Offri r-​Rivisti li Jixhdu għall-​Verità

¹ Ir-​rivista It-​Torri taʼ l-​Għassa Jħabbar is-​Saltna taʼ Ġeħova u r-​rivista Stenbaħ! li tmur id f’id magħha huma parti primarja mill-​ippridkar tas-​Saltna u x-​xogħol taʼ li nagħmlu dixxipli. (Mt. 24:14; 28:19, 20) Aħna nieħdu gost nippreżentaw regolarment dawn iż-​żewġ rivisti li joħorġu f’waqthom aħna u nieħdu sehem f’diversi aspetti tas-​servizz tas-​Saltna.

² Matul is-​snin rajna diversi bidliet fid-​daqs u l-​kontenut tar-​rivisti kif ukoll fil-​metodi li nużaw biex inqassmuhom. Dawn il-​bidliet saru bil-​mira li r-​rivisti jkunu iktar attraenti u effettivi, sabiex il-​messaġġ tas-​Saltna jilħaq il-​qalb taʼ “bnedmin taʼ kull xorta [ħalli] jiġu salvati u jaslu għall-​għarfien eżatt dwar il-​verità.”—1 Tim. 2:4.

³ Issa fil-​ministeru pubbliku tagħna se nibdew noffru ħarġa tat-​Torri taʼ l-​Għassa Jħabbar is-​Saltna taʼ Ġeħova flimkien maʼ Stenbaħ! li se joħorġu kull tliet xhur. Aħna jkollna eżempji taʼ preżentazzjonijiet għal kull rivista fl-​aħħar paġna tal-​Ministeru tas-​Saltna. Ġeneralment, dawn jenfasizzaw wieħed mill-​artikli tal-​bidu tar-​rivista imma kultant se jiġu enfasizzati ċerti artikli oħrajn b’suġġetti li jolqtu lil ħafna nies. Is-​suġġerimenti pubblikati jistgħu jintużaw bl-​iktar mod effettiv meta aħna nkunu midħla sew taʼ l-​artiklu li jitħaddtu fuqu, u meta nagħmluhom fi kliemna biex nadattaw il-​preżentazzjoni għat-​territorju tagħna.

⁴ Għalkemm Il-​Ministeru tas-​Saltna kultant se jinkludi żewġ suġġerimenti għal kull rivista, tistaʼ tħossok liberu tuża preżentazzjoni differenti għalkollox. Raġuni waħda għala għandek mnejn tagħmel dan hi minħabba li xi wieħed mill-​artikli l-​oħrajn jistaʼ jkun iktar interessanti għan-​nies fit-​territorju tiegħek. Jew forsi int tħoss li tistaʼ tagħmel preżentazzjoni iktar effettiva billi tuża artiklu li jinteressa iktar lilek.

⁵ Kif Tipprepara l-​Preżentazzjoni Tiegħek: L-​ewwelnett, int trid tkun midħla għalkollox taʼ l-​artiklu li tagħżel li tippreżenta. Jistaʼ jkun li mhux dejjem tkun tistaʼ ssir midħla taʼ kull artiklu fir-​rivista qabel ma tibda tużaha fil-​ministeru taʼ l-​għalqa. Madankollu, għandek turi entużjażmu u sinċerità rigward l-​artikli li tagħżel li tippreżenta. Dan tistaʼ tagħmlu biss jekk tkun midħla sew taʼ l-​informazzjoni li tippreżenta.

⁶ Imbagħad, kun flessibbli meta tipprepara x’se tgħid fil-​bidu tal-​preżentazzjoni. Biex tibda l-​konversazzjoni, tistaʼ tuża mistoqsija diretta li tqajjem l-​interess fl-​artiklu. Strieħ dejjem fuq il-​Kelma t’Alla biex tmiss il-​qalb. (Ebr. 4:12) Agħżel skrittura adattata li hija konnessa mas-​suġġett li tintroduċi, preferibbilment skrittura li hija ċitata jew kwotata fl-​artiklu li qed tippreżenta. Ikkunsidra kif tistaʼ tagħmel konnessjoni bejn l-​iskrittura u l-​artiklu.

⁷ F’Kull Opportunità: Il-​preżentazzjoni rridu nużawha jekk irriduha tkun effettiva. Ħu sehem mal-​kongregazzjoni fl-​għoti taʼ xiehda bir-​rivisti nhar taʼ Sibt. Offri r-​rivisti lin-​nies li qabel aċċettaw letteratura oħra. Dejjem offri r-​rivisti lill-​istudenti tal-​Bibbja tiegħek u lil nies oħrajn li għandhom mnejn ikunu d-​dar meta tagħmel żjara lura. Għandek mnejn tkun tistaʼ tħalli r-​rivisti maʼ nies li tkellem meta tmur tixtri, meta tivvjaġġa, jew meta tkun qed tistenna fil-​klinika tat-​tabib. Tejjeb il-​preżentazzjonijiet tiegħek iktar ma tużahom matul ix-​xahar.

⁸ Ir-​rivisti t-​Torri taʼ l-​Għassa u Stenbaħ! huma uniċi. Dawn jigglorifikaw lil Ġeħova bħala s-​Sovran taʼ l-​univers. (Atti 4:24) Huma jfarrġu lin-​nies bl-​aħbar tajba tas-​Saltna t’Alla u jħeġġuhom biex ikollhom fidi f’Ġesù Kristu. (Mt. 24:14; Atti 10:43) Iktar minn hekk, iżommuna informati dwar il-​ġrajjiet dinjin hekk kif dawn iwettqu l-​profeziji tal-​Bibbja. (Mt. 25:13) Għin lin-​nies fit-​territorju tiegħek biex jibbenefikaw minn dawn ir-​rivisti billi tkun lest li toffrihom fi kwalunkwe opportunità adattata!

⁹ Meta jirnexxilek tħalli rivista, jew anki jekk ikollok konversazzjoni dħulija dwar affarijiet spiritwali maʼ xi ħadd, kun lest b’mistoqsija jew stqarrija li ġġiegħlu jaħseb u li tistaʼ tiftaħ it-​triq għal żjara lura u konversazzjoni spiritwali oħra. Jekk aħna nkunu żelużi meta niżirgħu ż-​żrieragħ tal-​verità, nistgħu nkunu ċerti li Ġeħova se jiftaħ il-​qalb taʼ dawk li sinċerament jixtiequ jsiru jafuh u jsegwuh.—1 Kor. 3:6.

[Mistoqsijiet taʼ Studju]

1. X’inhu l-​irwol tar-​rivisti It-​Torri taʼ l-​Għassa u Stenbaħ!?

2. Liema bidliet rajna fir-​rivisti It-​Torri taʼ l-​Għassa u Stenbaħ!, u għala?

3. Ir-​rivisti kif se jintużaw fil-​ministeru?

4. Għala jistaʼ jkun taʼ benefiċċju li nużaw preżentazzjonijiet oħrajn minbarra t-​tnejn suġġeriti fil-​Ministeru tas-​Saltna?

5. Qabel ma nħejju preżentazzjoni għal rivista li nkunu se nużaw, xi rridu nagħmlu?

6. Kif nistgħu nħejju l-​preżentazzjoni tagħna stess?

7. Kif nistgħu ntejbu l-​preżentazzjonijiet tagħna?

8. B’liema modi huma uniċi r-​rivisti t-​Torri taʼ l-​Għassa u Stenbaħ!?

9. Kif nistgħu nwittu t-​triq għal żjara lura?