Arranġamenti għal postijiet taʼ qima

L-​ADURATURI veri taʼ Ġeħova huma kmandati jinġabru flimkien biex jirċievu tagħlim u biex jinkuraġġixxu lil xulxin. (Ebr. 10:23-​25) L-​ewwel post taʼ qima għall-​poplu magħżul t’Alla, l-​Iżraelin, kien it-​“tabernaklu, jiġifieri, it-​tinda tal-​laqgħa.” (Eżo. 39:32, 40) Iktar tard, Salamun bin David bena dar, jew tempju, għall-​glorja t’Alla. (1 Slat. 9:3) Wara l-​qerda taʼ dan it-​tempju fis-​sena 607 QEK, il-​Lhud għamlu arranġamenti biex jiltaqgħu f’postijiet għall-​qima msejħin sinagogi biex iqimu lil Alla. Maż-​żmien, it-​tempju reġaʼ nbena, u għal darb’oħra serva bħala ċentru għall-​qima vera. Ġesù għallem kemm fis-​sinagogi u kemm fit-​tempju. (Lq. 4:16; Ġw. 18:20) Ġesù saħansitra kellu laqgħa fuq muntanja.—Mt. 5:1–7:29.

² Wara l-​mewt taʼ Ġesù, il-​Kristjani ltaqgħu f’postijiet pubbliċi u fi djar privati biex jgħallmu l-​Iskrittura u biex igawdu assoċjazzjoni mal-​kredenti sħabhom. (Atti 19:8, 9; Rum. 16:3, 5; Kol. 4:15; Flm. 2) Kultant kien neċessarju li l-​Kristjani tal-​bidu jiltaqgħu f’postijiet iżolati biex jevitaw li jsibuhom il-​persekuturi. Tabilħaqq, il-​qaddejja leali t’Alla fil-​passat kellhom xewqa sinċiera li jiltaqgħu f’postijiet għall-​qima sabiex jiġu “mgħallmin minn Ġeħova.”—Is. 54:13.

³ Anki llum jintużaw djar privati u postijiet pubbliċi bħala postijiet għal-​laqgħat Kristjani. Id-​djar privati spiss iservu bħala postijiet fejn isiru laqgħat għas-​servizz tal-​għalqa. Dawk li joffru darhom għal laqgħat bħal dawn iqisu dan bħala privileġġ. Ħafna jħossu li bbenefikaw spiritwalment billi jiftħu darhom b’dan il-​mod.

IS-​SALA TAS-​SALTNA

⁴ Il-​post prinċipali għal-​laqgħat tax-​Xhieda taʼ Ġeħova huwa s-​Sala tas-​Saltna. Ġeneralment tinxtara l-​art u tinbena Sala tas-​Saltna ġdida jew jiġi rinnovat bini eżistenti. Sabiex ma jiżdidux l-​ispejjeż u jsir l-​aqwa użu tal-​faċilitajiet tagħna, diversi kongregazzjonijiet jistgħu jużaw l-​istess Sala tas-​Saltna meta jkun prattiku. F’ċerti nħawi jkun hemm il-​bżonn li tinkera sala. Għal Swali tas-​Saltna ġodda u dawk li saru rinnovazzjonijiet kbar fihom, ikun xieraq li jsir programm taʼ dedikazzjoni. Però, jekk isiru biss rinnovazzjonijiet żgħar f’Sala tas-​Saltna eżistenti, ma jkunx hemm għalfejn isir programm taʼ dedikazzjoni.

⁵ Is-​Sala tas-​Saltna m’għandhiex tkun bini elaborat magħmul biex jimpressjona lil oħrajn. Filwaqt li d-​disinn jistaʼ jvarja minn post għall-​ieħor, l-​iskop hu li jsir użu minnha. (Atti 17:24) Skont iċ-​ċirkustanzi lokali, għandha tkun post komdu u konvenjenti biex jinżammu l-​laqgħat Kristjani.

