Skola li Tħejjina għal Dak li Hu l-​Iktar Importanti fil-​Ħajja

¹ In-​nies imorru l-​iskola biex jieħdu istruzzjoni li tgħinhom jilħqu l-​miri tagħhom fil-​ħajja. Iżda, liema mira tistaʼ tkun iktar importanti milli tfaħħar lill-​istess Donatur tal-​ħajja u tgħin lil oħrajn jitgħallmu dwar l-​iskopijiet u l-​mogħdijiet tiegħu? L-​ebda waħda. L-​iskop taʼ l-​Iskola tal-​Ministeru Teokratiku huwa li tħejjina biex ngħallmu t-​twemmin tagħna lil oħrajn. B’hekk, waqt li nattendu l-​iskola kull ġimgħa, inkunu qed niksbu kapaċitajiet li jħejjuna għall-​attivitajiet l-​iktar importanti fil-​ħajja.

² L-​“Iskeda taʼ l-​Iskola tal-​Ministeru Teokratiku għall-​2003” ġiet provduta fil-​ħarġa tal-​Ministeru tas-​Saltna tax-​xahar l-​ieħor. L-​iskeda fiha dettalji dwar kif se titmexxa l-​iskola. Forsi jkun prattiku li żżomm l-​iskeda fil-​kopja tiegħek tal-​ktieb Benefit From Theocratic Ministry School Education (Ibbenefika mill-​Edukazzjoni taʼ l-​Iskola tal-​Ministeru Teokratiku), li għandek iġġibu miegħek kull ġimgħa għall-​Iskola tal-​Ministeru Teokratiku. Ikkunsidra xi ftit mill-​karatteristiċi taʼ l-​Iskola tal-​Ministeru Teokratiku għall-​2003.

³ Kwalità tad-​diskors: B’seħħ minn Jannar, kull laqgħa se tibda b’taħdita taʼ ħames minuti dwar xi kwalità tad-​diskors jew xi aspett tal-​qari, taʼ l-​istudju, jew tat-​tagħlim. L-​indokratur taʼ l-​iskola se jippreżenta dawn id-​diskussjonijiet tal-​ftuħ, jew għandu mnejn jaħtar anzjan kwalifikat ieħor biex jagħti din it-​taħdita. Il-​kelliemi jistaʼ jiddiskuti d-​definizzjoni u l-​importanza tal-​kwalità tad-​diskors. Imbagħad, hu għandu jidħol iktar fid-​dettall tal-​materjal billi jiddiskuti eżempji Skritturali u juri kif tistaʼ tintuża din il-​kwalità, waqt li jitfaʼ attenzjoni partikulari fuq kif dan jistaʼ jsebbaħ il-​ministeru tagħna taʼ l-​għalqa.

⁴ Inkarigu Nru. 1: L-​aħwa li jingħataw it-​taħdita taʼ istruzzjoni għal darb’oħra jiġu mwissijin biex “jiffokaw l-​attenzjoni fuq il-​valur prattiku taʼ l-​informazzjoni li tkun qed tiġi diskussa.” Dan ifisser li juru lill-​kongregazzjoni kif tagħmel użu mill-​informazzjoni. Jekk tingħata dan l-​inkarigu, iċċekkja paġni 48-9 tal-​ktieb Ministry School għal suġġerimenti dwar kif tipprepara, u studja r-​referenzi li jidhru fl-​indiċi tal-​ktieb taħt “Practical application” (Applikazzjoni prattika).

⁵ Skeda taʼ Qari tal-​Bibbja: Jekk fl-​imgħoddi ma kienx qed jirnexxilek tlaħħaq mal-​qari tal-​Bibbja taʼ kull ġimgħa, għala ma tkunx determinat li żżomm maʼ l-​iskeda din is-​sena? Dawk li jagħmlu dan se jaqraw l-​Iskrittura Griega Kristjana kollha sa l-​aħħar tas-​sena. Il-​benefiċċji li tibda programm taʼ qari tal-​Bibbja bl-​Iskrittura Griega Kristjana huma diskussi f’paġna 10, paragrafu 4, tal-​ktieb Ministry School.

⁶ Punti Prinċipali mill-​Qari tal-​Bibbja: Din il-​parti ttawlet għal għaxar minuti sabiex l-​udjenza tkun tistaʼ toffri kummenti fuq il-​qari tal-​ġimgħa. Min jingħata din it-​taħdita għandu jżomm mal-​ħin stipulat. Se tiġi preżentata kull ġimgħa, inkluż fil-​ġimgħa tar-​reviżjoni orali. Meta tkun qed taqra l-​kapitli li jkun imiss, fittex punti li huma taʼ benefiċċju għalik fl-​istudju tal-​familja, fil-​ministeru, jew fil-​ħajja tiegħek taʼ kuljum. Liema kwalitajiet taʼ Jehovah intwerew meta ttratta maʼ nies u ġnus? X’tgħallimt li saħħaħlek il-​fidi tiegħek u kabbar l-​apprezzament tiegħek għal Jehovah? Tistaʼ tikkummenta fuq kwalunkwe punt fil-​kapitli li jkun imiss, anki minn xi versi li jkunu se jinqraw fl-​Inkarigu Nru. 2, peress li l-​ħu li jkun se jieħu ħsieb il-​qari mhux se jikkummenta fuq il-​versi.

