Konvenzjoni Distrettwali “Fidi Fil-​Kelma T’Alla” Għall-​1997

¹ L-​appostlu Pawlu fakkar lil Timotju li “l-​Iskrittura kollha hija mnebbħa minn Alla.” (2 Tim. 3:​16) Ladarba l-​Kelma t’Alla hija mnebbħa, għandna kull raġuni għalxiex neżerċitaw fidi fiha. It-​tema tal-​konvenzjoni distrettwali għal din is-​sena hija “Fidi Fil-​Kelma T’Alla.” Il-​programm se jsaħħaħ il-​fidi tagħna fil-​Bibbja, kemm jekk ilna nafu l-​verità għal ħafna snin u kemm jekk m’ilniex wisq li għamilna kuntatt maʼ l-​organizzazzjoni taʼ Jehovah. Ilkoll kemm aħna għandna nagħmlu arranġamenti sabiex nattendu l-​programm kollu. Kemm tkun xi ħaġa li tibnina jekk xi wħud li għadhom kif bdew juru interess, partikolarment dawk li nistudjaw il-​Bibbja magħhom, jattendu magħna!

² Konvenzjoni Taʼ Tlett Ijiem: Din is-​sena ġie mħejji għall-​benefiċċju tagħna programm għal konvenzjoni distrettwali taʼ tlett ijiem. Il-​konvenzjoni distrettwali għal Malta hija għal darb’oħra maħsuba li ssir fin-​New Dolmen Hotel fi tmiem il-​ġimgħa taʼ bejn it-​12 u l-​14 taʼ Settembru, 1997. Nafu li se tagħmlu pjanijiet definiti biex tattendu t-​tlett ijiem kollha tal-​programm. Avviċinajt int lill-​imgħallem tiegħek biex tieħu l-​leave meħtieġ? Jekk għandek tfal li għadhom l-​iskola u l-​konvenzjoni tinzerta fil-​perijodu taʼ l-​iskola, informajt kif jixraq lill-​għalliema tagħhom li wliedek se jkunu assenti l-​Ġimgħa minħabba din il-​parti importanti mit-​taħriġ reliġjuż tagħhom?​—Dewt. 31:12.

³ Se jerġgħu jsiru arranġamenti biex il-​programm ikun jistaʼ jinstemaʼ kemm bil-​Malti u kemm bl-​Ingliż.

⁴ Il-​programm se jibda kuljum fid-​9.30 taʼ fil-​għodu. Il-​bibien se jinfetħu fit-​8.00 taʼ fil-​għodu. L-​uniċi wħud li se jitħallew jidħlu qabel dak il-​ħin huma dawk b’inkarigi taʼ xogħol, imma m’humiex se jitħallew jerfgħu xi postijiet qabel ma l-​bini jinfetaħ għal kulħadd.​—Flp. 2:4.

⁵ Nagħmlu Tajjeb Jekk Noqogħdu Attenti: L-​appostlu Pawlu fakkar lill-​Kristjani taʼ l-​ewwel seklu li kienu jagħmlu tajjeb jekk joqogħdu attenti għall-​kelma profetika bħal li kieku xi lampa tiddi f’post mudlam. (2 Piet. 1:​19) Dan huwa minnu fil-​każ tagħna wkoll. Li ngħixu f’din id-​dinja qadima li qiegħda taħt il-​kontroll taʼ Satana huwa bħal li kieku qegħdin f’post mudlam. Aħna grati li ġejna msejħin ’il barra mid-​dlam spiritwali. (Kol. 1:​13; 1 Piet. 2:​9; 1 Ġwn. 5:​19) Biex nibqgħu fid-​dawl, jeħtieġ li nżommu l-​fidi tagħna qawwija billi noqogħdu attenti għall-​Kelma ispirata taʼ Jehovah. Il-​konvenzjoni distrettwali tagħna taʼ dan is-​sajf se tinkuraġġina biex nagħmlu eżatt hekk.

