‘Stagħnew b’Opri Tajba’

¹ Matul l-​aħħar snin tal-​ministeru żeluż tiegħu, l-​appostlu Pawlu kien jaħdem mill-​qrib maʼ Timotju u Titu. Lil kull wieħed minnhom hu kitbilhom kliem taʼ inkuraġġiment simili. Hu qal lil Titu li “dawk li jemmnu f’Alla” kellhom “jieħdu ħsieb li jkunu minn taʼ l-​ewwel fl-​opri tajba.” (Titu 3:8) Hu qal lil Timotju li dawk li jserrħu t-​tama tagħhom fuq Alla għandhom “jistagħnu b’opri tajba.” (1 Tim. 6:​17, 18) Dan hu parir mill-​aqwa għalina lkoll! Iżda x’se jqanqalna biex nagħmlu opri tajba f’ħajjitna? U liema opri speċifiċi nistgħu nagħmlu fil-​jiem li ġejjin?

² Bħala riżultat tat-​twemmin tagħna f’Jehovah u l-​imħabba għalih, u minħabba t-​tama meraviljuża li tana, aħna nitqanqlu biex nistagħnew b’opri tajba. (1 Tim. 6:19; Titu 2:11) Speċjalment matul dan iż-​żmien tas-​sena, niġu mfakkrin li Jehovah bagħat lil Ibnu fuq l-​art sabiex Ġesù jkun jistaʼ jiġġustifika lil Missieru u jipprovdi t-​triq għall-​ħajja taʼ dejjem lill-​bnedmin kollha li jixirqilhom. (Mt. 20:28; Ġw. 3:16) Dan se jintwera biċ-​ċar fl-​osservanza tal-​Mafkar tal-​mewt taʼ Kristu fit-​28 taʼ Marzu. Minħabba t-​tama li niksbu l-​ħajja taʼ dejjem, ma nitqanqlux aħna biex nagħmlu kulma nistgħu ħalli ‘nistagħnew b’opri tajba’? Dażgur li iva! Liema opri nistgħu nwettqu issa stess?

³ Opri Tajba f’Marzu u Wara: Żgur li se nattendu għall-​Mafkar—l-​iktar ġrajja importanti tas-​sena għax-​Xhieda taʼ Jehovah madwar id-​dinja. (Lq. 22:19) Iżda aħna rridu naqsmu l-​ferħ taʼ din l-​okkażjoni maʼ kemm jistaʼ jkun nies. Agħti ħarsa lejn ir-​rapport tas-​servizz fit-​2002 Yearbook, u tistaʼ tara li s-​sena l-​oħra f’ħafna pajjiżi madwar id-​dinja, l-​attendenza għall-​Mafkar kienet akbar tliet, erbaʼ, ħames darbiet jew iktar mill-​ammont taʼ pubblikaturi. Żgur li kien hemm bżonn taʼ sforz diliġenti minn kulħadd fil-​kongregazzjonijiet sabiex sar tqassim bir-​reqqa taʼ l-​inviti għall-​Mafkar fit-​territorju kollu. Għalhekk, irridu nqattgħu ħin kemm nistgħu bejn issa u t-​28 taʼ Marzu biex nistiednu lin-​nies għall-​Mafkar, filwaqt li ngħinuhom jitgħallmu dwar it-​tama taʼ salvazzjoni.

⁴ Sakemm jasal April, nistgħu nkunu diġà bdejna ngawdu ġranet itwal u temp isbaħ. Kif nistgħu nużaw dawn il-​vantaġġi bl-​aħjar mod sabiex inkunu qed ‘nistagħnew b’opri tajba’? Billi nkomplu nieħdu sehem bil-​ħeġġa fix-​xogħol taʼ l-​ippridkar taʼ l-​aħbar tajba, filwaqt li nkunu ‘mħeġġin għall-​għemil it-​tajjeb.’ (Titu 2:14; Mt. 24:14) Jekk ma tistax taqdi bħala pijunier awżiljarju f’Marzu, tistaʼ tagħmel dan f’April u/jew f’Mejju? Jekk qed taqdi bħala pijunier f’Marzu, tistaʼ tkompli tagħmel dan?