⁶ Il-​kongregazzjonijiet kollha tax-​Xhieda taʼ Ġeħova jikkontribwixxu għall-​użu, il-​funzjoni, u l-​manutenzjoni tas-​Sala tas-​Saltna li fiha jkunu assenjati. Ma jsir ebda ġbir; lanqas ma jintalbu flus. Kaxxa għall-​kontribuzzjonijiet hi provduta biex dawk li jattendu l-​laqgħat ikunu jistgħu jikkontribwixxu għall-​ispejjeż neċessarji li għandhom x’jaqsmu mal-​użu tas-​sala. Jagħmlu dan minn jeddhom u minn qalbhom.—2 Kor. 9:7.

⁷ Kulħadd fil-​kongregazzjoni jqisu privileġġ li jappoġġa s-​Sala tas-​Saltna finanzjarjament u li joffri s-​servizzi tiegħu biex iżommha nadifa u f’kundizzjoni tajba. Anzjan jew qaddej ministerjali normalment jiġi inkarigat biex jagħmel skeda għal dan ix-​xogħol. Ġeneralment, it-​tindif isir mill-​gruppi tas-​servizz tal-​għalqa, u l-​indokratur tal-​grupp jew l-​assistent tiegħu jieħu t-​tmexxija. Is-​Sala tas-​Saltna għandha tirrappreżenta lil Ġeħova u l-​organizzazzjoni tiegħu kif jixraq, kemm minn ġewwa kif ukoll minn barra.

⁸ Meta iktar minn kongregazzjoni waħda tiltaqaʼ f’sala, l-​anzjani tal-​kongregazzjonijiet involuti jaħtru Kumitat li Jieħu Ħsieb is-​Sala tas-​Saltna li jikkoordina l-​affarijiet li għandhom x’jaqsmu mal-​bini u l-​proprjetà. Il-​ġemgħat tal-​anzjani jaħtru ħu biex jaqdi bħala l-​koordinatur tal-​Kumitat li Jieħu Ħsieb is-​Sala tas-​Saltna. Billi jaħdem taħt id-​direzzjoni tal-​ġemgħat tal-​anzjani, il-​kumitat li jieħu ħsieb jimmonitorja t-​tindif tas-​sala u jagħmel ċert li s-​sala tibqaʼ f’kundizzjoni tajba u li jkunu disponibbli biżżejjed provvisti. Dan jitlob kooperazzjoni mill-​qrib fost il-​kongregazzjonijiet involuti.

⁹ Meta diversi kongregazzjonijiet jużaw Sala tas-​Saltna waħda, jistaʼ jkun li l-​iskeda tal-​ħinijiet għal-​laqgħat tkun tinvolvi rotazzjoni. L-​anzjani jaħdmu l-​iskeda fi spirtu taʼ tħassib reċiproku u mħabba għall-​aħwa. (Flp. 2:2-​4; 1 Pt. 3:8) L-​ebda kongregazzjoni m’għandha tieħu deċiżjonijiet għan-​nom tal-​kongregazzjonijiet l-​oħra. Meta l-​indokratur li jżur il-​kongregazzjonijiet iżur waħda mill-​kongregazzjonijiet li tuża s-​Sala tas-​Saltna, il-​kongregazzjonijiet l-​oħra jirranġaw il-​ħinijiet tal-​laqgħat tagħhom skont il-​bżonn għal dik il-​ġimgħa.

¹⁰ Is-​Sala tas-​Saltna tistaʼ tintuża għal tiġijiet u funerali bil-​permess tal-​Kumitat tas-​Servizz tal-​Kongregazzjoni. Dawn l-​anzjani jikkunsidraw sew x’inhu mitlub u jibbażaw id-​deċiżjoni tagħhom fuq direzzjoni provduta mill-​uffiċċju tal-​fergħa.

¹¹ Dawk li jitħallew jużaw is-​Sala tas-​Saltna għal skopijiet bħal dawn huma mistennijin li jġibu ruħhom kif jixraq lill-​Kristjani ġenwini. M’għandu jsir xejn fis-​Sala tas-​Saltna li jkun taʼ offiża għall-​kongregazzjoni jew li jġib tmaqdir fuq Ġeħova u l-​isem tajjeb tal-​kongregazzjoni. (Flp. 2:14, 15) Is-​Sala tas-​Saltna tistaʼ tintuża għal skopijiet spiritwali oħra taħt id-​direzzjoni tal-​uffiċċju tal-​fergħa, bħall-​Iskola tal-​Ministeru tas-​Saltna u l-​Iskola tas-​Servizz taʼ Pijunier.