⁶ Forsi se jkun hemm bżonn taʼ sforz min-​naħa tagħna biex nikkonċentraw fuq il-​programm, imma żgur li se nitbierku talli nagħmlu hekk. Għandna nistinkaw biex naslu fuq il-​post tal-​konvenzjoni mistriħin sew sabiex inkunu moħħna hemm matul is-​sessjonijiet. Kuljum, ara li tasal fuq il-​post tal-​konvenzjoni kmieni biżżejjed sabiex issib postok qabel ma jibda l-​programm. Imbagħad ħu sehem fl-​għanja tal-​ftuħ u t-​talba fil-​bidu tal-​programm taʼ kull ġurnata. L-​adulti għandhom jagħtu eżempju, u l-​ġenituri għandhom iħarrġu lil uliedhom.​—Efe. 6:4.

⁷ Jekk nagħtu daqqa t’għajn lejn it-​titli tal-​partijiet qabel ma jibda l-​programm tal-​jum, nistgħu nipprovaw nantiċipaw x’punti jistgħu joħorġu matul dik is-​sessjoni. Dan se jkattar l-​interess tagħna fil-​materjal meta jiġi ppreżentat. Nistgħu noqogħdu attenti għal xi punti li se jgħinuna nesprimu m’oħrajn għala nemmnu f’Alla u fil-​wegħda ċerta tiegħu li se jippremja lil dawk li qegħdin ifittxuh bil-​ħrara. (Ebr. 11:​1, 6) Ġie rrikmandat li nieħdu xi noti qosra biex jgħinuna niftakru l-​punti prinċipali tal-​programm. Jekk nieħdu wisq noti, jistgħu jaqbżulna xi punti prinċipali għax inkunu wisq aljenati niktbu.

⁸ Is-​sena li għaddiet reġgħu ġew osservati ħafna adulti u żgħażagħ igawdu l-​faċilitajiet tal-​lukanda u jduru u jagħqdu barra waqt li l-​programm kien għaddej minflok ma qagħdu jagħtu widen għal dak li “l-​irsir leali u diskret” kien ipprovda għall-​benefiċċju tagħna. Ġesù wiegħed li jagħtina ikel spiritwali fiż-​żmien xieraq. (Matt. 24:​45-​47, NW) Għalhekk, irridu nkunu preżenti biex nibbenefikaw minn dak l-​ikel u mhux nuru nuqqas t’apprezzament. (2 Kor. 6:1) Jidher ukoll li meta xi tfal jibdew jiddejqu, taʼ spiss jitolbu biex imorru sat-​toilet bħala skuża biex iqumu u jduru dawra. Taħriġ kif jixraq fid-​dar taʼ spiss inaqqas il-​bżonn li wieħed joqgħod ġej u sejjer it-​toilet. Xi drabi, żgħażagħ ftit akbar joqogħdu bil-​qiegħda ħdejn xulxin, ipaċpċu, ipespsu, u jgħaddu n-​noti lil xulxin. Iż-​żgħażagħ tagħna, li llum jiffaċċjaw ħafna pressjonijiet, għandhom bżonn jikkonċentraw fuq il-​materjal li jkun qiegħed jiġi ppreżentat, u mhux jagħmlu affarijiet oħrajn matul il-​programm. Xewqat taż-​żgħożija li ma jaqblux mal-​prinċipji tal-​Bibbja għandhom jiġu evitati. (Qabbel 2 Timotju 2:​22.) Li kulħadd joqgħod attent, kemm adulti u kemm żgħażagħ, se jonora lil Jehovah u jagħmlu ferħan.

