‘Nagħtu Xiehda bir-Reqqa dwar l-Aħbar Tajba’
1. Liema aħbar tajba rridu naqsmu m’oħrajn?
1 F’dinja fejn rari tismaʼ aħbar tajba, aħna għandna l-privileġġ li ‘nagħtu xiehda bir-reqqa dwar l-aħbar tajba tal-qalb tajba mhix mistħoqqa t’Alla.’ (Atti 20:24) Dan jinkludi li ngħidu lin-nies biex ikunu jafu li d-dinja l-ġdida sewwa u ġusta taʼ Ġeħova, dinja ġdida li fiha “l-affarijiet taʼ qabel ikunu spiċċaw,” dalwaqt se tieħu post l-“aħħar jiem.” (2 Tim. 3:1-5; Riv. 21:4) F’dak iż-żmien mhux se jkun hemm iktar mard. (Is. 33:24) L-uħud maħbubin mejtin se joħorġu mill-oqbra tat-tifkira u jerġgħu jingħaqdu mal-familja u l-ħbieb. (Ġw. 5:28, 29) L-art kollha se ssir Ġenna taʼ l-art mill-isbaħ. (Is. 65:21-23) Dawn huma ftit eżempji taʼ l-aħbar tajba li rridu naqsmu m’oħrajn!
2. L-istaġun tat-Tifkira għala jagħtina opportunità eċċellenti biex nagħtu xiehda dwar l-aħbar tajba?
2 Ix-xhur taʼ Marzu, April, u Mejju se joffru opportunità eċċellenti biex inxandru aħbar tajba bħal din. Matul dawn ix-xhur, it-temp u l-ġranet itwal f’ħafna partijiet tad-dinja jkunu tajbin biex inqattgħu iktar ħin fil-ministeru. Barra minn hekk, l-iktar okkażjoni importanti tas-sena, it-Tifkira, se tiġi osservata madwar id-dinja wara nżul ix-xemx nhar is-Sibt, 22 taʼ Marzu. Issa huwa ż-żmien biex nibdew nippreparaw ħalli noħorġu iktar fis-servizz taʼ l-għalqa.
3. X’jistaʼ jgħinna nżidu l-attività tagħna bħala familja?
3 Pijunier Awżiljarju: Tistaʼ tirranġa l-iskeda tiegħek biex taqdi bħala pijunier awżiljarju għal xahar minnhom, xahrejn, jew it-tliet xhur kollha? Għax ma twarrabx ftit ħin matul l-istudju tal-familja li jmiss sabiex tikkunsidra din il-kwistjoni? B’kooperazzjoni tajba, membru wieħed jew iktar tal-familja jistaʼ jirnexxilu jaqdi bħala pijunier awżiljarju. (Prov. 15:22) Itlob dwar din il-kwistjoni, u tara kif Ġeħova jbierek l-isforzi tiegħek. (Prov. 16:3) Anki jekk ħadd mill-familja ma jistaʼ jaqdi bħala pijunier awżiljarju, il-membri kollha tal-familja jistgħu jagħmlu miri speċifiċi biex iżidu s-sehem tagħhom fil-ministeru hekk kif jaħdmu m’oħrajn li jistgħu jaqdu bħala pijunieri.
4. Kif nistgħu nirranġaw l-affarijiet fl-iskeda tagħna biex naqdu bħala pijunieri awżiljarji jekk għandna xogħol full-time?
4 Jekk taħdem xogħol full-time jistaʼ jirnexxilek taqdi bħala pijunier awżiljarju permezz taʼ skeda tajba. Forsi tistaʼ tuża ftit ħin mill-break taʼ l-ikel biex tippriedka. Jew tistaʼ tikseb territorju persunali viċin id-dar tiegħek jew fejn taħdem u tieħu sehem fil-ministeru għal siegħa jew iktar qabel jew wara x-xogħol. Jistaʼ jirnexxilek iżżid iktar ħin fl-iskeda tiegħek billi ċerti affarijiet mhux daqshekk importanti tagħmilhom xahar ieħor u billi tqattaʼ ġranet sħaħ fil-ministeru matul tmiem il-ġimgħa. Xi wħud irnexxielhom jieħdu ġurnata leave jew tnejn biex joħorġu fis-servizz taʼ l-għalqa.