⁵ Xi wħud li jaħdmu b’mod sekulari sabu li jistgħu jqattgħu siegħa bejn wieħed u ieħor fis-​servizz huma u sejrin ix-​xogħol, jagħtu xiehda fit-​toroq jew iżuru lin-​nies li jaħdmu f’postijiet tan-​negozju li jiftħu kmieni fil-​għodu. Oħrajn jippjanaw parti mill-​ħin tal-​brejk biex jagħtu xiehda. Xi wħud sabu li hu possibbli jikkonduċu studji tal-​Bibbja waqt dan il-​ħin maʼ xi ħadd li jaħdem magħhom. Ħafna aħwa li huma nisa tad-​dar irnexxielhom iwarrbu l-​ħin għall-​ministeru taʼ l-​għalqa waqt li wliedhom ikunu l-​iskola. Billi jqumu ftit iktar kmieni f’ċertu ġranet sabiex ilestu x-​xogħol tad-​dar, huma jkollhom iktar ħin matul il-​ġurnata għax-​xogħol taʼ l-​ippridkar u t-​tagħlim.—Efes. 5:​15, 16.

⁶ Anki jekk ma tinsabx f’kundizzjoni li tistaʼ taqdi bħala pijunier awżiljarju, forsi tkun tistaʼ tippjana skeda persunali biex tieħu sehem iktar fil-​ministeru, u tagħmel dak kollu li tistaʼ biex ‘tagħmel il-​ġid, tistagħna b’opri tajba, li tkun ġeneruż u taqsam maʼ oħrajn’ il-​verità.—1 Tim. 6:18.

⁷ Niftakru fl-​Opri Tajba taʼ li Nagħmlu Dixxipli: Kull sena jkun hemm uħud interessati li jiġu għall-​Mafkar. Jistaʼ jkun possibbli għal xi wħud fil-​kongregazzjoni li jagħtu attenzjoni lil dawn l-​uħud li jattendu iżda mhux qed jistudjaw bħalissa? Jistgħu jsirulhom żjajjar lura sabiex jingħataw għajnuna ħalli jagħmlu progress spiritwali? Għandu mnejn xi wħud minn dawn li jattendu għall-​Mafkar huma qraba tax-​Xhieda. Oħrajn jistgħu jkunu individwi li studjaw fil-​passat u li kulma għandhom bżonn hu taʼ ftit inkuraġġiment biex jerġgħu jibdew jistudjaw u jattendu l-​laqgħat regolarment. Kemm iġibilna ferħ li narawhom isiru qaddejja attivi taʼ Jehovah flimkien magħna!

⁸ Meta nżidu s-​sehem tagħna fil-​ministeru matul Marzu u fix-​xhur taʼ wara, wisq probabbli se nsibu iktar nies interessati għand min immorru lura. Ipprova ħallihom b’mistoqsija. Imbagħad wegħedhom li se tagħtihom tweġiba fiż-​żjara li jmiss. Meta nagħmlu dan, inkunu qed inħejju t-​triq għal żjara lura. Iktar ma nkunu nistgħu nagħmlu ż-​żjara lura malajr, iktar aħjar. Jekk ma rnexxilniex nibdew studju fl-​ewwel żjara, irridu nipprovaw nibdew wieħed fiż-​żjara li jmiss jekk inhu possibbli.

⁹ Meta nkunu qed nagħtu xiehda fit-​toroq, irridu nżommu f’moħħna li nipprovaw nibdew konversazzjonijiet man-​nies. Ħafna pubblikaturi ngħataw l-​ismijiet, l-​indirizzi, u n-​numri tat-​telefon taʼ dawk l-​uħud interessati li ltaqgħu magħhom waqt li kienu qed jagħtu xiehda fit-​toroq. Jekk l-​individwu li ġie kuntattjat ma joqgħodx fit-​territorju tiegħek għaddi l-​informazzjoni lis-​segretarju tal-​kongregazzjoni, li se jgħaddiha lill-​kongregazzjoni li tieħu ħsieb it-​territorju fejn joqgħod l-​individwu. Jekk is-​segretarju ma jkunx jistaʼ jagħmel dan, se jgħaddiha lill-​uffiċċju tas-​Soċjetà biex jieħdu ħsieb minn hemm. B’dan il-​mod, l-​interess jistaʼ jiġi kultivat.

