Iżżommx Lura!
1. Kif nistgħu ma ‘nżommux lura milli nagħmlu l-ġid’?
1 Meta nipparteċipaw b’mod attiv f’li nxandru l-aħbar tajba tas-Saltna t’Alla, aħna ma ‘nżommux lura milli nagħmlu l-ġid’ lil dawk fit-territorju assenjat lilna. (Prov. 3:27, NW) M’hemmx messaġġ aħjar x’jingħata lill-umanità minn dak dwar iż-żminijiet aħjar li ġejjin taħt il-ħakma t’Alla. Għalkemm int tistaʼ b’mod ġeneruż taqsam m’oħrajn it-tama tas-Saltna billi tagħti xiehda informalment jew billi tħalli l-letteratura, għala ma tagħmilhiex il-mira tiegħek li tikkonduċi studju tal-Bibbja, jekk għadek m’għamiltx dan s’issa?
2. X’jistaʼ jġegħelna nżommu lura milli nibdew studju tal-Bibbja?
2 Kultant, wieħed mill-akbar ostakli biex nikkonduċu studju tal-Bibbja huwa l-mod kif inħossuna dwar il-kwistjoni. Xi wħud iżommu lura milli jikkonduċu studju tal-Bibbja minħabba li m’għandhomx fiduċja fihom infushom jew minħabba li għandhom skeda mimlija. Is-suġġerimenti li ġejjin jistgħu jkunu t’għajnuna għalik biex ma żżommx lura milli tieħu sehem fix-xogħol taʼ li nikkonduċu studju tal-Bibbja.—Mt. 28:19; Atti 20:20.
3. Għala aħna kwalifikati biex ngħallmu l-Bibbja?
3 Nuqqas taʼ Fiduċja: Forsi għandek edukazzjoni sekulari limitata jew għal xi raġuni oħra għandek nuqqas taʼ fiduċja fl-abbiltà tiegħek li tikkonduċi studju tal-Bibbja. Ministri Kristjani effettivi fl-ewwel seklu kienu “komuni u taʼ ftit skola.” X’għenhom jgħallmu l-verità lil ħaddieħor? “Kienu jkunu maʼ Ġesù.” (Atti 4:13) Huma tgħallmu mill-Għalliem il-Kbir, Ġesù, li t-tagħlim u l-metodi tiegħu ġew preservati għalina fl-Iskrittura. Anki jekk l-edukazzjoni sekulari tiegħek hija limitata, int qed tirċievi edukazzjoni spiritwali li ma tistax tqabbilha maʼ xi forma oħra t’edukazzjoni.—Is. 50:4; 2 Kor. 3:5.
4. X’nistgħu nitgħallmu mill-eżempju t’Għamos?
4 Xi drabi Ġeħova uża l-profeti biex iċanfar lil ħakkiema li żbaljaw jew lil xi ħadd ieħor f’pożizzjoni għolja. Xi wħud, bħal Għamos, kienu ġejjin minn familja komuni. Għamos ammetta: “Jien m’iniex profeta, lanqas bin profeta; jiena biss ragħaj u niżbor il-ġummajż.” (Għam. 7:14) Minkejja dan, Għamos ma żammx lura milli jwassal il-messaġġ taʼ ġudizzju taʼ Ġeħova lill-qassis Amasija li kien jadura l-għoġol. (Għam. 7:16, 17) Għandna dejjem niftakru li aħna qed inwettqu x-xogħol t’Alla u hu se jikkwalifikana biżżejjed biex nagħmluh.—2 Tim. 3:17.
5. Għala għandna nistinkaw biex nibdew studju tal-Bibbja anki jekk ikollna skeda mimlija?
5 Skeda Mimlija: Anki jekk għandek skeda mimlija, x’aktarx li diġà warrabt il-ħin biex tieħu sehem fil-ministeru regolarment. Il-fatt li tikkonduċi studju tal-Bibbja jistaʼ jkun wieħed mill-iktar aspetti sbieħ tal-ministeru. Huwa privileġġ li tara l-Kelma taʼ Ġeħova ssawwar ħajja taʼ persuna. (Ebr. 4:12) Ġeħova jieħu pjaċir meta aħna nagħmlu sagrifiċċji persunali sabiex nassistu lil xi ħadd biex ‘jasal għall-għarfien eżatt dwar il-verità.’ (1 Tim. 2:4) Anki l-anġli jesperjenzaw ferħ meta xi ħadd jindem mill-mod taʼ ħajja taʼ qabel u jagħmel progress spiritwali.—Lq. 15:10.
6. Xi privileġġ għandna sabiex inwettqu r-rieda t’Alla?
6 Alla “jrid li bnedmin taʼ kull xorta jiġu salvati u jaslu għall-għarfien eżatt dwar il-verità.” (1 Tim. 2:4) Xi rwol speċjali għandna li naħdmu fi qbil mar-rieda t’Alla billi ma nżommux lura milli nikkonduċu studji tal-Bibbja!