jaħdmu taħt id-​direzzjoni taʼ xi ġenitur jew taʼ xi adult responsabbli ieħor.

Kliem Taʼ Twissija: Oqogħdu għassa għal xi problemi potenzjali sabiex tevitaw diffikultajiet bla bżonn. Taʼ spiss il-​ħallelin u individwi taʼ bla skruplu jduru għal nies li huma ’l bogħod mill-​ambjent tad-​dar tagħhom. Kunu ċerti li l-​karozza tagħkom tkun imsakkra l-​ħin kollu, u qatt tħallu xi ħaġa tidher li tħajjar lil xi ħadd biex ikisser u jisraq. Il-​ħallelin u dawk li jisirqu l-​affarijiet mill-​bwiet jiffokaw l-​attenzjoni tagħhom fuq laqgħat kbar. Ma jkunx għaqli li tħallu oġġetti taʼ valur fuq is-​siġġu tagħkom. Ma tistgħux tkunu ċerti li kulmin hemm madwarkom hu Kristjan. Għala toffru xi tentazzjoni? Irċevejna rapporti li f’xi pajjiżi saru attentati minn uħud barranin biex iħajru lit-​tfal għal warajhom. ŻOMMU LIL ULIEDKOM FEJN TARAWHOM IL-​ĦIN KOLLU.

Jekk jogħġobkom iċċemplux jew tiktbu lil min imexxi l-​lukanda New Dolmen biex tiksbu informazzjoni dwar kwalunkwe affarijiet fuq il-​konvenzjoni. Tistgħu tiksbu bla dewmien kwalunkwe informazzjoni li forsi teħtieġu mingħand l-​anzjani lokali tagħkom. Jekk l-​anzjani ma jistgħux jagħtukom l-​informazzjoni dak il-​ħin, jistgħu jakkwistawhielkom mingħand il-​kumitat tal-​konvenzjoni distrettwali.