Ibqaʼ Xandar l-Għeġubijiet taʼ Jehovah
1. X’inhuma xi wħud mill-għeġubijiet taʼ Jehovah li int tapprezza b’mod partikulari?
1 Ħadd ma jistaʼ jitqabbel m’Alla l-grandjuż tagħna, Jehovah! David kiteb: “Bla għadd l-għemejjel tiegħek, Mulej, Alla tiegħi; taʼ l-għaġeb il-ħsibijiet tiegħek għalina; ħadd ma jħabbatha miegħek!” (Salm 40:6 [40:5, NW]) L-għeġubijiet taʼ Jehovah jinkludu l-ħolqien taʼ l-univers, is-Saltna Messjanika, l-atti taʼ qalb tajba bl-imħabba lejn in-nies tiegħu, u l-kampanja taʼ ppridkar madwar id-dinja. (Salm 17:7, 8; 139:14; Dan. 2:44; Mt. 24:14) L-imħabba għal Jehovah u l-apprezzament għal dak kollu li għamel iqanqluna biex ngħidu lil oħrajn dwaru. (Salm 145:5-7) Matul Marzu, April, u Mejju, se jkollna l-opportunità biex nagħmlu dan iktar bis-sħiħ.
2. Kif nistgħu nibbenefikaw personalment billi nkunu pijunieri awżiljarji?
2 Bħala Pijunier Awżiljarju: Tistaʼ tirranġa l-iskeda tiegħek biex tqattaʼ 50 siegħa fil-ministeru matul xahar jew iktar minn dawn ix-xhur t’attività speċjali? Żgur li kull bidla li se tagħmel fir-rutina tiegħek se tkun siewja. (Efes. 5:16) Ħafna wħud sabu li meta jieħdu sehem fix-xogħol taʼ pijunier awżiljarju jtejbu l-kwalità tal-ministeru tagħhom. Huma jħossuhom iktar komdi fuq il-bibien u jużaw iktar il-Bibbja. Meta jqattgħu iktar ħin fil-ministeru jkun iktar faċli għalihom li jsegwu l-interess li jsibu, u xi wħud li qatt ma kkonduċew studju tal-Bibbja qabel irnexxielhom jibdew wieħed waqt li kienu pijunieri awżiljarji. Minħabba li x-xogħol taʼ pijunier awżiljarju jinvolvi li tagħti minnek innifsek għal oħrajn, dan huwa xogħol ferrieħi.—Atti 20:35.
3. Xi wħud kif irnexxielhom jaqdu bħala pijunieri awżiljarji minkejja ċirkustanzi diffiċli?
3 Tgħaġġilx biex tikkonkludi li ċ-ċirkustanzi tiegħek ma jippermettulikx biex tieħu sehem. Anzjan li qeda bħala pijunier awżiljarju s-sena l-oħra għandu żewġt itfal u xogħol sekulari full-time. Dan il-ħu li għandu ħafna x’jagħmel kif irnexxielu jagħmel dan? Peress li jaħdem matul il-ġimgħa, hu ppjana li jaħdem ġranet twal fis-servizz fi tmiem il-ġimgħa, billi kull nhar taʼ Sibt jibda fis–7:00 a.m. jagħti xiehda fit-toroq. Diversi aħwa fil-kongregazzjoni li kellhom ċirkustanzi simili ħadu sehem ukoll fix-xogħol taʼ pijunier, u appoġġaw u inkuraġġew lil xulxin. F’kongregazzjoni oħra, oħt li kellha 99 sena ddeċidiet li tkun pijuniera fix-xahar taʼ Mejju wara li ġiet mistiedna mit-tifla tagħha biex jagħmluh flimkien. Oħrajn fil-kongregazzjoni għenu lil din l-oħt anzjana biex tmur minn bieb għal bieb u fuq studji tal-Bibbja billi jimbottawlha s-siġġu tar-roti. Hi ħadet sehem ukoll fl-għoti taʼ xiehda bit-telefon, fit-toroq, kif ukoll permezz taʼ l-ittri. Hija konvinta li dan għamlitu, mhux bis-saħħa tagħha, imma biss bl-għajnuna taʼ Jehovah.—Is. 40:29-31.
4. X’fatturi għandna mnejn nikkunsidraw meta nagħmlu skeda għax-xogħol taʼ pijunier awżiljarju?
4 Ipprova ikteb l-aħjar skeda għaċ-ċirkustanzi tiegħek. L-iskedi mogħtijin bħala eżempju f’din il-ħarġa jistgħu jkunu t’għajnuna. Int taħdem full-time jew tmur l-iskola? Skeda li primarjament tinkludi tmiem il-ġimgħa tistaʼ tkun l-iktar waħda prattika għalik. Jekk għandek problemi taʼ saħħa u l-enerġija tiegħek ma tippermettilikx li taħdem ġranet twal fil-ministeru, skeda li titlob li taħdem ftit ħin kuljum tistaʼ tkun l-aħjar għalik. Tkellem m’oħrajn dwar ix-xewqa tiegħek biex tkun pijunier awżiljarju. Forsi huma jkunu jistgħu jagħmluha l-mira tagħhom ukoll.