¹⁰ Jekk jinkiseb in-​numru tat-​telefon iżda mhux l-​indirizz, f’dan il-​każ agħmel żjara lura billi ċċempel lill-​individwu. Ipprepara x’se tiddiskuti minn qabel. Żomm il-​ktieb Reasoning fil-​qrib biex tkun tistaʼ tirreferi għalih malajr meta tiġi bżonnu. Xi wħud qed imorru tajjeb meta jistudjaw maʼ individwi permezz tat-​telefon, inkluż dawk li kien diffiċli li jsibuhom id-​dar. Waħda oħt bdiet tistaqsi għan-​numri tat-​telefon mingħand nisa interessati li kienet tiltaqaʼ magħhom fil-​ministeru minn bieb għal bieb, u bħala riżultat irnexxielha tibda żewġ studji tal-​Bibbja.

¹¹ Ikkoopera maʼ l-​Anzjani biex Tgħin lil Uħud Inattivi: L-​anzjani għandhom interess kbir biex jagħtu għajnuna b’imħabba lil dawn l-​uħud. Numru mhux ħażin taʼ wħud bħal dawn, li ħadu l-​inizjattiva huma stess, diġà bdew jattendu l-​laqgħat tal-​kongregazzjoni mill-​ġdid. Huma jirrealizzaw li għandhom bżonn jissieħbu mill-​qrib maʼ l-​organizzazzjoni taʼ Jehovah sabiex ikollhom is-​sigurtà spiritwali deskritta f’Salm 91. Xi wħud minn dawn issa huma lesti biex jerġgħu jieħdu sehem fis-​servizz taʼ l-​għalqa. Jekk uħud li huma inattivi oħrajn jattendu għall-​Mafkar dan ix-​xahar, jistaʼ jkun li jieħdu pjaċir bi studju tal-​Bibbja persunali. Jekk dan hu l-​każ, l-​anzjani se jagħmlu arranġamenti biex xi ħadd jistudja maʼ dawk li jixtiequ l-​għajnuna. Jekk tkun mistieden biex tgħin b’dan il-​mod, il-​kooperazzjoni tiegħek se tkun apprezzata ferm.—Rum. 15:​1, 2.

¹² Ibqgħu ‘Stagħnew b’Opri Tajba’: Ħafna minn dawk li qdew fis-​servizz taʼ pijunier awżiljarju għal xahar jew iktar indunaw li l-​attività tagħhom fis-​servizz taʼ l-​għalqa żdiedet fix-​xhur taʼ wara. Huma ħassew il-​bżonn li jmorru lura għand uħud interessati li ltaqgħu magħhom. Dan qanqalhom jagħmlu sforz akbar biex joħorġu fis-​servizz taʼ l-​għalqa iktar spiss ħalli jerġgħu jikkuntattjaw lil dawn l-​uħud interessati. Xi wħud bdew xi studji, u dan għenhom biex ikollhom sehem saħansitra akbar fil-​ministeru.

¹³ Barra minn hekk, xi wħud tant kisbu ferħ meta għamlu iktar fix-​xogħol taʼ l-​ippridkar u li jagħmlu dixxipli li tqanqlu biex janalizzaw il-​prijoritajiet tagħhom. Bħala riżultat, xi wħud irnexxielhom inaqqsu x-​xogħol sekulari u bdew jaqdu bħala pijunieri awżiljarji b’mod kontinwu. Oħrajn irnexxielhom jibdew jaqdu fis-​servizz taʼ pijunier regulari. Huma setgħu jserrħu t-​tama tagħhom iktar bis-​sħiħ fuq Alla u mhux fuq l-​affarijiet li toffri d-​dinja. Sabu li meta kienu ‘ġenerużi u qasmu maʼ oħrajn,’ dan ġabilhom barkiet għonja mingħand Jehovah u saħħilhom it-​tama tagħhom li jgawdu “l-​ħajja vera.” (1 Tim. 6:​18, 19) Dażgur, hekk kif iktar uħud jibdew jaqdu fis-​servizz taʼ pijunier, tibbenefika l-​kongregazzjoni kollha. Il-​pijunieri huma inklinati li jitkellmu dwar l-​esperjenzi tagħhom u jistiednu lil oħrajn biex jieħdu sehem magħhom fil-​ministeru, u dan iqajjem atmosfera spiritwali iktar qawwija fil-​kongregazzjoni.

¹⁴ Jalla lkoll kemm aħna ‘nistagħnew b’opri tajba’ matul l-​istaġun tal-​Mafkar u wara billi nżidu s-​sehem tagħna fil-​ministeru Kristjan. Ejja nuru l-​apprezzament tagħna għal dak kollu li Jehovah għamel biex jagħtina t-​tama li ngħixu għal dejjem f’art ġdida u ġusta.—2 Pt. 3:13.