¹² Il-​kongregazzjoni għandha dejjem tuża l-​postijiet tal-​laqgħat tagħha b’rispett. L-​ilbies, il-​maxta tax-​xagħar, u l-​manjieri għandhom dejjem juru d-​dinjità assoċjata mal-​qima lil Ġeħova. (Ekk. 5:1; 1 Tim. 2:9, 10) Billi napplikaw dan il-​parir, inkunu qed nuru apprezzament għal-​laqgħat Kristjani tagħna.

¹³ Hu importanti li jinżamm l-​ordni waqt il-​laqgħat. Hu suġġerit li t-​tfal joqogħdu bilqiegħda mal-​ġenituri tagħhom. Ġenituri bi tfal żgħar jistgħu jiġu inkuraġġiti joqogħdu bilqiegħda fejn joħolqu l-​inqas distrazzjoni jekk ikun neċessarju li joħorġu lil uliedhom biex jiddixxiplinawhom jew biex jieħdu ħsieb bżonnijiet oħra.

¹⁴ Aħwa kwalifikati huma inkarigati jaqdu bħala attendants waqt laqgħat fis-​Sala tas-​Saltna. Għandhom ikunu moħħhom hemm, dħulin, u jużaw l-​għaqal. Ir-​responsabbiltajiet tagħhom jinkludu li jilqgħu lill-​ġodda u jgħinuhom iħossuhom milqugħin, jgħinu lil min jiġi tard isib post, jieħdu nota tal-​attendenza, u jagħtu l-​attenzjoni li jkun hemm bżonn għall-​ventilazzjoni u t-​temperatura tas-​sala. Meta jkun hemm bżonn, l-​attendants ifakkru lill-​ġenituri biex iżommu għajnejhom fuq uliedhom, biex dawn ma joqogħdux jiġru ’l hawn u ’l hemm qabel u wara l-​laqgħat jew jilagħbu fuq il-​platform. B’qalb tajba u tattika, attendant jistaʼ jitlob lil ġenitur taʼ tifel jew tifla li ma tkunx qed tobdi biex joħroġha, u b’hekk l-​udjenza ma tiġix distratta żżejjed. Ix-​xogħol tal-​attendants jgħin ħafna biex kulħadd igawdi l-​laqgħat. Preferibbilment, jintużaw l-​anzjani u l-​qaddejja ministerjali bħala attendants.

IL-​BINI TAʼ SWALI TAS-​SALTNA

¹⁵ Fl-​ewwel seklu, xi Kristjani kellhom iktar materjalment minn oħrajn, għalhekk l-​appostlu Pawlu kiteb: “Biex kulħadd ikun indaqs, bħalissa ż-​żejjed tagħkom jagħmel tajjeb għan-​nieqes tagħhom, sabiex iż-​żejjed tagħhom għad ukoll jagħmel tajjeb għan-​nieqes tagħkom, u b’hekk kulħadd ikun indaqs.” (2 Kor. 8:14) Illum, qed isir mezz biex “kulħadd ikun indaqs” ukoll. Fondi li jikkontribwixxu kongregazzjonijiet madwar id-​dinja jinġabru flimkien biex tiġi provduta għajnuna finanzjarja għall-​bini u l-​manutenzjoni tas-​Swali tas-​Saltna. L-​appoġġ ġeneruż tal-​fratellanza madwar id-​dinja huwa apprezzat bil-​kbir mill-​organizzazzjoni u mill-​kongregazzjonijiet li jibbenefikaw minn dawn il-​kontribuzzjonijiet.

¹⁶ Il-​kumitat tal-​fergħa jassenja kongregazzjonijiet fi Swali tas-​Saltna speċifiċi skont pjan magħmul għal dawk l-​inħawi. L-​uffiċċju tal-​fergħa jiddetermina wkoll meta u fejn jinbnew Swali tas-​Saltna ġodda u meta għandhom jiġu rinnovati Swali tas-​Saltna eżistenti fit-​territorju tal-​fergħa. Meta jseħħu d-​diżastri, isiru arranġamenti għal tiswijiet meħtieġa tas-​Swali tas-​Saltna li tkun ġratilhom il-​ħsara u, kultant, tad-​djar tal-​aħwa.

