Imita l-Imparzjalità taʼ Jehovah
1 Jehovah hu interessat fin-nies. Hu imparzjalment jaċċetta lil kulmin jagħmel ir-rieda tiegħu. (Atti 10:34, 35) Meta Ġesù kien jippriedka lin-nies, hu wkoll kien imparzjali. (Lq. 20:21) Aħna għandna bżonn nimitaw l-eżempju tagħhom, l-istess bħalma għamel Pawlu, li kiteb: “Hu s-Sid taʼ kulħadd u għani maʼ dawk kollha li jsejjħulu.”—Rum. 10:12.
2 Li nipproklamaw l-aħbar tajba tas-Saltna t’Alla maʼ dawk kollha li niltaqgħu magħhom iġib glorja lil Alla. Irridu nibqgħu naqsmu dan il-messaġġ meraviljuż maʼ kulħadd, minkejja r-razza, l-istat soċjali, l-edukazzjoni, il-qagħda finanzjarja, jew il-prominenza tagħhom. (Rum. 10:11-13) Dan ifisser li nippridkaw lil dawk kollha li jagħtu widen—irġiel, nisa, żgħażagħ, u dawk imdaħħlin fiż-żmien. Irridu nħabbtu kull bieb sabiex nagħtu lil kull inkwilin l-opportunità li jismaʼ l-verità.
3 Ħu Interess f’Kulħadd: Il-mira tagħna hi li nikkuntattjaw lil kulmin nistgħu. B’dan f’moħħhom, xi pubblikaturi kellhom suċċess f’li jagħtu xiehda lin-nies fl-uffiċċji tat-tobba, fl-isptarijiet, fid-djar tax-xjuħ, fl-uffiċċji tal-welfare, u fiċ-ċentri tar-rijabilitazzjoni għal dawk li jiddependu mid-droga u l-alkoħol. Iżjed minn hekk, xi pubblikaturi taw xiehda lil dawk li jieħdu ħsieb il-funerali, supervisors u kunsillieri taʼ l-iskejjel, u mħallfin. Meta tavviċina lil xi uffiċjali, huwa xieraq li tesprimi apprezzament lejhom għas-servizzi t’għajnuna li huma jipprovdu fil-komunità. Uri rispett, u agħżel artikli f’waqthom li jittrattaw partikolarment mat-tip taʼ xogħol rispettiv tagħhom u l-problemi relatati miegħu.
4 Per eżempju, waħda oħt irnexxielha titkellem maʼ mħallef fl-uffiċċju tiegħu. Wara konversazzjoni interessanti, hu qal minn jeddu dan il-kumment: “Taf x’jogħġobni dwar ix-Xhieda taʼ Jehovah? Huma għandhom prinċipji sodi u ma jitbegħdux minnhom.” Xiehda mill-aħjar ngħatat lil din il-persuna tant influwenti fuq in-nies.
5 Aħna ma nistgħux naqrawlhom qalbhom lin-nies. Madankollu, billi nitkellmu maʼ kulmin niltaqgħu, aħna nuru l-fidi tagħna fl-abbiltà t’Alla li jidderieġi x-xogħol tagħna. Barra minn hekk, dan jagħtihom il-privileġġ li jisimgħu u jwieġbu għall-messaġġ taʼ tama. (1 Tim. 2:3, 4) Ejja nużaw il-ħin tagħna bil-għaqal u nagħmlu ħilitna kollha biex nimitaw l-imparzjalità taʼ Jehovah billi nilħqu lil dawk kollha li nistgħu bl-aħbar tajba.—Rum. 2:11; Efes. 5:1, 2.