Għoti taʼ Xiehda bit-​Telefon li Jagħti Riżultati Tajbin

¹ L-​objettiv tagħna bħala Xhieda taʼ Jehovah m’huwiex sempliċement li nieħdu sehem fl-​ippridkar taʼ l-​aħbar tajba, imma wkoll li nilħqu kemm jistaʼ jkun lil kulħadd bil-​messaġġ tas-​Saltna. (Atti 10:42; 20:24) Waqt li l-​għoti taʼ xiehda minn dar għal dar jibqaʼ l-​mod prinċipali biex nilħqu lin-​nies, aħna nirrealizzaw li lanqas b’dan il-​metodu organizzat ma nikkuntattjaw lil kulħadd. Mela biex ‘naqdu sewwa l-​ministeru tagħna,’ qed nużaw metodi oħra—inkluż l-​għoti taʼ xiehda bit-​telefon—biex insibu lill-​uħud bħal nagħaġ.—2 Tim. 4:5.

² F’ħafna pajjiżi, in-​nies jgħixu f’appartamenti b’sigurtà sofistikata, f’kumplessi fejn jgħixu ħafna familji, jew f’komunitajiet li jkunu mdawrin b’kanċelli tas-​sigurtà, fejn ikun diffiċli li jintlaħqu bil-​metodu tas-​soltu minn bieb għal bieb. Anki f’territorji fejn nistgħu naħdmu minn dar għal dar, ħafna nies ma jkunux id-​dar. Madankollu, ħafna pubblikaturi qed ikollhom riżultati tajbin f’li jilħqu lil dawn ir-​residenti permezz tat-​telefon. Għodwa waħda waqt l-​għoti taʼ xiehda minn dar għal dar, koppja miżżewġa sabet disat idjar fejn ma kien hemm ħadd. Wara li marru lura lejn is-​Sala tas-​Saltna, huma fittxew għal min joqgħod hemm permezz taʼ direttorju li jagħti n-​numri tat-​telefon skond l-​indirizzi. Ċemplulhom u sabu tmienja mill-​inkwilini d-​dar!

³ Issibha diffiċli biex tinkludi l-​għoti taʼ xiehda bit-​telefon fil-​ministeru tiegħek? Wieħed ħu jammetti: “Ma niħux pjaċir min joqgħod iċempilli d-​dar biex ibegħli xi ħaġa, u għalhekk għandi ċertu preġudizzju kontra dan il-​metodu taʼ għoti taʼ xiehda.” Madankollu, wara li għamel sempliċement żewġ telefonati, hu qal: “Kemm nieħu pjaċir! Qatt ma immaġinajt li se nagħmel dan, imma vera nieħu pjaċir! In-​nies ikunu rilassati fuq it-​telefon, u kulma se tuża jkun quddiemek. Huwa veru effettiv!” Kien hemm oħt li kellha l-​istess reazzjoni: “L-​għoti taʼ xiehda bit-​telefon ma tantx kien jolqotni. Biex ngħid il-​verità, ma ridtx nagħmlu. Imma pprovajtu u sibt li jagħti ħafna frott. Għandi 37 żjara lura permezz taʼ l-​għoti taʼ xiehda bit-​telefon u iktar studji milli nistaʼ llaħħaq magħhom!” Jekk int lest li tipprova l-​għoti taʼ xiehda bit-​telefon, int ukoll jistaʼ jkollok riżultati tajbin.

⁴ Kif Torganizza l-​Għoti taʼ Xiehda bit-​Telefon: L-​attività taʼ l-​għoti taʼ xiehda tal-​kongregazzjoni taqaʼ taħt ir-​responsabbiltà taʼ l-​indokratur tas-​servizz. Skond il-​bżonn, il-​ġemgħa taʼ l-​anzjani tistaʼ tagħżel li taħtar anzjan ieħor jew qaddej ministerjali kwalifikat biex jaħdem mill-​qrib miegħu sabiex jgħinu jorganizza l-​għoti taʼ xiehda bit-​telefon. Il-​ħu li jieħu ħsieb it-​territorji wkoll irid ikun involut, ladarba hu jassenja t-​territorji u jżomm rekord aġġornat. L-​indokratur tas-​circuit ukoll se jkun interessat dwar kif dan l-​arranġament sejjer.

⁵ Jekk hemm xi nħawi fit-​territorju tiegħek li ma jistgħux jintlaħqu permezz taʼ l-​għoti taʼ xiehda minn bieb għal bieb, għandhom jiġu preparati t-​territorji bit-​telefon. Il-​ħu inkarigat irid jieħu ħsieb li jagħmel bir-​reqqa lista taʼ l-​indirizzi li jridu jaqgħu taħt dawn it-​territorji. Dawn l-​istess territorji għandhom jinżammu daqsxejn żgħar sabiex ikunu jistgħu jinħadmu regolarment. Il-​mapep kollha tat-​territorju li fihom dawn l-​inħawi għandhom jiġu mmarkati b’nota li s-​sezzjoni speċifika tħalliet għall-​għoti taʼ xiehda bit-​telefon.

