Brais Seara/Moment via Getty Images
IBQAʼ ATTENT!
Nixfa Kbira—X’Tgħid il-Bibbja?
“Iċ-Ċina rrapportat ‘l-iktar heatwave qawwija’ u t-tielet l-iktar sajf niexef li qatt ġie rrekordjat.”—The Guardian, 7 taʼ Settembru, 2022.
“In-nixfa li qed tolqot partijiet tal-Afrika mistennija tkompli għall-ħames sena.”—UN News, 26 t’Awwissu, 2022.
“Iktar minn nofs l-Ewropa għaddejja minn xi tip taʼ nixfa, xi ħaġa li ilha ma tiġri 500 sena.”—BBC News, 23 t’Awwissu, 2022.
Ħafna esperti qed ibassru li nixfa bħal din se tkompli għaddejja u anke se tmur għall-agħar. Hemm xi tama li l-futur se jkun aħjar? Il-Bibbja x’tgħid?
In-nixfa u l-profeziji tal-Bibbja
Dwar żmienna l-Bibbja bassret:
“F’post wara l-ieħor ikun hemm . . . nuqqas taʼ ikel.”—Luqa 21:11.
In-nixfa spiss twassal għal nuqqas taʼ ikel. In-nuqqas taʼ ikel, u t-tbatija u l-imwiet minħabba n-nuqqas taʼ ikel, qed iwettqu l-profeziji tal-Bibbja.—Rivelazzjoni 6:6, 8.
Għala qed tiżdied in-nixfa
Il-Bibbja ssemmi raġuni bażika għala qed tiżdied in-nixfa. Hi tgħid:
“Triq il-bniedem m’hijiex f’idejh. Lanqas min jimxi ma jistaʼ jidderieġi l-passi tiegħu.”—Ġeremija 10:23.
Dan ifisser li l-bnedmin ma jistgħux ‘jidderieġu l-passi tagħhom,’ jew imexxu lilhom nfushom b’suċċess. Ħafna drabi, id-deċiżjonijiet ħżiena li jieħdu jwasslu għal nixfa u nuqqas taʼ ilma.
Il-maġġoranza tax-xjentisti jaqblu li dak li għamel il-bniedem ikkaġuna l-global warming u minħabba f’hekk żdiedet in-nixfa madwar id-dinja.
Xi nies jaġixxu b’mod egoist u xi kultant dawk li jmexxu jieħdu deċiżjonijiet mingħajr ma jaħsbu fil-futur. Minħabba f’hekk qed jinqerdu l-foresti, qed tiżdied il-pollution, u r-riżorsi naturali mhumiex jintużawx bil-għaqal. Dan jistaʼ jwassal għal nuqqas kbir taʼ ilma.
Madankollu, il-Bibbja tgħid li hemm tama.
Hemm xi tama għall-futur?
Il-Bibbja twiegħed li Alla se jsolvi l-kriżi tan-nuqqas taʼ ilma. Kif?
1. Alla se ‘jeqred lil dawk li qed jeqirdu l-art.’ (Rivelazzjoni 11:18) Hu se jneħħi wieħed mir-raġunijiet għala hawn nuqqas taʼ ilma—in-nies ħżiena u egoisti, li b’dak li jagħmlu qed iħassru l-ambjent.—2 Timotju 3:1, 2.
2. “L-art imqaxqxa bis-sħana tkun saret bħal għadira mimlija qasab.” (Isaija 35:1, 6, 7) Alla se jneħħi l-ħsara li saret minħabba n-nixfa u se jbiddel din id-dinja f’ġenna taʼ l-art b’abbundanza taʼ ilma.
3. “Int tieħu ħsieb l-art; Għamiltha b’ħamrija tajba u tipproduċi b’abbundanza.” (Salm 65:9) Alla se jbierek l-art u se tkun mimlija b’ikel tajjeb u ilma nadif għal kulħadd.