5. Iż-żgħażagħ liema miri jistgħu jagħmlu għal Marzu, April, u Mejju?
5 Modi Kif iż-Żgħażagħ Jistgħu Jieħdu Sehem: Jehovah jifraħ meta jara liż-żgħażagħ jitkellmu dwar l-għeġubijiet tiegħu. (Salm 71:17; Mt. 21:16) Jekk int għadek żgħir u mgħammed, forsi tistaʼ tkun pijunier awżiljarju matul xahar li jkun fih il-vaganzi. Jekk ma tistax taqdi bħala pijunier awżiljarju, tistaʼ tagħmel miri speċifiċi biex iżżid is-sehem tiegħek u ttejjeb il-kwalità tal-ministeru tiegħek matul dawn ix-xhur? Jekk kont qed toħroġ fil-ministeru mal-ġenituri tiegħek imma għadek m’intix pubblikatur mhux mgħammed, dan iż-żmien jistaʼ jkun tajjeb biex tipprova tikkwalifika. M’għandikx għalfejn tħoss li għandek tkun espert biex twieġeb mistoqsijiet mill-Bibbja jew li għandek tkun taf daqs kemm jafu l-adulti mgħammdin. Tifhmu int it-tagħlim bażiku tal-Bibbja? Qiegħed tgħix fi qbil mal-livelli morali tal-Bibbja? Trid tkun magħruf bħala wieħed mix-Xhieda taʼ Jehovah? Mela tkellem mal-ġenituri tiegħek dwar dan. Huma jistgħu jiftiehmu biex tiltaqgħu flimkien maʼ l-anzjani ħalli jaraw jekk tikkwalifikax.—Ara l-ktieb Our Ministry, paġni 98-9.
6. Kif nistgħu ngħinu lill-istudenti tal-Bibbja jsiru pubblikaturi taʼ l-aħbar tajba?
6 Ngħinu lil Oħrajn biex Jippridkaw: Studenti tal-Bibbja li qed jagħmlu progress jistgħu jikkwalifikaw biex jingħaqdu magħna bħala pubblikaturi matul ix-xhur t’attività speċjali li ġejjin. Jekk għandek student tal-Bibbja li qed jagħmel progress tajjeb, fittex l-għajnuna taʼ l-indokratur taʼ l-istudju tal-ktieb tiegħek jew taʼ l-indokratur tas-servizz. Xi ħadd minnhom jistaʼ jingħaqad magħkom fl-istudju sabiex jara l-progress taʼ l-istudent. Jekk l-istudent jikkwalifika u għandu x-xewqa li jsir pubblikatur, l-indokratur li jippresiedi jistaʼ jirranġa biex żewġ anzjani jiltaqgħu miegħek u maʼ l-istudent. (Ara It-Torri taʼ l-Għassa, tal-15 taʼ Frar, 1989, paġna 13.) Malli l-istudent jiġi approvat, ibda ħarrġu fil-ministeru mill-ewwel.
7. Pubblikaturi li m’humiex regulari jew inattivi kif jistgħu jingħataw l-għajnuna?
7 L-indokraturi taʼ l-istudju tal-ktieb għandhom jagħtu attenzjoni speċjali lil kulmin huwa inattiv jew irregulari fil-grupp tagħhom. Stidinhom personalment biex jaħdmu miegħek fil-ministeru. Jekk ilhom inattivi għal żmien twil, huwa għaqli li żewġ anzjani l-ewwel jitkellmu magħhom biex jaraw jekk jikkwalifikawx. (Ara l-Kaxxa għall-Mistoqsija fil-Ministeru tas-Saltna taʼ Diċembru 2000.) Iż-żelu tal-kongregazzjoni matul dawn ix-xhur t’attività speċjali jistaʼ jqanqalhom biex il-ministeru jerġgħu jagħmluh aspett regulari f’ħajjithom.
8, 9. L-anzjani x’jistgħu jagħmlu biex iqanqlu l-entużjażmu għall-attività speċjali?