⁹ Jekk isir neċessarju għal wieħed mill-​attendants li jwissi lil xi ħadd dwar dawn l-​affarijiet, dan għandu jiġi aċċettat bħala provvediment taʼ mħabba mingħand Jehovah. (Gal. 6:1) Ilkoll kemm aħna rridu niftakru li r-​raġuni għala nagħmlu tant sforz biex nattendu l-​konvenzjoni hija sabiex inkunu nistgħu ‘nisimgħu u nitgħallmu.’ (Dewt. 31:12) Ukoll, “jismaʼ wkoll l-​għaref, u jżid l-​għerf tiegħu.” (Prov. 1:5) Fiż-​żmien li fadal qabel ma tattendu l-​konvenzjoni, iddiskutu bħala familja l-​bżonn li tpoġġu bil-​qiegħda flimkien fl-​udjenza, tibqgħu bil-​qiegħda matul il-​programm, u toqogħdu ħafna attenti, sabiex tiksbu l-​iktar benefiċċju sħiħ mill-​programm.

¹⁰ Tiżjin Li Jogħġob Lil Jehovah: In-​nies taʼ Jehovah qegħdin bħal wirja għad-​dinja kollha biex tarahom. (1 Kor. 4:9) Aħna ġeneralment magħrufin għal-​livell mill-​aħjar taʼ l-​ilbies u l-​maxta. Billi applikaw il-​prinċipji Skritturali misjubin fl-​1 Timotju 2:​9, 10 u fl-​1 Pietru 3:​3, 4 ħafna għamlu bidliet kbar fid-​dehra tagħhom meta tqabbilhom maʼ kif kienu jidhru meta bdew jissieħbu mal-​kongregazzjoni Kristjana. Dan huwa f’kuntrast qawwi mal-​livelli li dejjem sejrin għall-​agħar fl-​ilbies u fil-​maxta li naraw fid-​dinja. Irridu noqogħdu għassa li ma nsirux bħal tad-​dinja fid-​dehra tagħna​—billi nilbsu ħwejjeġ taʼ barra minn hawn, billi nippromwovu xi stil taʼ xagħar dinji u tal-​mument, jew billi nilbsu b’mod immodest. L-​ilbies u l-​maxta eżemplari tagħna għandhom jgħinu lil uħud ġodda li jattendu l-​konvenzjoni biex jaraw kif il-​Kristjani għandhom iżejnu lilhom infushom.

¹¹ Fil-​waqt li l-​impressjoni ġenerali li tħalliet bħala riżultat tal-​konvenzjonijiet tas-​sena l-​oħra kienet favorevoli ħafna, ilbies u maxta dinjin għadhom ikunu taʼ problema għal xi aħwa rġiel u nisa, speċjalment matul il-​ħin taʼ rilassar taʼ wara. Waqt li nkunu qegħdin nagħmlu l-​pjanijiet tagħna biex nattendu l-​konvenzjoni, għandna nanalizzaw lilna nfusna rigward l-​ilbies u l-​maxta tagħna. Ġenituri, iflu bil-​għaqal x’se jilbsu t-​tfal żgħar u ż-​żgħażagħ tagħkom. Kunu ċerti li m’aħniex inħallu xi stili jew modi dinjin ikollhom effett ħażin fuq id-​dehra Kristjana tagħna.

