Ir-​Rivisti Jħabbru s-​Saltna

¹ Bħala Xhieda taʼ Jehovah, aħna magħrufin sewwa għall-​ippridkar żeluż tagħna dwar is-​Saltna taʼ Alla. Ir-​rivisti It-​Torri taʼ l-​Għassa u Stenbaħ! li nqassmu għandhom irwol potenti f’li jgħinu lil miljuni taʼ nies jitgħallmu dwar l-​iskopijiet taʼ Alla. Il-​messaġġ li fihom huwa tassew aħbar tajba, għax dan iħabbar is-​Saltna taʼ Alla tas-​sema bħala l-​unika tama għall-​umanità.

² Ir-​rivisti jolqtu l-​bżonnijiet li n-​nies għandhom verament​—emozzjonali, soċjali, u spiritwali. Waqt li l-​morali u l-​valuri tal-​familja qed jisfrondaw kullimkien, It-​Torri taʼ l-​Għassa u Stenbaħ! jgħinu lin-​nies itejbu l-​kwalità taʼ ħajjithom billi juruhom kif japplikaw il-​prinċipji tal-​Bibbja. Se jkun il-​pjaċir tagħna li nippreżentaw ir-​rivisti matul April u Mejju.

³ Verament Huma Attraenti: It-​Torri taʼ l-​Għassa u Stenbaħ! huma disponibbli fil-​lingwi taʼ kważi l-​popolazzjoni kollha tad-​dinja. Minħabba dan, ir-​rivisti tagħna huma magħrufin sewwa. Dawn huma xi raġunijiet għala lin-​nies jogħġbuhom:

◼ Bħala ġurnali taʼ integrità u verità, dawn juru biċ-​ċar id-​differenza bejn it-​tajjeb u l-​ħażin.

◼ Jagħtu tama taʼ ġenna taʼ tjieba li trid tiġi, ibbażata fuq il-​wegħda taʼ Alla li jġib l-​art taħt il-​ħakma tas-​Saltna tiegħu.

◼ Varjetà kbira taʼ suġġetti f’waqthom li jolqtu lin-​nies taʼ kull sfond u kultura jiġu ppreżentati.

◼ L-​artikli huma konċiżi, edukattivi, fattwali, u bla preġudizzji u kompromessi.

◼ L-​istampi li jolqtu l-​għajn mill-​ewwel joħolqu interess, u l-​istil ċar u tond tal-​kitba jagħmel lir-​rivisti faċli biex jinqraw.

⁴ Qassamhom Estensivament: Tqassim effettiv tar-​rivisti jiddependi l-​iktar fuq id-​diliġenza tagħna f’li nippreparaw il-​preżentazzjonijiet tagħna, nagħmlu skeda għall-​ħin tagħna, u norganizzaw l-​attività tagħna taʼ l-​ippridkar. Suġġerimenti prattiċi ġew offruti fil-​ħarġiet taʼ Il-​Ministeru tas-​Saltna taʼ Settembru 1995 (bl-Ingliż) u Ottubru 1996, li jkun tajjeb li nirriveduhom u napplikawhom.

⁵ Sir Midħla tar-​Rivisti: Waqt li taqra kull ħarġa, aħseb f’xi ħadd li jieħu pjaċir jekk jingħata kopja. Fittex punti jew skritturi speċifiċi li tistaʼ tikkwotahom fil-​preżentazzjoni tiegħek. Aħseb f’mistoqsija li tistaʼ ssaqsiha biex tibda konversazzjoni u tqajjem l-​interess fis-​suġġett.

⁶ Addatta l-​Preżentazzjoni għall-​Persuna: Ħejji preżentazzjoni ħafifa u flessibbli li tistaʼ tiġi rranġata għal raġel, mara, persuna ixjeħ, jew żagħżugħ, kemm jekk hu xi ħadd li taf u kemm jekk stranġier.

⁷ Kun Dejjem Lest li Toffri t-​Torri taʼ l-​Għassa u Stenbaħ!: Peress li r-​rivisti joqogħdu faċilment f’basket, f’handbag, jew f’but, aħna nistgħu nġorru xi kopji magħna meta nivvjaġġaw jew immorru nixtru. Offrihom meta tkun qed titkellem mal-​qraba, mal-​ġirien, maʼ ħaddiema sħabek, maʼ sħabek taʼ l-​iskola, jew maʼ l-​għalliema. Warrab ġurnata kull ġimgħa għall-​għoti taʼ xiehda bir-​rivisti.

⁸ Uri Apprezzament għar-​Rivisti: Dawn qatt ma jitilfu l-​valur tagħhom. Il-​mogħdija taż-​żmien ma tnaqqasx l-​importanza tal-​messaġġ li fihom. M’għandniex xi ngħidu, jekk nagħmlu sforz speċjali biex inħallu r-​rivisti kollha li nakkwistaw, ħarġiet eqdem ma jkollhomx għalfejn jakkumulaw fuq l-​ixkaffa.

⁹ L-​Għoti taʼ Xiehda fit-​Toroq Huwa Effettiv: Dan hu wieħed mill-​aħjar modi kif toffri r-​rivisti lil għadd kbir taʼ nies. Xi pubblikaturi jaħdmu kull tant ħin dawk it-​toroq li jkunu mimlijin nies jixtru.

¹⁰ It-​Territorju tan-​Negozju Huwa Produttiv: Meta nagħtu xiehda minn ħanut għal ħanut, rari ma nsibux nies. Il-​biċċa l-​kbira tan-​negozjanti huma edukati, u ħafna bi pjaċir jaċċettaw ir-​rivisti. Ippreżenta artikli li huma xierqa għan-​negozju partikulari li jkun qed jiġi kkuntattjat.

¹¹ Ir-​Rotot bir-​Rivisti Għandhom Potenzjal: Peress li r-​rivisti huma ppubblikati darbtejn fix-​xahar, ikun xieraq li nżuru lura lin-​nies li jaqrawhom u nippreżentawlhom il-​ħarġiet li jkun imiss. Għandna nagħmlu żjajjar lura regulari, mhux biss biex inħallu r-​rivisti imma wkoll biex niżviluppaw l-​interess taʼ dak li jkun fil-​Bibbja. Ir-​rotot bir-​rivisti huma sors eċċellenti taʼ studji tal-​Bibbja potenzjali.

¹² Ħu Vantaġġ Kemm Jistaʼ Jkun minn April u Mejju: It-​Torri taʼ l-​Għassa u Stenbaħ! rebħu l-​fiduċja taʼ miljuni taʼ qarrejja li japprezzawhom. Tant huma effettivi f’li jħabbru s-​Saltna li għandna nagħmluha l-​mira tagħna li nġorruhom magħna u noffruhom f’kull opportunità. Jalla April u Mejju jkunu xhur speċjali għat-​tqassim tar-​rivisti!