Tkellem Il-​Verità Mal-​Ġar Tiegħek

 ¹ Wieħed mill-​akbar żewġ kmandamenti huwa: “Trid tħobb lil ġarek bħalek innifsek.” (Matt. 22:39) Imħabba bħal din se tqanqalna biex naqsmu mal-​ġar tagħna l-​aqwa ħaġa li għandna​—il-​verità li sibna fil-​Kelma t’Alla. Peress li r-​rivisti It-​Torri Taʼ L-​Għassa bil-​Malti u bl-​Ingliż u l-​Awake! ixandru bil-​kbir il-​messaġġ tal-​verità, mod wieħed għalina biex ‘nitkellmu l-​verità mal-​ġirien tagħna’ huwa li nqassmu dawn il-​ġurnali matul ix-​xahar taʼ Mejju.​—Ef. 4:25.

 ² Għandu jiġi mqassam l-​“Awake!” tat-​22 t’April sakemm tispiċċa l-​provista tagħkom. Tistaʼ tibda l-​preżentazzjoni tiegħek billi tistaqsi:

◼ “X’inhi r-​reazzjoni tiegħek għal dinja mingħajr gwerer? [Agħti ħin għal tweġiba.] Kont taf li r-​reliġjonijiet tad-​dinja attwalment jippromwovu l-​gwerer u l-​qtil? [Agħti ħin għal tweġiba.] B’kuntrast qawwi, innota x’tgħid il-​Bibbja li se jagħmlu l-​adoraturi veri t’Alla.” Aqra Isaija 2:​2-4 fin-​naħa taʼ fuq taʼ paġna 4 tar-​rivista, u mbagħad aqra l-​ewwel paragrafu f’paġna 10 taħt is-​sottitlu “Calling to Lovers of Peace” (Insejħu Lil Dawk Li Jħobbu L-​Paċi). Wara dan, staqsi: “Taf kif Alla se jagħmel dan? It-​tweġiba tinsab f’din ir-​rivista, u din hija l-​kopja tiegħek biex taqraha.”

 ³ Meta tkun qiegħed toffri “It-​Torri Taʼ L-​Għassa” taʼ l-​ewwel taʼ Mejju, ipprova irreferi għal xi ġrajja riċenti fl-​aħbarijiet li ġiegħlet lin-​nies iħossuhom bla sigurtà, u mbagħad staqsi:

◼ “X’taħseb li jkun hemm bżonn biex aħna nħossuna verament fis-​sigurtà f’din il-​ħajja? [Agħti ħin għal tweġiba.] Bl-​onestà kollha, huwa realistiku li nafdaw fil-​bnedmin biex isolvu l-​problemi li l-​umanità tiffaċċja? [Agħti ħin għal tweġiba; imbagħad aqra Salmi 146:3.] Is-​salmista mbagħad jagħtina raġuni għalfejn għandna nkunu ottimisti dwar il-​futur. [Aqra Salmi 146:​5, 6.] Dan l-​artiklu, ‘Sigurtà Vera, Issa u Għal Dejjem,’ jispjega għala nistgħu nafdaw f’Alla Jehovah biex iġib kundizzjonijiet aħjar għall-​art.” Offri li tħalli żewġ rivisti u li terġaʼ tiġi lura biex tiddiskuti kif inhu possibbli li ngawdu ħajja fis-​sigurtà issa stess.

 ⁴ L-​istorja konnessa maʼ l-​istampa taʼ quddiem taʼ l-​“Awake!” tat-​22 taʼ Mejju għandha tqajjem l-​interess tan-​nies kemm minn dar għal dar u kemm f’territorju kummerċjali. Tistaʼ tintroduċiha billi tgħid:

◼ “Ħafna nisa għaddew mill-​esperjenza qarsa taʼ li jiġu ttantati sesswalment fuq il-​post tax-​xogħol. Is-​sitwazzjoni tant saret serja li l-​qrati bdew jikkastigaw lil dawk li joffendu u jikkumpensaw lill-​vittmi. Bħala servizz lill-​komunità, aħna ppubblikajna dan ir-​rapport, li jġib fix-​xejn ħrejjef komuni dwar il-​kwistjoni. Dan jipprovdi wkoll ideat prattiċi għal nisa u għal irġiel dwar kif jipproteġu lilhom infushom milli jew isiru vittma taʼ li jiġu ttantati sesswalment jew jiġu akkużati b’dan. Tixtieq int taqra din il-​ħarġa tar-​rivista Awake!? [Stenna tweġiba.] Għalkemm aħna nħallu r-​rivisti tagħna mingħajr ħlas, naċċettaw donazzjonijiet żgħar għax-​xogħol tagħna taʼ madwar id-​dinja.”

 ⁵ Jekk tippreferi preżentazzjoni qasira, tistaʼ tipprova din:

◼ “Ħafna jħossu li l-​biċċa l-​kbira tar-​rivisti popolari tal-​lum juru wisq kummerċjaliżmu, sess, jew vjolenza. [Uri It-​Torri Taʼ L-​Għassa u l-​Awake!] Qegħdin inqassmu dawn il-​ġurnali edifikanti li huma bbażati fuq il-​Bibbja. Huma verament edukattivi u jgħallmuna biex inqimu lil Alla, inħobbu lill-​proxxmu tagħna, u jkollna kondotta nadifa. Jekk tippreferi taqra dan it-​tip taʼ materjal, naf li se tieħu gost b’dak li se ssib f’dawn il-​ħarġiet.”

 ⁶ Jekk inkunu żelużi f’li nitkellmu l-​verità mal-​ġirien tagħna, inkunu nistgħu nferrħu bil-​kbir lil ħafna.​—Atti 8:​4, 8.