Ġeħova ‘Ddrittali Triqati’

IL-​ĠENITURI TIEGĦI GĦENUNI NSIB L-​AĦJAR TRIQ

Wara l-​1920, qabel il-​ġenituri tiegħi żżewġu, sabu l-​verità. Jien twelidt fl-​1939. Meta kont għadni żgħir, konna ngħixu l-​Ingilterra. Kont immur il-​laqgħat mal-​ġenituri tiegħi u bdejt nieħu sehem fl-​Iskola tal-​Ministeru Teokratiku. Għadni niftakar l-​ewwel taħdita li għamilt. Kelli nitlaʼ fuq kaxxa biex inkun nistaʼ nara lill-​aħwa. Kien għad kelli sitt snin u meta rajt l-​aħwa t’esperjenza jħarsu lejja vera ħassejtni eċitat.

Għall-​ministeru, missieri kitibli preżentazzjoni żgħira u sempliċi fuq kard biex nużaha waqt l-​ippritkar. Kien għad kelli tmien snin meta ħabbatt l-​ewwel bieb waħdi. Kemm kont ferħan meta l-​inkwilin qara l-​kard tiegħi u aċċetta mill-​ewwel il-​ktieb “Let God Be True”! Niftakar li tlaqt niġri biex ngħid lil missieri. Il-​ministeru u l-​laqgħat kienu jagħmluni ferħan u għenuni biex ikolli xewqa naqdi lil Ġeħova full-​time.

Missieri kien kitibni biex nirċievi It-​Torri tal-​Għassa b’mod regulari. Dan għenni biex inħobb il-​verità iktar. Malli kont nirċivihom, kont naqrahom mill-​ewwel. Il-​fidi tiegħi f’Ġeħova kibret u maż-​żmien iddedikajt ħajti lilu.

Fl-​1950, bħala familja attendejna l-​assemblea “Theocracy’s Increase,” fi New York. Il-​Ħamis, 3 taʼ Awwissu, it-​tema kienet “Missionary Day.” Dakinhar, Ħuna Carey Barber, li iktar tard qeda bħala membru tal-​Ġemgħa li Tiggverna, għamel it-​taħdita tal-​magħmudija. Wara li staqsa ż-​żewġ mistoqsijiet lill-​kandidati tal-​magħmudija, jien qomt bilwieqfa u għedt, “Iva!” Kelli biss 11-​il sena, imma kont naf li ħadt deċiżjoni importanti. Però, bdejt nibżaʼ ninżel fl-​ilma għax kont għadni ma nafx ngħum. Iz-​ziju ġie miegħi sa fejn il-​pool u serraħli moħħi li mhu se jiġrili xejn. U f’kemm ili ngħidlek, tlajt u nżilt. Kien hemm żewġ aħwa; wieħed minnhom għammidni u l-​ieħor tellagħni mill-​pool. Minn dik il-​ġurnata importanti ʼl quddiem, Ġeħova kompla jiddrittali triqati.

IDDEĊIDEJT LI NAFDA LIL ĠEĦOVA

Meta spiċċajt l-​iskola, ridt nibda naqdi bħala pijunier, imma l-​għalliema inkuraġġewni biex immur l-​università. Jiena smajt minnhom u mort l-​università. Imma malajr irrealizzajt li ma stajtx nimxi ʼl quddiem fil-​verità u fl-​istess ħin niffoka fuq l-​istudji, għalhekk iddeċidejt li nieqaf. Tlabt lil Ġeħova dwarha u ktibt ittra lill-​għalliema biex b’rispett nispjegalhom għal liema raġuni ddeċidejt li nieqaf fl-​aħħar tal-​ewwel sena. Jien fdajt kompletament f’Ġeħova u mill-​ewwel bdejt naqdi bħala pijunier.

F’Lulju tal-​1957, bdejt is-​servizz full-​time tiegħi f’Wellingborough. Jien staqsejt lill-​aħwa f’Betel taʼ Londra biex jaraw jekk hemmx xi ħu pijunier tal-​esperjenza ħalli jkun jistaʼ jgħinni fl-​ippritkar. Ħuna Bert Vaisey għallimni ħafna affarijiet. Hu kien żeluż fl-​ippritkar u għenni biex nagħmel skeda tajba għall-​ministeru. Fil-​kongregazzjoni kien hemm biss sitt aħwa nisa kbar fl-​età, Ħuna Vaisey, u jien. Il-​preparazzjoni u l-​parteċipazzjoni fil-​laqgħat tawni l-​opportunità biex nafda iktar f’Ġeħova u nesprimi l-​fidi tiegħi.