8 Ipprepara Issa għal Iktar Attività: Anzjani, ibdew minn issa biex tibnu l-entużjażmu fil-kongregazzjoni għax-xogħol taʼ pijunier awżiljarju. Tistgħu tagħmlu ħafna ġid bil-kummenti pożittivi u l-eżempju tajjeb tagħkom. (1 Pt. 5:3) X’kien l-akbar numru taʼ pijunieri awżiljarji fil-kongregazzjoni? Dan in-numru jistaʼ jinqabeż din is-sena? L-indokraturi taʼ l-istudju tal-ktieb u l-assistenti tagħhom iridu jfittxu modi kif jinkuraġġixxu lil kulħadd fil-grupp biex iżid l-attività tiegħu. L-indokraturi tas-servizz jistgħu jagħmlu arranġament għal iktar laqgħat għas-servizz taʼ l-għalqa. Informa lill-kongregazzjoni bil-quddiem dwar l-arranġamenti li jsiru. Kun ċert li pubblikaturi kapaċi jkunu inkarigati biex jieħdu t-tmexxija u li l-laqgħat għas-servizz jibdew u jispiċċaw fil-ħin. (Ara l-Kaxxa għall-Mistoqsija fil-Ministeru tas-Saltna taʼ Settembru 2001.) L-indokratur tas-servizz għandu wkoll jagħmel arranġamenti biex ikun hemm biżżejjed territorju, rivisti, u letteratura.
9 Is-sena l-oħra l-anzjani taʼ kongregazzjoni waħda b’entużjażmu u billi ħasbu sew minn qabel bdew jinkuraġġixxu x-xogħol taʼ pijunier awżiljarju, u ħafna minnhom tefgħu l-applikazzjonijiet. Huma għamlu arranġamenti biex ikun hemm iktar laqgħat għas-servizz taʼ l-għalqa—wieħed fil–5:30 a.m. għall-għoti taʼ xiehda fit-toroq, ieħor fit-3:00 p.m. għal dawk li jispiċċaw mill-iskola, u t-tielet grupp fis-6:00 p.m. għal dawk li jispiċċaw mix-xogħol. Barra minn hekk, saru arranġamenti għal tliet laqgħat għas-servizz taʼ l-għalqa għas-Sibtijiet. Kien hemm reazzjoni tajba mill-kongregazzjoni b’66 persuna li għamlu x-xogħol taʼ pijunier awżiljarju f’April!
10. Il-familji kif jistgħu jippreparaw biex iżidu l-attività tagħhom?
10 Għaliex ma tħallux ftit ħin mill-istudju tal-familja li jmiss biex tagħmlu miri realistiċi għax-xhur li ġejjin? Permezz taʼ kooperazzjoni u ppjanar tajjeb, xi ftit mill-membri tal-familja, jew kollha kemm huma, ikunu jistgħu jagħmlu x-xogħol taʼ pijunier awżiljarju. Jekk dan m’huwiex possibbli, agħmlu miri biex iżżidu l-attività tagħkom billi ttawlu l-ħin li s-soltu tqattgħu fil-ministeru jew billi toħorġu iktar drabi. Itolbu dwarha bħala familja. Tistgħu tkunu ċerti li Jehovah se jbierek l-isforzi tagħkom.—1 Ġw. 3:22.
11. (a) Liema għeġubijiet wettaq is-sagrifiċċju taʼ Kristu? (b) X’inhu l-ħin u l-post taʼ l-osservanza tat-Tifkira lokali?
11 L-Akbar Wieħed mill-Għeġubijiet t’Alla: L-akbar espressjoni taʼ mħabba mingħand Jehovah hija l-għotja taʼ Ibnu bħala fidwa għalina. (1 Ġw. 4:9, 10) Is-sagrifiċċju taʼ fidwa jipprovdi l-bażi legali sabiex l-umanità tinfeda mid-dnub u l-mewt. (Rum. 3:23, 24) Permezz tad-demm imxerred taʼ Ġesù, il-patt il-ġdid sar validu, u b’hekk il-bnedmin imperfetti setgħu jiġu adottati bħala wlied Alla bil-prospett li jaħkmu fis-Saltna tas-sema. (Ġer. 31:31-34; Mk. 14:24) Primarjament, il-ħajja t’ubbidjenza perfetta taʼ Ġesù qaddset l-isem taʼ Jehovah. (Dt. 32:4; Prov. 27:11) Il-Ħadd, 4 t’April, wara nżul ix-xemx, it-Tifkira tal-mewt taʼ Kristu se tiġi ċelebrata madwar id-dinja.
