Nilħqu Saħansitra Iżjed Nies bl-​Aħbar Tajba

HEKK kif kont qed naħseb dwar in-​nies taʼ pajjiżi, irrealizzajt li ħafna jafu lix-​Xhieda taʼ Jehovah mir-​rapporti taʼ l-​aħbarijiet biss. Dawn in-​nies għandhom jiġu kkuntattjati, ħsibt jien, sabiex forsi jsiru jafu min huma x-​Xhieda taʼ Jehovah u dak li tassew jemmnu. Imma kif stajt ngħin? Żewġi jaqdi bħala anzjan Kristjan, u hu pprovdieli gwida u suġġerimenti għaqlin.

Sibna idea fundamentali fl-​artiklu “Magazines That Give Practical Comfort” (Rivisti li Jagħtu Faraġ Prattiku), ippubblikat fil-​ħarġa tar-​rivista Awake! tat-​8 taʼ Jannar, 1995. Rigward l-​attività taʼ waħda xhud, l-​artiklu jgħid: “Kienet qed tagħmilha bħala mira li tiġbor kopji qodma taʼ ċerti rivisti taʼ Stenbaħ! li Xhieda oħrajn kienu akkumulaw fid-​dar. Imbagħad iżżur aġenziji li tħoss li għandhom mnejn juru interess speċjali f’xi wħud mis-​suġġetti.”

Bil-għajnuna taʼ żewġi, jien malajr ġbart mijiet taʼ kopji tar-​rivisti. Minnhom stajt nagħżel varjetà taʼ suġġetti li huma addattati għan-​nies li kont se nipprova nikkuntattja.

Billi wżajt direttorji tat-​telefon u dokumenti pubbliċi, jien ġbart lista taʼ sptarijiet, residenzi għaż-​żgħażagħ, u djar tax-​xjuħ. Għamilt ukoll lista taʼ dawk li jieħdu ħsieb il-​funerali, supervisors u kunsillieri taʼ l-​iskejjel, eżaminaturi mediċi, u uffiċjali tal-​ħabsijiet u l-​qrati. Il-​lista tiegħi inkludiet xi diretturi taʼ istituzzjonijiet għal dawk li jiddependu mill-​alkoħol u d-​droga, assoċjazzjonijiet għall-​kwistjonijiet ambjentali, għall-​inkapaċitati u l-​vittmi tal-​gwerra, u għar-​riċerka dwar in-​nutriment. Lanqas ma ħallejt barra lil diretturi taʼ l-​uffiċċji tal-​welfare, servizzi soċjali, u affarijiet tal-​familja.

X’Se Ngħid?

L-​ewwel ħaġa li kont nagħmel meta nżur lil xi ħadd kienet li nidentifika b’mod ċar min jien. Imbagħad kont ngħidilhom li ż-​żjara tiegħi se tieħu biss ftit minuti.

Hekk kif kont niġi wiċċ imbwiċċ mal-​persuna inkarigata, kont ngħid: “Jiena waħda mix-​Xhieda taʼ Jehovah. Madankollu, ma ġejtx hawn biex nidħlu f’diskussjoni reliġjuża, li għandha mnejn ma tkunx flokha fil-​ħin tax-​xogħol.” Normalment l-​atmosfera kienet issir iktar rilassanti. Imbagħad, billi naddatta l-​kummenti tiegħi għas-​sitwazzjoni, kont inkompli: “Ir-​raġuni taż-​żjara tiegħi hija doppja. L-​ewwel, nixtieq nesprimi l-​apprezzament tiegħi għax-​xogħol li qed jiġi organizzat mill-​uffiċċju tagħkom. Wara kollox, kulħadd għandu japprezza l-​fatt li xi ħadd qed juża l-​ħin u l-​enerġija tiegħu għan-​nom tal-​pubbliku inġenerali. Dan ċertament huwa taʼ min ifaħħru.” F’ħafna każi l-​persuna li kont inkellem b’dan il-​mod kienet tistagħġeb.

S’issa l-​persuna x’aktarx li kienet tkun qed tberren dwar x’inhi t-​tieni raġuni għaż-​żjara tiegħi. Imbagħad kont inżid: “It-​tieni raġuni għaż-​żjara tiegħi hija din: Mir-​rivista tagħna Stenbaħ!, li hija ppubblikata b’mod internazzjonali, għażilt xi ftit artikli li jittrattaw partikolarment mat-​tip taʼ xogħol tiegħek u mal-​problemi li huma assoċjati miegħu. Ċerta li int tixtieq tkun taf kif ġurnal internazzjonali jqishom dawn il-​problemi. Nieħu gost inħallilek dawn il-​kopji.” Taʼ spiss kienu jgħiduli li l-​isforzi tiegħi ġew apprezzati.

