Għallem Lil Oħrajn Dak Li Alla Jirrikjedi

¹ Għadna nistgħu nsibu ħafna nies li ġew imċaħħdin spiritwalment mis-​“smigħ tal-​kliem taʼ Jehovah.” (Amos 8:​11) Fil-​waqt li xi wħud jemmnu li Alla jeżisti, dawn m’humiex konxji taʼ l-​iskop u l-​ħtiġijiet tiegħu. B’hekk, hemm bżonn li ngħallmuhom il-​verità tas-​Saltna li ssalva l-​ħajja. Billi nkunu mgħammrin u lesti kif jixraq biex nagħtu xiehda f’kull opportunità, nistgħu nilħqu lil dawk li jridu jkunu jafu x’jeħtieġ Alla.

² Matul April u Mejju, se jkollna ħarġiet verament f’waqthom x’inqassmu taʼ It-​Torri Taʼ L-​Għassa u Stenbaħ! bil-​Malti u bl-​Ingliż. Flimkien maʼ dan, għall-​ewwel darba, se noffru l-​brochure Alla X’Jirrikjedi Minna? L-​istampi li jolqtu l-​għajn u l-​mistoqsijiet tiegħu li jqanqlu l-​ħsieb jagħmlu lil dan il-​brochure jappella lil ħafna. Is-​suġġerimenti li ġejjin huma offruti biex jgħinuna nużaw il-​pubblikazzjonijiet eċċellenti tagħna bl-​aħjar mod.

³ Infittxu Lin-​Nies: F’inħawi fejn ħafna nies ma jkunux hemm meta nżuruhom minn dar għal dar, qiegħed jidher taʼ benefiċċju li nfittxu n-​nies u nitkellmu magħhom kulfejn nistgħu nsibuhom. L-​insert taʼ Il-​Ministeru Tas-​Saltna taʼ Settembru 1996 inkuraġġietna biex inxandru l-​aħbar tajba kullimkien​—fit-​triq, fuq tal-​linja, u fil-​ġonna, fejn jipparkjaw il-​karozzi, u f’postijiet tan-​negozju. Dan għamilna wkoll konxji tal-​bżonn li noħolqu opportunitajiet biex nippridkaw b’mod informali. Bħala eżempju taʼ dan, waħda oħt pijuniera marret iż-​żoo u ħadet magħha provista taʼ l-​Awake! tat-​8 t’Awissu, 1996, bis-​serje “Endangered Species​—Why Be Concerned?” (Speċi Fil-​Periklu​—Għala Nkunu Mħassbin?) F’temp taʼ siegħa, ħalliet 40 kopja maʼ nies li jirrispettaw u jħobbu l-​annimali! X’suċċess gawdejt int s’issa f’li tippriedka l-​aħbar tajba kullimkien? It-​Torri Taʼ L-​Għassa u Stenbaħ! kif ukoll il-​brochure X’Jirrikjedi huma addattati b’mod speċjali għal kull għamla taʼ għoti taʼ xiehda, għax dawn fihom informazzjoni li teffettwa l-​ħajjiet tan-​nies u li tistimula l-​abbiltà tal-​ħsieb.

⁴ Nibdew Konversazzjonijiet: Il-​paġna taʼ wara taʼ Il-​Ministeru Tas-​Saltna t’Ottubru 1996 tagħti dettalji dwar kif tipprepara l-​preżentazzjoni tiegħek stess għar-​rivisti It-​Torri Taʼ L-​Għassa u Stenbaħ! L-​istess suġġerimenti se jkunu daqstant tajbin meta tkun qiegħed tipprepara l-​preżentazzjoni tiegħek għall-​brochure X’Jirrikjedi. Dak li ngħidu jistaʼ jkun xi ħaġa żgħira daqs ftit sentenzi jew twil biżżejjed biex ninkludu xi ħsieb Skritturali. Huwa importanti li nagħżlu l-​kliem tal-​ftuħ bil-​għaqal, peress li dan jistaʼ jiddetermina jekk il-​persuna li tavviċina hijiex se tkompli tismaʼ. Xi wħud kellhom suċċess b’dan il-​kumment tal-​ftuħ: “Qrajt artiklu li kien inkuraġġanti għalija, u nixtieq naqsmu miegħek.” Jew tistaʼ titqajjem mistoqsija interessanti biex iddaħħal lill-​persuna l-​oħra f’konversazzjoni.

