Istruzzjonijiet Għal Dawk li Jkollhom Xi Inkarigu fil-​Laqgħa tas-​Servizz

B’seħħ minn din il-​ħarġa tal-​Ministeru tas-​Saltna, il-​kliem fl-​iskeda tal-​Laqgħa tas-​Servizz qed jiġi simplifikat. L-​istruzzjonijiet u t-​tfakkiriet li ġejjin se jaġġornawna u jiċċaraw dak li ngħad fl-​artiklu “Kif Għandna Nippreparaw għal-​Laqgħa tas-​Servizz,” li deher fil-​Ministeru tas-​Saltna taʼ Mejju, 2009.

◼ Taħdita: Din tirreferi għal taħdita bbażata fuq il-​materjal assenjat bla parteċipazzjoni mill-​udjenza. Il-​kelliemi għandu jiffoka fuq dak li se jkun l-​iktar taʼ għajnuna għall-​kongregazzjoni.

◼ Mistoqsija u Tweġiba: Simili għat-​Torri tal-​Għassa, dan l-​inkarigu jkollu introduzzjoni u konklużjoni qosra ħafna, u l-​mistoqsijiet isiru f’kull paragrafu. Dak li jikkonduċi għandu jevita li jikkummenta żżejjed. L-​iskritturi prinċipali jistgħu jinqraw skont ma jippermetti l-​ħin. Il-​paragrafi m’għandhomx jinqraw sakemm ma jkunx hemm istruzzjonijiet biex tagħmel dan.

◼ Diskussjoni: Din hija taħdita li tinkludi xi ftit jew wisq il-​parteċipazzjoni tal-​udjenza. Mhijiex sempliċement taħdita, u ma tinkludix biss mistoqsijiet u tweġibiet.

◼ Turijiet u Intervisti: L-​istruzzjonijiet li jgħidu ħejji turija jfissru li l-​ħu inkarigat huwa responsabbli biex jinkludi turija; m’għandux jagħmel it-​turija hu nnifsu. Dawk l-​uħud li jagħżel biex jgħinuh għandhom ikunu kapaċi u eżemplari u, sa fejn hu possibbli, għandu jagħmel arranġamenti magħhom minn qabel. Ikun aħjar li ma jintużawx pubblikaturi ġodda u bla esperjenza biex juru kif għandu jsir ix-​xogħol, sempliċement biex tkun tajthom l-​opportunità li jitilgħu fuq il-​platform, għalkemm xi wħud jistgħu jintużaw bħala inkwilini. Il-​pubblikaturi li jagħmlu turija għandhom jagħmlu ċert li jħarsu lejn l-​udjenza. Dawk li jkollhom xi intervista għandhom jagħmlu l-​kummenti tagħhom minn fuq il-​platform, u mhux minn posthom. It-​turijiet u l-​intervisti għandhom jiġu prattikati minn qabel. Jekk il-​laqgħa tkun qed tieħu iktar ħin milli suppost u xi ħu jkollu jqassar l-​inkarigu tiegħu, dan għandu jevita li jħassar it-​turijiet jew l-​intervisti. Il-​qaddejja ministerjali għandhom jiċċekkjaw mal-​koordinatur tal-​ġemgħa tal-​anzjani jew xi anzjan ieħor qabel ma jagħżel lil dawk l-​uħud li jkunu se jieħdu sehem.

Jekk xi inkarigu uniku jkollu istruzzjonijiet speċjali, dawn għandhom jiġu segwiti bir-​reqqa. Jekk l-​inkarigi fil-​Laqgħa tas-​Servizz jitwettqu bil-​mod li għadu kif ngħad, l-​aħwa se jgħinu biex “isir kollox bid-​deċenza u bl-​ordni” fil-​Laqgħat tas-​Servizz.—1 Kor. 14:40.