⁶ L-​anzjani jistgħu jinteressaw ruħhom b’mod attiv f’dan ix-​xogħol billi jagħmlu arranġament biex dawk li għandhom l-​esperjenza fl-​għoti taʼ xiehda bit-​telefon iħarrġu lil oħrajn, forsi permezz tal-​programm Pijunieri Jgħinu lil Oħrajn. Kull tant żmien, il-​parti li ssir għall-​bżonnijiet lokali fil-​Laqgħa tas-​Servizz għandha tingħata biex tkabbar il-​valur tar-​riżultati tajbin taʼ dan l-​aspett taʼ l-​għoti taʼ xiehda.

⁷ Meta l-​anzjani jagħmlu ż-​żjajjar pastorali lil dawk li jridu joqogħdu ġewwa minħabba xi diżabilità jew dawk li għandhom nuqqas taʼ saħħa, jistgħu jkunu lesti li jinkuraġġuhom biex jipparteċipaw fl-​għoti taʼ xiehda bit-​telefon. Forsi anzjan jistaʼ jagħmel ftit telefonati waqt li l-​pubblikatur ikun qed josservah. Imbagħad, il-​pubblikatur jistaʼ jieħu l-​opportunità li jagħmel telefonata hu stess. Ħafna li bdew b’dan il-​mod saru jqattgħu ftit minuti kuljum f’dan ix-​xogħol, u tassew jogħġobhom.

⁸ Suġġerimenti biex Ikollok Riżultati Tajbin: Meta Ġesù bagħat lid-​dixxipli tiegħu jippridkaw, “bagħathom tnejn tnejn.” (Lq. 10:1) Għala? Għax kien jaf li jekk jaħdmu flimkien se jitgħallmu minn xulxin u jinkuraġġixxu wieħed lill-​ieħor. L-​istess japplika għall-​għoti taʼ xiehda bit-​telefon. Billi tissieħbu flimkien, tistgħu titgħallmu minn xulxin, tiddiskutu r-​riżultati li jkollkom, u toffru xi suġġerimenti għall-​konversazzjoni li jkun imiss. Anki waqt it-​telefonata, tistgħu tgħinu lil xulxin biex issibu l-​informazzjoni xierqa.

⁹ Sabiex tkun tistaʼ taħseb u tikkonċentra sew, oqgħod bil-​qegħda fejn quddiemek jistaʼ jkollok l-​għodda biex tagħti xiehda—il-​Bibbja, il-​ktieb Reasoning u l-​ktejjeb Kif Nibdew u Nkomplu Diskussjonijiet Fuq Il-​Bibbja, il-​browxer X’Jirrikjedi, ir-​rivisti, u affarijiet bħal dawn. Ikteb xi preżentazzjonijiet, u ħallihom fejn tarahom. Kun preparat li żżomm rekords eżatti u sħaħ, inkluż id-​data u l-​ħin tal-​ġurnata biex tkun taf meta għandek terġaʼ tikkuntattja lill-​individwu jekk juri interess.

¹⁰ Taʼ spiss, in-​nies joqogħdu attenti meta jisimgħu vuċi mhux familjari fuq it-​telefon. Għalhekk kun simpatiku, dħuli, u uża t-​tattika. L-​inkwilin kulma jismaʼ hi l-​vuċi tiegħek biex ikun jistaʼ jiddetermina x’inhu l-​karattru tiegħek u kemm int sinċier. Kun rilassat u tkellem minn qalbek. Tkellem bil-​mod u ċar u b’volum li tinstemaʼ sew. Agħti lill-​inkwilin l-​opportunità li jitkellem. Agħti l-​isem sħiħ tiegħek, u għid fejn toqgħod. Ma rridux inġagħlu lin-​nies jaħsbu li aħna wħud li nbigħu l-​oġġetti permezz tat-​telefon. Minflok ma toqgħod tgħid lill-​inkwilin li qed iċċempel lir-​residenti kollha f’dak il-​bini jew kumpless partikulari, it-​telefonata agħmilha għalih persunali.

¹¹ Il-​Preżentazzjonijiet bit-​Telefon: Ħafna mill-​introduzzjonijiet f’paġni 2-7 tal-​ktejjeb Kif Nibdew u Nkomplu Diskussjonijiet Fuq Il-​Bibbja jistgħu jkunu addattati għall-​għoti taʼ xiehda bit-​telefon. Int tistaʼ tgħid: “Qed inċempillek għax ma nistax niġi narak personalment. L-​iskop tat-​telefonata tiegħi hu biex nistaqsi x’inhi l-​opinjoni tiegħek fuq mistoqsija verament importanti.” Imbagħad staqsi l-​mistoqsija.