Wara ftit żmien fil-​ħabs minħabba li ma ridtx nieħu sehem fis-​servizz militari, iltqajt maʼ Barbara, li kienet pijuniera speċjali. Aħna żżewwiġna fl-​1959, u konna lesti mmorru fejn jibagħtuna. L-​ewwel bagħtuna Lancashire, in-​naħa taʼ fuq tal-​Ingilterra. Imbagħad, f’Jannar tal-​1961, ġejt mistieden biex nattendi l-​Iskola tal-​Ministeru tas-​Saltna għal xahar, f’Betel taʼ Londra. Fl-​aħħar tal-​kors ġejt inkarigat biex naqdi bħala indokratur li jżur il-​kongregazzjonijiet. Din kienet sorpriża għalija! Irċivejt trejning għall-​ħmistax mingħand indokratur li jżur il-​kongregazzjonijiet tal-​esperjenza fil-​belt taʼ Birmingham, u Barbara setgħet tiġi miegħi. Imbagħad bdejna l-​inkarigu tagħna ġewwa Lancashire u Cheshire.

META TAFDA F’ĠEĦOVA MA JIDDISPJAĊIKX

Waqt vaganza f’Awwissu tal-​1962, irċivejna ittra mill-​uffiċċju tal-​fergħa. Mal-​ittra kien hemm żewġ applikazzjonijiet għall-​Iskola taʼ Gilegħad. Wara li tlabna dwarha, jien u Barbara mlejna l-​formoli u bgħatniehom malajr lill-​uffiċċju tal-​fergħa. Ħames xhur wara morna Brooklyn, New York, biex nattendu t-​38 klassi taʼ Gilegħad, għaxar xhur kors taʼ edukazzjoni teokratika.

Fl-​Iskola taʼ Gilegħad tgħallimna ħafna dwar il-​Kelma t’Alla, l-​organizzazzjoni, u l-​aħwa madwar id-​dinja. Konna għadna żgħar, u tgħallimna ħafna mill-​istudenti li kienu fil-​klassi magħna. Kelli l-​privileġġ li nagħmel xi xogħol ieħor f’Betel maʼ Ħuna  Fred Rusk, wieħed mill-​għalliema tagħna. Waħda mil-​lezzjoni importanti li hu enfasizza kienet li meta nagħtu parir, għandu jkun dejjem ibbażat fuq l-​Iskrittura. Fost l-​aħwa li taw it-​taħditiet kien hemm aħwa taʼ esperjenza bħal Ħutna Nathan Knorr, Frederick Franz, u Karl Klein. U kemm tgħallimna mill-​eżempju t’umiltà taʼ Ħuna A. H. Macmillan! Hu għallimna kif Ġeħova għen l-​aħwa fl-​organizzazzjoni matul żmien diffiċli li esperjenzaw mill-​1914 sal-​bidu tal-​1919!

BIDLA FL-​INKARIGU

Lejn l-​aħħar tal-​kors, Ħuna Knorr qal lili u lil Barbara li ġejna assenjati l-​Burundi, fl-​Afrika. Aħna morna niġru fil-​librerija taʼ Betel biex infittxu fil-​Yearbook ħalli naraw kemm kien hemm pubblikaturi fil-​Burundi. Bqajna sorpriżi meta ma sibna xejn dwar dan il-​post! Iva, konna sejrin f’post fejn l-​ippritkar qatt ma kien sar. Konna ansjużi ħafna! Imma wara li tlabna mill-​qalb, Ġeħova kkalmana.

Fl-​inkarigu l-​ġdid tagħna, kollox kien differenti minn dak li esperjenzajna qabel—il-​klima, il-​kultura, u l-​lingwa. Issa kellna nitgħallmu l-​Franċiż. Ukoll, kellna nsibu post fejn ngħixu. Jumejn wara li wasalna, wieħed li kien magħna fil-​klassi taʼ Gilegħad, Harry Arnott, ġie jżurna qabel mar lura għall-​inkarigu tiegħu fiż-​Żambja. Hu għenna nsibu appartament li sar l-​ewwel dar tagħna. Però, malajr bdiet l-​oppożizzjoni mill-​awtoritajiet tal-​lokal, li ma kienu jafu xejn dwar ix-​Xhieda taʼ Ġeħova. Malli bdejna nħossuna ferħanin fl-​inkarigu tagħna, l-​awtoritajiet informawna li ma stajniex nibqgħu hemmhekk mingħajr permess tax-​xogħol. B’dispjaċir, kellna nitilqu u nerġgħu naddattaw ruħna f’pajjiż ieħor. Din id-​darba l-​Uganda.