12. Kif tistaʼ l-attendenza għall-osservanza taʼ l-Ikla taʼ fil-Għaxija tal-Mulej tkun taʼ ġid għal uħud interessati?
12 L-osservanza taʼ l-Ikla taʼ fil-Għaxija tal-Mulej tkompli tigglorifika l-għeġubijiet taʼ Jehovah. It-taħdita tkabbar l-apprezzament għal dak li Jehovah għamel meta pprovda l-fidwa. Dawk l-uħud interessati li jattendu se jkunu jistgħu josservaw għeġubijiet oħra t’Alla. Se jkunu jistgħu jaraw l-għaqda u l-imħabba mill-qalb li Jehovah għallem lin-nies tiegħu biex juru. (Efes. 4:16, 22-24; Ġak. 3:17, 18) L-attendenza għal din l-okkażjoni importanti jistaʼ jkollha impatt qawwi fuq il-ħsieb taʼ dak li jkun, u għalhekk nixtiequ lil kemm jistaʼ jkun nies ikunu preżenti.—2 Kor. 5:14, 15.
13, 14. Lil min għandna nistiednu għat-Tifkira, u kif?
13 Nistiednu lil Oħrajn biex Jattendu: Ibda ipprepara minnufih billi tagħmel lista taʼ dawk li se tistieden. Il-lista tiegħek għandha tinkludi lill-membri tal-familja tiegħek li ma jemmnux, ġirien, nies li taf mix-xogħol jew mill-iskola, uħud li kienu jew għadhom qed jistudjaw, u ż-żjajjar lura kollha li għandek. L-indokraturi taʼ l-istudju tal-ktieb għandhom jinkludu fil-lista tagħhom lil dawk il-pubblikaturi inattivi.
14 Uża l-inviti stampati tat-Tifkira, u ittajpja jew ikteb pulit fuqhom il-ħin u l-post tat-Tifkira. Jew forsi tistaʼ tuża l-invit li jidher fuq il-qoxra taʼ wara tat-Torri taʼ l-Għassa tal-15 taʼ Marzu, 2004, jew Stenbaħ! tat-8 t’April, 2004. Hekk kif joqrob l-4 t’April, fakkar lil dawk li għandek fuq il-lista, jew personalment jew inkella bit-telefon.
15. Kif nistgħu nuru l-ospitalità fil-lejla tat-Tifkira?
15 Fit-Tifkira: Ipprova asal kmieni fil-lejla tat-Tifkira. Uri l-ospitalità billi minn qalbek tilqaʼ lill-ġodda. (Rum. 12:13) Int għandek responsabbiltà speċjali lejn dawk li tistieden int. Għinhom biex ma jħossuhomx ħuta barra mill-ilma, u introduċihom maʼ oħrajn fil-kongregazzjoni. Forsi tistaʼ tgħinhom isibu post ħdejk. U jekk m’għandhomx Bibbja jew ktieb taʼ l-għanjiet, irranġalhom biex jaraw miegħek jew maʼ xi ħadd ieħor. Wara l-osservanza, kun disponibbli biex twieġeb kwalunkwe mistoqsija li jistaʼ jkollhom. Jekk hemm xi wħud li ġew għall-ewwel darba, staqsihom jekk jixtiqux jitgħallmu iktar dwar il-Kelma t’Alla u l-iskop tiegħu. Offrilhom biex tikkonduċi studju tal-Bibbja fid-dar magħhom.
16. X’jistaʼ jsir biex ngħinu lil dawk li attendew jagħmlu progress spiritwali?
16 Kompli Għin lil Dawk li Attendew: Fil-ġimgħat taʼ wara t-Tifkira, dawk li attendew jistaʼ jkollhom bżonn iktar assistenza. Dan jinkludi lil uħud li qabel kienu jattendu l-laqgħat regolarment imma li issa ftit li xejn jissieħbu mal-kongregazzjoni. L-anzjani se jkunu attenti biex jaraw li wħud bħal dawn ma jiġux injorati u jaraw għala waqfu jagħmlu progress spiritwali. Ġibhom konxji taʼ l-urġenza taż-żmien. (1 Pt. 4:7) Għin lil kulħadd jara l-benefiċċju li jiġi meta nobdu t-twissija Skritturali biex niltaqgħu flimkien regolarment mal-poplu t’Alla.—Lhud 10:24, 25.
17. Għala għandna nibqgħu nxandru l-għeġubijiet taʼ Jehovah?
17 L-għemejjel taʼ Jehovah huma wisq taʼ l-għaġeb biex nifhmuhom kompletament, anki jekk ngħixu għal dejjem. (Ġob 42:2, 3; Koħ. 3:11) Għalhekk, dejjem se nsibu affarijiet dwar xiex infaħħruh. F’dan l-istaġun tat-Tifkira nistgħu nuru l-apprezzament għall-għeġubijiet taʼ Jehovah billi nagħmlu sforz speċjali biex inżidu s-sehem tagħna fil-ministeru.
[Tabella f’paġna 5]
Tistaʼ Taqdi Bħala Pijunier Awżiljarju Billi Tuża Waħda minn Dawn l-Iskedi?
Għall-formazzjoni sħiħa tat-test, ara pubblikazzjoni