¹⁷ L-​uffiċċju tal-​fergħa jikkoordina l-​użu tal-​volontieri biex jgħinu fix-​xiri taʼ proprjetà, disinn tas-​Swali tas-​Saltna, permessi għall-​bini, kostruzzjoni, u manutenzjoni. Minħabba l-​bżonn kbir għal Swali tas-​Saltna fil-​biċċa l-​kbira tal-​pajjiżi, hemm bżonn taʼ ħafna volontieri. Il-​pubblikaturi mgħammdin kollha li jikkwalifikaw u jixtiequ jgħinu huma mħeġġin jimlew applikazzjoni u jagħtuha lill-​Kumitat tas-​Servizz tal-​Kongregazzjoni lokali tagħhom. Anki pubblikaturi mhux mgħammdin jistgħu jgħinu fil-​bini jew rinnovazzjoni tas-​Sala tas-​Saltna tagħhom stess.

SWALI TAL-​ASSEMBLEA

¹⁸ Il-​Kristjani tal-​bidu kienu ġeneralment jiltaqgħu fi gruppi żgħar. Madankollu, kultant kienet tiltaqaʼ “folla ġmielha.” (Atti 11:26) Bl-​istess mod, il-​poplu taʼ Ġeħova llum jiltaqaʼ f’laqgħat kbar għall-​assembleat u l-​konvenzjonijiet. Ħafna drabi jinkrew faċilitajiet lokali għal dan l-​għan, imma meta dawn ma jkunux adattati jew disponibbli, jistaʼ jinxtara post għall-​qima li jissejjaħ Sala tal-​Assemblea.

¹⁹ Xi drabi, jinxtara bini, jiġi rinnovat, u jintuża bħala Sala tal-​Assemblea. Madankollu, iktar spiss tinxtara l-​proprjetà u tinbena sala ġdida. Is-​Swali tal-​Assemblea jvarjaw fid-​daqs, skont il-​bżonnijiet lokali. L-​uffiċċju tal-​fergħa jieħu d-​deċiżjoni biex jinxtara jew jinbena bini bħal dan biss wara li jkun analizza tajjeb l-​ispejjeż involuti u ddetermina kemm ikun se jintuża.

²⁰ L-​uffiċċju tal-​fergħa jaħtar aħwa rġiel biex jieħdu ħsieb il-​funzjoni u l-​manutenzjoni tas-​Sala tal-​Assemblea. Isiru arranġamenti biex is-​circuits jagħmlu t-​tindif regolari, it-​tindif taʼ kull sitt xhur, u l-​manutenzjoni preventiva. Ikun taʼ benefiċċju li aħwa volontieri jagħmlu dan ix-​xogħol. Għalhekk, il-​kongregazzjonijiet huma inkuraġġiti jappoġġaw dawn l-​arranġamenti b’qalbhom kollha.—Salm 110:3; Mal. 1:10.

²¹ Kultant, is-​Sala tal-​Assemblea tistaʼ tintuża wkoll għal funzjonijiet teokratiċi oħra, bħal skejjel tal-​Bibbja u laqgħat speċjali għall-​indokraturi li jivvjaġġaw. Bħas-​Swali tas-​Saltna, Sala tal-​Assemblea hija post dedikat għall-​qima. Meta niltaqgħu f’Sala tal-​Assemblea, l-​imġiba, l-​ilbies, u l-​maxta tax-​xagħar tagħna għandhom ikunu dinjitużi daqs kemm ikunu meta niltaqgħu għall-​qima fis-​Sala tas-​Saltna.

²² Ħafna wħud ġodda qed isiru parti mill-​organizzazzjoni t’Alla bil-​ħeffa matul il-​parti finali taʼ dawn l-​aħħar jiem. Din hi evidenza tal-​barka taʼ Ġeħova. (Is. 60:8, 10, 11, 22) B’hekk, għandna nappoġġaw l-​arranġamenti biex jinkisbu postijiet għall-​qima nodfa u komdi u li ssir manutenzjoni fuqhom. Meta nagħmlu hekk, nuru l-​apprezzament tagħna għall-​irwol li għandhom faċilitajiet bħal dawn biex jgħinuna ninkuraġġixxu wieħed lill-​ieħor iktar u iktar hekk kif naraw joqrob il-​jum taʼ Ġeħova.