¹² Inżommu Kondotta Mill-​Aħjar: Kondotta mill-​aħjar hija karatteristika tal-​veri Kristjani. (1 Piet. 2:​12) Il-​mod kif inġibu ruħna kulfejn inkunu​—fil-​konvenzjoni, f’xi restoranti, u fil-​lukanda, u kif ukoll meta nivvjaġġaw—​jistaʼ jagħti xiehda mill-​aħjar u jgħin lil oħrajn jaraw x’tistaʼ tagħmel għan-​nies il-​fidi f’Alla u fil-​Kelma tiegħu. Dan jistaʼ jqanqal lil xi wħud biex isiru jafu lil Jehovah. (Qabbel 1 Pietru 3:​1, 2.) Aħna għandna l-​privileġġ li nigglorifikaw lil Alla bil-​kondotta tagħna. Id-​diriġenti taʼ lukanda fl-​Istati Uniti qalu li d-​delegati tagħna huma “l-​iktar grupp mill-​aħjar u li jġib ruħu sew li huma jospitaw.” Dawn żiedu: “Se jkun privileġġ li nerġgħu narawkom fil-​futur.” Uffiċċju governattiv li jippromwovi t-​turiżmu u l-​konvenzjonijiet fil-​Majjistral taʼ l-​Istati Uniti kiteb: “Kull sena, il-​konferenza tal-​Watchtower Society tkun mistennija bil-​ħerqa mill-​komunità tagħna kollha. Il-​membri tagħkom fihom verament għaxqa; iġibu ruħhom bil-​korteżija u r-​rispett kollu. In-​negozjanti tagħna jagħrfuh dan u jħarsu ’l quddiem kull sena lejn ir-​ritorn tal-​‘familja’ tagħhom taʼ mistednin.” Rapporti bħal dawn jagħtuk pjaċir li taqrahom, hux hekk? Huwa dan il-​mod kif dawk li jmexxu n-​New Dolmen iħarsu lejna? Hemm il-​bżonn li nibqgħu viġilanti sabiex nippreservaw ir-​reputazzjoni tajba tal-​poplu taʼ Jehovah.

¹³ Ġew mogħtijin ħafna tfakkiriet dwar li nikkontrollaw lil uliedna, u mhux inħalluhom jiġru waħedhom ’l hemm u ’l hawn fil-​lukanda, u jdejqu lil mistednin oħrajn. Għalkemm il-​konvenzjonijiet jipprovdulna l-​opportunità li nżuru u nissieħbu mal-​fratellanza tagħna, il-​ġenituri xorta jridu jżommu f’moħħhom l-​obbligu tagħhom li jipprovdu superviżjoni għal uliedhom il-​ħin kollu. Din hija responsabbiltà li Jehovah jitfaʼ fuq kull ġenitur. (Prov. 1:​8; Efe. 6:4) Dak li jagħmlu t-​tfal meta ma jkunux taħt il-​ħarsien taʼ xi ħadd jistaʼ jdgħajjef ir-​reputazzjoni tajba li Xhieda taʼ Jehovah oħrajn ħadmu iebes biex jibnu.​—Prov. 29:15.

¹⁴ Żommu f’moħħkom li t-​tips huma xi ħaġa xierqa meta tirċievu servizz persunali, speċjalment meta tqis li ħafna minn dawk li jaqdu lill-​pubbliku, bħalma huma waiters, waitresses, dawk li jieħdu ħsieb it-​tindif, u li jwasslulek il-​bagalji sal-​kamra, jiddependu l-​biċċa l-​kbira fuq it-​tips biex jaqilgħu l-​għajxien. Bħala Xhieda taʼ Jehovah, irridu nuru manjieri tajbin f’dan ir-​rigward ukoll.​—Ara l-​Awake! tat-​22 taʼ Ġunju, 1986, paġni 24-7.

¹⁵ Inkopru L-​Ispejjeż Tal-​Konvenzjoni: Ilkoll kemm aħna se jkollna xi spejjeż li għandhom x’jaqsmu maʼ li nattendu l-​konvenzjonijiet. Hemm spiża oħra li nagħmlu tajjeb li nikkunsidrawha. Il-​faċilitajiet li jintużaw għal konvenzjonijiet iqumu l-​flus. Hemm ukoll spejjeż oħrajn li jridu jitħallsu. Il-​kontribuzzjonijiet ġenerużi u volontarji tagħna fil-​konvenzjonijiet huma apprezzati bil-​kbir.​—Atti 20:​35; 2 Kor. 9:​7, 11, 13.

