Ġeħova Qed Iħarriġna Għal Dan ix-​Xogħol

1. Meta Ġeħova jagħti inkarigu lill-​bnedmin, x’jagħmel ukoll?

¹ Meta Ġeħova jagħti inkarigu lill-​bnedmin, hu wkoll jagħtihom l-​għajnuna li jkollhom bżonn sabiex iwettquh. Pereżempju, meta Ġeħova qal lil Noè biex jibni arka, xi ħaġa li Noè qatt ma kien għamel qabel, Hu qallu wkoll kif. (Ġen. 6:14-​16) Meta r-​ragħaj umli Mosè ġie inkarigat javviċina lill-​irġiel ixjeħ t’Iżrael u lill-​Fargħun, Ġeħova assigurah: “Jien inkun maʼ fommok u ngħallmek dak li għandek tgħid.” (Eżo. 4:12) Meta niġu għall-​inkarigu tagħna biex nippritkaw l-​aħbar tajba, Ġeħova ma telaqniex għal rasna. Hu qed iħarriġna għal dan ix-​xogħol permezz tal-​Iskola tal-​Ministeru Teokratiku u l-​Laqgħa tas-​Servizz. Kif nistgħu nibbenefikaw minn dan it-​taħriġ?

2. Kif nistgħu nibbenefikaw mill-​Iskola tal-​Ministeru Teokratiku?

² L-​Iskola tal-​Ministeru Teokratiku: Ikkunsidra l-​materjal imniżżel fl-​iskeda qabel ma tattendi kull laqgħa. Imbagħad, hekk kif tara kif l-​istudenti jiżviluppaw din l-​informazzjoni fit-​taħditiet tagħhom, il-​fehma tiegħek taʼ kif tgħallem se titjieb. (Prov. 27:17) Ġib miegħek il-​ktieb Skola tal-​Ministeru għal-​laqgħa u użah bħala workbook. Meta l-​indokratur tal-​iskola jirreferi għalih wara kull taħdita tal-​istudenti, immarka l-​punti prinċipali li tixtieq tapplika u uża l-​marġni biex tieħu n-​noti. Imma l-​aħjar mod biex tibbenefika minn din l-​iskola hu billi tipparteċipa. Int miktub fiha? Meta tirċievi inkarigu taʼ taħdita, ipprepara sew u applika l-​parir li tingħata. Meta tkun fil-​ministeru, uża dak li tgħallimt.

3. X’se jgħinna nibbenefikaw mil-​Laqgħa tas-​Servizz?

³ Il-​Laqgħa tas-​Servizz: Se niftakru iktar is-​suġġerimenti li ningħataw f’din il-​laqgħa billi naqraw minn qabel il-​materjal u nippreparaw biex inwieġbu. Jekk inżommu l-​kummenti tagħna fil-​qosor, iktar nies se jkunu jistgħu jkollhom sehem. Oqgħod attent ħafna għat-​turijiet, u uża kwalunkwe suġġerimenti li tħoss li se jagħmlu l-​ministeru tiegħek iktar effettiv. Żomm kopja t’artikli ewlenin mill-​Ministeru tas-​Saltna biex tirreferi għalihom fil-​futur.

4. Għala għandna nużaw tajjeb it-​taħriġ teokratiku?

⁴ Bħall-​inkarigi li ngħataw lil Noè u Mosè, l-​inkarigu tagħna biex nippritkaw l-​aħbar tajba fl-​art abitata kollha hu taʼ sfida. (Mt. 24:14) Aħna jistaʼ jkollna suċċess jekk nistrieħu fuq Ġeħova, l-​Istruttur Grandjuż tagħna, u nużaw tajjeb it-​taħriġ li jipprovdi.—Is. 30:20.