Qiegħed Twettaq il-​Ministeru Tiegħek bir-​Reqqa?

¹ Fil-​ktieb taʼ l-​Atti nsibu li d-​dixxipli taʼ Ġesù wettqu l-​ministeru tagħhom billi taw “xiehda bir-​reqqa” lin-​nies. (Atti 2:​40; 8:​25; 28:23, NW) Dak żgur li kien l-​għan taʼ l-​appostlu Pawlu. (Atti 20:24) M’hijiex din il-​mira tiegħek bħala ministru taʼ l-​aħbar tajba? Kif tistaʼ twettaq dan?

² Ipprepara l-​Preżentazzjoni Tiegħek: Biex tkun ċert li se tagħti xiehda effettiva fil-​ministeru, hu importanti li tipprepara. Dan huwa minnu speċjalment meta tkun qed toffri r-​rivisti, peress li s-​suġġett jinbidel il-​ħin kollu. Biex tgħinna nkunu mgħammrin b’mod aħjar, din il-​ħarġa taʼ Il-​Ministeru tas-​Saltna qed tintroduċi aspett ġdid​—il-​kolonna fuq ix-​xellug, li fiha lista t’eżempji taʼ preżentazzjonijiet mir-​rivisti kurrenti tat-​Torri taʼ l-​Għassa u Stenbaħ! Suġġett f’waqtu li se jolqot lil ħafna nies se jkun enfasizzat minn kull ħarġa. Kif tistaʼ tibni fuq dawn il-​preżentazzjonijiet qosra?

³ Agħżel suġġeriment li taħseb li se jkun l-​iktar effettiv fit-​territorju tiegħek. Aqra fid-​dettall l-​artiklu msemmi, u ħu nota taʼ punti speċifiċi li wisq probabbli se jqajmu l-​interess. Sib skrittura minn ġor-​rivista li torbot mad-​diskussjoni u li tistaʼ taqraha lill-​inkwilin. Agħmel ukoll konklużjoni qasira biex tħeġġeġ lis-​semmiegħ jaqra r-​rivista u għid fil-​qosor, jekk ikun jixraq, li l-​inkwilin jistaʼ jagħti donazzjoni għax-​xogħol mad-​dinja kollha tax-​Xhieda taʼ Jehovah. Issa, ipprattika l-​preżentazzjoni tiegħek.

⁴ Ippjana li Tuża l-​Bibbja: B’ippjanar tajjeb, taʼ spiss tistaʼ tinkludi skrittura fil-​preżentazzjoni tiegħek. Per eżempju, pubblikaturi taʼ l-​esperjenza f’ħafna postijiet qed ikollhom suċċess billi jmorru fuq il-​bieb bil-​Bibbja f’idejhom, isellmu lill-​inkwilin, u jgħidulu:

◼ “Qed nistaqsu lin-​nies jekk jemmnux f’dan . . .” Aqra Ġenesi 1:1, u mbagħad staqsi: “Taqbel maʼ din l-​istqarrija?” Jekk l-​individwu jaqbel, imbagħad għidlu: “Jien naqbel ukoll. Madankollu, taħseb li jekk Alla ħalaq kollox, għandu t-​tort tal-​ħażen ukoll?” Wara li turi lill-​individwu li qgħadt attent għat-​tweġiba tiegħu, aqra Koħèlet 7:29. Iftaħ il-​ktieb Għarfien f’paġna 71, u aqra paragrafu 2. Ħeġġeġ lill-​individwu biex jaqra l-​ktieb. Jekk l-​inkwilin ma jaqbilx maʼ l-​istqarrija taʼ Ġenesi 1:1, ħeġġu biex jeżamina l-​ktieb Creation.

⁵ Mur Lura fuq Kull Interess li Ssib: Ma tistax twettaq il-​ministeru tiegħek bir-​reqqa jekk ma tmurx lura fuq l-​interess li ssib. Meta jkollok diskussjoni tajba, sew jekk tħalli r-​rivisti jew letteratura oħra u sew jekk le, ħu nota taʼ l-​isem u l-​indirizz taʼ l-​individwu. Ħabrek biex tipprova tiżviluppa l-​interess taʼ l-​individwu billi tmur lura fil-​pront. Kun ċert li toffri studju tal-​Bibbja.

⁶ Id-​dixxipli taʼ l-​ewwel seklu kienu jafu li Ġesù ordnalhom biex jagħtu “xiehda bir-​reqqa.” (Atti 10:42, NW) Dak l-​istess kmand japplika għalina, għax huwa l-​uniku mod kif se nkunu nistgħu nagħmlu dixxipli. (Mt. 28:19, 20) Ejja nagħmlu l-​aħjar li nistgħu sabiex inwettqu l-​ministeru tagħna bir-​reqqa.​—2 Tim. 4:5.