Uri Interess Persunali​—Billi Tagħmel Kuntatt bl-​Għajnejn

¹ Meta nkunu qed nagħtu xiehda pubblika u minn dar għal dar, spiss nagħmlu kuntatt bl-​għajnejn qabel ma nibdew nitkellmu. F’dak il-​mument qasir, għandna mnejn nifhmu mill-​espressjoni taʼ wiċċhom kif l-​inkwilini qed iħossuhom dwar il-​preżenza tagħna u anki liema burdata jinsabu fiha. Bl-​istess mod, huma jistgħu jagħrfu xi ħaġa dwarna. Waħda mara qalet hekk rigward żjara li kellha minn waħda Xhud: “Li niftakar dwar il-​wiċċ daħqan tagħha kien il-​paċi li kellha. Qanqlitli l-​kurżità.” Dan wassal biex il-​mara tismaʼ l-​aħbar tajba.

² Iż-​żamma tal-​kuntatt bl-​għajnejn m’oħrajn hija mod effettiv li jwassal biex nibdew nagħtu xiehda kemm fit-​toroq u kemm f’postijiet pubbliċi. Wieħed ħu jħares f’għajnejn dawk li jkunu qed javviċinawh. Meta hu jagħmel kuntatt bl-​għajnejn, jitbissem u jippreżenta r-​rivisti. B’dan il-​metodu hu jħalli ħafna letteratura u jgawdi ħafna diskussjonijiet sbieħ.

³ Agħraf is-​Sentimenti taʼ Ħaddieħor: Aħna niġu megħjunin nagħrfu s-​sentimenti taʼ ħaddieħor meta nżommu kuntatt bl-​għajnejn. Per eżempju, jekk xi ħadd għandu diffikultà biex jifhem jew ma jaqbilx maʼ dak li qed ngħidu, normalment se jidher fl-​espressjoni taʼ wiċċu. Jekk jinsab imħabbat jew qed jitlef il-​paċenzja, aħna se nindunaw b’dan billi nosservaw l-​espressjoni taʼ wiċċu. Nistgħu naġġustaw jew inqassru l-​preżentazzjoni tagħna skond il-​bżonn. Mod sabiħ biex nuru l-​interess persunali f’oħrajn huwa billi nkunu sensittivi għas-​sentimenti tagħhom.

⁴ Is-​Sinċerità u l-​Konvinzjoni: F’diversi kulturi, li tħares f’għajnejn persuna jistaʼ jitqies bħala evidenza li int sinċier. Innota kif Ġesù wieġeb meta d-​dixxipli tiegħu staqsewh: “Min tassew jistaʼ jiġi salvat?” Il-​Bibbja tgħid: “Waqt li ħares fiss lejhom, Ġesù qalilhom: ‘Għall-​bnedmin dan hu impossibbli, imma għal Alla kollox hu possibbli.’” (Mt. 19:​25, 26) Bla dubju, il-​konvinzjoni f’għajnejn Ġesù żiedet l-​impatt fi kliemu. Bl-​istess mod, li nżommu kuntatt bl-​għajnejn se jgħinna biex inwasslu l-​messaġġ tas-​Saltna bis-​sinċerità u bil-​konvinzjoni.​—2 Kor. 2:​17; 1 Tess. 1:5.