Kif il-​Membri tal-​Familja Jikkooperaw għal Sehem Sħiħ

—Fil-​Ministeru

¹ X’jistaʼ jagħtik gost iktar milli tara rġiel u nisa miżżewġin, ġenituri u tfal jaħdmu flimkien fil-​ministeru Kristjan, ifaħħru pubblikament isem Jehovah? (Salm 148:​12, 13) Il-​familji kollha għandhom ikollhom rutina tajba għal parteċipazzjoni regulari fis-​servizz taʼ l-​għalqa. Għandha l-​familja tiegħek ġurnata stabbilita kull ġimgħa biex tqattgħuha fil-​ministeru? Jekk isir hekk, imbagħad kulħadd ikun jaf eżattament għal xiex jippjana u jkun jistaʼ jkollu sehem sħiħ.​—Prov. 21:5a.

² Qabel ġurnata taʼ servizz bħala familja, għala ma tagħmluhx proġett flimkien li tippreparaw il-​preżentazzjonijiet li se tuża l-​familja tiegħek? Sessjonijiet taʼ prattika jistgħu jkunu t’għajnuna kbira ħafna, u jistgħu jipproduċu spirtu veru taʼ kooperazzjoni fil-​familja. Kemm ikun premjanti meta l-​ministeru taʼ l-​għalqa jkun affari tal-​familja u l-​membri kollha jkunu ppreparati sew!

³ Indokratur li jivvjaġġa ngħaqad maʼ familja sħiħa fl-​attività bir-​rivisti. Waqt li kien qed jaħdem minn dar għal dar maʼ waħda mill-​bniet, hi staqsietu: “Sa x’ħin se taħdem miegħi?” Imbagħad hi spjegat li wara kienet se taħdem maʼ missierha. Kien ovvju li hi u missierha kienu tassew jieħdu pjaċir flimkien fis-​servizz. Xi spirtu mill-​aħjar fil-​familja!

⁴ Xi familji għandhom mnejn ikunu jistgħu jagħmlu x-​xogħol taʼ pijunier awżiljarju flimkien f’xi xahar matul is-​sena. Jew jistaʼ jkun possibbli li għallinqas membru wieħed tal-​familja jaqdi kontinwament bħala pijunier awżiljarju jew saħansitra jibda bħala pijunier regulari. B’organizzazzjoni tajba u kooperazzjoni, forsi l-​membri kollha tal-​familja jkunu jistgħu jżidu s-​sehem persunali tagħhom fis-​servizz billi jappoġġaw lil min ikun qed jagħmel ix-​xogħol taʼ pijunier. Żgur li l-​familja se titbierek b’din l-​attività miżjuda u bl-​esperjenzi tajbin li jitgawdew fil-​ministeru.​—Mal. 3:10.

⁵ Sehem sħiħ fix-​xogħol taʼ l-​evanġelizzar se jgħin lill-​familji jibqgħu qrib xulxin, żelużi, produttivi, u ferħanin fis-​servizz taʼ Jehovah!​—Qabbel Filippin 2:​1, 2.