Iżżommx Lura —Kif Tlaħħaq maʼ Skeda Mimlija

1. Xi wħud għala jaħsbuha darbtejn biex joffru studju tal-​Bibbja?

¹ Xi wħud jaħsbuha darbtejn biex joffru studju tal-​Bibbja għax ikollhom skeda mimlija. Jirrikjedi l-​ħin biex tieħu ħsieb student tal-​Bibbja. Trid il-​ħin biex tipprepara għall-​istudju, tikkonduċih, u tgħin lill-​istudent jegħleb xi ostakli personali. L-​appostlu Pawlu qal li ta ruħu stess biex jgħin lil dawk f’Tessalonika jsiru jafu lil Ġeħova. (1 Tess. 2:7, 8) Kif nistgħu nikkonduċu studju tal-​Bibbja anki jekk ikollna skeda mimlija?

2. L-​imħabba għal Ġeħova kif teffettwa l-​mod kif nużaw il-​ħin tagħna?

² Jirrikjedi l-​Ħin Biex Tqim lil Ġeħova: Ngħiduha kif inhi, il-​qima tirrikjedi l-​ħin. Pereżempju, aħna b’mod regulari nieħdu l-​ħin biex nattendu l-​laqgħat, nieħdu sehem fil-​ministeru, naqraw il-​Bibbja, u nitolbu. Xi ħadd miżżewweġ li jkollu ħafna x’jagħmel iwarrab il-​ħin minn qalbu biex iqattgħu mas-​sieħeb jew sieħba tiegħu fiż-​żwieġ. Kemm iktar għandna ‘nużaw’ il-​ħin minn qalbna biex inqimu lil Ġeħova għax inħobbuh. (Efes. 5:15-​17; 1 Ġw. 5:3) Skont Ġesù, parti vitali mill-​qima tagħna hi li nagħmlu dixxipli. (Mt. 28:19, 20) Meta nirriflettu fuq dan niġu megħjunin ma nżommux lura milli naċċettaw ir-​responsabbiltà taʼ li nikkonduċu studju tal-​Bibbja.

3. Kif nistgħu nieħdu ħsieb studju tal-​Bibbja anke jekk iċ-​ċirkustanzi jfixklu l-​iskeda għall-​ministeru?

³ Iżda xi ngħidu jekk l-​iskeda tagħna tiġi mfixkla mill-​impjieg, problemi kroniċi taʼ saħħa, jew inkarigi teokratiċi? Xi pubblikaturi li kultant ikollhom ikunu ’l bogħod mill-​istudent, jikkonduċu l-​istudju tal-​Bibbja tagħhom fuq it-​telefown jew permezz taʼ konferenza bil-​kompjuter. Dawk li l-​iskeda tagħhom tiġi mfixkla minn problemi kroniċi taʼ saħħa għamlu arranġamenti biex l-​istudent jiġi d-​dar tagħhom għall-​istudju. Xi wħud irranġaw biex pubblikatur taʼ min joqgħod fuqu jkun jistaʼ jissostitwihom u jikkonduċi l-​istudju meta huma ma jkunux disponibbli.

4. Liema barkiet jiġu meta nikkonduċu studju tal-​Bibbja?

⁴ Pawlu kiseb ħafna ferħ għax ta mill-​ħin u l-​enerġija tiegħu biex jgħin lil oħrajn jitgħallmu l-​verità. (Atti 20:35) Meta rrifletta fuq dawk kollha li setaʼ jgħin f’Tessalonika, hu ġie mqanqal biex irodd ħajr lil Ġeħova. (1 Tess. 1:2) Il-​ferħ u s-​sodisfazzjon tagħna fil-​ministeru jistgħu jiżdiedu jekk ma nħallux skeda mimlija żżommna lura milli nikkonduċu studju tal-​Bibbja.