Kif Nużaw l-​Eżempji taʼ Preżentazzjonijiet

1. Kif għandna nqisu l-​eżempji taʼ preżentazzjonijiet li jiġu provduti?

¹ L-​eżempji taʼ preżentazzjonijiet dwar kif noffru r-​rivisti tagħna u pubblikazzjonijiet oħra jidhru regolarment fil-​Ministeru tas-​Saltna. Meta nkunu qed nieħdu sehem fil-​ministeru, m’hemmx għalfejn nirripetu dawn is-​suġġerimenti kelma b’kelma. Huma provduti biex jagħtuna idea ġenerali taʼ x’nistgħu ngħidu. Spiss inkunu iktar effettivi jekk ngħidu l-​preżentazzjonijiet fi kliemna stess. L-​inkwilin iħossu iktar rilassat meta aħna nesprimu ruħna b’mod naturali, u dan jirrifletti wkoll is-​sinċerità u l-​konvinzjoni tagħna.​—2 Kor. 2:​17; 1 Tess. 1:5.

2. Għala għandna nikkunsidraw id-​drawwiet lokali meta nkunu qed nippreparaw xi preżentazzjoni?

² Addatta l-​Preżentazzjoni Tiegħek: Il-​preżentazzjoni tagħna taʼ l-​aħbar tajba tiġi effettwata bil-​kbir minn drawwiet lokali. Tistaʼ tibda b’tislima u mbagħad tinkludi l-​preżentazzjoni tiegħek fil-​konversazzjoni, jew in-​nies fit-​territorju tiegħek jistennew li tkun dirett? Dan ivarja minn post għall-​ieħor u kultant anki minn persuna għall-​oħra. Għandna bżonn nuru dixxerniment anki meta nużaw il-​mistoqsijiet. Mistoqsijiet li huma addattati f’xi postijiet forsi jġagħlu lin-​nies iħossuhom skomdi f’postijiet oħra. Għalhekk, għandna nużaw l-​għaqal u naddattaw il-​preżentazzjonijiet tagħna skond dak li hu aċċettabbli lokalment.

3. Għala għandna nikkunsidraw l-​ambjent u l-​opinjoni taʼ dawk li nitkellmu magħhom?

³ Flimkien maʼ dan, hemm bżonn li nikkunsidraw l-​ambjent u l-​opinjoni tan-​nies fit-​territorju tagħna meta nkunu qed nippreparaw għas-​servizz taʼ l-​għalqa. Per eżempju, x’aktarx li tiddiskuti Mattew 6:​9, 10 maʼ Kattoliku devot b’mod differenti milli kieku tkun qed titkellem maʼ xi ħadd li mhux familjari mat-​talba tal-​“Missierna.” B’daqsxejn tal-​ħsieb, spiss inkunu nistgħu naddattaw il-​preżentazzjonijiet tagħna biex nagħmluhom iktar interessanti għan-​nies li niltaqgħu magħhom fil-​ministeru.​—1 Kor. 9:​20-​23.

4. Għala hija essenzjali preparazzjoni tajba?

⁴ Anki meta nippjanaw biex nużaw eżempju taʼ preżentazzjoni bejn wieħed u ieħor kif inhu miktub, xorta hemm bżonn taʼ preparazzjoni tajba. Għandna naqraw bir-​reqqa l-​artiklu jew il-​kapitlu li bi ħsiebna nużaw u nfittxu punti li jistgħu jqanqlu l-​interess. Imbagħad dawn ninkluduhom fil-​preżentazzjoni tagħna. Irridu nkunu familjari maʼ l-​informazzjoni siewja fil-​pubblikazzjonijiet tagħna biex noffruhom b’entużjażmu.

5. Għala forsi jkollna bżonn nippreparaw preżentazzjoni differenti, u kif nistgħu nagħmlu dan?

⁵ Metodi Oħra: Għandna nużaw biss il-​metodi li jidhru fl-​eżempji taʼ preżentazzjonijiet? Le. Jekk int tħossok iktar komdu b’xi metodu ieħor, jew xi skrittura differenti, uża lilu. Speċjalment fejn jidħlu r-​rivisti, fittex opportunitajiet biex tuża artikli oħra fir-​rivista li forsi jkunu taʼ interess speċjali fit-​territorju tiegħek. Meta jkun hemm turijiet taʼ preżentazzjonijiet għas-​servizz taʼ l-​għalqa fil-​Laqgħa tas-​Servizz, jistgħu jsiru arranġamenti biex jintuża metodu li jkun effettiv fit-​territorju lokali. B’dan il-​mod, kulħadd jistaʼ jiġi megħjun biex jippreżenta l-​aħbar tajba b’mod effettiv.