¹² L-​ewwel preżentazzjoni taħt it-​titlu “Kriminalità/Sigurezza” tistaʼ tintuża b’dan il-​mod: “Hello. Jien jisimni ․․․․․․․․. Noqgħod f’dawn l-​inħawi. Nixtieq nagħmilha ċara li jien mhux qed inbigħ xi ħaġa jew qed nagħmel xi stħarriġ. Qed inċempel għax interessata dwar il-​kwistjoni taʼ sigurezza persunali. Madwarna hawn ħafna kriminalità, u din teffettwa lil ħajjitna. Taħseb li għad jiġi żmien meta n-​nies kollha jkunu jistgħu jimxu fit-​triq fil-​għaxija u jħossuhom fiż-​żgur? [Agħti ċans għal tweġiba.] Ħa naqralek Alla x’wiegħed li jagħmel.”

¹³ Kien hemm riżultati tajbin meta ġew offruti direttament studji tal-​Bibbja fuq it-​telefon. L-​istudju jistaʼ jintwera fi ftit minuti. Offri li tmur iżżur lill-​individwu d-​dar tiegħu biex tkomplu l-​istudju, jew jekk il-​persuna ma tkunx tixtieq dan, offri li tkompli l-​istudju bit-​telefon f’ġurnata oħra.

¹⁴ Meta tispiċċa l-​konversazzjoni, żomm xi ħaġa milli għedtu f’moħħok li se tgħinek biex tmur iżżur lill-​individwu f’daru jew li tibgħatlu xi letteratura. Jekk hu jżomm lura milli jagħtik l-​indirizz tiegħu, offri li terġaʼ ċċempel. Jistaʼ jirrikjedi diversi telefonati qabel ma jibda jħossu komdu biżżejjed biex jistiednek f’daru.

¹⁵ Kif Tieħu l-​Inizjattiva: Oħt taʼ 15-il sena bdiet is-​servizz tagħha taʼ fil-​għodu b’telefonata. Tkellmet maʼ mara li aċċettat il-​ktieb Għarfien. Meta l-​oħt marret tagħtiha l-​ktieb, il-​mara riedet tkun taf kif din l-​oħt kisbet in-​numru tat-​telefon tagħha, peress li ma kienx imniżżel fid-​direttorju. L-​oħt qaltilha li kienet ċemplitu bi żball! Il-​mara aċċettat studju tal-​Bibbja u issa hi pubblikatriċi mhux mgħammda.

¹⁶ Waħda oħt ħadet territorju taʼ l-​għoti taʼ xiehda bit-​telefon, imma minħabba li bdiet tibżaʼ, damet tliet ġimgħat biex tibdieh. X’kien li għenha tikseb il-​kuraġġ biex tibda? Hi ftakret fl-​artiklu taʼ l-​Awake! tat-​22 taʼ Jannar, 1997, intitolat “When I Am Weak, Then I Am Powerful.” Kien dwar oħt li tippriedka bit-​telefon minkejja l-​limitazzjonijiet fiżiċi tagħha. L-​oħt qalet: “Jien tlabt lil Jehovah biex isaħħaħni. Tlabtu jagħtini l-​kliem xieraq biex inkun nistaʼ nagħmel il-​preżentazzjoni tiegħi.” X’kien ir-​riżultat taʼ l-​ewwel ġurnata tagħha bl-​għoti taʼ xiehda bit-​telefon? Hi tirrapporta: “Jehovah wieġeb it-​talb tiegħi. In-​nies qagħdu jisimgħuni, u rnexxieli niftiehem għal żjara lura.” Wara ftit taż-​żmien, permezz taʼ l-​għoti taʼ xiehda bit-​telefon irnexxielha tibda studju tal-​Bibbja. Hi tikkonkludi: “Għal darb’oħra, Jehovah għallimni nafda fih u mhux fija nnifsi.”—Prov. 3:5.

¹⁷ Li l-​verità tiġi preżentata permezz tat-​telefon sar metodu li jġib riżultati tajbin fl-​ippridkar taʼ l-​aħbar tajba. Ipprepara sew, u pparteċipa b’qalbek kollha. Taqtax qalbek jekk fl-​ewwel telefonati n-​nies ma jwiġbux b’mod favorevoli. Itlob għad-​direzzjoni taʼ Jehovah, u qabbel in-​noti maʼ taʼ dawk li qed jippridkaw b’dan il-​mod interessanti. Billi jkollna x-​xewqa li nilħqu lil kulħadd fit-​territorju tagħna, jalla nwettqu bir-​reqqa l-​ministeru tagħna b’urġenza.—Rum. 10:​13, 14.