Dawk fil-​Bżonn

Jimpurtah Alla minn dawk fil-​bżonn?

“Ħa jkun il-​mod kif tgħixu ħieles mill-​imħabba għall-​flus . . . Għax [Alla] qal: ‘Żgur ma nitilqekx u żgur ma nabbandunakx.’” —Ebrej 13:5.

KIF ALLA JURI LI JIMPURTAH

Meta aduratur t’Alla Ġeħova jgħaddi minn żminijiet diffiċli, li Alla jimpurtah minnu jistaʼ jkun evidenti b’diversi modi. Wieħed minnhom hu l-​appoġġ bl-​imħabba li jingħata minn Kristjani sħabu.a Ġakbu 1:27 jgħid: “Il-​qima li hi nadifa u bla tinġis mill-​ħarsa t’Alla tagħna u Missierna hi din: li tieħu ħsieb l-​iltiema u r-​romol fit-​tribulazzjoni tagħhom.”

Il-​Kristjani tal-​bidu kienu jgħinu lil xulxin. Pereżempju, meta ġie mbassar li kien se jkun hemm ġuħ kbir fl-​art tal-​Lhudija, il-​Kristjani fil-​belt Sirjana t’Antjokja “ddeċidew li jibagħtu l-​għajnuna . . . lill-​aħwa li kienu joqogħdu l-​Lhudija.” (Atti 11:28-​30) B’hekk, sħabhom il-​Kristjani li kienu fil-​bżonn irċivew il-​provvisti essenzjali. Dan l-​għoti volontarju wera l-​imħabba Kristjana fl-​azzjoni.—1 Ġwanni 3:18.

Dawk fil-​bżonn kif jistgħu jgħinu lilhom infushom?

“Jien, Ġeħova, jien Alla tiegħek, li ngħallmek għall-​ġid tiegħek.”—Isaija 48:17, 18.

ALLA JGĦINNA BIEX NGĦINU LILNA NFUSNA

Bħalma skoprew miljuni taʼ nies, l-​għerf li nsibu fil-​Bibbja hu prattiku u ma jistaʼ jitqabbel maʼ xejn. Proverbji 2:6, 7 jgħid: “Għax Ġeħova jagħti l-​għerf; minn fommu joħorġu l-​għarfien u d-​dixxerniment. U hu jaħżen l-​għaqal għar-​retti.” Meta n-​nies ifittxu dak l-​għerf u jpoġġuh fil-​prattika, se jiswielhom taʼ ġid.

Pereżempju, huma jevitaw vizzji taʼ ħsara u li jiswew ħafna flus, bħalma huwa l-​abbuż mid-​drogi u l-​alkoħol. (2 Korintin 7:1) Barra minn hekk, isiru onesti u iktar kuxjenzjużi u responsabbli, u b’hekk ikollhom iktar ċans isibu impjieg jew ikunu saħansitra iktar stmati bħala impjegati. Efesin 4:28 jgħid: “Min kien jisraq ħa ma jisraqx iktar, imma minflok ħa jaħdem iebes . . . biex ikollu xi ħaġa x’jagħti lil min hu fil-​bżonn.”

Hemm evidenza li l-​għerf tal-​Bibbja jgħin lil dawk fil-​bżonn?

“L-​għerf t’Alla jintwera li hu sewwa mir-​riżultati li jkollu.”—Mattew 11:19, The New English Bible.

RIŻULTATI LI JITKELLMU GĦALIHOM INFUSHOM

Wilson, li jgħix il-​Gana u li kien ħaddiem temporanju, kien wasal biex jispiċċalu l-​kuntratt tax-​xogħol. Fl-​aħħar ġurnata, waqt li kien qed jaħsel il-​karozza tad-​direttur, Wilson sab xi flus fil-​bagoll. Is-​supervisor qallu biex jiħodhom. Imma Wilson, li kien wieħed mix-​Xhieda taʼ Ġeħova, ma riedx jisraq. Minflok, radd lura l-​flus li sab. U mhux talli ma spiċċax mix-​xogħol, imma talli Wilson ġie offrut xogħol permanenti u iktar tard ingħata kariga ogħla.

Fl-​Ewropa, Géraldine tilfet l-​impjieg tagħha għax dik li impjegatha ma kellhiex grazzja max-​Xhieda taʼ Ġeħova. Imma omm dik li impjegat lil Géraldine qalet lil bintha li kienet għamlet żball kbir. Hi qaltilha: “Jekk trid impjegata taʼ min jafdaha u li tieħu l-​impjieg tagħha bis-​serjetà, ma tistax issib aħjar minn waħda mix-​Xhieda taʼ Ġeħova.” Bintha għamlet riċerka fuq ix-​Xhieda, u Géraldine ingħatat lura l-​impjieg tagħha.

Sarah, omm fl-​Afrika t’Isfel li trabbi lil uliedha waħedha, għaddiet minn żminijiet diffiċli. Hi esperjenzat l-​imħabba Kristjana fl-​azzjoni meta membri tal-​kongregazzjoni tagħha għenu lill-​familja tagħha billi pprovdewlhom l-​ikel u t-​trasport li kellhom bżonn. Iktar tard uliedha qalu, “Għandna ħafna ġenituri fil-​kongregazzjoni.”

Hemm ħafna esperjenzi simili li jistgħu jiġu rakkontati. Dawn ifakkruna fi Proverbji 1:33 li jgħid “Min jismaʼ [minn Ġeħova] jgħammar fis-​sigurtà.” Kemm hu minnu dan il-​kliem!