Ibbenefika mill-​Programm taʼ l-​Iskola tal-​Ministeru Teokratiku għall-​1999

¹ Ġesù kien l-​Għalliem il-​Kbir. In-​nies kienu jibqgħu “mistagħġbin bil-​mod tat-​tagħlim tiegħu.” (Mk. 1:22) Għalkemm ħadd minna ma jistaʼ jitkellem u jgħallem tajjeb daqs Ġesù, nistgħu nagħmlu sforz biex nimitawh. (Atti 4:13) Biex jirnexxilna, is-​sehem tagħna fil-​programm taʼ l-​Iskola tal-​Ministeru Teokratiku se jgħinna nkomplu ntejbu s-​snajjaʼ tagħna tad-​diskors u tat-​tagħlim.

² Fis-​sena 1999, Inkarigu Nru. 1 se jkun ibbażat prinċipalment fuq artikli tar-​rivisti Torr­i taʼ l-​Għassa jew Watch­tower u Awake! taʼ l-​1997. Il-​fehma tagħna dwar kwistjonijiet spiritwali se tikber ferm jekk naqraw din l-​informazzjoni minn qabel u mbagħad nisimgħuha fil-​programm taʼ l-​iskola. Min ikun assenjat biex jagħti dawn it-​taħditiet taʼ istruzzjoni għandu jagħmel applikar prattiku tal-​materjal, billi jippreżentah b’manjiera interessanti u vivaċi. Inkarigu Nru. 3 se jkun ibbażat fuq il-​ktieb Hena Fil-​Familja, u Inkarigu Nru. 4 fuq karattru mill-​Bibbja, għalkemm is-​sors tal-​materjal jistaʼ jalterna għal dawn l-​inkarigi. L-​indokratur taʼ l-​iskola għandu jikkunsidra bir-​reqqa l-​materjal qabel ma jagħti l-​inkarigi. L-​istudenti kollha assenjati biex jagħtu t-​taħdita mill-​ktieb Hena Fil-​Familja għandhom ikunu eżemplari fil-​ħajja tal-​familja tagħhom stess.

³ Applika l-​Pariri, u Ipprepara Tajjeb: Kulħadd jistaʼ jitjieb iżjed fl-​arti tad-​diskors u t-​tagħlim. (1 Tim. 4:13) Għaldaqstant, għandna nfittxu l-​parir u qatt ma nqisuh bħala xi ħaġa li trid tiġi evitata. (Prov. 12:15; 19:20) L-​ippreżentar tal-​verità b’mod effettiv fil-​laqgħat u fis-​servizz taʼ l-​għalqa jirrikjedi iktar minn sempliċement l-​irrakkontar taʼ fatti jew il-​qari taʼ l-​iskrittura b’mod superfiċjali. Għandna bżonn nilħqu l-​qlub u nimmotivaw lil dawk li jisimgħuna. Dan nistgħu nagħmluh billi nitkellmu l-​verità b’mod konvinċenti minn qalbna. (Qabbel Atti 2:37.) Il-​pariri li nirċievu fl-​iskola se jgħinuna nwettqu dan.

⁴ Malli tirċievi xi inkarigu, aħseb dwar il-​kwalitajiet tad-​diskors li trid taħdem fuqhom kif inhu spjegat fl-​iSchool Guide­book. Ikkunsidra x’għandek bżonn tagħmel biex tapplika l-​pariri li tkun irċevejt qabel. Immedita fuq it-​tema tiegħek, is-​setting li se tuża jekk ikun hemm bżonn, u kif tapplika l-​iskritturi li jinsabu fil-​materjal assenjat lilek. Irrifletti dwar kif l-​aħjar li tuża l-​informazzjoni biex tgħallem u timmotiva.​—1 Tim. 4:​15, 16.

⁵ Jekk qed tibżaʼ xi ftit biex tinkiteb fl-​iskola, itlob dwar dan u mbagħad iddiskuti kif tħossok maʼ l-​indokratur taʼ l-​iskola. Kulħadd jistaʼ jibbenefika billi jieħu vantaġġ sħiħ mill-​programm li se jiġi ppreżentat fl-​Iskola tal-​Ministeru Teokratiku fl-​1999.