⁷ Inkarigu Nru. 2: L-​ewwel inkarigu taʼ l-​istudenti kull ġimgħa se jkun eżerċizzju fil-​qari pubbliku. Il-​qari kollu taʼ kull xahar minbarra l-​aħħar wieħed jittieħed mill-​qari tal-​Bibbja għal dik il-​ġimgħa. L-​aħħar qari tax-​xahar se jittieħed minn It-​Torri taʼ l-​Għassa. L-​istudent għandu jaqra l-​materjal li jkollu mingħajr ma jagħmel introduzzjoni jew konklużjoni. B’dan il-​mod, hu jistaʼ jiffoka l-​attenzjoni ewlenija tiegħu fuq l-​abbiltà tiegħu fil-​qari.—1 Tim. 4:13.

⁸ Inkarigi Nru. 3 u Nru. 4: Xi ftit minn dawn l-​inkarigi għandhom informazzjoni bħala sors mill-​ktieb Reasoning iktar minn oħrajn; xi ftit għandhom biss it-​tema. Dawk li jingħataw inkarigi b’materjal bħala sors limitat jew jingħataw biss it-​tema se jkollhom l-​opportunità jiżviluppaw il-​preżentazzjonijiet tagħhom billi jagħmlu riċerka fil-​pubblikazzjonijiet Kristjani tagħna. Dan jistaʼ jagħmilha eħfef għall-​aħwa nisa li jaddattaw il-​kummenti tagħhom għall-​assistenti tagħhom.

⁹ Is-​Setting: Kif inhu indikat f’paġna 45 tal-​ktieb Ministry School, l-​indokratur taʼ l-​iskola għandu mnejn jindika x’setting għandu jintgħażel. Jekk ma jagħmilx dan, l-​aħwa nisa jistgħu jagħżlu setting mil-​lista f’paġna 82. Jekk oħt tagħti taħdita kull xahrejn, it-​30 setting se jipprovdu biżżejjed varjetà biex iservu għal ħames snin. L-​aħwa nisa li jagħżlu Nru. 30, jiġifieri, “Another setting appropriate to your area,” (Setting ieħor addattat għal fejn toqgħod) għandhom jiktbu s-​setting fit-​tarf jew fuq wara tal-​karta taʼ l-​inkarigu (S-89). L-​indokratur taʼ l-​iskola jikteb id-​data tat-​taħdita taʼ l-​istudenta f’paġna 82 tal-​ktieb tagħha maġenb is-​setting li tkun għażlet. Jistaʼ jagħmel dan fl-​istess ħin li jimmarka l-​formola tal-​pariri taʼ l-​istudenta.

¹⁰ Formola tal-​Pariri: Il-​formola tal-​pariri tinsab fil-​ktieb stess. Din tidher f’paġni 79-81. Għalhekk, int trid tippreżenta l-​ktieb tiegħek lill-​indokratur taʼ l-​iskola wara kull taħdita li tagħti. L-​indokratur taʼ l-​iskola jkollu bżonn iżomm bil-​miktub il-​punti tal-​pariri li jkunu qed jaħdmu fuqhom l-​istudenti.

¹¹ Reviżjoni Orali: Ir-​reviżjoni taʼ l-​Iskola tal-​Ministeru Teokratiku ssir oralment. Tinżamm darba kull xahrejn u ddum 30 minuta. Il-​mistoqsijiet li jkunu se jiġu kunsidrati fir-​reviżjoni se jkomplu jidhru fil-​Ministeru tas-​Saltna. Jekk il-​ġimgħa tar-​reviżjoni orali tinzerta mal-​ġimgħa taʼ l-​assemblea tas-​circuit jew maż-​żjara taʼ l-​indokratur tas-​circuit, allura t-​taħditiet tal-​ġimgħa taʼ wara għandhom jingħataw ġimgħa qabel u r-​reviżjoni orali titressaq għall-​ġimgħa taʼ wara.

¹² Klassijiet Awżiljarji: F’kongregazzjonijiet fejn l-​iskola fiha iktar minn 50 student, l-​anzjani għandhom mnejn jikkunsidraw l-​użu taʼ klassijiet awżiljarji. “Dan l-​arranġament jistaʼ jintuża għall-​preżentazzjonijiet kollha taʼ l-​istudenti jew għall-​aħħar tnejn biss.” (Ministry School, pġ. 285) Dan is-​suġġeriment taʼ l-​aħħar sar biex jgħin lill-​kongregazzjonijiet li fihom hemm ħafna aħwa nisa imma ftit aħwa rġiel li jistgħu jingħataw l-​inkarigi tal-​qari. L-​anzjani għandhom jagħżlu aħwa kwalifikati biex jikkonduċu dawn il-​klassijiet.