¹⁶ Siġġijiet: Id-​direzzjonijiet li ġew mogħtijin għal għadd taʼ snin se jkomplu jgħoddu, jiġifieri, TISTAʼ ŻŻOMM SIĠĠIJIET BISS GĦAL MEMBRI IMMEDJATI TAL-​FAMILJA TIEGĦEK U GĦAL MIN IKUN QIEGĦED JIVVJAĠĠA MIEGĦEK FIL-​KAROZZA TIEGĦEK. Kienet xi ħaġa sabiħa li naraw li f’dawn l-​aħħar snin ħafna iktar qegħdin jimxu maʼ dawn id-​direzzjonijiet, u dan żied l-​atmosfera taʼ mħabba murija fil-​konvenzjonijiet. Jekk jogħġobkom uru l-​mogħdrija, u ħallu s-​siġġijiet l-​iktar konvenjenti għal dawk li minħabba ċ-​ċirkostanzi tagħhom ikollhom bżonnhom.

¹⁷ Cameras, Camcorders, u Audiocassette Recorders: Cameras u tagħmir ieħor li jirrekordja jistgħu jintużaw fil-​konvenzjonijiet. Madankollu, l-​użu tagħhom m’għandux ikun taʼ tfixkil għal oħrajn fl-​udjenza. M’għandniex noqogħdu nduru nieħdu r-​ritratti matul is-​sessjonijiet, għax dan se jfixkel lil oħrajn li qegħdin jipprovaw jikkonċentraw fuq il-​programm. L-​ebda tip taʼ tagħmir taʼ l-​irrekordjar m’għandu jiġi mqabbad mas-​sistemi tad-​dawl u tas-​smigħ, u lanqas m’għandu dan it-​tagħmir jiżgombra kurituri, passaġġi, jew jimblokka l-​veduta t’oħrajn.

¹⁸ L-​Ewwel Għajnuna: Id-​Dipartiment taʼ L-​Ewwel Għajnuna huwa biss għall-​emerġenzi. Dan m’huwiex f’qagħda li jipprovdi kura għal mard kroniku. Dan hu għala għandek tqis minn qabel il-​bżonnijiet taʼ saħħtek u taʼ saħħet il-​familja tiegħek. Jekk jogħġbok aħseb int għal xi aspirina, xi għajnuniet għad-​diġestjoni, faxex, labar tas-​sarwâl, u oġġetti simili, peress li affarijiet bħal dawn m’humiex se jkunu disponibbli fil-​konvenzjoni. Min ġieli jsofri minn xi attakki, xokkijiet minħabba l-​insulina, problemi tal-​qalb, u affarijiet bħal dawn, għandu jantiċipa l-​bżonnijiet tiegħu sakemm hu possibbli. Uħud bħal dawn għandu jkollhom il-​mediċina neċessarja, u xi membru tal-​familja jew tal-​kongregazzjoni li jifhem is-​sitwazzjoni tagħhom għandu jkun preżenti magħhom il-​ħin kollu biex jipprovdi kwalunkwe għajnuna li jkun hemm bżonn. Ġieli qamu xi problemi f’konvenzjonijiet meta individwi bi problemi kroniċi taʼ saħħa tħallew waħedhom u ħassewhom ma jifilħux. L-​amministrazzjoni tal-​konvenzjoni kellha ċċempel għal servizz mediku urġenti biex jiħduhom l-​isptar. Jekk xi wħud bi bżonnijiet speċjali taʼ saħħa m’għandhomx membri tal-​familja li jistgħu jgħinuhom, l-​anzjani tal-​kongregazzjoni tagħhom iridu jiġu informati bis-​sitwazzjoni u jagħmlu arranġamenti neċessarji biex jgħinuhom. Ma se jkun hemm l-​ebda provvediment fil-​konvenzjonijiet għal kmamar speċjali biex jakkomodaw lil dawk li jbatu minn xi allerġiji.

