Kif Nibbenefikaw mill-​Iskola tal-​Ministeru Teokratiku

¹ Il-​poplu taʼ Ġeħova għandu l-​privileġġ uniku li jirċievi edukazzjoni teokratika. (Is. 54:13; Ġw. 6:​45) Madankollu, kemm nibbenefikaw minnha jiddependi l-​iktar mill-​isforz li nagħmlu. Tistaʼ tarahom il-​benefiċċji pożittivi li qed ikollha l-​Iskola tal-​Ministeru Teokratiku fuq l-​ispiritwalità tiegħek?

² Kummenti t’Apprezzament: Ħafna mill-​indokraturi taʼ l-​iskola nnotaw li l-​istudju komprensiv tal-​kwalitajiet tad-​diskors tejjeb l-​effettività tal-​kongregazzjoni tagħhom fil-​ministeru taʼ l-​għalqa. Flimkien maʼ dan, indokratur taʼ l-​iskola sab li bħala riżultat tal-​parteċipazzjoni taʼ l-​udjenza fil-​punti prinċipali mill-​Bibbja, iktar uħud qed iżommu maʼ l-​iskeda tal-​qari tal-​Bibbja. Rigward l-​Inkarigu Nru. 2, ħafna aħwa kkummentaw b’mod favorevoli dwar il-​benefiċċji li jiġu meta jiffokaw fuq il-​materjal mingħajr ma jippreparaw introduzzjoni u konklużjoni. Dawk li jingħataw dan l-​inkarigu issa qed jikkonċentraw b’iktar attenzjoni fuq li jtejbu l-​qari tagħhom.​—1 Tim. 4:​13.

³ Ilkoll Nistgħu Nibbenefikaw: Huwa taʼ pjaċir li nikkummentaw fil-​laqgħat. (Prov. 15:23) Il-​fatt li għandna l-​mistoqsijiet tar-​reviżjoni orali minn qabel jgħinna nippreparaw u nipparteċipaw aħjar. Flimkien maʼ dan, mill-​ħarġa tat-​Torri taʼ l-​Għassa taʼ l-​1 taʼ Jannar, 2004, dehru punti prinċipali mill-​kotba Bibliċi li jikkorrispondu mal-​qari li jkollna fl-​Iskola tal-​Ministeru Teokratiku. Dawn l-​artikli għenu lil ħafna biex jagħmlu kummenti li jibnu waqt il-​punti prinċipali mill-​Bibbja.

⁴ Kulmin jieħu sehem fl-​iskola għandu l-​privileġġ speċjali li jistaʼ jipprepara u jagħti taħditiet. Ilkoll kemm aħna nistgħu nibbenefikaw mill-​kummenti pożittivi taʼ l-​indokratur taʼ l-​iskola minn fuq il-​platform. Studenti individwali jibbenefikaw iktar minn pariri li hu jistaʼ jagħti fil-​privat wara l-​laqgħa.

⁵ Hekk kif ideat prattiċi u Skritturali jinġibdu għall-​attenzjoni tiegħek waqt jew wara l-​iskola, agħmel nota taʼ dawn fil-​kopja tiegħek tal-​ktejjeb Abbiltà. Irrifletti fuq dak li tkun tgħallimt, u ikkunsidra kif dan l-​aspett t’edukazzjoni divina qed isaħħaħ l-​ispiritwalità tiegħek.