⁵ Jekk dan jgħodd għall-​inħawi fejn toqgħod, tistaʼ tipprova tistaqsi xi mistoqsijiet bħal dawn li ġejjin fil-​preżentazzjonijiet tiegħek taʼ dan ix-​xahar:

◼ “Sirna naraw wisq tħażżiż mal-​ħitan, skart, u tniġġis. X’hemm bżonn biex titnaddaf l-​art u ssir post aħjar fejn ngħixu?” Agħti ċans għal tweġiba, u mbagħad spjega li għandek xi informazzjoni li tassigurana dwar kif u meta l-​art se ssir ġnien globali. Aqsam maʼ l-​individwu xi kumment speċifiku, xi skrittura żgħira, u xi stampa kkulurita minn rivista kurrenti, u mbagħad offrih lill-​individwu biex jaqrah. Jekk l-​inkwilin jistaqsi dwar il-​ħlas, semmi li ħafna li jieħdu pjaċir jaqraw il-​pubblikazzjonijiet tagħna joffru donazzjoni, u li bil-​qalb kollha nużawha għax-​xogħol tagħna taʼ madwar id-​dinja. Qabel ma ttemm il-​konversazzjoni, ipprova rranġa biex tkompliha darb’oħra.

◼ “Taħseb int li Alla ried li aħna ngħixu mdawrin bi problemi bħal dawk li qegħdin niffaċċjaw illum il-​ġurnata?” Wara li l-​persuna twieġeb, tistaʼ tgħid: “X’aktarx li int familjari mat-​talba li Ġesù għallem lis-​segwaċi tiegħu jitolbu, meta jgħidu ‘tiġi Saltnatek.’ Qatt ħsibt x’inhi verament is-​Saltna t’Alla?” Mur f’lezzjoni 6 fil-​brochure X’Jirrikjedi, u aqra l-​mistoqsijiet imqajmin fil-​bidu tal-​lezzjoni. Imbagħad, hekk kif taqra paragrafu 1, uri t-​tweġiba għall-​ewwel mistoqsija. Spjega li l-​bqija tal-​mistoqsijiet huma mwieġba b’mod daqstant konċiż. Offri l-​bro­chure, semmi l-​arranġament tad-​donazzjonijiet jekk l-​inkwilin jistaqsi dwar il-​ħlas, u offrilu li terġgħu tiltaqgħu biex tagħtih iktar informazzjoni dwar is-​Saltna.

◼ “Ħafna nies li jaħsbu qegħdin jibdew iħarsu lejn ir-​reliġjonijiet tad-​dinja bħala l-​kaġun tal-​problemi tal-​bniedem minflok ma huma s-​soluzzjoni. X’taħseb int dwar dan?” Wara li tagħti widen għal kif jaħsibha l-​individwu, urih xi ħaġa minn waħda mir-​rivisti kurrenti li tistaʼ tattira l-​interess tiegħu dwar il-​falliment tar-​reliġjon falza jew dwar ir-​rovina li riesqa tagħha. Staqsih jekk jixtieqx jaqrah. Għidlu x’jismek u staqsih x’jismu, u offrilu biex terġgħu tiltaqgħu sabiex tkun tistaʼ tispjegalu kif il-​vera reliġjon ma naqsitx lill-​umanità. Kulmeta tqum l-​okkażjoni, spjega kif dak li juri interess jistaʼ jagħti donazzjoni żgħira.

◼ “B’daqshekk problemi fil-​ħajja tal-​familja llum, qatt ħsibt dwar x’inhu s-​sigriet taʼ kif wieħed jikseb l-​hena fil-​familja?” Stenna għal risposta, u spjega li fil-​Bibbja, Alla jirrivela s-​sigriet veru taʼ l-​hena fil-​familja. Forsi tistaʼ taqra Isaija 48:​17. Imbagħad mur f’lezzjoni 8 tal-​brochure X’Jirrikjedi, u irreferi għal xi ftit mill-​versi Bibliċi ċċitati li jipprovdu gwida li wieħed jistaʼ jorbot fuqha għal kull membru tal-​familja. Aqra l-​lista taʼ mistoqsijiet fil-​bidu tal-​lezzjoni. Staqsi jekk l-​individwu jixtieqx jaqra t-​tweġibiet. Jekk iva, agħtih il-​brochure. Jekk l-​inkwilin jistaqsi dwar kif inhu ffinanzjat ix-​xogħol tagħna int tistaʼ tispjegalu li naċċettaw donazzjonijiet modesti biex jgħinu fix-​xogħol tagħna taʼ madwar id-​dinja. Offrilu li terġaʼ tmur darb’oħra biex tagħtih iktar mill-​gwida prattika li fiha l-​Bibbja għal ħajja tal-​familja hienja.

⁶ L-​insert f’Il-Ministeru Tas-​Saltna taʼ Marzu 1997 inkuraġġietna biex nuru l-​qlubija f’li nagħmlu żjajjar lura. Ġejna rrikmandati li nużaw il-​bro­chure X’Jirrikjedi biex nibdew studji tal-​Bibbja, jekk mhux fl-​ewwel żjara, allura fiż-​żjara taʼ wara. L-​akbar bżonn taʼ l-​umanità huwa li titgħallem x’jeħtieġ Alla u li mbagħad tagħmlu. (Kol. 1:​9, 10) Oħrajn se jibbenefikaw bil-​kbir matul April u Mejju jekk aħna nistgħu nibdew ngħallmuhom dak li nafu dwar il-​ħtiġijiet taʼ Jehovah għall-​ħajja.​—1 Kor. 9:​23.