Konna ansjużi minħabba li ma kellniex viża biex immorru l-​Uganda, imma fdajna f’Ġeħova. Ħu mill-​Kanada li kien jaqdi fl-​Uganda spjega s-​sitwazzjoni tagħna lill-​uffiċjal tal-​immigrazzjoni, u hu qalilna li stajna nibqgħu għal ftit xhur sakemm ikollna l-​permess. Dan tana prova li Ġeħova kien qed jgħinna.

Is-​sitwazzjoni fl-​Uganda kienet differenti ħafna minn dik fil-​Burundi. Minkejja li kien hemm biss 28 Xhud fil-​pajjiż, ix-​xogħol tal-​ippritkar fl-​Uganda kien diġà qed isir. Fit-​territorju kien hemm ħafna li jitkellmu bl-​Ingliż. Imma malajr indunajna li biex ngħinu wħud interessati jagħmlu progress, kellna bżonn nitgħallmu minn tal-​inqas waħda mill-​ħafna lingwi li jitkellmu fil-​pajjiż. Bdejna nippritkaw fil-​belt taʼ Kampala, fejn kienu jitkellmu bil-​lingwa Luganda. Għalhekk, iddeċidejna li nitgħallmu din il-​lingwa. Domna snin biex nitgħallmuha, imma għamlet differenza kbira għax sirna iktar effettivi fix-​xogħol tal-​ippritkar! Bdejna nifhmu aħjar x’kellhom bżonn jitgħallmu l-​istudenti tal-​Bibbja tagħna. Meta l-​istudenti raw li aħna ridna ngħinuhom, huma bdew jiftħu qalbhom magħna u jgħidulna kif iħossuhom dwar dak li kienu qed jitgħallmu.

ĦAFNA VJAĠĠI DIFFERENTI

Aħna konna nieħdu pjaċir ħafna ngħinu lin-​nies jitgħallmu l-​verità. U fraħna ħafna meta talbuni biex naqdi bħala indokratur li jżur il-​kongregazzjonijiet. Taħt id-​direzzjoni tal-​fergħa fil-​Kenja, aħna vvjaġġajna fil-​pajjiż biex insibu nħawi fejn kien hemm bżonn iktar pijunieri speċjali. Ħafna drabi, in-​nies kienu ospitabbli ħafna magħna minkejja li qatt ma ltaqgħu max-​Xhieda taʼ Ġeħova. Konna nħossuna komdi magħhom u ġieli anki ppreparaw l-​ikel għalina.

Imbagħad kien imiss vjaġġ ieħor. Minn Kampala għamilt xi jumejn nivvjaġġa biex nasal fil-​belt taʼ Mombasa, fil-​Kenja. Imbagħad ivvjaġġajt b’vapur biex nasal is-​Seychelles, grupp taʼ gżejjer fl-​Oċean Indjan. Iktar tard, mill-​1965 sal-​1972, jien u Barbara bdejna nagħmlu żjajjar regulari fis-​Seychelles. Fil-​bidu, kulma kien hemm żewġ pubblikaturi, imma iktar tard kien hemm grupp u wara kongregazzjoni. Għamilt vjaġġi oħrajn biex inżur l-​aħwa fl-​Eritrea, fl-​Etjopja, u fis-​Sudan.

Is-​sitwazzjoni politika fl-​Uganda nbidlet wara li grupp militari ħa l-​kontroll tal-​gvern. Is-​snin taʼ wara kienu diffiċli ħafna u tgħallimt kemm hu importanti li nobdi l-​kmand tal-​Bibbja biex nobdi lill-​gvern. (Mk. 12:17) Il-​barranin kollha li kienu jgħixu fl-​Uganda ġew mitluba biex imorru jirreġistraw isimhom fl-​eqreb għassa tal-​pulizija tad-​dar tagħhom. Aħna obdejna mill-​ewwel. Fil-​ġranet taʼ wara, waqt li jien u missjunarju ieħor konna qegħdin insuqu f’Kampala, uffiċjali tal-​pulizija waqqfuna. Konna bżajna ħafna! Huma akkużawna li konna spiji u ħaduna d-​depot tal-​pulizija fejn spjegajnielhom li aħna missjunarji. Aħna għednielhom li diġà konna rreġistrajna isimna mal-​pulizija, imma ma emmnuniex. Ġejna arrestati u ħaduna l-​għassa tal-​pulizija viċin id-​dar li konna ngħixu fiha. Malli wasalna l-​għassa ħadna r-​ruħ għax il-​pulizija li rreġistrajna isimna miegħu qabel għarafna, u qal lill-​gwardjan biex jeħlisna!