¹⁹ Ikel Fil-​Konvenzjoni: Li ma jkollniex servizz taʼ l-​ikel fil-​konvenzjonijiet irriżulta f’li ħafna iktar ikunu ħelsin matul is-​sessjonijiet kollha biex jikkonċentraw fuq l-​ikel spiritwali. Irċevejna għadd t’espressjonijiet t’apprezzament għal dan l-​issimplifikar minn mindu ġie istitwit l-​arranġament. Kulħadd għandu jippjana li jġib miegħu ikel prattiku u sustanzjuż għall-​waqfa taʼ nofs in-​nhar, bħalma huma dawk issuġġeriti fl-​insert taʼ l-​Our Kingdom Min­is­try taʼ Mejju 1995, paragrafu 26. L-​ebda reċipjenti tal-​ħġieġ u xorb alkoħoliku m’għandhom jiddaħħlu fil-​faċilità tal-​konvenzjoni. Reċipjenti li jżommu l-​ikel frisk iridu jkunu żgħar biżżejjed li jidħlu eżatt taħt is-​siġġu tiegħek. Xi wħud fl-​udjenza ġew osservati jieklu u jixorbu matul il-​programm. Li nagħmlu dan juri nuqqas taʼ rispett.

²⁰ Aħna verament napprezzaw il-​festa spiritwali tagħna u l-​atmosfera rilassanti u paċifika taʼ sħubija matul il-​waqfiet qosra tagħna taʼ nofs in-​nhar. Biex nimxu fi qbil maʼ l-​iskop taʼ dan l-​arranġament, minflok ma nħallu l-​faċilità fil-​waqfa taʼ nofs in-​nhar biex nixtru l-​ikel, jekk jogħġobkom ġibu xi ħaġa magħkom. B’hekk, se jkollkom iktar ħin biex tgawdu s-​sħubija taʼ ħutkom irġiel u nisa.

²¹ Kemm aħna ferħanin li l-​Konvenzjonijiet Distrettwali “Fidi Fil-​Kelma T’Alla” se jibdew dalwaqt! Ilkoll kemm aħna rridu nkunu ċerti li għamilna l-​preparazzjonijiet tagħna biex nattendu l-​programm kollu, sabiex inkunu nistgħu ngawdu bis-​sħiħ il-​pranzu spiritwali mill-​aħjar li Jehovah ħejja għalina permezz taʼ l-​organizzazzjoni tiegħu. B’dan il-​mod se nsiru ‘mħejjijin għal kull ħidma tajba’ fiż-​żmien li ġej.​—2 Tim. 3:17.

[Kaxxa]

Tfakkiriet Tal-​Konvenzjoni Distrettwali

Magħmudija: Il-​kandidati għall-​magħmudija għandhom ikunu bil-​qiegħda f’posthom fuq quddiem f’nofs is-​sala qabel ma jibda l-​programm is-​Sibt fil-​għodu. Kulmin bi ħsiebu jitgħammed għandu jġib miegħu malja modesta u xugaman. Fil-​passat xi wħud libsu tipi taʼ ħwejjeġ li ma kinux xierqa u li naqqsu l-​valur taʼ l-​okkażjoni. L-​anzjani tal-​kongregazzjoni li jirrevedu mal-​kandidati għall-​magħmudija l-​mistoqsijiet minn fuq il-​ktieb Our Min­istry iridu jkunu ċerti li kull wieħed jifhem dawn il-​punti. Wara li ssir it-​taħdita tal-​magħmudija u t-​talba mill-​kelliemi, iċ-​chairman tas-​sessjoni jħabbar l-​għanja. Wara l-​aħħar strofa, l-​attendants jidderieġu lill-​kandidati lejn il-​post fejn se ssir il-​magħmudija. Il-​magħmudija b’simbolu tad-​dedikazzjoni taʼ dak li jkun hija xi ħaġa intima u persunali bejnu u bejn Jehovah. B’hekk, m’huwiex xieraq li l-​kandidati jgħannqu lil jew iżommu jdejn xulxin waqt li jkunu qegħdin jitgħammdu.