5. Kif tistaʼ tgħin lill-uħud imdaħħlin fiż-żmien jew li m’humiex f’saħħithom biex jaqdu bħala pijunieri awżiljarji?
5 Jekk int imdaħħal fiż-żmien jew m’intix f’saħħtek jew għandek enerġija limitata, għandek mnejn jirnexxilek taqdi bħala pijunier awżiljarju billi tqattaʼ ftit ħin kuljum fil-ministeru. Itlob lil Ġeħova biex jagħtik “il-qawwa iktar min-normal.” (2 Kor. 4:7) Waħda oħt irnexxielha taqdi bħala pijuniera awżiljarja fl-età taʼ 106! Bl-għajnuna tal-qraba Kristjani tagħha u oħrajn fil-kongregazzjoni, hi ppridkat minn dar għal dar, għamlet żjajjar lura, marret fuq studji tal-Bibbja, u ħadet sehem f’oqsma oħrajn tal-ministeru. Hi kienet t’għajnuna biex jinbdew għaxar studji tal-Bibbja. “Hekk kif naħseb dwar il-privileġġ meraviljuż li kelli biex naqdi bħala pijuniera awżiljarja,” tgħid hi, “qalbi timtela bi mħabba u apprezzament għal Ġeħova, għal Ibnu, u għall-organizzazzjoni Tiegħu kollha mħabba. Tassew nixtieq ngħid ‘grazzi, Ġeħova!’”
6 Jekk int żagħżugħ mgħammed li għadek tmur l-iskola, int ukoll jistaʼ jirnexxilek taqdi bħala pijunier awżiljarju. Bħal dawk li jaħdmu xogħol full-time, int x’aktarx li tistaʼ tuża primarjament tmiem il-ġimgħa fl-iskeda tiegħek għall-ministeru. Forsi f’xi ġranet tistaʼ toħroġ ukoll siegħa jew iktar wara l-iskola. Se jkun hemm xi festa pubblika li tistaʼ tużaha biex tieħu sehem fil-ministeru? Jekk tixtieq taqdi bħala pijunier awżiljarju, tkellem mal-ġenituri tiegħek dwar dan.
7 Żidu l-Entużjażmu: L-anzjani jistgħu jagħmlu ħafna permezz taʼ l-eżempju tagħhom biex iżidu l-entużjażmu tal-kongregazzjoni. (1 Pt. 5:2, 3) Huma għandhom mnejn jiddeċiedu li jżidu iktar laqgħat għas-servizz taʼ l-għalqa għal dawk li se jieħdu sehem fil-ministeru kmieni fil-għodu, wara l-iskola, jew wara x-xogħol. L-indokratur tas-servizz għandu jkun ċert li pubblikaturi kwalifikati jiġu inkarigati biex jikkonduċu dawn il-laqgħat u li jkun hemm biżżejjed territorju kif ukoll rivisti u letteratura disponibbli għal dawn ix-xhur t’attività speċjali.
8 F’kongregazzjoni waħda, l-anzjani bdew jinkuraġġixxu x-xogħol taʼ pijunier awżiljarju minn diversi xhur qabel. Huma żammew lill-kongregazzjoni informata kull ġimgħa dwar kemm kien hemm pubblikaturi approvati biex jaqdu bħala pijunieri awżiljarji. B’riżultat taʼ dan, dawk li xtaqu jżidu s-sehem tagħhom fil-ministeru kienu jafu li se jkollhom ħafna maʼ min jaħdmu. Ġew irranġati iktar laqgħat għas-servizz taʼ l-għalqa għal fil-għodu kmieni u fil-għaxija. Ir-riżultat kien li f’April 53 pubblikatur qdew bħala pijunieri awżiljarji, kważi nofs il-kongregazzjoni!
9 Għin lill-Oħrajn Jippridkaw: Meta wħud ġodda u xi żgħażagħ jikkwalifikaw biex isiru pubblikaturi, huma jistgħu jiġu mistidnin biex jaħdmu fis-servizz taʼ l-għalqa maʼ pubblikaturi t’esperjenza. Jistaʼ jkun hemm opportunità bħal din matul l-istaġun tat-Tifkira peress li ħafna fil-kongregazzjoni se jkunu qed iżidu l-attività tagħhom. Għandek xi student tal-Bibbja li qed jagħmel progress u li ġab ħajtu fi qbil mal-livelli sewwa u ġusti taʼ Ġeħova? Għandek xi tfal li qed iġibu ruħhom sew u li qed jagħmlu progress tajjeb imma li għadhom ma sarux pubblikaturi? Jekk uħud bħal dawn jesprimu x-xewqa li jsiru pubblikaturi mhux mgħammdin u int tħoss li jikkwalifikaw, għid lil xi ħadd mill-anzjani. L-indokratur li jippresiedi se jirranġa biex żewġ anzjani jiddiskutu l-kwistjoni miegħek u maʼ wliedek jew maʼ l-istudent tiegħek.
