Tgħallem Ikkomunika!
1 Sabiex inwettqu l-inkarigu tagħna li nippridkaw u nagħmlu dixxipli, irridu ngħaddu l-informazzjoni lil oħrajn. (Mt. 24:14; 28:19, 20) Il-komunikazzjoni tistaʼ tkun taʼ sfida anki bejn il-ħbieb. X’jistaʼ jgħinna nilħqu lill-istranġieri bl-aħbar tajba?
2 Minn Stranġier Issir Ħabib: Ipprova immaġina lilek innifsek flok dawk li lilhom tkellem fil-ministeru. Fid-dinja taʼ llum, wieħed jistaʼ jifhem għala xi wħud ikunu suspettużi, jew saħansitra beżgħanin, mill-istranġieri. Dan jistaʼ joħnoq il-komunikazzjoni. Kif tistaʼ tegħleb il-biżaʼ li jkollhom fil-bidu dawk li tiltaqaʼ magħhom? Saħansitra qabel ma llissnu kelma, mod wieħed kif nikkomunikaw hu bid-dehra persunali modesta tagħna. Il-fatt li nilbsu pulit u nżommu d-dinjità tagħna jgħin biex itaffi l-biżaʼ.—1 Tim. 2:9, 10.
3 Għodda oħra li tgħin fil-komunikazzjoni hi li nkunu rilassati u dħulin. Dan jgħin lil oħrajn iħossuhom komdi u iktar lesti biex jisimgħu. Għal dan hemm bżonn preparazzjoni tajba. Meta jkollna stampa ċara f’moħħna taʼ dak li se ngħidu, ġeneralment inħossuna iktar kalmi. U meta jkollna din l-attitudni trankwilla se nkunu nistgħu niġbdu lil oħrajn lejn il-messaġġ tagħna. Waħda mara qalet dan dwar żjara taʼ waħda Xhud: “Dak li niftakar mill-wiċċ daħqan tagħha hu l-paċi li kellha. Qabditni l-kurżità.” Dan fetaħ it-triq għal din il-mara biex tismaʼ l-aħbar tajba.
4 Kwalitajiet li Jiġbdu: Irridu nieħdu interess persunali f’oħrajn b’mod sinċier. (Flp. 2:4) Mod wieħed kif nagħmlu dan hu billi ma niddominawx il-konversazzjoni. Fuq kollox, il-komunikazzjoni tinvolvi wkoll li nisimgħu. Meta nistiednu lis-semmiegħa tagħna biex jesprimu ruħhom u nisimgħu l-kummenti tagħhom b’interess, huma jindunaw li verament jimpurtana minnhom. Allura meta s-semmiegħa tiegħek jitkellmu, tħaffifx biex terġaʼ lura għall-preżentazzjoni li tkun ħejjejt. Faħħarhom jekk tkun tistaʼ tagħmel dan sinċerament, u ipprova ibni fuq dak li jgħidu. Jekk il-kummenti tagħhom jikxfu li hemm xi ħaġa għażiża għal qalbhom, addatta l-preżentazzjoni tiegħek skond dak li jikkonċernahom.
5 Il-modestja u l-umiltà jgħinu biex il-komunikazzjoni tibqaʼ miexja ħarir. (Prov. 11:2, NW; Atti 20:19) In-nies inġibdu lejn Ġesù għaliex hu kien “taʼ qalb ħelwa u umli.” (Mt. 11:29) Mill-banda l-oħra, xi ħadd li jħossu superjuri jimbotta lil oħrajn. Għalhekk, għalkemm aħna konvinti b’mod sod li għandna l-verità, ikun għaqli li nevitaw li kliemna jkun dommatiku.
6 Xi ngħidu jekk il-kummenti taʼ l-individwu jirriflettu twemmin li ma jaqbilx mat-tagħlim tal-Bibbja? Aħna obbligati nikkoreġuh? Iva, maż-żmien, iżda m’għandniex nipprovaw nagħmlu dan fl-ewwel żjara. Spiss ikun taʼ vantaġġ li nibnu fuq ideat li jkollna komuni mas-semmiegħ tagħna qabel ma nibdew naqsmu miegħu t-tagħlim tal-Bibbja li hu jistaʼ jsibu iktar diffiċli biex jaċċettah. Dan jeħtieġ il-paċenzja u t-tattika. Pawlu ħallielna eżempju mill-aqwa f’dan meta ta xiehda lill-imħallfin fl-Arjopagu.—Atti 17:18, 22-31.
7 Fuq kollox, imħabba mhix egoista se tgħinna nikkomunikaw b’mod effettiv. Bħal Ġesù, irridu nitħassru lin-nies li jinsabu “mdejjqa u mitluqa bħal nagħaġ bla ragħaj.” (Mt. 9:36) Dan iqanqalna biex nagħtuhom l-aħbar tajba u ngħinuhom jiġu fit-triq li tagħti għall-ħajja. Il-messaġġ tagħna huwa wieħed taʼ mħabba, mela ejja nibqgħu ngħiduh bl-imħabba. Meta nagħmlu dan, inkunu qed nimitaw lil Alla Jehovah u lil Ġesù Kristu—l-iktar individwi fl-univers li jafu jikkomunikaw.