Badge Cards: Jekk jogħġobkom ilbsu l-​badge card taʼ l-​1997 il-​ħin kollu waqt li tkunu fil-​post tal-​konvenzjoni u waqt li tkunu qegħdin tivvjaġġaw għal u lura minnu. Dan taʼ spiss joħloqilna opportunitajiet biex nagħtu xiehda mill-​aħjar. Il-​badge cards u l-​holders għandhom jinkisbu mill-​kongregazzjoni tagħkom, peress li dawn m’humiex se jkunu disponibbli fil-​konvenzjoni. Toqogħdux tistennew sa ftit jiem qabel il-​konvenzjoni biex tistaqsu għal cards għalikom u għall-​familja tagħkom. Ftakru biex iġġorru fuqkom il-​biljett kurrenti tagħkom taʼ Direttiva Medika Bil-​Quddiem/Li Teħles Lit-​Tobba.

Pushchairs: Il-​pushchairs ma jistgħux jintużaw f’postijiet pubbliċi fejn jinġemgħu ħafna nies. Ir-​regolamenti tan-​nar jipprojbixxu li dawn jitpoġġew fil-​kurituri u fil-​passaġġi jew bejn ringieli taʼ siġġijiet. Peress li folol kbar jistgħu joħolqu kundizzjonijiet taʼ imblokkar, il-​push­chairs huma potenzjalment perikolużi kemm għat-​tarbija u kif ukoll għal xi ħadd li jistaʼ jitfixkel fihom. Mela jekk jogħġobkom iċċekkjaw maʼ l-​amministrazzjoni tal-​konvenzjoni rigward x’faċilitajiet jistaʼ jkun hemm disponibbli għalihom. Il-​koperazzjoni tagħkom hija importanti u apprezzata.

Servizz Taʼ Volontieri: Tistaʼ int twarrab ftit ħin fil-​konvenzjoni biex tgħin f’wieħed mid-​dipartimenti? Li naqdu lil ħutna, saħansitra jekk għal ftit sigħat biss, se jkun taʼ ħafna għajnuna u jġiblek ħafna sodisfazzjon persunali. Jekk tistaʼ tgħin, jekk jogħġbok irrapporta fid-​Dipartiment tas-​Servizz tal-​Volontieri fil-​konvenzjoni. Tfal taħt is-​16-il sena jistgħu wkoll jagħtu kontribut mill-​aħjar billi jaħdmu taħt id-​direzzjoni taʼ xi ġenitur jew taʼ xi adult responsabbli ieħor.

Kliem Taʼ Twissija: Oqogħdu għassa għal xi problemi li jistgħu jinqalgħu sabiex tevitaw diffikultajiet bla bżonn. Ħallelin u individwi taʼ bla skruplu taʼ spiss ifittxu nies li huma ’l bogħod mill-​ambjent tad-​dar tagħhom. Kunu ċerti li l-​karozza tagħkom tkun imsakkra l-​ħin kollu, u qatt tħallu xi ħaġa tidher li tħajjar lil xi ħadd biex ikisser u jisraq. Il-​ħallelin u dawk li jisirqu l-​affarijiet mill-​bwiet jiffokaw l-​attenzjoni tagħhom fuq laqgħat kbar. Ma jkunx għaqli li tħallu oġġetti taʼ valur fuq is-​siġġu tagħkom. Ma tistgħux tkunu ċerti li kulmin hemm madwarkom hu Kristjan. Għala toffru xi tentazzjoni? Irċevejna rapporti t’attentati minn uħud barranin biex iħajru lit-​tfal għal warajhom. ŻOMMU LIL ULIEDKOM FEJN TARAWHOM IL-​ĦIN KOLLU.

Jekk jogħġobkom iċċemplux jew tiktbu lil min imexxi s-​sala tal-​konvenzjoni, biex tiksbu informazzjoni dwar kwalunkwe ħaġa dwar il-​konvenzjoni. Jekk għandkom xi mistoqsijiet, jekk jogħġobkom ikkuntattjaw lil wieħed mill-​anzjani tal-​kongregazzjoni.