Riżultati Sorprendenti u Sodisfaċenti

Meta wżajt dan il-​metodu, il-​biċċa l-​kbira kienu jisimgħuni; wieħed minn kull 17 biss irrifjuta. Kelli ħafna esperjenzi li kienu kemm sorprendenti u kemm sodisfaċenti.

Per eżempju, wara li pprovajt erbaʼ darbiet u stennejt bil-​paċenzja, irnexxieli niltaqaʼ maʼ spettur taʼ l-​iskola tad-​distrett. Kien raġel verament okkupat. Madankollu, kien dħuli ħafna u kellimni għal ftit ħin. Hekk kif kont sejra, qalli: “Tassew napprezza l-​isforz tiegħek, u żgur li se naqra l-​letteratura tiegħek bir-​reqqa.”

F’okkażjoni oħra, mort f’qorti tad-​distrett, u ltqajt maʼ l-​imħallef prinċipali, raġel li kellu fuq l-​erbgħin. Meta dħalt fl-​uffiċċju tiegħu, refaʼ għajnejh mid-​dokumenti li kellu quddiemu pjuttost irritat.

“L-​uffiċċju jiftaħ it-​Tlieta fil-​għodu biss, u f’dak il-​ħin inkun nistaʼ nagħtik kwalunkwe informazzjoni,” qalli b’leħen żorr.

“Ippermettili niskuża ruħi talli ġejt f’ħin mhux addattat,” weġibt malajr u żidt, “M’għandniex xi ngħidu, lesta li nerġaʼ niġi f’ħin ieħor. Imma ż-​żjara tiegħi hija fil-​fatt taʼ natura persunali.”

Issa l-​imħallef kien kurjuż. Staqsieni, b’ton ħafna inqas ostili, x’ridt. Erġajt għedtlu li kont lesta li nerġaʼ ngħaddi t-​Tlieta.

“Jekk jogħġbok, poġġi bil-​qiegħda,” hu insista, b’sorpriża għalija. “X’għandek bżonn?”

Malajr qbadna konversazzjoni interessanti, u skuża ruħu talli fil-​bidu kien daqshekk żorr minħabba li kien verament okkupat.

“Taf x’jogħġobni dwar ix-​Xhieda taʼ Jehovah?” staqsieni l-​imħallef wara ftit. “Li għandhom prinċipji bbażati fuq is-​sod u ma jgħawġuhomx. Hitler ipprova minn kollox, imma x-​Xhieda xorta waħda ma marrux għall-​gwerra.”

Meta tnejn minna daħlu f’uffiċċju minnhom, is-​segretarji t’hemmhekk għarfuna. Imbagħad is-​segretarja esekuttiva qalet xott xott, “Il-​president qatt ma jirċievi ebda rappreżentanti.”

“Imma lilna iva,” weġibt bil-​kalma, “għaliex aħna x-​Xhieda taʼ Jehovah. M’aħniex nagħmlu petizzjonijiet, u ż-​żjara tagħna mhux se ddum iżjed minn tliet minuti.” Tlabt b’mod ferventi f’qalbi, “O Jehovah, jekk jogħġbok agħmel li kollox imur sew!”

Is-segretarja wieġbet b’mod indifferenti, “Orrajt, mela, nipprova.” Telqet ’l hemm. Wara xi żewġ minuti, li dehru bħala eternità għalija, reġgħet tfaċċat segwita mill-​president innifsu. Bla kliem taʼ xejn, imxejna warajh sa l-​uffiċċju tiegħu, waqt li għaddejna żewġt ikmamar oħra.

Hekk kif bdejna nitkellmu, hu beda jsir iktar u iktar dħuli. Hu aċċetta bil-​qalb kollha l-​ħarġiet speċjali tar-​rivista Stenbaħ! meta offrejnihomlu. Irringrazzjajna lil Jehovah għal din l-​opportunità li nagħtu xiehda tajba dwar l-​iskop tax-​xogħol tagħna.

Meta nħares lura lejn il-​ħafna esperjenzi meraviljużi, sirt napprezza bil-​wisq iktar dak li qal l-​appostlu Pietru: “Issa tassew qiegħed nifhem li Alla ma jħares lejn wiċċ ħadd, imma jilqaʼ lil kull min għandu l-​biżaʼ tiegħu u jagħmel is-​sewwa, ikun minn liema poplu jkun.” (Atti 10:34, 35) Ir-​rieda t’Alla hi li nies minn kull sfond, lingwa, jew pożizzjoni soċjali jingħataw l-​opportunità li jsiru jafu l-​iskop tiegħu għall-​umanità u għall-​art.​—Ikkontribwit.