Dak iż-​żmien, spiss iltqajna maʼ roadblocks li kienet tagħmel l-​armata, u spiss is-​suldati li kienu jwaqqfuna kienu jkunu fis-​sakra. Kull darba li kien jiġrilna hekk, konna nitolbu u dan kien jgħinna biex nibqgħu kalmi. U dejjem ħallewna ngħaddu bil-​kwiet. B’dispjaċir, fl-​1973, il-​missjunarji barranin kollha ġew mitluba biex jitilqu mill-​Uganda.

Għal darb’oħra ngħatajna inkarigu ġdid, fil-​Kosta tal-​Avorju, l-​Afrika tal-​Punent. Din kienet bidla kbira oħra għalina. Kellna nidraw kultura kompletament ġdida, nitkellmu bil-​Franċiż il-​ħin kollu, u ngħixu maʼ missjunarji minn pajjiżi differenti. Imma, hemmhekk erġajna rajna kif uħud taʼ qalb onestà u umli aċċettaw l-​aħbar tajba malajr. Jien u Barbara rajna li meta fdajna f’Ġeħova, hu ddrittalna triqatna.

BIDLA FIĊ-​ĊIRKUSTANZI

Imbagħad Barbara mardet bil-​kanċer. Għall-​kura morna ħafna drabi lura fl-​Ewropa, u fl-​1983 irrealizzajna li ma stajniex inkomplu naqdu fl-​inkarigu tagħna ġewwa l-​Afrika. Konna vera diżappuntati!

Waqt li konna qegħdin naqdu f’Betel Londra, il-​marda li kellha Barbara kompliet tiggrava u mietet. Il-​familja taʼ Betel kienet taʼ sapport kbir għalija. Koppja partikulari għenitni biex nidra u nkompli nafda f’Ġeħova. Imbagħad iltqajt maʼ oħt li kienet pijuniera speċjali li bdiet taħdem part-​time f’Betel, u stajt nara li kienet tħobb ħafna lil Ġeħova. Jien u Ann iżżewwiġna fl-​1989, u ilna naqdu flimkien f’Betel taʼ Londra minn dakinhar.

Mill-​1995 sal-​2018, kelli l-​privileġġ li naqdi bħala rappreżentant tal-​kwartieri ġenerali u żort kważi 60 pajjiż. F’kull żjara li għamilt, rajt li Ġeħova jieħu ħsieb lin-​nies tiegħu, jiġri x’jiġri.

Fl-​2017, waħda miż-​żjajjar kienet l-​Afrika. Kont ferħan ħafna li Ann ġiet miegħi għall-​ewwel darba l-​Burundi. It-​tnejn li aħna konna impressjonati kemm ġew nies fil-​verità! Fl-​istess triq fejn kont nipprietka minn dar għal dar fl-​1964, issa hemm Betel. Illum, hemm iktar minn 15,500 pubblikatur fil-​pajjiż.

Kont ferħan ħa ntir meta rċivejt l-​iskeda taż-​żjajjar fl-​2018 għax fuq il-​lista tal-​pajjiżi kien hemm il-​Kosta tal-​Avorju. Malli wasalna Abidjan, l-​iktar belt kbira fil-​pajjiż, ħassejtni qisni mort lura d-​dar. Mil-​lista tan-​numri tat-​telefowns tal-​aħwa li kienu jaħdmu f’Betel, indunajt li l-​ħu li kien jgħix fil-​kamra ħdejn il-​guestroom fejn konna qegħdin aħna, kien Ħuna Sossou. Ftakart li hu kien jaqdi bħala indokratur tal-​belt meta kont ngħix Abidjan. Imma kelli żball, għax kien it-​tifel tiegħu u mhux hu.

Ġeħova żamm il-​wegħda tiegħu. L-​affarijiet diffiċli li esperjenzajt għallmuni li meta nafdaw f’Ġeħova, hu verament jiddrittalna triqatna. Jien determinat li nibqaʼ naqdi lil Ġeħova sakemm iwassalni fid-​dinja l-​ġdida.—Prov. 4:18.