10 Ix-xhur li ġejjin se jkunu wkoll żmien eċċellenti għal dawk li saru inattivi biex jerġgħu jibdew ikunu attivi mal-kongregazzjoni. L-indokraturi taʼ l-Istudju tal-Ktieb tal-Kongregazzjoni u anzjani oħrajn għandhom jagħmlu sforz speċjali biex iżuru lil dawn l-uħud u jistidnuhom mill-qalb personalment ħalli jaħdmu magħhom fil-ministeru. Jekk ilhom inattivi għal żmien twil, l-ewwel iridu jitkellmu magħhom żewġ anzjani biex jiddeterminaw jekk jikkwalifikawx.—km 12/00 pġ. 7.
11 Ipprepara għat-Tifkira: Il-prezz li tħallas għall-fidwa huwa l-akbar espressjoni “tal-qalb tajba mhix mistħoqqa t’Alla.” (Atti 20:24) Miljuni taʼ nies grati madwar id-dinja se jingħaqdu nhar is-Sibt, 22 taʼ Marzu, wara nżul ix-xemx, biex josservaw it-Tifkira tal-mewt taʼ Kristu. Aħna rridu nistiednu u ngħinu lil dawk kollha taʼ qalb onesta biex jattendu din l-okkażjoni importanti li se tixhed dwar il-qalb tajba mhix mistħoqqa taʼ Ġeħova lejn il-bnedmin.
12 Agħmel lista taʼ dawk li tixtieq tistieden. Żgur li l-lista tiegħek se tinkludi lill-qraba, lill-ġirien, lil dawk li taf fuq ix-xogħol jew l-iskola, lil dawk li xi darba kienu jistudjaw u lil dawk li qed jistudjaw il-Bibbja bħalissa, u lil oħrajn kollha li żżurhom regolarment. Jekk xi ħadd minn dawk li tistieden ikollu mistoqsijiet dwar it-Tifkira, bħala għajnuna tistaʼ tuża l-artiklu fl-appendiċi tal-ktieb Il-Bibbja X’Tgħallem? f’paġni 206-8 rigward l-Ikla taʼ fil-Għaxija tal-Mulej. Dan jistaʼ saħansitra jgħinek tibda studju tal-Bibbja, ladarba se jagħtik l-opportunità li tintroduċi l-pubblikazzjoni li nużaw biex nikkonduċu studji tal-Bibbja.
13 Waħda oħt għamlet lista taʼ 48 familja li riedet tistieden. Hekk kif stidnithom, hi mmarkat isimhom u kitbet id-data meta stidnithom. Kemm kienet ferħana li 26 ruħ minn dawk li stiednet ġew għat-Tifkira! Wieħed ħu li għandu ħanut stieden lil wieħed mill-ħaddiema li qabel kien qassis. Ir-raġel attenda u wara qal, “Tgħallimt iktar dwar il-Bibbja f’siegħa milli fi 30 sena bħala Kattoliku.” Eżatt wara t-Tifkira, hu aċċetta studju bil-ktieb Il-Bibbja X’Tgħallem?
14 Il-Kampanja: B’seħħ mis-Sibt, l-1 taʼ Marzu, sat-22 taʼ Marzu, se jiġi mqassam invit speċjali għat-Tifkira madwar id-dinja. Il-pubblikaturi kollha se jkunu jixtiequ jieħdu sehem bis-sħiħ f’din il-kampanja importanti. Ikun aħjar li tagħti l-invit personalment lill-inkwilin milli tħalli wieħed fil-kaxxa taʼ l-ittri. Madankollu, jekk għandkom territorju kbir, l-anzjani għandhom mnejn jiddeċiedu li l-inviti jistgħu jitħallew b’mod għaqli lil dawk li ma jkunux id-dar. Fi tmiem il-ġimgħa se noffru wkoll il-ħarġiet kurrenti tar-rivisti.