¹³ Ajjutant li Jagħti l-​Pariri: Bħalma hu indikat fl-​iskeda taʼ l-​Iskola tal-​Ministeru Teokratiku, il-​ġemgħa taʼ l-​anzjani għandha taħtar ajjutant li jagħti l-​pariri biex joffri pariri fil-​privat lill-​anzjani u lill-​qaddejja ministerjali li jippreżentaw il-​punti prinċipali mill-​Bibbja u jagħtu t-​taħdita taʼ istruzzjoni. Il-​ħu li jiġi inkarigat jagħmel dan għandu jkun taʼ l-​esperjenza, u li l-​pariri tiegħu jiġu rispettati mill-​anzjani l-​oħrajn. Il-​pariri tiegħu għandhom ikunu pożittivi. Għandu jfaħħar metodi tajbin taʼ kif wieħed jitkellem u jgħallem u jirrikkmanda xi punt jew tnejn fejn jistaʼ jsir titjib. M’hemmx għalfejn jingħataw pariri wara kull taħdita li jagħti xi ħu li jkollu taħditiet spiss. Madankollu, il-​ħu li jinħatar biex jagħti dawn il-​pariri jrid juri dehen u japprezza li anki l-​aħwa li llum jagħtu taħditiet pubbliċi jistgħu jiġu megħjuna jagħmlu iktar progress.—1 Tim. 4:15.

¹⁴ Dak li Għandu Joqgħod Attent Għalih: X’jistaʼ jgħin lil min jagħti l-​pariri biex janalizza preżentazzjoni taʼ taħdita? It-​tielet kaxxa li tinsab fil-​biċċa l-​kbira mit-​53 kapitlu nnumerati tal-​ktieb Ministry School fiha ġabra fil-​qosor taʼ dak li għandu joqgħod attent għalih. L-​indokratur taʼ l-​iskola għandu jagħti kas ukoll taʼ tfakkiriet jew suġġerimenti oħrajn fil-​ktieb li se jgħinuh jiddetermina malajr kemm il-​materjal ikun ġie żviluppat b’mod koerenti u preżentat b’mod effettiv. Per eżempju, innota s-​serje taʼ mistoqsijiet li hemm fil-​bidu taʼ paġna 55 u l-​ideat fl-​aħħar paragrafu f’paġna 163.

¹⁵ Imla l-​Vojt: Minbarra l-​marġni wesgħin, il-​ktieb Ministry School għandu għadd taʼ spazji vojta mfasslin biex int tkun tistaʼ żżid xi noti waqt li tkun qed tagħmel l-​istudju persunali u meta tattendi l-​Iskola tal-​Ministeru Teokratiku. (Ara paġni 77, 92, 165, 243, 246, u 250.) Qis li ġġib il-​ktieb miegħek kull ġimgħa. Segwi minn fuq il-​ktieb matul it-​taħdita tal-​bidu. Żomm il-​ktieb miftuħ matul il-​kumplament taʼ l-​iskola. Agħti kas is-​suġġerimenti li jsiru mill-​indokratur taʼ l-​iskola. Oqgħod attent għall-​metodi taʼ tagħlim, il-​mistoqsijiet, l-​eżempji, il-​figuri tat-​taħdit, it-​tixbihat, l-​użu taʼ xi stampi u affarijiet simili, u l-​kuntrasti li jintużaw mill-​kelliema. Bin-​noti utli li tieħu, se tkun tistaʼ tiftakar u tuża l-​ħafna punti eċċellenti li tkun ksibt mill-​iskola.

¹⁶ Ġesù Kristu kien jaf li l-​ippridkar taʼ l-​aħbar tajba tas-​Saltna t’Alla huwa l-​aqwa privileġġ li jistaʼ jiġi offrut lil xi ħadd. Dan kien l-​inkarigu ewlieni tiegħu. (Mark 1:38) Hu qal: “Jeħtieġli nxandar l-​Evanġelju tas-​Saltna taʼ Alla lill-​ibliet l-​oħra wkoll, għax għalhekk kont mibgħut.” (Luqa 4:43) Bħala dawk li aċċettajna l-​istedina biex insegwuh, aħna wkoll okkupati ħafna bl-​ippridkar taʼ l-​aħbar tajba, u dejjem nistinkaw biex intejbu l-​kwalità tas-​‘sagrifiċċju tagħna taʼ tifħir.’ (Lhud 13:15) Għal dan l-​għan, jalla nkunu determinati li nipparteċipaw regolarment fl-​Iskola tal-​Ministeru Teokratiku, skola li tgħinna nitħejjew għal dak li hu l-​iktar importanti fil-​ħajja.