15 Ladarba għandna ħin limitat biex inqassmu l-inviti, ikun l-aħjar li nagħmlu preżentazzjoni qasira. Kun dħuli u mimli ħeġġa. Tistaʼ tgħid xi ħaġa hekk: “Nixtiequ nkunu ċerti li int, il-membri tal-familja tiegħek, u sħabek tiġu mistidnin għal ġrajja importanti li se tinżamm fit-22 taʼ Marzu. Dan hu l-invit tiegħek. Id-dettalji huma stampati fuq l-invit.” L-inkwilin għandu mnejn ikollu xi mistoqsijiet. Jew forsi jaċċetta l-invit u saħansitra jgħid li se jiġi. Ħu nota taʼ l-interess li ssib, u rranġa biex tmur lura.
16 Is-sena l-oħra kien hemm suldat li sab l-invit tat-Tifkira fil-kaxxa taʼ l-ittri tiegħu. Hu ddeċieda li jattendi imma kellu jieħu permess mingħand is-surġent tiegħu. Meta wera l-invit lis-surġent, is-surġent qagħad kwiet, u mbagħad qal li l-ġenituri tiegħu huma Xhieda u li qabel hu kien jattendi l-laqgħat magħhom. Mhux biss ta l-permess lis-suldat biex jattendi imma wkoll mar miegħu għat-Tifkira!
17 Uri Apprezzament: Hekk kif joqrob l-istaġun tat-Tifkira 2008, jalla lkoll kemm aħna nirriflettu dwar il-qalb tajba mhix mistħoqqa taʼ Ġeħova għan-nom tagħna. L-appostlu Pawlu kiteb: “Nitolbukom bil-ħrara wkoll biex ma taċċettawx il-qalb tajba mhix mistħoqqa t’Alla u titilfu l-iskop tagħha.” (2 Kor. 6:1) Kif nuru li ma tlifniex l-iskop tal-qalb tajba mhix mistħoqqa t’Alla? Pawlu kiteb: “Imma b’kull mod nirrikkmandaw lilna nfusna bħala ministri t’Alla.” (2 Kor. 6:4) Għalhekk, aħna nuru l-apprezzament tagħna għall-għotja taʼ Ġeħova permezz tal-kondotta tajba tagħna u billi nippridkaw l-aħbar tajba b’mod żeluż. F’dan l-istaġun tat-Tifkira se jkollna opportunità eċċellenti biex inżidu l-attività tagħna hekk kif nagħtu xiehda bir-reqqa dwar l-aħbar tajba.
6. Iż-żgħażagħ mgħammdin li għadhom imorru l-iskola kif jistaʼ jirnexxilhom jaqdu bħala pijunieri awżiljarji?
7. L-anzjani x’jistgħu jagħmlu biex iżidu l-entużjażmu għall-ministeru matul l-istaġun tat-Tifkira?
8. X’nitgħallmu mill-esperjenza taʼ kongregazzjoni waħda?
9. L-istaġun tat-Tifkira għala huwa żmien eċċellenti għal dawk li jikkwalifikaw biex isiru pubblikaturi taʼ l-aħbar tajba?
10. L-anzjani x’jistgħu jagħmlu biex jgħinu lil dawk li huma inattivi?
11. X’inhi l-akbar espressjoni “tal-qalb tajba mhix mistħoqqa t’Alla?”
12. Lil min għandna nistiednu għat-Tifkira?
13. Ġeħova kif bierek l-isforzi taʼ żewġ pubblikaturi li ddeċidew li jistiednu lil oħrajn għat-Tifkira?
14. Liema kampanja madwar id-dinja se tibda fl-1 taʼ Marzu?
15. Kif nistgħu nippreżentaw l-invit għat-Tifkira?
16. Liema esperjenza turi l-valur tal-kampanja biex nistiednu lin-nies fit-territorju għat-Tifkira?
17. Kif nuru li ma tlifniex l-iskop tal-qalb tajba mhix mistħoqqa t’Alla?
[Kaxxa f’paġna 3]
Min Jistaʼ Jirnexxilu Jaqdi Bħala Pijunier Awżiljarju?
◼ Familji
◼ Dawk li jaħdmu full-time
◼ Dawk imdaħħlin fiż-żmien u dawk li m’humiex f’saħħithom
◼ Dawk li jmorru l-iskola
[Kaxxa f’paġna 4]
Meta Tqassam l-Inviti għat-Tifkira:
◼ Żomm il-preżentazzjoni fil-qosor; tkellem bil-ħeġġa
◼ Ħu nota fejn issib interess u mur lura
◼ Offri r-rivisti fi tmiem il-ġimgħa